Yezu Atsidzikizwa Tani?

MIDZIDZI inango Yahova asacita pinthu pyakudzumatirisa toera kutsidzikiza anapiana na ale akuti nkhabe kwanisa kutsidzikizika okhene. Midzidzi inango anthu asaona pinthu pyenepi pinacita Yahova, mbwenye iwo nee asabvesesa kuti thangwi yanji pyenepi pikucitika.

Nyerezera kuti ukufamba m’munda, mbwenye waona mbalame dhuzi na iwe yakuti isaoneka ninga nee iri mwadidi. Pontho phapido yace ibodzi isakhala ninga yagwandika. Mu ndzidzi unaifendezera iwe dhuzi iyo isapitiriza kuthawa. Mwakucimbiza iyo isatoma kumburuka. Mwandimomwene iyo nee ikhadaphekekadi! Usadziwa thangwi yanji ikhacita pyenepi?—

Iyo ikhacita pyenepi, thangwi anace akhali ntsanga dhuzi na penepo, iyo ikhagopa kuti unaona anace mbuaphekesa. Na thangwi ineyi, iyo yasangizira kuti yaphekeka toera iwe ubuluke penepo. Usadziwa kuti mbani anatitsidzikiza ninga pinacita mbalame kuna anace?— M’Bhibhlya, Yahova asalandaniswa na mbalame inacemerwa capungu yakuti isatsidzikiza anace.—Dheuteronomyo 32:11, 12.

Yezu ndi Mwana wakufunika kakamwe wa Yahova. Pikhali Yezu kudzulu, iye akhali munthu wauzimu na wamphambvu ninga Babace. Pontho mbadakwanisa kutsalakanika ekhene. Mbwenye pidabalwa iye pa dziko yapantsi na manungo aunyama, iye nee akhakwanisa kutsidzikizika ekhene, pontho akhafunika kuphedzwa.

Toera kucita pikhafuna Mulungu pa dziko yapantsi, Yezu akhafunika kukula mbakhala wakusowa madawo. Sathani ayesera toera kupha Yezu pikhali iye wang’ono. Mphangwa zinalonga thangwi ya kuyesera kudacita Sathani toera kupha Yezu pikhali iye mwana na pinthu pidacita Yahova toera kuntsidzikiza ndi zakudzumatirisa. Usafuna kuzidziwa?—

Pidapita ndzidzi ungasi pidamala kubalwa Yezu, Sathani acitisa kuti kudzulu kuoneke nyenyezi. Natenepa anyakudziwisa pya nyenyezi aitowera mpaka ku Yerusalemu nsindzo wakulapha kakamwe. Kweneko abvundza amuna anango akuti akhadziwa mwadidi pikhalonga Bhibhlya kuti: ‘Mambo wa Ayuda anabalwa kupi?’ Amuna anewa atawira: “Ku Bhetelehemu.”—Mateu 2:1-6.

Herodhi wakuti akhali mambo wakuipa wa mu Yerusalemu, pidadziwa iye kuti abalwa mambo unango mu nzinda wa Bhetelehemu wakuti ukhali dhuzi na Yerusalemu, iye apanga anyakudziwisa pya nyenyezi kuti: ‘Ndokoni, nsakeni mwadidi mwana mungan’gumana bwerani mudzandipange kuna iye.’ Usadziwa thangwi yanji Herodhi akhafuna kudziwa kukhali Yezu?— Thangwi iye akhali na bibvu na Yezu, pontho akhafuna kumupha!

Mphapo Mulungu atsidzikiza tani Mwanace?— Anyakudziwisa pya nyenyezi pidagumana iwo Yezu, ampasa miyoni. Buluka penepo, Mulungu aapanga mu ndoto toera akhonde bwerera kuna Herodhi. Natenepa iwo abwerera m’mamidzi mwawo na njira inango mbakhonda kupita na ku Yerusalemu. Pidadzindikira Herodhi kuti anyakudziwisa pya nyenyezi aenda mbakhonda kubwerera kuna iye, aipirwa kakamwe. Toera kupha Yezu, Herodhi akhazikisa ntemo wakuti ana a amuna onsene mu Bhetelehemu kutomera pyaka piwiri kuenda pantsi akhafunika kuphiwa. Mbwenye mu ndzidzi unoyu Yezu nee akhalibve kweneko.

Usadziwa kuti Yezu apulumuka tani?— Anyakudziwisa pya nyenyezi pidamala iwo kuenda, Yahova apanga Zuze mamunace Mariya, toera iye na banjace athawire ku Ejitu. Na thangwi ineyi, Herodhi nee akwanisa kupha Yezu. Zuze na Mariya pidabwerera iwo na Yezu buluka ku Ejitu, Mulungu acenjeza pontho Zuze. Ampanga mu ndoto toera aende ku Nazareti, kweneko Yezu mbadakhala wakutsidzikizika.—Mateu 2:7-23.

