Anthu Anacita Pyakuipa Anakwanisa Kucinja?

ANTHU onsene mbadacita pinthu pyadidi, nee mbapidakhala pyakutsandzayisa kakamwe?— Mbwenye nkhabepo munthu anakwanisa kucita pinthu pyadidi ndzidzi onsene. Usadziwa thangwi yanji midzidzi inango ife tonsene tisacita pinthu pyakuipa, maseze tifune kucita pinthu pyadidi?— Thangwi tonsene tabalwa na madawo. Mbwenye pali na anthu azinji akuti asacita pinthu pyakuipa kakamwe. Iwo asaida andzawo na kuaphekesa mwakufuna. Iwe usanyerezera kuti anthu anewa anakwanisa kucinja mbacita pinthu pyadidi?—

Ona mamuna uyu ali dhuzi na nguwo za amuna anamenya Estevau na miyala. Mucihebheri dzina yace ndi Saulo, mbwenye Muciroma ndi Paulu. Iye akomerwa kakamwe pikhaona iye Estevau wakuti akhali nyakupfundza wa Mpfundzisi Wankulu mbakaphiwa. Tende tione mathangwi adacitisa Saulo kucita pinthu pyenepi pyakuipa.

Saulo akhali mu uphemberi Waciyuda, pontho akhali m’bodzi wa Afarisi. Afarisi akhadziwa Mafala a Mulungu, mbwenye iwo akhabvera kakamwe pinthu pikhapfundzisa atsogoleri awo a mauphemberi. Ndi pyenepi pidacitisa Saulo kucita pinthu pyakuipa.

Estevau pidaikhwa iye nkaidi ku Yerusalemu, Saulo akhali kweneko. Estevau akwatwa mbaendeswa ku mbuto inatongerwa miseru peno tribunal, anyakutonga miseru anango a kweneku akhali Afarisi. Maseze iwo ampambizira pinthu pizinji pyakuipa, mbwenye iye nee agopa. Natenepa iye atoma kuapanga mwacipapo mphangwa zadidi thangwi ya Yahova na Yezu.

Mbwenye anyakutonga miseru anewa nee akomerwa na pidalonga Estevau. Iwo akhadziwa kale pinthu pizinji thangwi ya Yezu. Mwandimomwene ndiwo anewa adaphesa Yezu! Mbwenye Yahova akwata Yezu mbaenda naye kudzulu. M’mbuto mwakucinja, atsogoleri anewa apitiriza kutcinga anyakupfundza a Yezu.

Anyakutonga miseru aphata Estevau mbaenda naye kunja kwa nzinda. Kweneko iwo am’menya mbatoma kumponyera miyala. Ninga pinapangizwa pa foto, Saulo akhalimbo penepo mbakaona pyonsene pikhacitika. Iye akhanyerezera kuti nee pikhali pyakuipa kupha Estevau.

Usadziwa thangwi yanji Saulo akhanyerezera tenepo?— Thangwi iye akhali Nfarisi mu umaso wace onsene, pontho akhakhulupira kuti pinthu pikhapfundzisa Afarisi pikhali pyandimomwene. Saulo akhanyerezera kuti pikhacita amuna anewa pikhali pyadidi, ndi thangwi yace akhapicitambo.—Mabasa 7:54-60.

Saulo acitanji pidamala kuphiwa Estevau?— Iye anyerezera kupha anyakupfundza onsene a Yezu! Iye akhapita n’nyumba ibodzi na ibodzi ya anyakupfundza anewa, mbakwekweta amuna na akazi ene mbaenda kaafungira nkaidi. Na thangwi ineyi, anyakupfundza azinji athawa mu Yerusalemu, mbwenye iwo nee asiya kumwaza mphangwa thangwi ya Yezu.—Mabasa 8:1-4.

Pyenepi pyacitisa Saulo kuaida kakamwe. Iye aenda kaphemba Nyantsembe Wankulu Kaifa toera antawirise kuti aende kamange Akristu akhali ku nzinda wa Dhamasku. Saulo akhafuna kuenda kaaikhisa nkaidi ku Yerusalemu toera athabuswe. Mbwenye pikhaenda iye ku Dhamasku, n’njira mwacitika cinthu cakudzumatirisa.

Cabuluka ceza kudzulu, mbibveka fala idalonga kuti: “Saulo, Saulo, thangwi yanji usanditcinga?” Akhali Yezu akhalonga kubulukira kudzulu! Ceza ceneci cagaka kakamwe mbacicitisa Saulo kukhala boliboli, pontho amuna akhali pabodzi na iye ankwata mbaenda naye ku Dhamasku.

Pidapita ntsiku zitatu, Yezu aonekera m’masomphenya kuna nyakupfundzace akhali ku Dhamasku akhacemerwa Ananiya. Yezu apanga Ananiya toera aende kaonana na Saulo kuti amuwangise na kucedza naye. Ananiya pidapanga iye Saulo thangwi ya Yezu, Saulo atawira undimomwene unoyu. Buluka penepo, Saulo atoma pontho kuona. Iye acinja pyonsene pikhacita iye mu umaso wace mbakhala ntumiki wakukhulupirika wa Mulungu.—Mabasa 9:1-22.

