Ndzidzi Onsene Usafuna Kukhala Wakutoma?

KODI alipo anadziwa iwe wakuti ndzidzi onsene asafuna kukhala wakutoma?— Panango iye asasukuma ndzace pa bhixa toera apite kutsogolo. Waona kale pyenepi mbapicitika?— Mpfundzisi Wankulu aonambo anthu anango akulu akuti akhafuna kukhala akutoma, peno kukhala pa mbuto zakufunika kakamwe. Iye nee akomerwa napyo. Tende tione kuti ninji pidacitika.

Bhibhlya isalonga kuti ntsiku inango, Yezu acemerwa toera kuenda kadya kunyumba kwa Nfarisi m’bodzi wakuti akhali ntsogoleri wakufunika kakamwe wa uphemberi. Yezu atawira ncemerero unoyu. Pidafika iye kweneko, iye aona kuti anthu anango adacemerwa akhasankhula mbuto zadidi kakamwe. Na thangwi ineyi, Yezu alonga nsangani kuna anthu anewa adacemerwa. Iwe usafuna kubva nsangani unoyu?—

Yezu alonga: “Ungacemerwa toera kugumanika pa phwando yakumanga banja, leka kukhala pa mbuto yadidi kakamwe.” Usadziwa thangwi yanji Yezu alonga pyenepi?— Yezu alonga pyenepi thangwi panango pa phwando ineyi pacemerwambo munthu unango wakufunika kakamwe. Ninga pinaona iwe pa foto, panango mwanaciro phwando anabwera, mbalonga: ‘Buluka penepa, ndoko kakhale kule, toera uyu akhale pa mbuto ineyi.’ Pyenepi pingacitika, munthu unoyu anapibva tani?— Iye anakhala na manyadzo, thangwi anthu anango adacemerwambo anamuona mbakabuluka pa mbuto yadidi mbaenda kakhala pa mbuto yakupwazika.

Yezu akhafuna kupangiza kuti nee ndi pyadidi kufuna mbuto zakufunika kakamwe. Na thangwi ineyi, iye alonga: ‘Iwe ungacemerwa pa phwando yakumanga banja, ndoko kakhale pa mbuto yakupwazika, toera ule adakucemera angabwera akupange kuti: “Xamwali, ndoko kakhale pa mbuto yadidi kakamwe.” Penepo iwe unadzalemedzwa pamaso pa anthu onsene adacemerwa pa phwando.’—Luka 14:1, 7-11.

Wabvesesa kuti nsangani wa Yezu usabvekanji?— Dikhira ndilonge citsandzo cibodzi toera ndione khala wabvesesadi. Nyerezera kuti usafuna kukwira karu yakuti yadzala na anthu. Kodi unathamanga mbukhala pa mpando, mbusiya nkhalamba mbakhala dzololo?— Usanyerezera kuti Yezu mbadakomerwa iwe ungacita pyenepi?—

Panango munthu unango analonga kuti Yezu nkhabe napyo basa pinthu pinacita ife. Iwe usanyerezerambo tenepo?— Pikhadya Yezu kunyumba kwa Nfarisi, iye aona anthu mbakasankhula mbuto toera kukhala. Nee usatawira kuti Yezu asaonambo pinacita ife lero?— Cincino Yezu ali kudzulu, natenepa, iye asaona pyonsene pinacita ife.

Munthu angafuna kakamwe kukhala wakutoma, pyenepi pisabweresa nyatwa. Kazinji kene anthu asaipirwa mbatoma kulongezana. Midzidzi inango, pyenepi pisacitika kuna anapiana angaenda kakwira karu. Misuwo ya karu ingafungulwa, iwo asathamanga toera akhale akutoma kupita. Iwo angakwira asafuna kukhala dhuzi na pa janela. Usadziwa kuti ninji pinacitika?— Inde, iwo asatoma kukanirana.

