Isekeza ritunganijwe neza rivamwo ivyiza

María Isabel ni umwamamaji akiri muto w’umunyamwete wo mu gisagara ca San Bernardo mu gihugu ca Shili co muri Amerika y’Epfo. We n’umuryango wiwe ni bamwe mu bantu b’imvukira bo mu bwoko bw’Abamapuce. Uwo muryango wose uramaze igihe ushigikira ubishashaye utwigoro two gushinga ishengero rikoresha ururimi rw’ikimapuce, urwitwa kandi ikimapudunguni.

Igihe vyamenyeshwa ko Icibutso c’urupfu rwa Kristu cogizwe no mu kimapudunguni be n’uko hariho ubutumire bw’Icibutso 2.000 bwo muri urwo rurimi bwo gutanga, vyatumye María Isabel azirikana. None yari gukora iki kugira ngo afashe? Yaributse ivyabonywe vyerekeye ibindi Vyabona bakiri bato baroraniwe igihe babwira inkuru nziza abo bigana be n’abigisha. Yarayaze ico kintu n’abavyeyi biwe, maze bafata ingingo bari hamwe yuko María Isabel yogerageza kwiyumvira ingene yotanga ubutumire kw’ishure. None yabigenjeje gute?

Ubwa mbere, María Isabel yarasavye abayobozi b’ishure uruhusha rwo kumanika agapapuro k’ubutumire kw’irembo rikuru ry’iryo shure. Barabimwemereye bongera baramukeza ku kuba yibwirije kugira ico kintu. Umusi umwe mu gitondo abanyeshure bagira bahamagarwe, umuyobozi w’iryo shure yarashikirije mbere itangazo rijanye n’ubwo butumire akoresheje icuma kiduza amajwi!

Mu nyuma, María Isabel yarasavye ko yoca mu birasi vyose. Abigisha bamaze kumuha uruhusha, yarabajije abanyeshure bo mu kirasi kimwekimwe cose nimba muri bo hoba harimwo Abamapuce. Avuga ati: “Nibwira yuko kuri iryo shure ryose hobonetse kumbure abanyeshure 10 canke 15 bo mu miryango y’Abamapuce, mugabo habonetse abaruta abo, nkaba nahavuye ntanga ubutumire 150!”

“YARI YITEZE UMUNTU AKUZE KURUTA”

Umugore umwe yabonye ka gapapuro k’ubutumire kari kuri rya rembo ry’ishure, yarasavye ngo bamubwire uwo yobaza ibijanye n’urwo rubanza. Iyumvire ukuntu yatangaye igihe bamurungika ku kigeme k’imyaka cumi! María Isabel avuga amwenyura ati: “Yari yiteze umuntu akuze kuruta.” María Isabel amaze guha ubutumire uwo mugore no kumusigurira muri make, yaramusavye aderese yiwe kugira ngo we n’abavyeyi biwe bazomugendere bamubwire n’ibindi ku bijanye n’Ubwami bw’Imana. Abamamaji 20 bakorera mu cibare kivugwamwo ururimi rw’ikimapudunguni barahimbawe cane no kubona uwo mugore ari kumwe n’abandi bantu 26 bashimishijwe b’Abamapuce bitavye Icibutso. Uwo mugwi usigaye ari ishengero riteye imbere!

Uko woba ungana kwose, woba wokwibwiriza nk’ukwo nyene ugatumira abo mwigana canke abo mukorana, ngo baze ku Cibutso, ku nsiguro y’icese kibure kw’ihwaniro ry’intara? Ubona gute ugize ubushakashatsi mu bisohokayandikiro vyacu kugira ngo urabe ivyabonywe vyoshobora kuguha ivyiyumviro vy’ukuntu wotuma uwo mugambi uroranirwa? Vyongeye, nusenge usaba impwemu nyeranda ya Yehova kugira ngo igufashe kugira umutima rugabo wo kuvuga ibimwerekeye. (Luka 11:13) Ubigize, na wewe nyene woshobora guhimbarwa no gutangazwa n’ivyova mu kigoro kawe gatunganijwe neza kandi bikakuremesha cane.