Iwe Usapereka Takhuta?

KODI iwe wadya lero?— Mbani adaphika cakudya ceneci?— Panango ndi mai wako peno munthu unango. Natenepa tisafunika kupereka takhuta kuna ule adaphika na ule adatipakulira. Mphapo thangwi yanji tisafunika kupereka takhuta kuna Mulungu thangwi ya cakudya?— Thangwi ndi Mulungu anacitisa kuti miti na mbeu zinango zinatipasa cakudya pikule.

Midzidzi inango tisaduwala kupereka takhuta kuna anthu thangwi ya pinthu pyadidi pidaticitira iwo, nee ndimodi? Pikhali Mpfundzisi Wankulu pa dziko yapantsi, anyamatanya anango aduwala kupereka takhuta.

Usadziwa kuti matanya ninji?— Matanya ndi utenda wakuti unakwanisa kucitisa munthu kuluza makhundu anango a manungo. Mu ndzidzi ukhali Yezu pa dziko yapantsi, anyamatanya akhafunika kukhala kutali na anthu. Iye angaona munthu mbakanfendedzera dhuzi, nyamatanya akhafunika kukhuwa mbapanga munthu unoyu toera akhale kutali na iye. Iye akhacita pyenepi, gopa anthu anganfendedzera dhuzi kakamwe anakhalambo na matanya.

Yezu akhatsalakana mwadidi anyamatanya. Ntsiku inango pikhaenda Yezu ku Yerusalemu, iye apita na mu nzinda unango ung’ono. Pikhali iye cifupi na nzinda unoyu, anyamatanya khumi aenda kuna iye. Iwo akhadabva kuti Yezu apaswa mphambvu na Mulungu toera kuwangisa mautenda onsene.

Anyamatanya anewa nee afika dhuzi na Yezu. Iwo alimira kutali. Mbwenye iwo akakhulupira kuti Yezu mbadakwanisa kuwangisa utenda wawo. Na thangwi ineyi, anyamatanya pidaona iwo Mpfundzisi Wankulu akhuwa: ‘Yezu, Mpfundzisi, tiphedzeni.’

Kodi iwe usabvera ntsisi anthu anabva kupha?— Yezu akhaabvera ntsisi. Iye akhadziwa kuti munthu angakhala na matanya asabva kupha kakamwe. Na thangwi ineyi, iye apanga anyamatanya: “Ndokoni kapangizike kuna anyantsembe.”—Luka 17:11-14.

Thangwi yanji Yezu aapanga toera acite pyenepi? Ndi thangwi ya mwambo udapereka Yahova kuna mbumba Yace unalonga thangwi ya anthu ali na matanya. Mwambo unoyu ukhalonga kuti nyantsembe wa Mulungu akhafunika kuyang’ana mwadidi khanda ya nyamatanya. Basi ene ndi nyantsembe akhafunika kulonga kuti iye awanga. Nyamatanya angawanga mbadakwanisa kukhala pontho pabodzi na anthu anango.—Levitiko 13:16, 17.

Mbwenye anyamatanya anewa akhapitiriza kubva kupha. Kodi iwo aenda kuna nyantsembe ninga pidapangwa iwo na Yezu?— Inde, iwo aenda mwakucimbiza. Pisaoneka kuti amuna anewa akakhulupira kuti Yezu mbadawangisa utenda wawo. Ninji pidacitika?

Mu ndzidzi ukhaenda iwo kuna nyantsembe, utenda wawo wamala. Iwo awangiswa. Iwo akhali ninga pikhali iwo pakutoma mbadzati kuphatwa na matanya. Iwo aphedzwa thangwi akhulupira mphambvu za Yezu. Natenepa iwo atsandzaya kakamwe. Mphapo akhafunika kucitanji toera kupangiza kupereka kwawo takhuta? Iwe mbudacitanji?—

M’bodzi mwa amuna anewa adawangiswa abwerera kuna Yezu. Iye atoma kusimba Yahova, mbalonga pinthu pyadidi thangwi ya Mulungu. Iye acita mwadidi thangwi mphambvu idawangiswa na iye ikhabuluka kuna Yahova. Iye agodama pamaso pa Mpfundzisi Wankulu mbapereka takhuta kuna iye. Iye akhapereka takhuta kakamwe thangwi ya pidancitira Yezu.

Mphapo amuna anango apfemba acitanji? Yezu abvundza: ‘Onsene adawangiswa ndi anthu khumi. Mphapo apfemba ali kupi? Ndi m’bodzi basi adabwerera toera kusimba Mulungu?’

Ndimodi, mwa anthu khumi, ndi m’bodzi basi adabwerera toera kusimba peno kupasa mbiri Mulungu na kupereka takhuta kuna Yezu. Mamuna unoyu akhali wa dziko inango, iye akhali wa ku Samariya. Amuna anango apfemba nee apereka takhuta kuna Mulungu nee kuna Yezu.—Luka 17:15-19.

Mphapo iwe usafuna kukhala ninga ani? Ndimomwene kuti tonsene tisafuna kukhala ninga mamuna wa ku Samariya. Mphapo munthu angaticitira cinthu cadidi tisafunika kucitanji?— Tisafunika kupereka takhuta. Anthu azinji asaduwala kupereka takhuta. Mbwenye ndi pyakufunika kakamwe kupereka takhuta. Tingacita pyenepi, Yahova Mulungu na Mwanace, Yezu, asakhala akutsandzaya.

Unganyerezera mwadidi, unadzindikira kuti anthu asakucitira pinthu pizinji kakamwe. Mwacitsandzo, iwe waferuka kale ntsiku inango?— Panango iwe nee wabva kupha kakamwe ninga anyamatanya khumi, mbwenye panango waphatwa na nyampwanda peno wabva kupha m’mimba. Mbani adakutsalakana mu ndzidzi unoyu?— Panango akupasa mitombwe toera umwe peno akucitira pinthu pinango. Kodi iwe watsandzaya thangwi yakuphedzwa toera ukhale pontho mwadidi?—

Mamuna wa ku Samariya apereka takhuta kuna Yezu thangwi yakuwangiswa, pontho Yezu atsandzaya na pyenepi. Kodi usaona kuti mai wako peno pai wako anatsandzaya ungapereka takhuta thangwi ya pinthu pyonsene pinakucitira iwo?— Inde, iwo anatsandzaya.

Anthu anango asacita pinthu pyadidi kuna iwe ntsiku zonsene peno masumana onsene. Panango ineyi ndi basa yawo. Iwo asakomerwa na kucita pyenepi. Mbwenye panango cipo wapereka kale takhuta kuna iwo. Mwacitsandzo, mpfundzisi wako asawangisira kakamwe toera kukuphedza kuti ubvesese pinapfundza iwe. Iye asacita pyenepi thangwi ndi basa yace. Mbwenye iye anatsandzaya kakamwe ungapereka takhuta thangwi ya kukuphedza kubvesesa.

Midzidzi inango anthu asaticitira pinthu ping’ono. Kodi alipo adakufungulira kale nsuwo toera upite? Peno alipo adakuthambiza cakudya? Mphyadidi kupereka takhuta ngakhale mu pinthu pyenepi ping’ono.

Tingapereka takhuta kuna anthu, pinakhala pyakukhonda nentsa kuperekambo takhuta kuna Babathu wakudzulu. Tiri na mathangwi mazinji anaticitisa kupereka takhuta kuna Yahova. Iye atipasa umaso na pinthu pyonsene pyadidi pinatitsandzayisa mu umaso. Natenepa, tiri na mathangwi mazinji toera kupasa mbiri Mulungu na kunsimba ntsiku zonsene.