Kufuna kukhala wakutoma kusabweresa nyatwa zizinji. Pyenepi pyacitikambo na apostolo a Yezu. Ninga pidapfundza ife mu Nsolo 6 wa bukhu ino, iwo akhaketesana kuti mbani nkulu pakati pawo. Kodi Yezu acitanji?— Inde, iye aasandika. Mbwenye mukupita kwa ndzidzi iwo aketesana pontho. Tende tione kuti pyenepi pyatoma tani?

Apostolo na anthu anango akhaenda ku Yerusalemu pabodzi na Yezu paulendo wawo wakumalisa. Nakuti Yezu akhadaapanga pya Umambo wace, Tiyago na Juwau akhafunambo kutonga pabodzi na iye ninga amambo. Iwo acedza thangwi ya pyenepi na mai wawo, Salome. (Mateu 27:56; Marko 15:40) Na thangwi ineyi, mu ndzidzi ukhaenda iwo ku Yerusalemu, Salome afendezera Yezu, agodama pamaso pace toera kuphemba cinthu.

Yezu ambvundza: “Usafunanji?” Iye atawira kuti akhafuna kuti anace awiri akhale pabodzi na Yezu mu Umambo wace; m’bodzi kunkono wace wamadyo unango kunkono wace wabzwere. Usaona kuti apostolo anango khumi apibva tani pidadzindikira iwo kuti Tiyago na Juwau apanga mai wawo toera aphembe pyenepi?—

Iwo aipirwa kakamwe na Tiyago na Juwau. Natenepa, Yezu apereka uphungu wadidi kuna apostolo ace onsene. Yezu aapanga kuti atongi a dziko asakomerwa kakamwe kuoneka ninga akufunika na amphambvu. Iwo asafunambo kukhala na cidzo na kubverwa na anthu onsene. Mbwenye Yezu apanga anyakupfundzace kuti iwo nee akhafunika kukhala tenepo. M’mbuto mwace, Yezu aapanga: “Ule anafuna kukhala wakutoma pakati panu asafunika kukhala bitcu wanu.”—Mateu 20:20-28.

Usadziwa kuti bitcu asacitanji?— Iye asatumikira anthu anango, mbakhonda kudikhira kuti anango antumikirembo. Iye asakhala pa mbuto yakupwazika, tayu yakufunika. Iye angacita pinthu asapangiza kuti ndi munthu wakupwazika, tayu ninga munthu wakufunika kakamwe. Pontho kumbuka pidalonga Yezu kuti khala munthu asafuna kukhala wakutoma, asafunika kukhala ninga bitcu wa anango.

Pyenepi pisabvekanji kuna ife?— Kodi bitcu mbadaketesana na mbuyace kuti mbani akhafunika kukhala pa mbuto yadidi? Peno kuti mbani akhafunika kudya pakutoma? Usaona tani?— Yezu afokotoza kuti bitcu asaikha pifuno pya mbuyace pa mbuto yakutoma.—Luka 17:7-10.

M’mbuto mwakuyesera kukhala akutoma, tisafunika kucitanji?— Inde, tisafunika kukhala ninga mabitcu kuna anango. Pyenepi pisabveka kuti tisafunika kuikha pifuno pya anthu anango pa mbuto yakutoma, pontho pisabvekambo kuona anango kuti ndi akufunika kakamwe kupiringana ife. Mphapo tinaikha tani pifuno pya anango pa mbuto yakutoma?— Ndiye tani uone pontho tsamba 40 na 41 ya bukhu ino, penepo iwe unaona kuti unakwanisa tani kuikha pifuno pya anango pa mbuto yakutoma na kuatumikira.

Kumbuka kuti Mpfundzisi Wankulu akhaikha pifuno pya anango pa mbuto yakutoma, pontho akhaatumikira. Iye agodama mbatsuka miyendo ya apostolo ace pa ntsiku yakumalisa idakhala iye pabodzi na iwo. Ife tingaikha pifuno pya anango pa mbuto yakutoma na kuatumikira, tinatsandzayisa Mpfundzisi Wankulu pabodzi na Pai wace, Yahova Mulungu.