Yehova yaradufashije ‘gukurira aho twagiye turaterwa’

Mats na Ann-Catrin bitavye ishure rya Gileyadi mu 1979, maze bagenda baraterwa ahatandukanye, ni ukuvuga barungikwa gukorera ahatandukanye. Barakoreye muri Birmaniya, mu Buganda, muri Irani, mw’izinga rya Maurice, muri Tanzaniya no muri Zayire. Igihe bari mw’ishure rya Gileyadi ni ho umwe mu bigisha babo ari we Jack Redford, yabaha iyo mpanuro. Iyo mpanuro yarabafashije mu ncuro nyinshi bagiye barahindurirwa igikorwa, ivyo twogereranya no guterwa, kurandurwa no gusubira guterwa. Reka batwiganire iyo nkuru.

Mats, wotwiganira ingene wamenye ukuri?

Mats: Mu gihe c’Intambara ya kabiri y’isi yose, papa yaba muri Polonye. Ico gihe yariboneye uburyarya butagira izina bwarangwa mw’idini rya gatolika. Akenshi yakunda kwivugira ati: «Hategerezwa kuba hariho idini ry’ukuri naho ntararitora.» Haciye igihe nahavuye mbona ko ivyo yavuga vyari vyo. Narakunda kugura ibitabu vyo gusoma, kimwe muri vyo kikaba cari igitabu c’ubururu citwa Ukuri kujana mu buzima budahera. Umutwe w’ico gitabu warandyoheye cane ku buryo naraye mpejeje kugisoma kuri uwo musi nyene ndakironka. Bwakeye maze kubona ko nubuye ukuri.

Kuva muri Ndamukiza 1972, narasomye ibindi bitabu bitari bike vyasohowe n’Ivyabona vya Yehova, kandi nararonse inyishu z’ibibazo nari mfise bishingiye kuri Bibiliya. Nabaye nka wa mudandaza Yezu yavuga yubura imaragarita imwe y’agaciro kanini agaca agenda akagurisha ivyo afise vyose kugira ayigure. Na jewe maze kwubura ukuri, ukwo nogereranya n’iyo maragarita, naciye mpeba canke mera nk’uwugurishije imigambi yose nari mfise yo kwiga kaminuza no kuba umuganga, kugira ngo ngure ukwo kuri. (Mat. 13:​45, 46) Nabatijwe ku wa 10 Kigarama 1972.

Mu kiringo c’umwaka umwe, abavyeyi banje be na mutoyi wanje, na bo nyene barakiriye ukuri maze barabatizwa. Muri Mukakaro 1973 naciye ntangura umurimo udasanzwe w’igihe cose. Mu batsimvyi b’abanyamwete bo mw’ishengero iwacu harimwo umudada asa n’irirenga yitwa Ann-Catrin kandi yitwararika cane ivy’impwemu. Twaratanguye gukundana maze mu 1975 duca turubakana. Mu myaka ine yakurikiye, twaba mu gisagara ciza cane co muri Suwede citwa Strömsund carimwo abantu banyotewe cane ukuri.

Ann-Catrin: Papa yamenye ukuri ariko arasozera kaminuza i Stockholm. Naho ico gihe nari mfise amezi atatu gusa, yama antwara ku makoraniro no mu ndimiro. Kubera ko mama atabikunda, yaguma agerageza kwerekana ko Ivyabona batavuga ukuri ariko arabura ibimenyamenya. Na we nyene rero yahavuye afata ingingo yo kubatizwa. Nabatijwe mfise imyaka 13 hanyuma nca ntangura ubutsimvyi mfise imyaka 16. Nabanje gukorera mu gisagara citwa Umeå, ahari hakenewe cane abamamaji, mu nyuma na ho nca mba umutsimvyi adasanzwe.

Twe na Mats tumaze kwubakana, twarironkeye umunezero wo gufasha abantu batari bake kumenya ukuri. Umwe muri bo yari umwigeme w’umuyabaga yitwa Maivor. Yarahevye inkino yakunda cane kugira ngo akorere Yehova, mu nyuma na ho akorana ubutsimvyi na mutoyi wanje. Bahavuye bitaba ishure rya Gileyadi mu 1984, ubu bakaba ari abamisiyonari muri Équateur.

Mu murimo wanyu w’ubumisiyonari, ni igiki cabafashije gukurikiza ya mpanuro yo ‘gukurira aho mwatewe’?

