Baritanze babikunze muri Équateur

UMUVUKANYI umwe akiri muto wo mu Butaliyano yari mu mukazo. Ni ho yari agiheza amashure yisumbuye akaba yari yarushije abandi bose bigana, ico gihe na ho incuti ziwe hamwe n’abigisha bakaba bariko bamuhimiriza kuja muri kaminuza. Ariko rero hari haciye imyaka mike uwo muvukanyi, ari we Bruno, yiyeguriye Yehova akaba yari yasezeranye gushira ivyo Imana igomba imbere y’ibindi mu buzima bwiwe. None yafashe ingingo iyihe? Asigura ati: “Nari narabwiye Yehova mw’isengesho yuko nzobaho nisunga ukwiyegura kwanje nkongera nkamushira mu kibanza ca mbere. Mugabo muri iryo sengesho nongeyeko ndabikuye ku mutima yuko ntipfuza ubuzima burambira, ahubwo ko nipfuza ubuzima bwuzuye ibikorwa bitandukanye mu murimo wiwe.”

Haciye imyaka mikeyi, Bruno yari muri Équateur muri Amerika y’Epfo. Avuga ati: “Yehova yarishuye isengesho ryanje kuruta uko nari ndavyiteze.” Ashitse muri Équateur, yaratangaye igihe yahurirayo n’abandi bakiri bato benshi na bo nyene bari barimukiyeyo kugira ngo bakorere Yehova ku rugero runini kuruta.

ABAKIRI BATO ‘BAGEZA YEHOVA’

Bruno, cokimwe n’abandi bakiri bato ibihumbi bo hirya no hino kw’isi, yaremeye akamo Yehova yateye kagira gati: “Enda nimungeze . . . murabe ko ntazobagomororera ingomero z’amajuru, nkabacuncuburirako vy’ukuri umuhezagiro.” (Mal. 3:10) Babitumwe n’urukundo bakunda Imana, barafashe ingingo yo ‘kugeza Yehova’ mu gutanga babikunze umwanya wabo, inguvu zabo be n’ivyo batunze kugira ngo bashigikire igikorwa cayo mu gihugu aho abamamaji b’Ubwami bakenewe kuruta.

Abo bakozi b’umutima ukunze bakimara gushika iyo baba barungitswe, baribonera yuko “ivyimburwa [ari] vyinshi mugabo abakozi [bakaba] bake.” (Mat. 9:37) Nk’akarorero, Jaqueline aturuka mu Budagi yandikiye ishami ryo muri Équateur akamwemwe kamusya ati: “Maze imyaka irenga ibiri gusa nkorera ng’aha muri Équateur, nkaba maze kuronka abantu 13 twigana Bibiliya, 4 muri bo bakaba bitaba amakoraniro badahorereza. Ivyo none ntibiteye umunezero?” Chantal aturuka muri Kanada yigana ati: “Mu 2008, narimukiye mu karere ko muri Équateur ko ku nkengera y’ikiyaga, hakaba hari ishengero rimwe gusa. Ubu muri ako karere hari amashengero atatu n’abatsimvyi barenga 30. Nta kintu na kimwe cogereranywa no kubona abantu benshi bashasha nk’abo batera imbere!” Yongerako ati: “Mperuka kwimukira mu gisagara kiri ku metero 2743 muri ya Misozi yitwa les Andes. Ico gisagara kirimwo abantu barenga 75.000 n’ishengero rimwe gusa. Ni icibare cimbuka cane! Ndahimbarwa cane n’ubusuku ndangura.”

HARABAMWO INGORANE

Ariko ntiwumve, gukorera mu kindi gihugu birimwo ingorane zitoroshe. Nkako, abakiri bato bamwebamwe barashikiwe n’intambamyi n’imbere y’uko bimuka. Kayla ava muri Leta Zunze Ubumwe avuga ati: “Ukuntu abavukanyi bamwebamwe bo mu gihugu cacu bavyakira nabi batabigiranye imvo mbi vyaranca intege. Ntibatahura igituma nipfuza kwimukira mu kindi gihugu gukora ubutsimvyi. Rimwe na rimwe, vyaratuma nibaza nti: ‘Noba nafashe ingingo ibereye?’” Naho vyari ukwo, Kayla yarafashe ingingo yo kwimuka. Asigura ati: “Amasengesho menshi natuye Yehova be n’ibiyago birebire nagiraniye n’abo dusangiye ukwemera bahumuye, vyaramfashije kubona yuko Yehova ahezagira agatima ko kwitanga.”

