Woba ‘warize akabanga’ ko kubumbwa n’ivyo ufise?

1. Kubumbwa n’ivyo dufise bisobanura iki, kandi ni igiki bidasobanura?

WOBA uri umuntu abumbwa n’ivyo afise? Umuntu abumbwa n’ivyo afise araronka amahoro n’umunezero kubera ko ashima ivyiza afise. Ntata umutwe canke ngo ashavure kubera ko hari ivyo adafise. Ariko rero, kubumbwa n’ivyo ufise ntibisobanura kuba sindabinezwe. Nk’akarorero, umukirisu arondeye gukora vyinshi mu murimo wa Yehova, nta kibi aba akoze. (Rom. 12:1; 1 Tim. 3:1) Naho ari ukwo, igihe adaciye aterwa agateka yipfuza ntaca atakaza umunezero.

2. Kubera iki kutabumbwa n’ivyo dufise biteye akaga?

² Kutabumbwa n’ivyo dufise birashobora kudukwegera ingorane zikomeye. Abantu batigera babumbwa n’ivyo bafise boshobora gukora amasaha menshi cane kugira ngo baronke ibintu usanga batanakeneye vy’ukuri. Ikibabaje, ni uko hari n’abakirisu bageze aho biba amahera be n’ibindi bintu bipfuza. Bashobora kuba bibwiye bati: «Ibi bikwiye kuba rwanje», canke bati: «Kuva aho narindiririye ni kera», canke na ho bati: «Aya mahera nzoyasubiza.» Yamara ubusuma ubwo ari bwo bwose ntibuhimbara Yehova, kandi buramusiga iceyi. (Imig. 30:9) Hari n’abandi bacitse intege cane kubera ko bataronse agateka bipfuza, bica bituma baheba gukorera Yehova burundu. (Gal. 6:9) None bigenda gute ngo umusavyi wa Yehova yamwiyeguriye ashike hiyo hose? Ingorane ishobora kuba ihagaze ku kuba uwo muntu atakibumbwa n’ivyo afise.

3. Ni icigwa ikihe kiremesha dusanga mu Bafilipi 4:​11, 12?

³ Twese turashobora kwiga kubumbwa n’ivyo dufise. Intumwa Pawulo yavuze ko «[yize] kubumbwa n’ivyo afise mu bihe vyose.» (Soma Abafilipi 4:​11, 12.) Ayo majambo yayanditse ari mw’ibohero. Naho ari ukwo, yari agifise umunezero. Yari yarize akabanga ko kubumbwa n’ivyo afise. Nimba bitugora kubumbwa n’ivyo dufise, ayo majambo ya Pawulo be n’ivyo yaciyemwo birashobora kuturemesha, tukabona ko na twebwe twoshobora kubumbwa n’ivyo dufise. Ariko rero, ntitwitege ko bizopfa kwizana. Dutegerezwa kuvyiga. None twobishikako gute? Reka turabe kamere zodufasha kwiga akabanga ko kubumbwa n’ivyo dufise.

NUBE UMUNTU AKENGURUKA

4. Gukenguruka bidufasha gute kubumbwa n’ivyo dufise? (1 Abatesalonika 5:18)

⁴ Umuntu akenguruka usanga kenshi abumbwa n’ivyo afise. (Soma 1 Abatesalonika 5:18.) Nk’akarorero, igihe dushima ivyo dufise usanga tutarazwa ishinga cane n’ibintu twipfuza yamara tudafise. Vyongeye, igihe dukenguruka agateka k’umurimo dufise, bituma dukora ivyo dushoboye vyose mu gikorwa twajejwe, aho kuguma twiyumvira cane ukuntu tworonka akandi gateka. Ni co gituma ivyanditswe bituremesha kuza turakengurukira Yehova mu masengesho yacu. Igihe turi abantu bakenguruka biradufasha kuronka «amahoro y’Imana arengeye ugutahura kwose.»—Flp. 4:​6, 7.

5. Ni ibiki vyari bikwiye gutuma Abisirayeli bakenguruka? (Raba n’ifoto.)

⁵ Raba ivyashikiye Abisirayeli. Akatari gake baridogeye Yehova kubera ko bataronka ibifungurwa bahora baronka mu Misiri. (Guh. 11:​4-6) Ego ni ko ubuzima bwo mu bugaragwa ntibwari bworoshe. Ni ibiki none vyari kubafasha kubumbwa n’ivyo bafise? Bari bakeneye kuzirikana ku vyo Yehova yari amaze kubakorera kandi bakabikenguruka. Nk’akarorero, igihe bari mu Misiri bafatwa nabi nk’abashumba, Yehova yarateje Abanyamisiri ivyago cumi. Abisirayeli bamaze kurekurwa ‘baranyaze Abanyamisiri’ ifeza n’inzahabu hamwe n’impuzu. (Kuv. 12:​35, 36) Igihe Abanyamisiri baboma inyuma gushika ku kiyaga Gitukura, Yehova yaciye akigaburamwo kubiri ku gitangaro. Igihe na ho Abisirayeli bariko baraca mu bugaragwa, Yehova yarabagaburira manu buri musi. None bari bafise ingorane iyihe? Ntibabumbwa n’ivyo bafise. Ivyo ntivyaterwa n’uko batari bafise imfungurwa bakeneye, ahubwo ni uko batashima ivyo bari basanzwe bafise.

