Ibibazo vy’abasomyi

Umukirisu yoba ashobora kuguma afise ijwi ryo mu mutima ritamwagiriza ikibi mu gihe yokwemera gukora akazi gasaba ko yitwaza ikirwanisho?

Ivyabona vya Yehova iyo bava bakagera barafatana uburemere ibanga bajejwe n’Imana ryo kuronsa imiryango yabo ivyo ikeneye mu vy’umubiri (1 Timoteyo 5:8). Ariko rero, hari ubuzi bumwebumwe usanga vyibonekeza ko buteye kubiri n’ingingo ngenderwako za Bibiliya, ubwo umuntu akaba akwiye kubwirinda. Aho twovuga ubuzi bufitaniye isano n’ivy’akamari, ugukoresha amaraso kutabereye, be n’ivy’ukuremesha abantu kunywa itabi (Yesaya 65:11; Ivyakozwe n’intumwa 15:29; 2 Ab’i Korinto 7:1; Ab’i Kolosayi 3:5). Hari n’ubundi buzi usanga Bibiliya itabwiyamiriza mu buryo budomako, mugabo bukaba bwoshobora gutuma umuntu akora ibintu biteye kubiri n’ijwi ryo mu mutima ryiwe canke bitsitaza abandi.

Gukora akazi gasaba ko umuntu yitwaza inkoho canke ikindi kirwanisho, ni ingingo umwumwe wese yifatira. Ariko rero, gukora akazi gasaba ko umuntu yitwaza ikirwanisho bituma ashobora kwagirwa n’amaraso mu gihe vyoba ngombwa ko akoresha ico kirwanisho. Ku bw’ivyo, umukirisu arakeneye kurimbura ajanisha n’isengesho nimba yokwemera kubwirizwa gufata ingingo y’igihutihuti yo gukoresha canke kudakoresha ikirwanisho, mu bihe ubuzima bw’umuntu bushobora kuhasinzikarira canke bukahasigara. Kwitwaza ikirwanisho bituma umuntu ashobora gukomereka canke gupfa mu gihe hogira uwuza kumutera canke kumwihora.

Vyongeye, ingingo umuntu yofata irashobora kugira ico ikoze no ku bandi. Nk’akarorero, turazi ko ibanga nyamukuru umukirisu afise ari iryo kwamamaza inkuru nziza y’Ubwami bw’Imana (Matayo 24:14). Wumva none umuntu yoshobora gute kwigisha abandi ‘kwuzura n’abantu bose’ kandi yitwaza ikirwanisho igihe aba ariko arondera ikimubeshaho (Abaroma 12:18)? Bite ho ku bana canke ku bandi bagize umuryango? Kugira ikirwanisho mu nzu vyoba vyoshira ubuzima bwabo mu kaga? Vyongeye, abandi boba botsitazwa n’ingene umuntu abona ivyerekeye ico kibazo?​—Ab’i Filipi 1:10.

Muri iyi “misi y’iherezo”, abantu b’“inkazi, badakunda ivyiza” baguma barushiriza kwongerekana (2 Timoteyo 3:1, 3). Umuntu azi ivyo, yoba yoshobora kuguma ‘atariko umugayo’ hamwe yohitamwo gukora akazi kamusaba kwitwaza ikirwanisho koshobora gutuma haba amatati hagati yiwe na mwene abo bantu (1 Timoteyo 3:10)? Nawe urumva ko bidashoboka! Ku bw’iyo mvo, ishengero ntiryobona ko umuntu nk’uyo ‘atariko umugayo’ mu gihe yobandanya kwitwaza ikirwanisho kandi amaze guhabwa impanuro yo muri Bibiliya itanganywe umutima mwiza (1 Timoteyo 3:2; Tito 1:5, 6). Muri ico gihe, umuntu nk’uyo, yaba umugabo canke umugore, ntiyoba abereye guterwa agateka kadasanzwe na kamwe mw’ishengero.

Yezu yarasubirije umutima mu nda abigishwa biwe yuko, mu gihe boba bashira ivyungura Ubwami imbere y’ibindi vyose mu buzima bwabo, bada keneye kurazwa ishinga bimwe birenze urugero n’ukuronka ivya nkenerwa mu buzima (Matayo 6:25, 33). Kukaba nkako, twizigiye Yehova tugaherezako, “azo[t]uramira: ntazokwigera akundira umugororotsi kunyiganyizwa”.​—Zaburi 55:22.