Kuba Ndi Kwakuipa!

KODI alipo adakubera kale?— Mphapo wapibva tani?— Munthu anacita pyenepi ndi mbava, pontho nkhabe anakomerwa na mbava. Ninji pinacitisa munthu kukhala mbava? Kodi iye asabalwa mbava?—

Ife tapfundza kuti anthu asabalwa na madawo. Ndi thangwi yace tonsene ndife akusowa ungwiro. Nkhabe munthu anabalwa mbava. Panango mbava abalwa pa banja yadidi. Anyakubalace na abale ace panango ndi anthu adidi. Mbwenye angafuna kakamwe kobiri na pinthu pyakuti iye asafuna kupigula na kobiri ineyi, panango pyenepi pinancitisa kukhala mbava.

Mbani adatoma kukhala mbava?— Tende tindzindikire. Mpfundzisi Wankulu pikhali iye kudzulu akhandziwa. Mbava wakutoma akhali anju. Nakuti aanju onsene adacita Mulungu akhali aungwiro, mphapo pyacitika tani kuti anju unoyu akhale mbava?— Ninga pidapfundza ife mu Nsolo 8 wa bukhu ino, iye akhafuna pinthu pyakuti nee ndi pyace. Usakumbuka kuti ndi pinthu pipi?—

Pidamala Mulungu kucita mamuna na nkazi wakutoma, anju unoyu akhafuna kuti iwo amulambire. Iye nee athema toera kulambirwa. Basi ene iwo akhafunika kulambira Mulungu. Mbwenye anju unoyu aba kulambirwa kweneku! Natenepa pidacitisa iye Adhamu na Eva kumulambira, pyenepi pyakhala ninga iye aba, mbakhala Sathani Dyabo.

Ninji pinacitisa munthu kukhala mbava?— Ndi kufuna pinthu pyakuti nee ndi pyace. Cifuno ceneci cinakwanisa kukula kakamwe mpaka kucitisa anthu adidi kucita pinthu pyakuipa. Anthu anango anakhala mambava cipo asatcunyuka mbacita pontho pinthu pyadidi. M’bodzi wa apostolo a Yezu adacita pyenepi ndi Yuda Iskariyoti.

Yuda akhadziwa kuti kuba ndi kwakuipa thangwi iye akhadapfundza Mwambo wa Mulungu kutomera uwana wace. Iye akhadziwa kuti Mulungu akhadapanga mbumba yace bulukira kudzulu kuti: ‘Lekani kuba.’ (Eksodho 20:15) Pidakula Yuda adziwana na Mpfundzisi Wankulu mbakhala m’bodzi wa anyakupfundzace. Mukupita kwa ndzidzi Yezu asankhula Yuda toera akhale m’bodzi wa apostolo ace 12.

Yezu na apostolo ace akhafamba pabodzi, pontho akhadya pabodzi. Iwo akhakoya kobiri yawo m’bokosi. Yezu apasa Yuda bokosi ineyi toera aikoye. Ndimomwene kuti kobiri ineyi nee ikhali ya Yuda. Usadziwa kuti mukupita kwa ndzidzi Yuda atoma kucitanji?—

Iye atoma kukwata kobiri m’bokosi ineyi idapaswa iye, pinthu pyakuti nee akhadatawiriswa toera kupicita. Iye akhakwata kobiri ineyi mwacibisobiso, pontho akhasaka njira toera kukwata kobiri izinji. Ndzidzi onsene Yuda akhanyerezera pya kobiri basi. Tende tione kuti cifuno ceneci cancitisa kucitanji ntsiku zingasi Yezu mbadzati kuphiwa.

Mariya m’bale wace Lazaro, akwata mafuta akudhula kakamwe mbaatsanulira m’miyendo ya Yezu. Mbwenye Yuda adungunya. Usadziwa thangwi yanji?— Iye alonga kuti mbapidakhala mwadidi kakamwe mafuta anewa aguliswe toera kobiri ineyi ipaswe anyakutcerenga. Mbwenye iye akhafuna kuti m’bokosi mukhale na kobiri izinji toera akwanise kuiba.—Juwau 12:1-6.

Yezu apanga Yuda kuti aleke kudzudzumisa Mariya thangwi iye akhapangiza kukoma ntima kukulu kakamwe. Yuda nee akomerwa na pidalonga Yezu, na thangwi ineyi, iye aenda kalonga na akulu a anyantsembe akuti akhali anyamalwa a Yezu. Iwo akhafuna kumanga Yezu, mbwenye akhafuna kucita pyenepi namasiku toera mbumba ikhonde kuaona.

Yuda apanga anyantsembe: ‘Mungandipasa kobiri, ine ndinakupangani kuti munamanga tani Yezu. Mphapo munandipasa kontanji?’