6. Ni ibiki vyodufasha kuba abantu bashima?

⁶ Ni ibiki vyodufasha kuba abantu bashima? Ubwa mbere, nuze urafata umwanya buri musi uzirikane ku vyiza wifitiye. Woshobora no kwandika ikintu kimwe canke bibiri ukenguruka. (Int. 3:​22, 23) Ubwa kabiri, niwerekane ko ushima. Nuze uribwiriza gukengurukira abandi ku vyo bagukorera. N’ikiruta vyose niwame ukengurukira Yehova. (Zab. 75:1) Ubwa gatatu, nuhitemwo abagenzi bakunda gushima. Kwifatanya n’abantu bashima canke b’intashima birashobora gutuma umera nka bo. (Gus. 1:​26-28; 2 Tim. 3:​1, 2, 5) Abantu bakunda gushima usanga kenshi babumbwa n’ivyo bafise.

7. Ni ibiki vyafashije Aci kuba umuntu ashima, kandi vyavuyemwo iki?

⁷ Raba ivyashikiye mushiki wacu yitwa Aci wo muri Endoneziya. Avuga ati: «Mu gihe ca Korona naratanguye kugereranya uko ivyanje vyifashe be n’ivy’abandi dusangiye ukwizera. Ivyo vyatumye ntabumwa n’ivyo mfise.» (Gal. 6:4) None ni igiki camufashije guhindura uko yabona ibintu? Aci avuga ati: «Naratanguye kuzirikana ku mihezagiro nironkera buri musi no ku vyiza vyinshi nari mfise kubera ndi mw’ishirahamwe rya Yehova. Naciye nkengurukira Yehova kuri ivyo vyiza vyose. Ivyo vyatumye mpimbarirwa ivyo mfise.» Nimba na wewe urengewe n’ivyiyumviro bica intege, ubona gute ubigenjeje gutyo nyene kugira usubire kuba umuntu ashima?

NUGUMIZE UMUTIMA KU VYO UFISE KANDI WICISHE BUGUFI

8. Ni umutego uwuhe Baruki yaguyemwo?

⁸ Umunyamabanga w’umuhanuzi Yeremiya ari we Baruki vyarashitse aragwa mu mutego. Baruki yari ajejwe igikorwa kitoroshe co gushigikira Yeremiya mu gushikiriza ihanga ry’intashima ubutumwa bukomeye. Ariko vyarashitse Baruki ntiyaba agishira umutima cane ku vyo Yehova yashaka ko akora, ahubwo atangura kwiyumvira cane ibimwerekeye be n’ivyo we yipfuza gukora. Yehova abicishije kuri Yeremiya yabwiye Baruki ati: «Uriko wironderera ibintu bihambaye. Reka kubirondera.» (Yer. 45:​3-5) Mu yandi majambo, ni nk’aho yamubwiye ati: «Shima ivyo ufise.» Baruki yaremeye gukosorwa kandi Yehova yagumye amushima.

9. Twisunze 1 Abakorinto 4:​6, 7, ukwicisha bugufi kwodufasha gutahura iki? (Raba n’amafoto.)

⁹ Birashika umusavyi wa Yehova akiyumvira ko abereye agateka kanaka, kumbure kubera ko afise impano zitandukanye, akora cane, canke amaze imyaka myinshi akorera Yehova. Ariko rero, ako gateka nyene yipfuza koshobora guterwa abandi. None mu gihe nk’ico akwiye gukora iki? Arakwiye kuzirikana ku vyo intumwa Pawulo yanditse dusanga mu 1 Abakorinto 4:​6, 7. (Soma.) Agateka ako ari ko kose duterwa, n’impano iyo ari yo yose dufise, biva kuri Yehova. Nta co twatanze kugira tubironke. Vyose tubikesha ubuntu buhebuje bwa Yehova.—Rom. 12:​3, 6; Ef. 2:​8, 9.