Benshi birababera intambamyi kwiga urundi rurimi. Siobhan ava muri Irlande avuga ivyo yibuka ati: “Kuba ntashobora guserura ivyiyumviro vyanje vyarambabaza cane. Nabwirijwe kwiga kwihangana, kwiga urwo rurimi ndabigiranye umwete, no kwitwenga igihe naba mvuze amakosa.” Anna ava muri Estoniya na we avuga ati: “Kumenyera ubushuhe bwo mu karere gashushe, inkungugu nyinshi no kutaronka amazi yo kwoga ashushe vyarapfuma ubigereranije no kwiga igisupanyoli. Vyarashika nkumva notana n’akabando. Nabwirijwe kwiga kwibanda ku vyo nashobora, aho kwibanda ku makosa navuga.”

Ntitwokwirengagiza ingorane ijanye n’inkumbu. Jonathan ava muri Leta Zunze Ubumwe, yiyemerera ati: “Haciye igihe gito nshitse naracitse intege kubera ko nari natandukanye n’abagenzi banje be n’umuryango wanje. Mugabo narikuyemwo izo nyiyumvo mu kwitunira ku kwiyigisha Bibiliya no ku busuku. Budakeye na kabiri, ibintu biteye akamwemwe nibonera mu ndimiro be n’abagenzi bashasha naronse mw’ishengero vyaramfashije gusubira kugira umunezero.”

Iyindi ngorane ijanye n’ubuzima. Birashoboka ko buba butandukanye n’ubwo umuntu aba amenyereye. Beau ava muri Kanada, atubwira ati: “Iyo umuntu ari mu gihugu ciwe c’amavukiro, abona ko kuba afise ibintu vya nkenerwa, nk’umuyagankuba n’amazi, ari ikintu gisanzwe. Mugabo ng’aha, ivyo bintu biraza bikongera bikagenda uko vyishakiye.” Ubukene, uburyo bwo kwiyunguruza butameze neza be n’ukutamenya gusoma no kwandika, na vyo nyene usanga birangwa mu bihugu vyinshi bikiri mu nzira y’amajambere. Ines ava muri Otrishe arihanganira ivyo bintu mu kwibanda kuri kamere nziza z’abantu bo muri ako karere. Avuga ati: “Ni abakiranyi cane, baritonda, barafashanya kandi baricisha bugufi. N’ikiruta vyose, baritwararika rwose kumenya vyinshi ku vyerekeye Imana.”

“UMUHEZAGIRO GUSHIKA AHO HADASUBIRA KUBAHO UMUKENO”

Naho abo bakiri bato bose bakorera muri Équateur bagize ivyo bahevye, babona ko Yehova abaronsa “ibirengeye kure n’iyo ivyo” bari biteze. (Ef. 3:20) Nkako, babona ko baronse “umuhezagiro gushika aho hadasubira kubaho umukeno.” (Mal. 3:10) Uku ni ko biyumva ku bijanye n’ubusuku bwabo:

Bruno: “Umurimo naranguriye ng’aha muri Équateur nawutanguriye muri ka karere gakwegera k’uruzi Amazone. Mu nyuma, narafashije mw’iyagurwa ry’ibiro vy’ishami vyo muri Équateur. Ubu nkorera kuri Beteli. Nkiri mu Butaliyano, narafashe ingingo yo gushira Yehova mu kibanza ca mbere, kandi ariko arashitsa koko icipfuzo canje co kugira ubuzima bushimishije kandi burimwo ibikorwa bitandukanye mu murimo wiwe.”

Beau: “Nararushirije kwiyegereza Yehova kubera ko muri Équateur umwanya wanje wose ndawukoresha mu bikorwa bijanye n’ivy’impwemu. Uretse ivyo, ndafise n’umuhezagiro wo kugira ingendo nja kuratira ijisho ibibanza vyizavyiza, ico kikaba ari ikintu namye nipfuza kugira.”

