Woba uruhurira abandi?

KU MPERA z’Ubumanuko bw’urukurikirane rw’imisozi yitwa Anti-Lebanoni ni ho hari Umusozi Herumoni, uwufise isonga ry’ubwiza butangaje riri ku metero 2.814 hejuru y’urugero rw’ibahari. Mu kiringo kinini c’umwaka, isonga rya Herumoni riba ryuzuyeko ibibarafu, ivyo bikaba bituma umwuka ususurutse wo mw’ijoro uca hejuru y’iryo songa, wibumbabumba maze ugacika urume. Urwo rume ruca rumanukira ku biti vyo mu bwoko bw’isederi no ku biti vy’ivyamwa biri hepfo gatoya ku nkike y’umusozi, hamwe no ku biti vy’inzabibu biri ku mucamo w’uwo musozi. Mu kiringo kirekire c’ici muri Isirayeli ya kera, mwene urwo rume rupfutse cari co kintu nyamukuru catuma ibimera bigumana akabombera.

Mu ruririmbo rumwe rwahumetswe n’Imana, ubumwe buruhura buri hagati y’abasavyi ba Yehova busanishwa n’“ikime co kuri Herumoni, gitonda ku misozi y’i Siyoni” (Zaburi 133:1, 3). Nka kurya nyene Umusozi Herumoni utuma ibimera bironka urume rupfutse, turashobora gutuma abo duhura baruhurirwa. None ivyo twobigira gute?

Akarorero Yezu yatanze mu kuruhurira abandi

Yezu Kristu yaragira ikintu gikomeye agize ku bandi. Mbere no kumarana na we akanya gatoya vyaratuma umuntu yumva aruhuriwe cane. Nk’akarorero, umwanditsi w’Injili Mariko yigana ati: “[Yezu] afata nya bana mu maboko yiwe atangura kubahezagira, abarambitseko ibiganza” (Mariko 10:16). Ese ukuntu ivyo bitegerezwa kuba vyararuhuriye abo bana!

Mw’ijoro rya nyuma yamaze kw’isi ari umuntu, Yezu yarogeje ibirenge vy’abigishwa biwe. Ukwicisha bugufi kwiwe gutegerezwa kuba kwarabakoze ku mutima. Yezu yaciye ababwira ati: “Nabahaye icitegererezo, kugira ngo, nk’uko nabagiriye, abe ari ko mugiriranira namwe” (Yohani 13:1-17). Ni vyo, na bo nyene bari bakeneye kuba abicisha bugufi. Naho intumwa zitaciye ubwo nyene zitahura agaciro k’ayo majambo ya Yezu kandi mu nyuma muri iryo joro nyene zikaba zaratanguye guhazuka ku bijanye n’uwoba yasa na mukuru muri bo, Yezu ntiyaciye atwarwa n’ishavu. Ahubwo riho, yarabafashije kuzirikana abigiranye ukwihangana (Luka 22:24-27). Mbere n’“igihe yatukwa, [Yezu] ntiyasubizayo igitutsi”. Nkako, “igihe yababazwa, ntiyahiga, mugabo yaguma yiha umwe aca imanza mu bugororotsi”. Akarorero Yezu yatanze mu kuruhurira abandi, birabereye ko tukigana.​—1 Petero 2:21, 23.

Yezu yavuze ati: “Mwishireko ingǒgo yanje munyigireko, kuko nitonda kandi niyoroheje mu mutima, namwe muzoronka ukuruhuka kw’imitima yanyu” (Matayo 11:29). Niwihe ishusho uriko urigishwa na Yezu ubwiwe. Abantu bo mu karere Yezu yavukiyemwo bamaze kumwumva yigisha mw’isinagogi yabo, barajorewe maze bavuga bati: “Mbega uyu muntu yakuye hehe ubu bukerebutsi n’ibi bikorwa vy’ububasha?” (Matayo 13:54). Gusoma ivyerekeye ubuzima bwa Yezu be n’ubusuku yaranguye birashobora kutwigisha vyinshi ku bijanye n’ukuntu dukwiye kuba abaruhurira abandi. Nimuze dusuzume ingene Yezu yatanze akarorero kadasanzwe biciye ku mvugo iremesha be no ku kugira agatima ko gufasha abandi.