10. Ni igiki codufasha kugaragaza ukwicisha bugufi?

¹⁰ Turashobora kugaragaza ukwicisha bugufi tuzirikanye ku karorero Yezu yadusigiye. Raba ivyabaye muri rya joro Yezu yoza ibirenge intumwa ziwe. Intumwa Yohani yanditse ati: «Yezu rero, kubera yari azi ko [1] Se yashize ibintu vyose mu maboko yiwe be n’uko [2] yaje ava ku Mana kandi [3] akaba yagira asubire ku Mana, . . . atangura kwoza ibirenge vy’abigishwa.» (Yoh. 13:​3-5) Yezu yari gushobora kwiyumvira ko ari we yari akwiriye kwozwa ibirenge. Mugabo mu kiringo cose yamaze ng’aha kw’isi, ntiyigeze yiyumvira ko yari abereye kubaho mu buzima bwiza cane. (Luka 9:58) Yezu yaricisha bugufi kandi akabumbwa n’ivyo afise. Ese ingene yadusigiye akarorero keza.—Yoh 13:15.

11. Ukwicisha bugufi kwafashije gute Dennis gushima ivyo afise?

¹¹ Umuvukanyi yitwa Dennis wo mu Buholande, aragerageza gukurikiza akarorero ka Yezu ko kwicisha bugufi naho bitama vyoroshe. Avuga ati: «Iyo hagize uwuterwa agateka nipfuza, birashika nkagira ubwibone kubera ko mbona ko ari je nari ndakabereye. Iyo bishitse nca niga ibijanye no kwicisha bugufi. Muri JW Library narashize hamwe ivyanditswe bijanye no kwicisha bugufi kugira bize biranyorohera gutora, nce nsubira kubisoma. Vyongeye, naravomye muri terefone yanje insiguro zivuga ibijanye no kwicisha bugufi kandi ndakunda kuzumviriza.a Nahavuye ntahura ko ibintu vyose dukora, tubikora kugira tuninahaze Yehova atari kugira twininahaze. Umwe wese muri twebwe, Yehova aramwemerera kugira uruhara na rutoyi mu gushitsa ivyo agomba. Nimba rero utanguye kwumva ko utagishima uko ivyawe vyifashe, nugerageze gukora ibintu vyotuma urushiriza kwicisha bugufi. Ivyo bizotuma ukomeza ubucuti ufitaniye na Yehova kandi bigufashe gushima ivyo ufise.—Yak. 4:​6, 8.

ZIRIKANA KU VYO YEHOVA YADUSEZERANIYE

12. Ni umuhango uwuhe udufasha kubumbwa n’ivyo dufise? (Yesaya 65:​21-25)

¹² Iyo tuzirikanye ku vyiza Yehova yadusezeraniye biratuma turushiriza kubumbwa n’ivyo dufise. Ivyo Yehova ubwiwe yavuze biciye ku muhanuzi Yesaya, birerekana ko atahura neza ingene ubuzima bugoye muri iki gihe bikongera bikadukura amazinda ko azodukiza izo ngorane. (Soma Yesaya 65:​21-25.) Tuzoba mu mazu mezameza, dukore ibikorwa bihimbaye, dufungure n’ibifungurwa ntungamagara kandi biryoshe. Ntituzokwigera dusubira gutinya ko hari ibintu bibi vyodushikira canke bigashikira abana bacu. (Yes. 32:​17, 18; Ezk. 34:25) Emwe, ivyo vyiza vyose tuzovyibonera!

13. Ni ryari canecane twokenera gushira umutima ku vyo Yehova yadusezeraniye?

¹³ Ubu kuruta ikindi gihe, turakeneye gushira umutima ku vyo Yehova yadusezeraniye. Uti kubera iki? Kubera ko tubayeho mu misi ya nyuma, kandi twese tukaba duhanganye n’ingorane ‘zigoye kwihanganira.’ (2 Tim. 3:1) Buri musi Yehova aradufasha kwihanganira izo ngorane. (Zab. 145:14) Vyongeye, ivyo Yehova yadusezeraniye biradufasha kwihanganira ibihe bitoroshe. Nk’akarorero, bishobora kuba bikubera urugamba kuronsa umuryango wawe ivya nkenerwa. None ivyo vyoba bisobanura yuko uzokwama ukenye? Habe namba. Yehova yasezeranye ko mw’Iparadizo uzoronka ivyo ukeneye vyose be n’ibirenze ivyo ukeneye. (Zab. 9:18; 72:​12-14) Ku rundi ruhande, ushobora kuba wama ufise ububabare budahera, urwaye akabonge, canke iyindi ndwara ikomeye. None vyoba bisobanura ko ata gahengwe uzokwigera uronka? Oya nawe nu! Mw’isi nshasha indwara n’urupfu ntibizoba bikiriho. (Ivyah. 21:​3, 4) Ivyo bintu Yehova yadusezeraniye biratuma dushima uko ivyacu vyifashe muri iki gihe, aho kubaho turi abantu bashishwe kandi b’abanyamujinya. Naho tworenganywa, tukabura abacu, tukarwara, canke tugashikirwa n’iyindi ngorane iyo ari yo yose, ntiduca dutakaza umunezero. Uti kubera iki? Kubera ko tuzi yuko naho ingorane turimwo muri iki gihe zoba zikomeye gute, ayo «makuba ari ay’akanya gato» kandi ko mw’isi nshasha izo ngorane zose zizovaho burundu.—2 Kor. 4:​17, 18.

