Mbani Anafuna Kutibalangaza?

MIDZIDZI inango usatsukwala peno usaona ninga uli wekha?— Wabvundzika kale kuti alipo anandifuna?— Pyenepi pisacitikambo kuna anapiana anango. Mbwenye Mulungu apikira: “Ine cipo ndinakuduwala.” (Izaiya 49:15) Nee ndi pyakutsandzayisa kudziwa pyenepi?— Inde, Yahova Mulungu asatifuna kakamwe!

Mamuna unango adalemba Bhibhlya alonga tenepa: “Maseze pai wanga na mai wanga andisiye, Yahova anadzanditsalakana.” (Masalmo 27:10) Mwandimomwene kudziwa pyenepi pisatibalangaza kakamwe. Ndi thangwi yace, Yahova alonga: “Leka kugopa, thangwi ine ndiri na iwe. . . . Inde, ndinadzakuphedza.”—Izaiya 41:10.

Mbwenye midzidzi inango Yahova asatawirisa kuti Sathani atithabuse. Pontho asatawirisambo Sathani kuti ayesere atumiki Ace. Ntsiku inango Sathani athabusa kakamwe Yezu mpaka Yezu kulonga kuna Yahova: “Mulungu wanga, Mulungu wanga, thangwi yanji mwandisiya.” (Mateu 27:46) Maseze Yezu akhathabuka, mbwenye iye akhadziwa kuti Yahova asanfuna. (Juwau 10:17) Pontho Yezu akhadziwa kuti Mulungu asatawirisa Sathani kuyesera atumiki Ace na kuathabusa. Mu nsolo unango tinadzapfundza mathangwi anacitisa Mulungu kutawirisa pyenepi.

Tingakhala anapiana midzidzi inango tisagopa kakamwe. Kodi iwe watayika kale ntsiku inango?— Wagopa?— Ana azinji asagopambo. Ntsiku inango Mpfundzisi Wankulu alonga pinthu pidacitika thangwi yakutayika. Mwandimomwene akhadatayika nee akhali mwana. Mbwenye ikhali bira.

Iwe ndiwe ninga bira. Thangwi yanji tisalonga tenepo? Thangwi mabira nee ndi pinyama pikulu kakamwe, pontho nee piri na mphambvu maka. Iwo asafunika kutsalakanwa mwadidi na kutsidzikizwa. Munthu anatsalakana mabira asacemerwa nkumbizi.

Yezu alonga pya nkumbizi m’bodzi wakuti akhali na mabira 100. Mbwenye bira ibodzi yataika. Panango thangwi ikhafuna kuenda kaona kukhundu inango ya phiri. Mwakukhonda dzindikira, iyo yaenda kutali. Nyerezera basi kutsukwala kudakhala na bira ineyi pidadzindikira iyo kuti iri yokhene.

Mphapo nkumbizi anacitanji angadzindikira kuti bira ibodzi yataika? Kodi iye anakhonda kuisaka mbanyerezera kuti yataika yokhene? Peno anasiya mabira anango 99 pa mbuto yakutsidzikizika mbaenda kasaka bira idatayika? Kodi iye akhafunikadi kuwangisira toera kusaka bira ibodzi basi?— Mbidakhala kuti bira ineyi idatayika ndiwe mbudafuna kuti nkumbizi akusake?—

Nkumbizi akhafuna mabira ace onsene kuphatanizambo ineyi idatayika. Na thangwi ineyi aenda kaisaka. Mwandimomwene, bira ineyi yatsandzaya kakamwe pidaona iyo nkumbizi mbakabwera! Pontho Yezu alongambo kuti nkumbizi atsandzaya kakamwe pidagumana iye bira yace yakuti ikhadatayika. Iye akomerwa kakamwe na bira ineyi kupiringana mabira ace 99 adakhonda kutaika. Mbani adalandana na nkumbizi unoyu adalonga Yezu? Mbani anatitsalakana mwadidi ninga nkumbizi unoyu wa mabira?— Yezu alonga kuti ndi Babace wakudzulu, Yahova.

Yahova ndi Nkumbizi Wankulu kakamwe kuna atumiki ace. Iye asafuna atumiki ace onsene kuphatanizambo anang’ono ninga iwe. Iye nee asafuna kuti tithabuke peno tifudzwe. Ndi pyakutsandzayisa kakamwe kudziwa kuti Mulungu asatitsalakana!—Mateu 18:12-14.

Kodi iwe usakhulupira kuti Yahova alipodi?— Usaona kuti iye ndi wandimomwene?— Mwandimomwene ife nee tisakwanisa kuona Yahova. Thangwi iye ndi nzimu. Mbwenye iye alipodi, pontho asakwanisa kutiona. Iye asadziwa tingafuna ciphedzo. Pontho ife tinakwanisa kulonga naye ninga pinacita ife na anthu anango kubulukira m’phembero. Yahova asafuna kuti tilonge naye.

Usafunika kucitanji ungakhala wakutsukwala peno ungaona kuti uli wekhene?— Usafunika kulonga na Yahova. Mpange pinakunentsa, iye anakubalangaza, pontho anakuphedza. Kumbuka kuti Yahova asakufuna kakamwe, maseze uone kuti uli wekha. Tende tione pinalonga Bhibhlya pa Masalmo 23. Tinatoma na vesi 1, isalonga: “Yahova ndi Nkumbizi wanga. Nee ndinasowa cinthu. Iye asandiendesa ku mbuto yakuti iri na thongwe yadidi; asanditsogolera toera kuenda kapuma ku mbuto yakuti iri na madzi.”

Ona basi mafala adalembwa pa vesi 4: “Maseze ndifambe nʼgowa ya cidima cikulu, nee ndinagopa cinthu, thangwi imwe muli na ine; mpswimbo yanu na ndodo yanu pisanditsidzikiza.” Ale analambira Yahova asapibvambo munjira ibodzi ene, pontho angatamba nyatwa asabalangazwa. Iwe usakhalambo na mabvero anewa?—

Ninga nkumbizi waufuni wakuti asatsalakana mabira ace, Yahova asatsalakanambo mbumba yace. Yahova asapanga mbumba yace pinthu pinafunika iwo kucita, pontho iwo asabvera mwakutsandzaya. Iwo nee asafunika kugopa maseze atambe nyatwa. Nkumbizi asaphatisira ndodo na mpswimbo toera kutsidzikiza mabira ace gopa anadyiwa na pinyama pyakugopswa. Bhibhlya isalonga kuti m’phale Dhavidhi wakuti akhali nkumbizi, atsidzikiza mabira ace mu ndzidzi ukhafuna iwo kudyiwa na nkhalamu, pontho na ursu. (1 Samweli 17:34-36) Mbumba ya Mulungu isadziwa kuti Yahova anaatsidzikizambo. Iwo asaona kuti ali akutsidzikizika thangwi Mulungu ali na iwo.

Yahova asafuna mabira ace, pontho asaatsalakana mwadidi. Bhibhlya isalonga: “Iye anadzatsalakana nkumbi wace ninga pinacita nkumbizi. Iye anadzagumanyiza anamabira na manja ace.”—Izaiya 40:11.

Nee ndi pyakutsandzayisa kudziwa kuti Yahova ndi nkumbizi wadidi?— Iwe usafunambo kukhala bira yace?— Mabira asadziwa fala ya nkumbizi wawo, pontho asantowera. Kodi iwe usabvera Yahova?— Usawangisira toera kukhala dhuzi na iye?— Natenepa nee usafunika kugopa. Thangwi Yahova anakuphedza.