Thangwi Yanji Ndi Pyakunentsa Kucita Pyadidi?

MU NDZIDZI ukhacita Saulo pinthu pyakuipa, mbani akhakomerwa?— Ndi Sathani Dyabo. Pontho atsogoleri auphemberi Waciyuda akhakomerwambo. Mbwenye pidakhala Saulo nyakupfundza wa Mpfundzisi Wankulu mbadziwika na dzina ya Paulu, atsogoleri anewa auphemberi atoma kumuida. Wabvesesa kuti thangwi yanji ndi pyakunentsa kuna nyakupfundza wa Yezu kucita pinthu pyadidi?—

Ntsiku inango nyantsembe wankulu akhacemerwa Ananiya atuma amuna toera aende kamenya Paulu kunkhope. Ananiya ayeserambo kuendesa Paulu nkaidi. Paulu athabuka kakamwe pidakhala iye nyakupfundza wa Yezu. Mwacitsandzo, anthu akuipa amenya Paulu, pontho akhafuna kumupha na miyala mikulu.—Mabasa 23:1, 2; 2 Akorinto 11:24, 25.

Anthu azinji panango anatikakamiza toera ticite pinthu pinatsukwalisa Mulungu. Mbwenye mbvundzo ndi uyu: Iwe usafunadi kucita pinthu pyadidi? Usafunadi kakamwe kucita pinthu pyadidi maseze anthu anango akuide thangwi ya pyenepi? Mwandimomwene, tisafunika kukhala na cipapo toera kucita pyenepi.

Panango unabvundzika: ‘Thangwi yanji anthu anatiida tingacita pinthu pyadidi? Iwo nee akhafunika kukomerwa na pyenepi?’ Ndimomwene. Kazinji kene anthu akhafuna Yezu thangwi ya pinthu pyadidi pikhacita iye. Ntsiku inango anthu onsene a nzinda ubodzi agumanyikana pansuwo wa nyumba ikhali Yezu. Iwo aenda kweneko thangwi Yezu akhawangisa anthu akhaduwala.—Marko 1:33.

Mbwenye midzidzi inango anthu nee akhakomerwa na pikhapfundzisa Yezu. Maseze ndzidzi onsene iye akhapfundzisa pinthu pyadidi, mbwenye anthu anango akhamuida thangwi iye akhalonga undimomwene. Ndi pyenepi pidacitika ntsiku inango ku Nazareti, nzinda udakula Yezu. Iye aenda ku sinagoga, mbuto ikhasonkhana Ayuda toera kulambira Mulungu.

Kweneko, Yezu acita nkhani yadidi mbakaphatisira Malemba. Pakutoma anthu akhakomerwa na nkhani ineyi. Iwo adzumatirwa na mafala adidi akhaphatisira iye. Iwo nee akhakhulupira kuti m’phale unoyu ndi ule adaona iwo mbakakula mucisa cawo.

Buluka penepo, Yezu atoma kulonga mphangwa zinango. Iye apanga anthu pya midzidzi idapangiza Mulungu kukoma ntima kuna anthu akuti nee akhali Ayuda. Pidamala Yezu kulonga pyenepi, anthu akhali mu sinagoga aipirwa kakamwe. Usadziwa thangwi yanji?— Thangwi iwo akhanyerezera kuti ndiwo basi akhali akutawirika kuna Mulungu, pontho akhanyerezera kuti ndi akufunika kakamwe kupiringana anango. Na thangwi ineyi, iwo atoma kuida Yezu thangwi ya pinthu pidalonga iye. Usadziwa kuti acitanji?—

Bhibhlya isalonga: ‘Iwo aphata Yezu mbabuluka naye kunja kwa nzinda. Iwo aenda naye padzulu paphiri, pontho akhafuna kumponya pantsi toera Yezu afe! Mbwenye Yezu athawa.’—Luka 4:16-30.

Khala pyenepi pyacitikambo kuna iwe, mbudabwerera pontho kalonga na anthu anewa thangwi ya Mulungu?— Mwandimomwene tisafunika kukhala na cipapo toera kucita pyenepi. Pidapita caka cibodzi, Yezu abwerera pontho ku Nazareti. Bhibhlya isalonga: “Yezu atoma kupfundzisa anthu mu sinagoga yawo.” Yezu nee asiya kulonga undimomwene thangwi yakugopa anthu akuti nee akhafuna Mulungu.—Mateu 13:54.