Nugumane imvugo iremesha

Gusambura inyubakwa biroroshe cane kuruta kuyubaka. Ico ciyumviro nyene co gusambura be no kwubaka kirakora mu bijanye n’imvugo dukoresha. Kubera yuko turi abanyagasembwa, twese turakora amakosa. Umwami Salomo yavuze ati: “Nta mugororotsi ariho kw isi akora ivyiza ntacumure” (Umusiguzi 7:20). Kubona amakosa y’uwundi muntu be no kumusenyura ukoresheje amajambo acumita usanga vyoroshe (Zaburi 64:2-4). Ariko kugumana imvugo iremesha, usanga vyovyo bisaba ubuhanga.

Yezu yakoresha ururimi rwiwe kugira ngo yubake abandi. Yarabaronkeje ukuruhurirwa kwo mu vy’impwemu mu kubabwira inkuru nziza y’Ubwami (Luka 8:1). Yezu kandi yararuhuriye abacitse abigishwa biwe, mu kubahishurira Se wiwe wo mw’ijuru (Matayo 11:25-27). Ntibitangaje kubona abantu barumva bakwegerewe na Yezu!

Ariko abanditsi n’Abafarizayo bo, ntibitaho ivyo abandi baba bakeneye. Yezu yavuze ati: “Bakunda ikibanza kiboneka kuruta ibindi ku mfungurwa zo ku migoroba be n’ivyicaro vy’imbere mu masinagogi” (Matayo 23:6). Kukaba nkako, barakengera abantu basanzwe, bakavuga bati: “Iri sinzi ritazi Itegeko ni ibivume” (Yohani 7:49). Nta nkeka ko agatima nk’ako ata kintu na kimwe kiruhura kavamwo!

Imvugo dukoresha akenshi iragaragaza ico turi imbere be n’ingene tubona abandi. Yezu yavuze ati: “Umuntu mwiza asohora ivyiza mw’itunga ryiza ry’umutima wiwe, mugabo umuntu mubi asohora ibibi mw’itunga ryiwe ribi; kuko akanwa kiwe kavuga bivanye n’ibibogaboga mu mutima” (Luka 6:45). None ni igiki twokora kugira ngo twiyemeze neza ko imvugo dukoresha iruhurira abandi?

Kimwe mu vyo dushobora gukora ni ugufata umwanya tukiyumvira imbere y’uko tuvuga. Mu Migani 15:28 hagira hati: “Umutima w’umugororotsi witondera ivyo wishura”. Mwene ukwo kwitondera ivyo wishura, ari kwo kuzirikana, ntibikenewe ko gufata umwanya muremure. Tubanje kwiyumvira gatoya imbere y’uko tuvuga, akenshi turashobora kumenya ingene ivyo tuvuga biza kwakirwa. Turashobora kwibaza duti: ‘Ubwo ivyo ngira mvuge vyoba biranga urukundo? Vyoba ari ivy’ukuri, canke ni urusaku gusa? Ryoba ari “ijambo riziye mu gihe kibereye”? Ubwo vyoba biza kuruhurira vyongere bikomeze abo ngira ndabibwire?’ (Imigani 15:23). Nimba dushitse ku ciyumviro c’uko iryo jambo ritubaka canke rije ku gihe kitabereye, nimuze tugire akigoro kavuye ku mutima ko kureka kurivuga. N’ikirushirije kuba ciza, ni kubera iki tutogerageza kurisubiriza n’irindi ryubaka kuruta kandi rije hageze? Amajambo umuntu avuze atabanje kwiyumvira ameze “nk’ugucumita kw’inkota”, mu gihe amajambo yubaka yo ‘avura’.​—Imigani 12:18.

Ikindi kintu codufasha ni ukwibanda ku bintu bituma abo dusangiye ukwizera baba abafise agaciro mu nyonga z’Imana. Yezu yavuze ati: “Nta muntu ashobora kuza kuri jewe kiretse Data yandungitse amukwegereye” (Yohani 6:44). Yehova arabona kamere nziza ziri muri umwumwe wese mu basavyi biwe b’intahemuka, mbere n’abo twoba tubona ko umenga bafise kamere zigoye. Biciye ku kugira utwigoro kugira ngo tubone kamere nziza bafise, tuzoronka imvo yotuma tubavuga neza.

Nufashe abandi

Yezu yaratahura bimwe vyuzuye intimba abacinyizwa bagira. Ni co gituma, “abonye amasinzi, bamute[ye] ikigongwe, kuko bari baratabaguwe, basabagiye nk’intama zitagira umwungere” (Matayo 9:36). Ariko rero Yezu ntiyagarukirije gusa ku kubona ukwo kuntu bari bateye ikigongwe, ahubwo yaciye agira ico akoze. Yatanze ubutumire bugira buti: “Nimuze kuri jewe, mwese abacumukura n’abaremerewe, nanje ndabaruhurira”. Yavuze kandi aya majambo asubiriza umutima mu nda, agira ati: “Ingǒgo yanje [iro]roshe n’umutwaro wanje u[ra]hwahutse”.​—Matayo 11:28, 30.

