Tinacitanji Toera Kukunda Kugopa?

USAONA kuti ndi pyakukhonda nentsa kutumikira Yahova?— Mpfundzisi Wankulu alonga kuti kucita pyenepi ndi pyakunentsa. Namasiku Yezu mbadzati kuphiwa, iye apanga apostolo ace: “Khala dziko isakuidani, imwe musadziwa kuti iyo yaida ine mbidzati kuida imwe.”—Juwau 15:18.

Pedhru adumbira kuti cipo mbadakhonda Yezu, mbwenye Yezu alonga kuti namasiku anewa Pedhru mbadankhonda katatu, mbalonga kuti nkhabe kun’dziwa. Ndi pyenepi pidacita Pedhru, iye akhonda Yezu. (Mateu 26:31-35, 69-75) Pyenepi pyacitika tani?— Pyenepi pyacitika thangwi Pedhru na apostolo anango agopa.

Thangwi yanji apostolo akhagopa?— Thangwi iwo asiya kucita cinthu cakufunika kakamwe. Kudziwa cinthu ceneci kunatiphedza toera kutumikira Yahova mwakukhonda tsalakana pinafuna kulonga anthu na pinafuna kucita iwo. Pakutoma tisafunika kukumbuka pinthu pidacitikira Yezu na apostolo ace pa ntsiku yakumalisa namasiku.

Pakutoma Yezu na apostolo ace acita Paskwa. Pyaka pyonsene ndzidzi unoyu wa Paswa ungafika mbumba ya Mulungu ikhakumbuka pidacitirwa iwo toera kubuluswa mu ubitcu ku Ejitu. Buluka penepo Yezu atomesa cakudya cinango cakupambulika. Mu nsolo unango kutsogolo tinapfundza pizinji thangwi ya cakudya ceneci, pontho tinaona kuti cinatiphedza tani toera kukumbukira Yezu. Pidamala iwo kudya cakudya ceneci na kubalangaza apostolo ace, Yezu aenda nawo ku munda wa Getsemani. Kazinji kene akhaenda ku mbuto ineyi thangwi akhakomerwa nayo kakamwe.

Pidafika iwo kweneko, Yezu aenda pace ekha toera kucita phembero. Iye apangambo Pedhru, Tiyago na Juwau toera acite phembero. Mbwenye iwo agona pyawo. Yezu aenda pace ekha maulendo matatu toera kucita phembero, pontho m’maulendo anewa onsene akhagumana Pedhru na andzace mbakagona! (Mateu 26:36-47) Usadziwa thangwi yanji Yezu apanga anyakupfundzace toera apitirize kukhala akuyang’anira, pontho mbacita phembero?— Tende tione.

Yuda Iskariyoti akhalimbo pa Paskwa pabodzi na Yezu na apostolo anango namaulo. Ninga usadziwa, Yuda adzakhala mbava. Buluka penepo, asandukira Yezu. Yuda akhadziwa mbuto ikhagumanyikana Yezu na apostolo ace kazinji kene m’munda wa Getsemani. Natenepa Yuda aenda kapangiza anyankhondo akhafuna kumanga Yezu mbuto ineyi. Pidafika iwo kweneko Yezu aabvundza: “Mbani anasaka imwe?”

Anyankhondo atawira: “Yezu.” Mwakukhonda gopa Yezu aatawira: “Ndine pano.” Anyankhondo adzumatirwa kakamwe na njira idatawira Yezu mwacipapo, pontho abwerera nduli mbagwa pantsi. Buluka penepo Yezu aapanga: ‘Khala mukusaka ine, apostolo anga asiyeni aende pyawo.’—Juwau 18:1-9.

Pidaphatwa Yezu na anyankhondo mbamangwa, apostolo agopa mbathawa. Pedhru na Juwau akhafuna kudziwa pikhafuna kucitikira Yezu, na thangwi ineyi antowera nakutali. Buluka penepo, anyankhondo akwata Yezu mbaenda naye kunyumba kwa Kaifa nkulu wa anyantsembe. Nakuti Juwau akhadziwika na nkulu wa anyantsembe, nkazi akhaonera pansuwo wa mpanda atawirisa kuti Juwau na Pedhru apite nkati.

Anyantsembe agumanyikana kunyumba kwa Kaifa toera kutonga Yezu. Iwo akhafuna kuti Yezu aphiwe. Iwo abweresa anthu akuti alonga uthambi thangwi ya Yezu. Buluka penepo, anthu anewa am’menya na maxoko, anango am’menya mbama. Pedhru akhaona mu ndzidzi ukhacitika pyenepi.