Ntsiku inango yakuti ikhali sabudu, Yezu aona mamuna m’bodzi wakulamala djanja. Yezu akhadapaswa mphambvu na Mulungu toera kuwangisa mamuna unoyu. Mbwenye amuna anango akuti akhali dhuzi ayesera kunkhondesa. Mphapo Mpfundzisi Wankulu acitanji?— Pakutoma iye abvundza: ‘Bira yanu ingagwera n’djenje ntsiku ya Sabudu, nee munaibulusa?’

Mwandimomwene mbadaibulusa, maseze ikhale Sabudu ntsiku ikhafunika iwo kupuma. Natenepa Yezu alonga: ‘Ndi pyadidi kakamwe kuphedza munthu pa ntsiku ya Sabudu thangwi munthu ndi wakufunika kakamwe kupiringana bira!’ Pyenepi pisapangiza kuti nee pikhali pyakuipa kuna Yezu kuwangisa mamuna unoyu!

Yezu apanga mamuna unoyu toera afuthule djanja yace. Iye awangiswa mu ndzidzi unoyu, pontho atsandzaya kakamwe. Ndiye tanimbo anthu anango? Kodi iwo atsandzayambo?— Nkhabe. M’mbuto mwace, iwo aida kakamwe Yezu, mbaenda kabverana kuti anamupha tani!—Mateu 12:9-14.

Lero pisacitikambo pibodzi pyene. Mwakukhonda tsalakana pinacita ife, nee tinakwanisa kukomeresa anthu onsene. Na thangwi ineyi, tisafunika kusankhula kuti mbani anafuna ife kukomeresa. Khala tisafuna kukomeresa Yahova Mulungu pabodzi na Mwanace Yezu Kristu, ndzidzi onsene tisafunika kucita pinthu pinatipfundzisa iwo. Tingacita pyenepi mbani anafuna kutiida? Mbani anafuna kutipingiza toera ticimwane kucita pinthu pyadidi?—

Ndi Sathani Dyabo. Na ani pontho?— Na ale adanyengezwa na Dyabo mbakhulupira pinthu pyakuipa. Yezu apanga atsogoleri a mauphemberi a mu ndzidzi wace kuti: “Imwe ndimwe ana a babanu Dyabo, pontho musafuna kucita pinafuna babanu.”—Juwau 8:44.

Pidalonga iye thangwi ya anthu akuti asafuniwa na Dyabo, Yezu aphatisira fala yakuti “dziko.” Dziko ineyi idalonga Yezu ndi ipi? Toera kubvesesa pyenepi tende tione lemba ya Juwau kapitulu 15, vesi 19. Pa vesi ineyi tisagumana mafala awa a Yezu: “Mbamudakhala ninga anthu a dziko, anthu a dziko mbadakomerwa na imwe. Nakuti cincino nee musacitabve khundu ya dziko, mbwenye ine ndakusankhulani pakati pa anthu a dziko, na thangwi ineyi anthu a dziko asakuidani.”

Natenepa dziko yakuti isaida anyakupfundza a Yezu isaphataniza anthu onsene akuti nee ndi atowereri ace. Thangwi yanji dziko isaida anyakupfundza a Yezu?— Nyerezera basi: Mbani ntongi wa dziko ino?— Bhibhlya isalonga: “Dziko yonsene iri m’manja mwa Nyakuipa.” Nyakuipa unoyu ndi Sathani Dyabo.—1 Juwau 5:19.

Cincino Wabvesesa kuti thangwi yanji ndi pyakunentsa kakamwe kucita pinthu pyadidi?— Ndi Sathani na dziko yace anacitisa pyenepi kukhala pyakunentsa. Mbwenye pali na thangwi inango. Usakumbuka kuti ndi ipi?— Mu Nsolo 23 wa bukhu ino, tapfundza kuti tonsene tabalwa na madawo. Nee usaona kuti pinakhala pyakutsandzayisa kakamwe madawo, Dyabo na dziko yace pingafudzwa?—

Bhibhlya isalonga: “Dziko iri kupita.” Pyenepi pisabveka kuti onsene akuti nee ndi atowereri a Mpfundzisi Wankulu anadzafudzwa. Iwo nee anadzakhala na umaso kwenda na kwenda. Mphapo mbani anafuna kukhala na umaso kwenda na kwenda?— Bhibhlya isatawira: “Munthu anacita pinafuna Mulungu anapitiriza kukhala kwenda na kwenda.” (1 Juwau 2:17) Basi ene ale anacita pinthu pyadidi peno ale “anacita pinafuna Mulungu” ndiwo anafuna kukhala na umaso wakwenda na kwenda mu dziko ipswa. Maseze pikhale pyakunentsa, ife tinapitiriza kucita pinthu pyadidi. Si pyenepi tayu?—