Urwaruka ruribaza
Ni ibiki nokwitega mu mubano w’ababiranye?—Igice ca 2
MU NOMERO IHERUKA, Twarihweje bimwebimwe mu vyiza n’ingorane wokwitega mu mubano w’ababiranye.
MURI IYI NOMERO, turihweza igituma ukwiye kwitega gushikirwa n’ivyo utari witeze.
Shira aka kamenyetso ✔ ku ruzitiro urwo ari rwo rwose ruhuye n’ivyo witeze, maze ivyo wahisemwo ubitondeke ukoresheje ibiharuro, uhereye ku co ubona ko gihambaye kuruta ibindi.
Niteze ko uwo tuzokwubakana . . .
✔
□ □ azoba asa n’irirenga
□ □ azotuma numva ifyeri
□ □ azoba afise imigambi nk’iyanje
□ □ azoba akunda uburyo bwo kwisamaza nk’ubwo nkunda
Nimba uriko urarondera uwo muzokwubakana, nta kibi kiri mu kumwitegako ivyo bintu. Woshobora mbere kuronka uwubikwije vyose. Ariko rero tuvugishije ukuri, uko igihe kihaca abantu barahinduka, n’ibintu bigahinduka.
Iciyumviro nyamukuru: Kugira uroranirwe mu mubano w’ababiranye, utegerezwa kwitega gushikirwa n’ivyo utari witeze.
Agakuru keza. Ibintu bimwebimwe utari witeze mu mubano w’ababiranye vyoshobora kuba ari vyiza cane mu buryo utari witeze.
“Ubu ko tumaze kwubakana na Maria,a agatima k’urweze afise ndakabona mu buryo ntari bwigere ndagashima tukireshanya. Kubera ko tutigira agahambaye, mbere n’ingorane zidushikira tubona ko ata co zivuze.”—Mark.
Agakuru katari keza. Ibintu bimwebimwe utari witeze mu mubano w’ababiranye vyoshobora kuba ari bibi. Rimbura aka karorero.
● Dufate yuko wewe n’uwo muzokwubakana mufise umugambi wo kuja gukorera aho abamamaji b’Ubwami bakenewe kuruta ahandi. Mugabo vyogenda gute nka hamwe mumaze kubana uwo mwubakanye yofatwa n’indwara ikomeye igatuma uwo mugambi mutawushikako? Tuvugishije ukuri ivyo birashoboka, kubera ko Bibiliya ivuga yuko “ibintu bibi bishikira bose!” (Umusiguzi 9:11, Holy Bible—Easy-to-Read Version) Nta gukeka ko wobabazwa n’ukuntu uwo mwubakanye amerewe, ukongera ukavunika umutima kubera yuko udashitse ku mugambi wawe. Ariko rero, hamwe ibintu nk’ivyo utari witeze vyoshika, nta kindi wokora atari ukuvyakira ukwo nyene. Nakare, wubakanye n’umuntu, ntiwubakanye n’umugambi.
Iciyumviro nyamukuru: Nk’uko Bibiliya ibivuga, abubaka izabo bazogira “amakuba” ku rugero kanaka. (1 Abakorinto 7:28) Rimwe na rimwe ayo makuba ava ku bintu utari witeze.
Wokwitegurira gute ibintu utari witeze? Niwubaka urwawe, uzokenera ibintu bibiri:
1. KUBONA IBINTU NK’UKO BIRI
Naho mwe n’uwo muzokwubakana mwoba muberanye gute, urakwiye kwitega ko
● mutazokwama muhuza ku kantu kose.
● mutazokwama mushira imbere bimwe.
● mutazokwama mukunda ibikorwa bimwe.
● mutazokwama mukundana nka kera.
Ibintu nk’ivyo duhejeje kubona birakunda gushika. Mugabo ntibizosambura umubano wanyu kiretse mubirekeranye! Uribuka yuko Bibiliya ivuga ko urukundo “rwihanganira vyose” be n’uko ‘rutigera runanirwa.’—1 Abakorinto 13:4, 7, 8.
Ico womenya: Impera n’imperuka, ingorane zibashikira mu mubano wanyu si zo zizowukomeza canke zizowusambura ahubwo ni ukuntu muzifatamwo.—Abakolosayi 3:13.
