Woba uvyibuka?
Woba warasomye witonze inomero z’Umunara w’Inderetsi za vuba? Raba rero nimba ushobora kwishura ibibazo bikurikira:
Dushobora gute kuzimya umuriro w’amajambo ataranga ukwiyumvira?
Turakwiye gusuzuma umutima wacu. Aho gutora amahinyu umuvukanyi, ubona gute usuzumye icoba gituma ugira ako gatima? Twoba tumutora amahinyu turondera kuboneka neza kuruta? Vyongeye, gutora abandi amahinyu birashobora gutuma ibintu vyunyuka.—15/8, urupapuro rwa 21.
Itegeko ryěrekana gute ingene Imana ibona abakenyezi?
Abagore b’Abisirayelikazi bari bafise umwidegemvyo mwinshi, kandi baremererwa kwiga. Babwirizwa kwubahwa no guterwa iteka, agateka kabo kagakingirwa.—1/9, urupapuro rwa 5-7.
Uko umusi wa Yehova wegereza, ni ibintu ibihe bikiraririye gushika?
Hazotangazwa “Amahoro n’umutekano!” Amahanga azogaba igitero kuri Babiloni Akomeye maze amutikize. Hari igitero kizogabwa ku basavyi b’Imana. Hazoshika intambara ya Harumagedoni, hanyuma Shetani n’amadayimoni yiwe batererwe mu nyenga.—15/9, urupapuro rwa 4.
Twungukira gute ku kuba tutazi igihe iherezo rizoshikira?
Kuba tutazi umusi canke isaha nyezina biratuma duhishura ikiri mu mutima wacu. Biraturonsa akaryo ko kunezereza umutima w’Imana. Biraturemesha kubaho mu buryo buranga ukwitanga bikongera bikadufasha kurushiriza kwiheka ku Mana no kw’Ijambo ryayo. Vyongeye, biratuma ingorane zidushikira muri iki gihe zidutyorora.—15/9, urupapuro rwa 24-25.
Twokoresha gute Itanguriro 3:19 mu gufasha kuzirikana umuntu yemera umuriro udahera?
Uwo murongo uvuga yuko Adamu apfuye yosubiye mu mukungugu, ntuvuga ko yogiye mu muriro udahera.—1/10, urupapuro rwa 13.
“Inyenyeri indwi” ziri mu kuboko kwa Yezu kw’ukuryo zivugwa mu Vyahishuwe 1:16, 20 zigereranya bande?
Zigereranya abacungezi barobanujwe impwemu bo mu mashengero, mu buryo bwagutse na ho zikagereranya abacungezi bose.—15/10, urupapuro rwa 14.
Abagize umuryango bohangana gute n’ideni bashobora kuba bafise?
Abubakanye bakwiye kuyaga ivyerekeye ideni bafise badahishanya kandi baturuye. Vyofasha barimbuye amahera bakoresha uko angana. Boba boshobora kwongereza ayo binjiza canke kugabanya ayo basohora? Bakwiye gushinga urutonde rw’ingene bazoza barariha amadeni bafise, kumbure bakaganira n’ababaguranye ingene boyariha. Mugabo bakwiye kumenya ko vyose bitazogenda nk’uko bavyipfuza kandi bakabona amahera mu buryo bubereye. (1 Tim. 6:8)—1/11, urupapuro rwa 19-21.
Yezu yagaragaje gute agatima ko kwicisha bugufi kavugwa muri Yesaya 50:4, 5?
Iyo mirongo ivuga yuko uwufise “ururimi rw’abigishijwe . . . [ato]hindukiriye hirya.” Yezu yaragaragaza agatima k’ukwicisha bugufi, agatega yompi ivyo Se yamwigisha. Yezu yari ashashaye kugira ico yigiye kuri Yehova, akihweza yitonze ukuntu Imana yicisha bugufi mu kugirira imbabazi abantu b’abacumuzi.—15/11, urupapuro rwa 11.
Itembure ya posita y’icibutso yo muri Estoniya yashingiye intahe gute ukutadohoka kw’Ivyabona vya Yehova?
Mu 2007, Ibiro vya posita vya Estoniya vyarasohoye itembure yibukiriza ihonyabwoko ryagiriwe abanyagihugu bo muri Estoniya ku ntwaro ya Staline. Iyo tembure yariko igiharuro 382, kikaba ari igitigiri c’Ivyabona vya Yehova n’abana babo bangajwe mu 1951, bagakurwa mu gihugu cabo bakajanwa iyo catawe mu makambi y’ibikorwa vy’umuruho mu Burusiya.—1/12, urupapuro rwa 27-28.