Muri kino gihe, tubayeho mu “bihe bitoroshe kandi bigoye kwihanganira” (2 Timoteyo 3:1). Abantu benshi bumva baremerewe n’“amaganya y’ivy’iyi si” (Matayo 13:22). Abandi na bo bikoreye umutwaro w’ibintu bitesha umutwe bibashikira (1 Abanyatesalonika 5:14). None dushobora gute kuronsa ukuruhurirwa abantu bagukeneye? Nka kumwe kwa Kristu, turashobora kugira ico dufashije kugira ngo umutwaro wabo uremuruke.

Abantu bamwebamwe barondera kwiremurura mu kuyagira abandi ingorane bafise. Igihe abantu bavunitse umutima baje kuturonderako imfashanyo, ubwo twoba dufata umwanya wo kubumviriza twitonze? Kuba umuntu yumviriza abigiranye impuhwe bisaka kwigumya. Bisaba ko tuguma twibanze ku vyo uwo muntu ariko aravuga, aho kwiyumvira ukuntu tuza kumwishura canke ukuntu iyo ngorane yotorerwa umuti. Biciye ku kwumviriza twitonze, ku kuguma turabana n’uwo muntu, be no ku kumwenyura igihe bibereye kubigira, turerekana ko tumwitwararitse.

Mw’ishengero rya gikirisu, hariho uturyo twinshi two kuremesha abo dusangiye ukwizera. Nk’akarorero, igihe twitaba amakoraniro ku Ngoro y’Ubwami, turashobora kugerageza kumenya abariko baranyinyana n’ingorane z’amagara. Rimwe na rimwe usanga hakenewe gusa ko dufata iminuta mikeya imbere canke inyuma y’amakoraniro kugira ngo tubabwire amajambo yo kubaremesha. Twoshobora kandi kwitwararika kumenya abadashika kw’ikoraniro ry’Inyigisho y’igitabu y’ishengero mu mugwi dukukira. Kumbure turashobora kubakura biciye kuri telefone, maze tukabaserurira yuko twitwararika ineza yabo canke tukagira ico tubafashije.​—Abafilipi 2:4.

Abakurambere bakirisu bikoreye umutwaro uremereye w’ibanga bajejwe mw’ishengero. Turashobora kugira ibitari bike dukoze kugira ngo dufashe kubaremurura uwo mutwaro, mu gusenyera ku mugozi umwe na bo be no mu kwitwararika kurangura twicishije bugufi igikorwa ico ari co cose twoshobora gushingwa. Ijambo ry’Imana riduhimiriza riti: “Mugamburukire ababaja imbere kandi muyoboke, kuko baguma barinze ubuzima bwanyu nk’abazogira ico babazwa; kugira ngo ivyo babikorane akanyamuneza, bataniha, kuko ivyo vyogirira nabi mwebwe” (Abaheburayo 13:17). Biciye ku kugaragaza umutima ukunze wo gukorana na bo, turashobora kuruhurira abo bagabo “bahagarikira neza”.​—1 Timoteyo 5:17.

Nurushirize kugira imvugo iremesha no gukora ibikorwa vyo gufasha abandi

Urume rupfutse ruboneka biciye ku tuma dutoduto cane tw’amazi tutagira igitigiri tumanuka bukebuke, utwo tuma umuntu akaba atamenya n’iyo twavuye. Muri ubwo buryo nyene, ukuruhurira abandi ntikuboneka biciye ku gukora igikorwa gishimwa kimwe gusa, ahubwo kuboneka biciye ku dukorwa twinshi tuguma dukora kugira ngo tugaragaze kamere nk’iza Kristu igihe cose.

Intumwa Paulo yanditse ati: “Mu vy’urukundo rwa kivukanyi mugiriranire ikibabarwe. Mu vyo guterana iteka mube aba mbere” (Abaroma 12:10). Nimuze dushire mu ngiro iyo mpanuro ya Paulo. Ese vy’ukuri tworuhurira abandi biciye ku mvugo dukoresha be no ku bikorwa dukora!

[Ifoto ku rup. 16]

Urume rwo ku Musozi Herumoni, ni kimwe mu bintu bituma ibimera bigumana akabombera

[Ifoto ku rup. 17]

Umuntu yumviriza abandi abigiranye impuhwe, arabaruhurira