Anyantsembe atawira: ‘Ife tinakupasa kobiri 30 za parata.’—Mateu 26:14-16.

Yuda atambira kobiri ineyi. Pyenepi pikhali ninga iye akhagulisa Mpfundzisi Wankulu kuna anthu anewa! Pinthu pidacita iye ndi pyakuipa kakamwe. Ndi pyenepi pinacitika na munthu angaba kobiri. Iye asafuna kakamwe kobiri kupiringana anthu anango peno Mulungu.

Panango iwe unalonga kuti ‘ine ndisafuna kakamwe Yahova Mulungu kupiringana pinthu pinango.’ Mphyadidi kunyerezera tenepo. Yuda pidasankhulwa iye na Yezu toera akhale mpostolo wace, panango iye akhanyerezerambo tenepo. Anango adakhala mambava akhanyerezerambo tenepo. Tende tione angasi mwa anthu anewa.

M’bodzi wa iwo akhali ntumiki wa Mulungu akhacemerwa Akani, wakuti akhala m’maso kale kakamwe Mpfundzisi Wankulu mbadzati kubalwa pa dziko ya pantsi. Akani akwata nguwo yakubalika, parata na ouro. Pinthu pyenepi nee pikhali pyace. Bhibhlya isalonga kuti pinthu pyenepi pikhali pya Yahova thangwi pikhadabuluswa pakati pa anyamalwa a mbumba ya Mulungu. Mbwenye Akani akhafuna kakamwe pinthu pyenepi na thangwi ineyi iye apiba.—Yoswa 6:19; 7:11, 20-22.

Citsandzo cinango ndi ca mambo Dhavidhi. Yahova akhadasankhula Dhavidhi toera akhale mambo wa mbumba ya Izraeli. Ntsiku inango, Dhavidhi aona nkazi wakubalika kakamwe akhacemerwa Bhatisebha. Iye apitiriza kumuyang’ana, mbanyerezera kunkwata toera akhale nkazace. Mbwenye Bhatisebha akhali nkazi wa Uriya. Mphapo Dhavidhi akhafunika kucitanji?—

Dhavidhi akhafunika kusiya kunyerezera kukwata Bhatisebha. Mbwenye iye nee acita pyenepi. Iye ankwata mbaenda naye kunyumba kwace. Buluka penepo acita masasanyiro toera Uriya aphiwe. Thangwi yanji Dhavidhi acita pinthu pyenepi pyakuipa?— Thangwi iye akhafuna nkazi wakuti nee akhali wace.—2 Samweli 11:2-27.

Nakuti Dhavidhi akhadatcunyuka, Yahova nee amupha. Mbwenye iye athabuka na nyatwa zizinji. Buluka penepo mwanace, Abhisaloni akhafuna kunkwatira umambo. Anthu pikhaenda iwo kaona Dhavidhi, Abhisaloni akhaakhumbatira mbaampswompswona. Bhibhlya isalonga: “Abhisaloni apitiriza kupeusa mitima ya anthu a mu Izraeli.” Iye acitisa kuti mbumba inkhazikise ninga mambo pa mbuto ya Dhavidhi.—2 Samweli 15:1-12.

Kodi pyacitikambo kuna iwe kufuna kakamwe cinthu ninga pidacita Akani, Dhavidhi na Abhisaloni?— Tingafuna cinthu ca munthu unango mbaticikwata mwakukhonda tawiriswa, unoyu ndi umbava. Usakumbuka pikhafuna mbava wakutoma, Sathani?— Iye akhafuna kuti anthu onsene amulambire, m’mbuto mwakulambira Mulungu. Natenepa Sathani pidacitisa iye Adhamu na Eva kumbvera, iye aba.

Munthu angakhala na cinthu cace, ali na ufulu wakupanga munthu anafuna iye toera aciphatisire. Mwacitsandzo, nyerezera kuti waenda kasendzeka kunyumba kwa xamwali wako, pinakhala mwadidi kukwata cinthu kunyumba kwace mbuenda naco kunyumba kwanu?— Nkhabe, kusiyapo khala pai wace peno mai wace akupanga toera ucikwate. Ungakwata cinthu kunyumba kwace nee kuphemba, unoyu ndi umbava.

Thangwi yanji panango unakhala na cifuno ca kuba?— Thangwi panango unasirira cinthu cakuti nee ndi cako. Maseze munthu unango akhonde kukuona, mphapo mbani anakuona?— Yahova Mulungu. Pontho tisafunika kukumbuka kuti Mulungu asaida kuba. Natenepa ungafuna Mulungu na andzako pinakuphedza toera ukhonde kuba.