2. NUSHIKAME KU NDAGANO
Nimba mwe n’uwo mwubakanye mwiyemeje kugumana naho hoshika iki, muzoshobora kwihanganira ingorane mutari mwiteze.—Matayo 19:6.
Hari abavuga ko indagano y’ukwabirana ituma umubano uba umuzigo. Ahubwo nyabuna, igira igihushane c’ivyo! Indagano iratuma ubucuti mufitaniye budahungabana. Igihe hashitse ikintu mutari mwiteze, mwe n’uwo mwubakanye muzorondera kugitorera umuti, aho kwahukana.
Kugira ngo urushirize kwumira ku ndagano y’ukwabirana, uzobwirizwa kwiyumvira ibijanye n’umubano w’ababiranye ubigiranye ubwenge atari nk’indoto gusa. Mu kwerekana iryo tandukaniro, nugerageze gukora uyu mwimenyerezo.
1. Dufate ko wahawe itike ya gusa y’indege kugira ngo uje aho ari ho hose mw’isi. Wohitamwo kuja he kandi kubera iki?
Aho noja: ․․․․․
Icotuma njayo:
․․․․․ kuratira ijisho
․․․․․ imico kama yaho
․․․․․ ikirere caho
․․․․․ kwisamaza
․․․․․ ikindi ․․․․․
2. Niwiyumvire ko ufise itike yo kujayo gusa kandi ko uzoca ugumayo.
Ubu hoho wohitamwo kuja he, nimba hariho?
Aho noja: ․․․․․
canke
․․․․․ Nokwigumira aho ndi.
Muri uwo mwimenyerezo, ahantu ha mbere wahisemwo ko woja hashobora kuba hatandukanye n’aha kabiri. Naho hoba hadatandukanye, ahagira kabiri ushobora kuba wabwirijwe kuhiyumvira mu buryo butandukanye n’aha mbere. Aho kwiha ishusho uri mu karuhuko wiyicariye ku musenyi wo ku kiyaga canke uriko uritemberera mu misozi, wabwirijwe kwiha ishusho uba aho hantu uriko urashikirwa n’ibintu vyiza be n’ingorane vyo mu buzima bwa misi yose.
Ukwo ni ko ukwiye kwiyumvira ibijanye n’umubano w’ababiranye. Nakare, ibintu vyoshobora guhinduka uko haca igihe. Nta gukeka ko wewe n’uwo mwubakanye na mwebwe nyene muzohinduka. Ukuroranirwa kwanyu ahanini kuzovana n’ubushobozi mufise bwo kwitega gushikirwa n’ivyo mutari mwiteze be n’ubwo kubitorera umuti igihe vyadutse.
Ico ukwiye kuzirikana: Ubu utarubaka urwawe, uvyifatamwo gute igihe hashitse ibintu utari witeze mu buzima?
Raba n’ayandi makuru yofasha imiyabaga ku muhora wa Internet www.jw.org
[Akajambo k’epfo]
a Bamwebamwe mu bavugwa muri iki kiganiro si ko basanzwe bitwa kubera ko bitashimwe ko bamenyekana.
[Uruzitiro/Amafoto ku rup. 17]
IVYO URUNGANWE RWAWE RUVUGA
Sirvan—Rimwe na rimwe abantu bareshanije barahitamwo kwirengagiza ibintu vyoteza ingeramizi babona ku bo bazokwubakana. Ivyo birimwo akaga. Amaherezo wokwubaka urwawe mugabo ntugire agahimbare, ugasigara ubona ko uburyo bwonyene bwo gusubira kugira agahimbare ari ukwahukana n’uwo muntu wigeze kuba wiyumvira ko utobaho mutari kumwe.
Danielle—Abantu benshi bubaka izabo kubera gusa biyumvira ko vyitezwe ko bubaka hatararengerana. Ariko rero, narumvise abantu bavuga yuko ari vyiza kurindira, kubera ko abakiri bato bahinduka mu buryo bwinshi. Mbere n’abubakanye bahimbawe bavuze ko iyo babimenya bari kurindira kandi gato.
[Uruzitiro ku rup. 18]
UBONA GUTE UBAJIJE ABAVYEYI BAWE?
Ni ivyiza ibihe be n’ingorane izihe vyabashikiye mutari muvyiteze ari ho mucubakana? Nokwitegurira gute gushikirwa n’ivyo ntari niteze ninubaka urwanje?
[Ifoto ku rup. 16]
[Ifoto ku rup. 18]