Urutonde rushasha rw’amakoraniro y’ishengero

1, 2. Guhera muri Nzero 2009, ni amahinduka ayahe ajanye n’amakoraniro azohaba?

¹ Ku ndwi yo ku wa 21-27 Ndamukiza 2008, umuryango w’abavukanyi ukwiye kw’isi yose warashikirijwe itangazo riteye akamwemwe rigira riti: “Guhera ku wa 1 Nzero 2009, Inyigisho y’igitabu y’ishengero izohora ibera rimwe n’Ishure ry’ubusuku bwa gitewokarasi be n’Ikoraniro ry’umurimo. Izina ry’Inyigisho y’igitabu y’ishengero rizohinduka maze ribe Inyigisho ya Bibiliya y’ishengero.”

² Urutonde rw’ayo makoraniro azogirwa ku ndwi ku ndwi: Umwanya wose hamwe ayo makoraniro azohora amara, harimwo ururirimbo n’isengesho, uzoba isaha 1 n’iminuta 45. Ayo makoraniro azotangurwa n’ururirimbo be n’isengesho (Imin. 5), hakurikire Inyigisho ya Bibiliya y’ishengero (Imin. 25). Hazoca hakurikira ubwo nyene Ishure ry’ubusuku bwa gitewokarasi (Imin. 30). Hanyuma, hazoca hakurikira ururirimbo (Imin. 5) rutangurira Ikoraniro ry’umurimo (Imin. 35). Iryo koraniro rizosozerwa n’ururirimbo be n’isengesho (Imin. 5). Kugira tubafashe kwitegurira ayo makoraniro, urutonde rw’Inyigisho ya Bibiliya y’ishengero, urw’Ishure ry’ubusuku bwa gitewokarasi hamwe n’urw’Ikoraniro ry’umurimo ruzoza rurasohoka ku kwezi ku kwezi mu Gikorwa dukorera Ubwami.

3. Inyigisho ya Bibiliya y’ishengero izorongorwa gute?

³ Inyigisho ya Bibiliya y’ishengero: Iryo koraniro rizorongorwa nka kurya kw’Inyigisho y’Umunara w’Inderetsi. Ntibizokenerwa ko ritangurwa n’isubiramwo ry’amayagwa azoba yarimbuwe mu ndwi y’imbere y’iyo. Ahubwo, iryo koraniro rikwiye gutangurwa n’intangamarara ngufi cane. Ivyo bizotuma abitavye iryo koraniro bose baronka umwanya uhagije wo gushikiriza insasanuro ngufingufi. Umucungezi muhagarikizi azotunganya ivy’uko abakurambere baza barakurakuranwa buri ndwi mu kuyobora iryo koraniro.

4. Ni ibiki bizohinduka ku bijanye n’Ikoraniro ry’umurimo?

⁴ Ikoraniro ry’umurimo: Ikoraniro ry’umurimo rizoguma uko ryahora, mugabo rizoba rigizwe n’ibiganiro bigufi ugereranije n’ivyari bihasanzwe. Amatangazo azoza aramara iminuta itanu. Uyo mwanya uzoba uhagije n’igihe mbere hoba hariho amatangazo ahambaye yo gushikiriza be n’amakete amwamwe avuye kw’ishami. Nk’amatangazo avuga ivy’indinganizo zijanye n’umurimo wo mu ndimiro, ivy’isuku, raporo y’ivy’amakonte, amakete amwamwe akunda kuva ku biro vy’ishami, ntibikenewe ko asomerwa ku mukiruruko, azoshirwa ku kibaho c’amatangazo kugira ngo abavukanyi bayisomere. Abazoba bahawe ibiganiro bashikiriza bakwiye kwitegura neza, kandi bakubahiriza umwanya wagenewe ikiganiro kimwekimwe cose bakisunga n’inama zatanzwe.

5. Mu ndwi ishengero rizoba ryagendewe n’umucungezi w’umuzunguruko, amakoraniro y’ishengero azogenda gute?

⁵ Igihe umucungezi w’umuzunguruko aba yabagendeye: Urutonde rukurikizwa mu ndwi muba mwagendewemwo n’umucungezi w’umuzunguruko ntiruzohinduka. Ku wa kabiri, hazoba Ishure ry’ubusuku bwa gitewokarasi hamwe n’Ikoraniro ry’umurimo, bikurikirwe n’ururirimbo. Maze, umucungezi w’umuzunguruko azoca ashikiriza insiguro y’iminuta 30. Nk’uko bisanzwe bigirwa mu gihe c’urugendo rwiwe, uwundi musi uzoba ugenewe Inyigisho ya Bibiliya y’ishengero, ikazokurikirwa n’ururirimbo be n’insiguro y’umurimo ishikirizwa n’umucungezi w’umuzunguruko. Iryo koraniro rizosozerwa n’ururirimbo be n’isengesho.

6. Umucungezi w’umugwi arangura uruhara uruhe?

⁶ Amakoraniro yo gusohoka mu ndimiro: Abacungezi b’imigwi bazogenwa n’inama y’abakurambere kugira ngo barabe ibijanye n’imigwi isohoka mu ndimiro bongere bitwararike abayigize. Igihe bikenewe ko umukozi w’ishengero arangura iryo banga, akwiye kwitwa “umusuku w’umugwi.”

7. Ni ibiki dushobora kwitega ku bijanye n’urutonde rushasha rw’amakoraniro y’ishengero?

⁷ Nk’uko vyamaze kuvugwa, tuzoronka akaryo ko kurimbura ibintu vyigisha kandi biremesha, ibizodufasha gukomeza ubucuti dufitaniye na Yehova. Ivyo bizotuma tuba abamamaji be n’abigisha babishoboye, bamenyerejwe ku bwo kurangura ubusuku bwimbuka kuruta.—Ef. 4:13, 14; 2 Tim. 3:17.

8. Ni gute kwitegura imbere y’igihe bizotugirira akamaro vyongere bikagirire n’abandi?

⁸ Gutegura imbere y’igihe ayo makoraniro bizodufasha kwitunira bimwe biboneka ku vyiyumviro bikurubikuru bizoshimikwako mw’ikoraniro rimwerimwe ryose. Tuzoronka twese akaryo ko gutanga insasanuro, gutyo tugire ico duterereye ku guhanahana indemesho kwiza igitangaza. (Rom. 1:11, 12; Heb. 10:24) Intumbero yacu ikwiye kuba iyo gutuma ‘iterambere ryacu ryibonekeza’ mu “[gu]koresha neza ijambo ry’ukuri.”—1 Tim. 4:15; 2 Tim. 2:15.

9. Umwiyemezo wacu ni uwuhe, kandi kubera iki?

⁹ Turahimbawe cane n’ayo mahinduka ahambaye yerekeye amakoraniro y’ishengero. Ese twese twobandanya gukoresha ubuyobozi “umushumba w’umwizigirwa kandi w’ubwenge” aturonsa tukongera tukaguma twiyegereje Umwungere wacu Mukuru uko aguma adutegura ku bijanye na ya “makuba” akomeye yimirije!—Mat. 24:21, 45; Heb. 13:20, 21; Ivyah. 7:14.