Mats: Mu murimo wacu w’ubumisiyonari, novuga ko twagiye turarandurwa aha duterwa ahandi. Ariko twaragerageje kuguma ‘dushinze imizi’ muri Yezu mu kwihatira kumwigana, canecane ukwicisha bugufi kwiwe. (Kol. 2:​6, 7) Nk’akarorero, aho kwitega ko abavukanyi b’aho twarungitswe gukorera bakora ibintu nk’uko twebwe dusanzwe tubimenyereye, twaragerageza nyabuna kurondera igituma bakora ibintu uku canke kuriya. Twashaka gutahura ukuntu babona ibintu be n’imico yabo. Uko twarushiriza kwigana Yezu, ni ko twarushiriza kubona ko tumeze nk’igiti «gitewe hafi y’imigezi y’amazi», ku buryo dushobora gukurira aho twoterwa hose.—Zab. 1:​2, 3.

Ann-Catrin: Iyo igiti kibatuwe kigaterwa ahandi, kirakenera n’akazuba. Yehova na we yamye atubera «izuba.» (Zab. 84:11) Yaraturonkeje umuryango w’abavukanyi urangwa urukundo n’igishika. Nk’akarorero, mw’ishengero ritoyi twarimwo i Tehran muri Irani, abavukanyi baratugaragarije igishika nka kimwe c’abantu bavugwa muri Bibiliya. Twari gushima kuguma muri Irani, ariko muri Mukakaro 1980 igikorwa c’Ivyabona vya Yehova carahagaritswe, duca duhabwa amasaha 48 ngo tube twavuyeyo. Twaciye turungikwa muri Afrika mu gihugu citwa Zayire (ubu citwa Kongo).

Igihe namenya ko turungitswe muri Afrika, nararize. Amakuru nari narumvise y’uko hariyo inzoka nyinshi n’indwara nyinshi, yarantera ubwoba cane. Ariko rero, hari abagenzi bacu babiri somambike bari barakoreyeyo igihe kirekire, batubwiye bati: «Ko mutarigera mujayo, nimugende muvyirabire. Turazi ko muzohakunda.» Erega uko babivuze ni ko vyahavuye bigenda. Abavukanyi bo muri Afrika twasanze barangwa n’urukundo be n’igishika. Uzi n’inkuru, igihe igikorwa cacu cabuzwa maze bikaba ngombwa ko tuva muri Zayire inyuma y’imyaka itandatu twari tuhamaze, naritwenze kuko ico gihe hoho nariko nsenga Yehova ndamubwira nti: «Ndakwinginze ntituve muri Afrika.»

Ni imihezagiro iyihe mwagiye murironkera mu murimo wa Yehova?

Mats: Nohera ku kuvuga ubucuti bukomeye twagiraniye n’abandi bamisiyonari bava mu bihugu bitandukanye. Novuga kandi ko twironkeye umunezero udasanzwe wo kuyobora inyigisho nyinshi za Bibiliya mu bihugu bimwebimwe twagiye turakoreramwo. Vyarashika umwe wese muri twebwe akayobora inyigisho nka 20. Ikindi cadukoze ku mutima, ni urukundo be n’ubwakiranyi bw’abavukanyi bacu bo muri Afrika. Igihe twaba tugendeye amashengero yo muri Tanzaniya, twarara mu muduga wacu wo mu bwoko bwa Kompi Volkswagen, twaba twaparitse hafi y’umuhana w’umuvukanyi. Ico gihe, abavukanyi baratugaragariza ubwakiranyi, bagakora ibirenze ivyo bashoboye. (2 Kor. 8:3) Ariko rero, hariho ikintu twakunda cane. Cari ikiringo twita umwanya w’inkuru. Haba ari ku mugoroba, aho twe na Ann-Catrin twicara tukayaga ingene umusi wagenze, tugaca dushimira Yehova kubona yabanye natwe.

Ann-Catrin: Jewe umuhezagiro udasanzwe novuga ni ukumenyana n’abavukanyi bo hirya no hino kw’isi. Twarize indimi nshasha, ushizemwo igifarsi, igifaransa, ikiganda be n’igiswahili. Aho hose twaba turiko turiga n’imico y’abavuga izo ndimi. Twaritwararitse abigishwa bashasha, turaronka abagenzi nyakuri, twongera turakorana na bo ‘twunze ubumwe’ mu murimo wa Yehova.—Zef. 3:9.

Twariboneye n’ibintu vyiza vyinshi Yehova yaremye. Igihe cose twemeye igikorwa twaba dushinzwe mu murimo wa Yehova, ni nk’aho twaba twemeye ko Yehova atuja imbere akatubera nk’indongozi igiye kudutembereza. Yaratweretse ibintu tutopfuye tubonye.

Ni ingorane izihe zabashikiye, kandi ni igiki cabafashije kuzihanganira?