Anna: “Sinabona yuko vyoshoboka ko jewe umwirebange nogira ubuzima nk’ubw’umumisiyonari. Mugabo ubu ndazi yuko bishoboka. Biciye ku muhezagiro wa Yehova, ndahimbarwa cane no guhindura abantu abigishwa, kwubaka Ingoro z’Ubwami no kuronka abagenzi bashasha.”

Elke: “Nkiri mu gihugu canje c’amavukiro Otrishe, akenshi narasenga Yehova ndamusaba ko noronka inyigisho ya Bibiliya imwe gusa. Ng’aha, mfise inyigisho za Bibiliya 15! Kwibonera umunezero abatohoji ba Bibiliya bariko baratera imbere bafise, bituma numva nshize akanyota cane.”

Joel: “Gushika mu karere utazi kugira ngo ukorere Yehova, ni ikintu gihambaye uba ugize. Uriga kurushiriza kwiheka kuri we, kandi biratera umunezero kwibonera ukuntu ahezagira utwigoro ugira! Mu mwaka wa mbere maze ng’aha kuva mvuye muri Leta Zunze Ubumwe, umugwi nkoreramwo warongerekanye uva ku bamamaji 6 ushika kuri 21. Icibutso citabwe n’abantu 110.”

WEHO BITE?

Yemwe bene wacu namwe bashiki bacu mukiri bato, uko ivyanyu vyifashe vyoba vyobakundira gukorera mu kandi karere ko mu mahanga canke ko mu gihugu canyu aho abamamaji b’Ubwami bakenewe kuruta? Birumvikana ko gufata ingingo ikomeye nk’iyo bisaba ko umuntu abitegekanya yitonze. N’ikiruta vyose, ategerezwa kuba akunda cane Yehova n’abantu kugira ngo afate iyo ngingo. Nimba ufise urwo rukundo ukaba kandi ukwije ibindi bintu bisabwa, nusenge Yehova ubigiranye ubwira ku bijanye no gukorera mu kandi karere. Vyongeye, nuyage n’abavyeyi bawe bakirisu be n’abakurambere b’ishengero ku bijanye n’icipfuzo ufise. Woshobora kubona ko na wewe nyene ushobora kugira uruhara muri uwo muce w’umurimo mweranda uteye umunezero kandi umara akanyota.

[Iciyumviro nyamukuru ku rup. 3]

“Amasengesho menshi natuye Yehova be n’ibiyago birebire nagiraniye n’abo dusangiye ukwemera bahumuye, vyaramfashije kubona yuko Yehova ahezagira agatima ko kwitanga.”​—Kayla ava muri Leta Zunze Ubumwe

[Uruzitiro/Ifoto ku rup. 6]

Ukuntu wokwitegurira gukorera mu kandi karere

• Nutsimbataze utumenyero twiza two kwiyigisha

• Nusubire wihweze Igikorwa dukorera Ubwami co muri Myandagaro 2011, urupapuro rwa 4-6

• Nuyage n’abandi bigeze gukorera mu kandi karere

• Nugire ubushakashatsi ku bijanye n’imico y’ako karere be n’ivyahabaye muri kahise

• Niwige ibintu vy’ishimikiro bijanye n’ururimi rwaho

[Uruzitiro/Ifoto ku rup. 6]

Abavukanyi bamwebamwe bakorera mu kandi karere ko mu mahanga canke mu gihugu cabo baronka amahera bifashisha mu . . .

• kuza barakora amezi makeyi buri mwaka mu gihugu cabo c’amavukiro

• gupangisha inzu yabo canke gukotesha urudandaza rwabo

• gukora akazi biciye kuri Internet

[Amafoto ku rup. 4, 5]

1 Jaqueline ava mu Budagi

2 Bruno ava mu Butaliyano

3 Beau ava muri Kanada

4 Siobhan ava muri Irlande

5 Joel ava muri Leta Zunze Ubumwe

6 Jonathan ava muri Leta Zunze Ubumwe

7 Anna ava muri Estoniya

8 Elke ava muri Otrishe

9 Chantal ava muri Kanada

10 Ines ava muri Otrishe