Harumagedoni​—Bamwe bavuga ko ari iki?

“Abakoraniriza hamwe ahantu hitwa Haru–Magedoni mu giheburayo.”​—IVYAHISHUWE 16:16.

WUMVISE ijambo “Harumagedoni” uca ubona iki? Hari aho woba uca ubona icago gikomeye. Naho iryo jambo riboneka rimwe gusa muri Bibiliya, mu mihingo myinshi yo kw’isi rirasubirwamwo kenshi n’ibimenyeshamakuru be n’indongozi z’amadini.

Ivyiyumviro abantu benshi bafise ku bijanye na Harumagedoni vyoba bihuye n’ivyo Bibiliya yigisha? Birahambaye ko tumenya inyishu y’ico kibazo. Kubera iki? Kubera ko kumenya ukuri ku bijanye na Harumagedoni bishobora kugukuramwo ubwoba budakenewe, bigatuma ubona neza kazoza, kandi bikagira ico bihinduye ku kuntu ubona Imana.

Rimbura ibi bibazo bitatu, maze ivyiyumviro abantu benshi bafise ku bijanye na Harumagedoni ubigereranye n’ivyo Bibiliya yigisha vy’ukuri.

1. HARUMAGEDONI COBA ARI ICAGO GITERWA N’UMUNTU?

Abamenyeshamakuru n’abashakashatsi barakunze gukoresha ijambo “Harumagedoni” bariko baravuga ivyago biterwa n’abantu. Nk’akarorero, Intambara ya mbere n’iya kabiri z’isi yose ziswe Harumagedoni. Inyuma y’izo ntambara, abantu baragize ubwoba bw’uko Leta Zunze Ubumwe za Amerika na Leta Zunze Ubumwe z’Abasoviyeti vyotanye mu mitwe bikoresheje ibirwanisho ruhonyanganda. Ibimenyeshamakuru vyise iyo ntambara “Harumagedoni iturutse ku birwanisho ruhonyanganda.” Muri iki gihe, abashakashatsi baratinya ko itosekazwa ry’ibidukikije rizohindura cane ikirere gikikuje isi, bakagabisha ko hagiye kuba “Harumagedoni itewe n’ihinduka ry’ikirere.”

Iyo nsobanuro bayiha yerekana iki? Yerekana ko abantu ari bo bafise mu minwe kazoza k’isi n’ubuzima bwose buri kuri yo. Amaleta atahakerebukiye ngo agire ico akoze, isi izokwononekara ubutakivayo.

Bibiliya yigisha iki? Imana ntizoreka ngo abantu batikize isi. Bibiliya idusubiriza umutima mu nda yuko Yehovaa ataremeye isi “ubusa gusa.” Ahubwo, yayiremye “ngo ibeko abantu.” (Yesaya 45:18) Imana ntizoreka ngo abantu bahonye isi, ahubwo “[izo]honya abahonya isi.”​—Ivyahishuwe 11:18.

2. HARUMAGEDONI COBA ARI ICAGO C’ICADUKA?

Rimwe na rimwe, ivyago vy’ivyaduka bikomakomeye abamenyeshamakuru bavyita “Harumagedoni.” Nk’akarorero, mu 2010 raporo imwe yaravuze ibijanye n’ico umuhinga umwe yise “Harumagedoni muri Hayiti.” Iyo raporo yariko iradondora imibabaro yatewe n’ikinyamugigima gikomeye cakubise ico gihugu, ivyo cononye be n’abo cahitanye. Abamenyeshamakuru n’abahinguzi b’amasenema ntibakoresha gusa iryo jambo ku bintu bimaze kuba, ariko kandi bararikoresha ku vyo batinya ko bizoba. Nk’akarorero, barakoresheje iryo jambo “Harumagedoni” mu kudondora ingaruka biyumvira ko zoba hamwe igisyo co mu kirere coseka isi.

Iyo nsobanuro bayiha yerekana iki? Yerekana ko Harumagedoni ari ikintu gipfa kwiyadukiza kikajaniranya ababi n’abeza. Nta co wokora ngo wikingire ntiguhitane.

Bibiliya yigisha iki? Harumagedoni si icago gipfa kwiyadukiza kigatema gikuzako. Ahubwo riho, mu gihe ca Harumagedoni ababisha ni bo gusa bazorandurwa. Bibiliya isezerana yuko vuba “umubisha [atazoba] akiriho; kandi uzokwitegereza koko aho yahora, umubure.”​—Zaburi 37:10.

3. IMANA YOBA IZOTIKIZA ISI KURI HARUMAGEDONI?

Abanyamadini benshi bemera yuko hazoba intambara ya nyuma aho iciza n’ikibi bizotana mu mitwe bigatuma uwu mubumbe tubako uhona. Mw’itohoza ryagizwe muri Leta Zunze Ubumwe za Amerika n’urwego rumwe (Princeton Survey Research Associates), basanze ibice 40 kw’ijana vy’abakuze babajijwe bemera yuko isi izorangirira mu “ntambara izoba kuri Harumagedoni.”

Iyo nsobanuro bayiha yerekana iki? Yerekana ko abantu batari bagenewe kubaho ibihe bidahera kw’isi be n’uko isi itaremwe ngo yameho. Imana yaremye abantu ifise intumbero y’uko umusi uri izina bazopfa bose.

Bibiliya yigisha iki? Bibiliya iravuga itomora ko Imana “yashinze isi ku bibanza vyayo bishimangiye; ntizogenda inyiganyijwe gushika igihe kitagira urugero, emwe gushika ibihe bidahera.” (Zaburi 104:5) Ku bijanye n’ababa kw’isi, Bibiliya ivuga iti: “Abagororotsi bazokwigabira isi, kandi bazoyibako ibihe bidahera.”​—Zaburi 37:29.

Biratomoye yuko Bibiliya ivuguruza ivyiyumviro vyinshi abantu benshi bafise ku bijanye na Harumagedoni. None ukuri ni ukuhe?

[Akajambo k’epfo]