Cincino wakwanisa kuona kuti thangwi yanji Saulo akhacita pinthu pyakuipa?— Thangwi iye akhadapfundziswa pinthu pyakuipa. Saulo akhacitambo pinthu pikhacita anthu akuti nee akhali akukhulupira kuna Mulungu. Pontho iye akhali mu nsoka wa anthu akuti akhalemedza kakamwe pikhapfundzisa anthu kupiringana Mafala a Mulungu. Mphapo thangwi yanji Saulo acinja mbatoma kucita pinthu pyadidi, maseze Afarisi anango akhapitiriza kucita pinthu pyakuti Mulungu nee akhakomerwa napyo?— Ndi thangwi yakuti Saulo nee akhaida undimomwene. Natenepa pidapfundziswa iye undimomwene, iye acinja mwakucimbiza.

Usadziwa kuti Saulo adzakhala ani?— Iye adzakhala m’bodzi wa anyakupfundza a Yezu, pontho akhacemerwa mpostolo Paulu. Panango usakumbuka kuti Paulu alemba mabukhu mazinji a m’Bhibhlya kupiringana anthu anango onsene.

Ninga Saulo, anthu azinji anacita pyakuipa anakwanisa kucinja. Mbwenye kucita pyenepi ndi pyakunentsa, thangwi pali na munthu anacitisa anthu kucita pinthu pyakuipa. Munthu unoyu mbani?— Yezu alonga pya munthu unoyu mu ndzidzi udaonekera iye panjira kuna Saulo wakuti akhaenda ku Dhamasku. Penepo Yezu alonga na Saulo kubulukira kudzulu kuti: ‘Ine ndiri kukutuma toera ufungule maso a anthu, uabuluse ncidima toera aende mu ceza, pontho uabuluse mʼmanja mwa Sathani adze kuna Mulungu.’—Mabasa 26:17, 18.

Ndimodi, ndi Sathani Dyabo anacitisa anthu kucita pinthu pyakuipa. Kuna iwe, ndi pyakunentsa midzidzi inango kucita pinthu pyadidi?— Pyenepi pisacitika na anthu onsene. Ndi Sathani anacitisa pyenepi. Mbwenye pali na thangwi inango inaticitisa kucita pinthu pyakuipa midzidzi inango. Usadziwa ndi thangwi ipi?— Thangwi tonsene tabalwa na madawo.

Kazinji kene madawo asacitisa anthu kucita pinthu pyakuipa mwakukhonda nentsa, kupiringana kucita pinthu pyadidi. Mphapo tisafunika kucitanji?— Tisafunika kuwangisira toera kucita pinthu pyadidi. Tingacita pyenepi, tinakwanisa kukhala na cinyindiro cakuti Yezu anatiphedza, thangwi iye asatifuna.

Pikhali Yezu pa dziko yapantsi, iye apangiza ufuni kuna anthu akuti pakutoma akhacita pyakuipa, mbwenye adzacinja. Iye akhadziwa kuti pikhali pyakunentsa kuna anthu anewa kucinja. Pakhali na akazi akuti akhacita ulukwali na amuna azinji. Mwandimomwene pyenepi pikhali pyakuipa kakamwe. M’Bhibhlya, akazi anewa asacemerwa akazi aulukwali.

Ntsiku inango, m’bodzi wa akazi anewa aulukwali, pidabva iye kuti Yezu ali kunyumba kwa Nfarisi, iye aenda kweneko. Nkazi unoyu akhwaza mafuta m’miyendo ya Yezu, alira, pontho atotesa miyendo ya Yezu na misozi mbaipukuta na tsisi yace. Iye akhadatcunyuka na ntima onsene, na thangwi ineyi, Yezu amulekerera. Mbwenye Nfarisi aona kuti nkazi unoyu nee akhadathema kulekererwa.—Luka 7:36-50.

Usadziwa kuti Yezu alonganji kuna Afarisi anango?— Iye alonga kuti: “Akazi aulukwali anadzakusiyani nduli pakupita mu Umambo wa Mulungu.” (Mateu 21:31) Yezu alonga pyenepi thangwi akazi anewa aulukwali an’khulupira, pontho asiya kucita pinthu pyakuipa. Mbwenye Afarisi apitiriza kutsalakana mwakuipa anyakupfundza a Yezu.

Natenepa Bhibhlya ingalonga kuti pinthu pinacita ife ndi pyakuipa, tisafunika kusiya kucita pinthu pyenepi. Pontho tingadzindikira pinthu pinafuna Yahova toera tipicite, tisafunika kupicita. Tingacita pyenepi, Yahova anakomerwa na ife, pontho anatipasa umaso wakukhonda mala.