Waona kuti Yahova atsidzikiza tani Mwanace?— Mbani lero analandaniswa ninga ana a mbalame zinabisala ntsanga peno ninga Yezu pikhali iye mwana? Iwe usalandaniswa na ana a mbalame anewa, pontho usalandaniswa na Yezu pikhali iye mwana. Thangwi pali na anthu anango akuti asafuna kukucita pinthu pyakuipa. Usadziwa kuti anthu anewa mbani?—

Bhibhlya isalonga kuti Sathani ndi ninga nkhalamu yakulira inasaka munthu toera kumudya. Ninga nkhalamu yakuti kazinji kene isasaka pinyama ping’ono toera kupidya, Sathani na madimonyo ace asafunambo kuthabusa anapiana. (1 Pedhru 5:8) Mbwenye Yahova ndi wamphambvu kakamwe kupiringana Sathani. Iye anakwanisa kutsidzikiza anapiana anantumikira mbamalisa nyatwa zonsene zinacitisa Sathani.

Usakumbuka kuti mu Nsolo 10 wa bukhu ino tapfundza pinthu pinafuna Sathani na madimonyo ace toera ife tipicite?— Iwo asafuna kuti tipite m’mabonde munjira yakuti Mulungu nee asakomerwa nayo. Mbani adathema kupita m’mabonde?— Ndimomwene, basi ene ndi mamuna na nkazi akumanga banja.

Mbwenye mwakutsukwalisa, akulu anango asakomerwa kupita m’mabonde na anang’ono. Na thangwi ineyi, aphale na atsikana azinji asatomambo kucita pinthu pyakuipa thangwi yakuona pinthu pyakuipa pinacita anthu anewa. Pontho iwo asaphatisirambo kumaso munjira yakuipa. Kale pyenepi pyacitikambo mu nzinda wa Sodhoma. Bhibhlya isalonga kuti anthu a kweneko, “kutomera aphale mpaka akulu,” akhafuna kupita m’mabonde na amuna adaenda kaona Loti panyumba pace.—Genesi 19:4, 5.

Natenepa, ninga Yezu wakuti akhafunika kutsidzikizwa, iwe usafunikambo kutsidzikizwa kuna anthu akulu—na anang’ono ene—akuti panango anayesera kupita m’mabonde na iwe. Kazinji kene anthu anewa asakhala ninga axamwali ako. Panango iwo anakupasa muoni ungaapanga kuti nee unalonga pinthu pyakuipa pinafuna iwo kucita kuna iwe. Mbwenye anthu anewa ndi akuipa ninga Sathani na madimonyo ace akuti asanyerezera pinakomerwa na iwo basi. Pontho anthu anewa asapita m’mabonde na anapiana toera kutsandzaya. Mbwenye pyenepi ndi pyakuipa kakamwe!

Iwo asacitanji toera akhale akutsandzaya?— Panango iwo anafuna kusendzeka na kumaso kwako. Peno anafuna kuti kumaso kwako na kwawo kukhuyane. Mbwenye leka kutawirisa munthu toera acite pyenepi na iwe. Maseze akhale m’bale wako wa mamuna, wa nkazi, mai wako peno pai wako. Thangwi makhundu anewa a manungo ndi acibisobiso.

Usafunika kucitanji toera utsidzikizike kuna anthu anewa anacita pinthu pyenepi pyakuipa?— Cakutoma leka kutawirisa munthu unango asendzeke na kumaso kwako. Munthu anayesera kucita pyenepi, mpange mwacipapo na mwakugaluza kuti: “Leka kucita pyenepi, ndinaenda kakulongera!” Pontho iye angalonga kuti pyenepi pyacitika thangwi yako, leka kutawira pyenepi. Unoyu ndi uthambi. Mwakukhonda tsalakana kuti munthu unoyu mbani, ndoko kamulongere! Maseze iye alonge kuti pinacita imwe anthu anango nee anapidziwa, ndoko kalonge. Ngakhale munthu unoyu akupange kuti anakupasa miyoni yadidi peno akuthuse, thawa, pontho ndoko kamulongere.

Nee usafunika kugopa, mbwenye usafunika kucita mphole-mphole. Anyakubalako angakupanga kuti anthu anango ndi akugopswa peno mbuto zinango ndi zakugopswa, abvere. Ungacita pyenepi, pinakhala pyakunentsa kuti anthu akuipa akuthabuse.