Nyabasa wankazi akhaonera pa nsuwo wa mpanda pidaona iye Pedhru na Juwau mbapita, ayang’ana Pedhru mbalonga. “Iwembo ukhali pabodzi na Yezu.” Pedhru akhonda mbalonga kuti nkhabe kundziwa Yezu. Pidapita ndzidzi ungasi nkazi unango adzindikira pontho Pedhru mbalonga kuna anthu onsene akhali penepo: “Mamuna uyu akhali pabodzi na Yezu.” Pedhru akhonda pontho mbalonga kuti nkhabe kundziwa Yezu. Pakupita pontho ndzidzi ungasi, anthu akhali penepo aona Pedhru mbalonga: “Mwandimomwene ndiwe mʼbodzi wawo.” Pedhru akhonda pontho kacitatu mbalonga: “Ine nkhabe kundziwa munthu unoyu!” Pedhru adumbira mbalonga kuti akhalonga undimomwene, penepo pene Yezu ayang’ana Pedhru.—Mateu 26:57-75; Luka 22:54-62; Juwau 18:15-27.

Usadziwa thangwi yanji Pedhru alonga uthambi?— Inde, thangwi iye akhagopa. Mphapo thangwi yanji Pedhru akhagopa? Iye akhafunika kucitanji toera kuthimizira cipapo cace? Nyerezera basi. Yezu acitanji toera apitirize kukhala na cipapo?— Iye acita phembero kuna Mulungu, pontho Mulungu amphedza toera akhale na cipapo. Pontho kumbuka kuti Yezu apanga Pedhru m’maulendo matatu kuti acite phembero mbakhala m’maso na wakuyang’anira. Mphapo ninji pidacitika?—

M’maulendo anewa onsene, Pedhru akhagona. Iye nee akhacita phembero, pontho nee akhali wakuyang’anira. Na thangwi ineyi, pidamangwa Yezu, Pedhru adzudzumika. Mu ndzidzi ukhatongwa Yezu, Pedhru agopa kakamwe pidaona iye anthu mbakamenya Yezu, na kubverana toera kumupha. Pyenepi mbapidzati kucitika, Yezu akhadalonganji kuna apostolo ace?— Yezu alonga kuti, ninga mukhaidiwa iye na dziko, iwo mbadaidiwambo.

Cincino tende tione pinthu pingasi pyakuti panango pinacitikambo kuna ife ninga pidacitikira Pedhru. Nyerezera kuti iwe uli kuxikola, pontho andzako asatoma longa mwakuipa ale akuti nee asalambira bandera peno ale akuti nee asacita maphwando a Natali. Unacitanji munthu angakubvundza tenepa: “Ndimomwene kuti iwe nkhabe kulambira bandera?” Panango anango anakupanga: “Ife tabva kuti iwe nee usacita phwando ya Natali!” Mbudagopa kulonga undimomwene?— Peno mbudalonga uthambi ninga Pedhru?—

Pedhru atsukwala kakamwe pidamala iye kukhonda Yezu. Pidadzindikira iye pyenepi, Pedhru abuluka kunja mbalira. Mukupita kwa ndzidzi, iye atoma pontho kutowera Yezu. (Luka 22:32) Nyerezera basi. Ninji pinafuna kutiphedza toera tikhonde gopa kakamwe, mbatikhonda kucita pinthu ninga pidacita Pedhru?— Kumbuka kuti Pedhru nee acita phembero, pontho nee apitiriza kukhala maso toera kuyang’anira. Mphapo tisafunika kucitanji toera tikhale atowereri a Mpfundzisi Wankulu?—

Mwandimomwene tisafunika kucita phembero kuna Yahova, mbatiphemba ciphedzo cace. Yezu pidacita iye phembero, usadziwa kuti Mulungu acitanji?— Atumiza anju toera kumuwangisa. (Luka 22:43) Aanju anakwanisa kutiphedzambo?— Bhibhlya isalonga: “Anju wa Yahova asatsidzikiza anthu onsene ananʼgopa, pontho iye asaapulumusa.” (Masalmo 34:7) Mbwenye toera tiphedzwe na Mulungu nee tisafunika kucita phembero basi, tisafunikambo kucita pinthu pinango. Ndi pinthu pipi?— Yezu apanga atowereri ace toera akhale m’maso na akuyang’anira. Ninji pinafuna kutiphedza toera kucita pyenepi?—

Tisafunika kubvesera mwadidi pinalongwa pa misonkhano na pinaleri ife m’Bhibhlya. Ndzidzi onsene tisafunikambo kucita phembero kuna Yahova na kuphemba ciphedzo cace toera tintumikire. Tingacita pyenepi iye anatiphedza toera tikhonde gopa. Pontho tinakhala akutsandzaya kakamwe tingalonga na anango thangwi ya Mpfundzisi Wankulu na Pai wace.