Kodi Ndi Pyadidi Kucita Nthonga?

KODI usadziwa m’phale peno ntsikana m’bodzi wakuti asaoneka ninga wamphambvu kupiringana anango?— Kodi usakomerwa kusendzeka na anthu anewa? Peno usakomerwa kusendzeka na munthu wadidi wakuti asafuna ntendere?— Mpfundzisi Wankulu alonga: “Anyakutsandzaya ndi ale anakhazikisa ntendere, thangwi anadzacemerwa ‘ana a Mulungu.’”—Mateu 5:9.

Mbwenye midzidzi inango anango asacita pinthu pyakuti pisaticitisa kukhala akuipirwa. Unoyu nee ndi undimomwene?— Panango tinafuna kuabwezera pidaticitira iwo. Ntsiku inango pyenepi pyacitikambo kuna anyakupfundza a Yezu pikhaenda iwo pabodzi na iye ku Yerusalemu. Dikhira ndikupange pidacitika.

Pidafamba iwo nsindzo ungasi, Yezu atuma anyakupfundzace anango toera aende ku Samariya kasaka mbuto toera agone. Mbwenye Asamariya akhonda kuatambira thangwi uphemberi wawo ukhali wakusiyana. Asamariya nee akhakomerwa na munthu angaenda kalambira ku Yerusalemu.

Khala pyenepi pyacitikira iwe mbudacitanji? Mbudaipirwa peno kunyerezera kuabwezera pidacita iwo?— Ndi pyenepi pikhafuna kucita Tiyago na Juwau. Iwo apanga Yezu: “Musafuna kuti tiphembe moto ubwere buluka kudzulu toera kuafudza?” Ndi thangwi yace, Yezu aacemera kuti ndi Ana a Njazi! Mbwenye Yezu aapanga kuti nee akhafunika kutsalakana anthu munjira ineyi.—Luka 9:51-56; Marko 3:17.

Ndimomwene kuti midzidzi inango anthu asatitsalakana mwakuipa. Anapiana anango panango anakhonda kusendzeka na ife. Panango iwo analonga: “Ife nkhabe funa sendzeka na iwe.” Pyenepi pingacitika panango pinatitsukwalisa kakamwe. Si pyenepi tayu? Midzidzi inango, panango tinafuna kuabwezera pinthu pidaticitira iwo. Mphapo tisafunikadi kucita pyenepi?—

Usaona tani ukwate Bhibhlya yako? Tende tione pabodzi lemba ya Misangani kapitulu 24, vesi 29. Iyo isalonga: “Leka kulonga kuti: ‘Ndinancitira sawasawa na pidandicitira iye; ndinam’bwezera pidandicitira iye.’”

M’maonero ako lemba ineyi isafuna kulonganji?— Isafuna kulonga kuti nee tisafunika kubwezera pinthu pyakuipa kuna munthu adatitsalakana mwakuipa. Mphapo ndiye tani khala munthu akusosa toera kumenyana na iwe? Panango iye anakupasa madzina akuti nee unakomerwa nawo toera uipirwe. Panango iye anakuseka mbalonga kuti uli kugopa. Ndiye tani angakupanga kuti ndiwe dzemwa, unacitanji? Unamenyana naye?—

Tende tione pontho pinalonga Bhibhlya. Fungula pa Mateu kapitulu 5, vesi 39. Yezu alonga: “Lekani kuthimbana na munthu wakuipa, m’mbuto mwace, munthu angakumenya mbama pa phutu yamadyo, mpasembo phutu yako yabzwere.” Yezu akhafuna kulonganji na pyenepi? Kodi iye akhafuna kulonga kuti munthu angakumenya mbama pa phutu ibodzi usafunika kumpasa inango?—

Mwandimomwene Yezu nee akhafuna kulonga pyenepi. Kumenywa mbama ndi pyakusiyana na kumenywa xoko. Pontho ndi pyakusiyana na kusukumwa.  Munthu angatimenya mbama asafuna kutomesa nthonga. Iye asafuna kuti tiipirwe. Ndiye tani khala taipirwa mbatim’menyambo mbama? Ninji pinafuna kucitika?— Panango nthonga inatoma.

Yezu nee akhafuna kuti atowereri ace acite nthonga. Ndi thangwi yace, iye alonga kuti munthu angatimenya mbama nee tisafunika kum’bwezera, pontho nee tisafunika kuipirwa mbaticita nthonga. Tingamenyana tinapangiza kuti nee tasiyana na munthu adatomesa nthonga.

Munthu angatisosa tisafunika kucitanji?— Tisafunika kubuluka pa mbuto ineyi. Panango munthu unango anabwera mbatisosa pontho. Mbwenye panango iye anadzaneta. Ungabuluka pyako pa mbuto ineyi nee pisabveka kuti ndiwe wakupolola. Mbwenye pisapangiza kuti ndiwe wakuwanga, pontho usafuna kucita pinthu pyadidi.

Ndiye tani ungamenyana na munthu mbunkunda? Ninji pinafuna kucitika?— Munthu adamenya iwe panango anacemera axamwali ace, mbakumenya na muti peno mbakulasa na mpeni. Cincino wabvesesa kuti thangwi yanji Yezu nee asafuna kuti ticite nthonga?—

Mphapo tisafunika kucitanji tingaona anthu mbakamenyana? Tisafunika kuphedzera m’bodzi wa iwo?— Bhibhlya isatipanga pinafunika ife kucita. Fungula pa Misangani kapitulu 26, vesi 17. Iyo isalonga: “Ule anapita na njira mbaipirwa na nthonga ya anango, ndi ninga munthu anaphata makutu a mwanambwa.”

Ninji pinafuna kucitika ungaphata makutu a mwanambwa? Mwandimomwene iye anabva kupha mbafuna kukuluma. Mu ndzidzi unayesera mwanambwa kuthawa, panango iwe unapitiriza kuphata makutu ace mwamphambvu, pyenepi pinancitisa toera aipirwe kakamwe. Ungansiya panango iye anakuluma. Mphapo ndi pyakukwanisika kuphatirira makutu a mwanambwa mu ndzidzi uzinji?—

Ineyi ndi nyatwa inafuna kukhala na ife tingapitira nthonga za anthu anango. Panango ife nee tisadziwa munthu adatomesa nthonga peno thangwi yanji ali kumenyana. Panango munthu anamenywa aba cinthu. Natenepa tingaipitira tiri kuphedzera mbava. Pyenepi ndi pyadidi?

Usafunika kucitanji ungaona anthu mbakamenyana?— Khala ndi kuxikola iwe usafunika kucemera mpfundzisi. Khala nee ndi kuxikola cemera anyakubala ako peno mpolisiya. Ngakhale anango asafuna kucita nthonga, ife tisafunika kukhala antendere.

Anyakupfundza andimomwene a Yezu asawangisira toera akhonde kucita nthonga. Tingacita pyenepi, tisapangiza kuti tisafuna kucita pinthu pyadidi. Bhibhlya isalonga kuti anyakupfundza a Yezu ‘nee asafunika kuketesana na anthu, mbwenye asafunika kukhala akukoma ntima kuna anthu onsene.’—2 Timoti 2:24.