14. Twokomeza gute icizigiro cacu?

¹⁴ Twokomeza gute icizigiro cacu, narirya ari co ahanini kidufasha gushima uko ivyacu vyifashe? Kurya nyene umuntu yokenera kwambara amarori kugira abone neza ibintu biri kure, na twebwe vyoshobora kuba ngombwa ko tugira ivyo dukoze kugira dukomeze icizigiro cacu, maze turushirize kubona neza ingene ibintu bizoba bimeze mw’Iparadizo. Nk’akarorero, igihe turengewe n’ingorane z’ivy’ubutunzi twoshobora kwiha ishusho ingene ubuzima buzoba bumeze igihe ata muntu azoba agikenera amahera, ata wugisaba ideni, ata n’ubusumbasumbane mu vy’ubutunzi buzoba bukiriho. Nimba na ho ducitse intege kubera ko hari agateka tutaraterwa, twoshobora kuzirikana ku kuntu ivyo ata co bizoba bikivuze inyuma y’imyaka ibihumbi tuzoba tumaze dukorera Yehova turi abantu batunganye. (1 Tim. 6:19) Naho ingorane dufise muri iki gihe zoshobora gutuma twiganyira cane ku buryo bitugora kuzirikana kuri ivyo vyiza Yehova yadusezeraniye, twihase tukaguma tubizirikanako vyokworoha ko tubigumizako umutima gusumba kuwugumiza ku ngorane zacu.

15. Ivyavuzwe na Christa bitwigisha iki?

¹⁵ Raba ingene icizigiro cacu ca kazoza cafashije Christa, umugore w’umwe Dennis twavuga. Avuga ati: «Ngwaye indwara ituma imitsi itakaza inguvu, bigatuma ngendera mu gakinga k’abamugaye kandi nkamara umusi nka wose ndi mu gitanda. Namana ububabare buri musi. Umuganga amvura aheruka kumbwira ko ntazokira. Akibimbwira naciye nibwira nti: ‘Ntitubona kumwe kazoza.’ Jewe ngumiza umutima ku cizigiro cacu ca kazoza ivyo bikaba bituma ngira amahoro. Naho muri iki gihe bisaba ko nguma nihanganira ingorane, mw’isi nshasha nzoryimara.»

‘ABAMUTINYA NTA CO BIGERA BABURA’

16. Kubera iki umwami Dawidi yavuze ko abatinya Yehova «ata co bigera babura»?

¹⁶ Naho umusavyi wa Yehova yoba abumbwa n’ivyo afise, ntabura gushikirwa n’ingorane. Raba akarorero k’umwami Dawidi. Yarabuze batatu mu bana biwe, aragirizwa ibinyoma, arahemukirwa, yongera amara imyaka itari mike ahigwa buhongo. Naho ari ukwo, igihe yari mu ngorane ikomeye yavuze ku bijanye na Yehova ko «abamutinya ata co bigera babura.» (Zab. 34:​9, 10) Kubera iki none yavuze gutyo? Kubera ko naho twebwe abasavyi ba Yehova tutiteze kubaho tutagira ingorane, turizigira tudakeka ko tutazokwigera tubura ivya nkenerwa. (Zab. 145:16) Vyongeye, turizigira ko Yehova adushigikira mu ngorane zose tuba turiko turacamwo. Ivyo bituma dutekana.

17. Kubera iki wokwiyemeza kwiga akabanga ko kubumbwa n’ivyo ufise?

¹⁷ Yehova yipfuza ko ubumbwa n’ivyo ufise. (Zab. 131:​1, 2) Nukore uko ushoboye kwose rero kugira ngo wige akabanga ko kubumbwa n’ivyo ufise. Niwihatira kuba umuntu ashima, ukagumiza umutima ku vyiza ufise kandi ukicisha bugufi, ukongera ugakomeza icizigiro cawe, uzoshobora rero kuvuga uti: ‘Narize kubumbwa n’ivyo mfise.’—Zab. 16:​5, 6.