Mats: Mu myaka n’iyindi, twararwaye indwara zitandukanye, ushizemwo na malariya. Ann-Catrin yaranabazwe nka kangahe tutari tuvyiteze. Vyongeye, twarahagarika umutima kubera ko abavyeyi bacu bariko bariterera mu myaka. Ni co gituma dukengurukira cane abo tuvukana bagumye babitwararika. Ico gikorwa bagikoranye ukwihangana, umunezero be n’urukundo. (1 Tim. 5:4) Naho ari ukwo, vyarashika tukumva twiyanse kubera ko twipfuza gufasha vyinshi abavyeyi bacu, aho kuguma tubafasha gusa turi kure yabo.

Ann-Catrin: Mu 1983, igihe twari tugikorera muri Zayire, nararwaye ikiza ca kolera ndaremba. Hari umuganga yabwiye Mats ati: «Mukure muri iki gihugu uyu musi nyene.» Ku musi wakurikiye, twaciye twurira indege itwara imizigo tuja muri Suwede, akaba ari yo ndege yonyene twashobora kuronka.

Mats: Twararize cane kubera ko twiyumvira yuko umurimo wacu w’ubumisiyonari urangiye. Naho wa muganga yiyumvira ko Ann-Catrin atazorusimba, yahavuye atora mitende. Haciye umwaka, twarasubiye muri Zayire duca tuja mw’ishengero ritoyi rikoresha igiswahili ry’i Lubumbashi.

Ann-Catrin: Igihe twari i Lubumbashi, narasamye mbanyi ariko ica irakoroka. Naho ata mugambi twari dufise wo kuvyara abana, urupfu rw’uwo mwana rwaradutuntuje cane. Ariko muri ico kiringo c’umubabaro, Yehova yaraturonkeje ibindi vyiza tutari twiteze. Twaratanguje inyigisho za Bibiliya nyinshi tutari bwigere turonka. Mu kiringo kidashika umwaka, ishengero twarimwo ryavuye ku bamamaji 35 rija kuri 70, abitaba amakoraniro na bo bava kuri 40 bashika ku 220. Kubera ko twamara umwanya munini mu ndimiro, Yehova yarahezagiye utwigoro twacu, bica bituma numva nduhuriwe cane. Ariko ntiwumve, akenshi birashika tukiyumvira ka kana kacu. Si twe tuzobona harageze igihe Yehova azodukiza burundu intuntu dufise.

Mats: Igihe kimwe, Ann-Catrin yaratanguye kwumva afise uburuhe budasanzwe. Muri ico kiringo nyene, na jewe barantoye kanseri y’urura igeze kure, nkaba nari nkeneye kubagwa bimwe bikomeye. Ariko ubu naratoye mitende, kandi na Ann-Catrin aracakorera Yehova uko ashoboye kwose.

Twahavuye dusanga atari twe twenyene dushikirwa n’ingorane. Inyuma ya jenoside yabaye mu Rwanda mu 1994, twaragiye kuraba abavukanyi benshi bari mu makambi y’impunzi. Kwibonera ukwizera kwabo, ukwihangana kwabo, n’umutima w’ubwakiranyi bafise, vyaratwigishije ko Yehova afise ububasha bwo gushigikira abasavyi biwe mu kigeragezo ico ari co cose boba bariko baracamwo.—Zab. 55:22.

Ann-Catrin: Iyindi ngorane yadushikiye igihe twitaba ibirori vyo kwegurira Yehova ishami ryo mu Buganda muri 2007. Inyuma y’ivyo birori, twarafashe urugendo tuja i Nairobi muri Kenya turi umugwi w’abamisiyonari n’Abanyabeteli nka 25. Tugira dushike ku mupaka wa Kenya, hari igikamyo cataye inzira gica kigonga umuduga twarimwo. Umushoferi wacu be n’abavukanyi n’abadada batanu baciye bapfa ubwo nyene, uwundi mudada na we apfira ku bitaro. Si twe tuzobona turasubiye kubabona.—Yobu 14:​13-15.

Nahavuye nkira ibikomere nagiriye muri iryo sanganya. Ariko rero, jewe n’umugabo wanje turi mu bantu benshi bagize ihahamuka kubera iryo sanganya. Jewe vyakunda kumfata mw’ijoro, ngaca mvyuka numva umengo mfise ibimenyetso vy’umuntu agomba abe pararize. Vyari biteye ubwoba cane. Ariko gusenga Yehova no gusoma ivyanditswe twakunda cane, vyaradufasha gutekana. Twarituye n’abaganga kandi vyaradufashije cane. Ubu vya bimenyetso vyaragabanutse, kandi tuguma dusaba Yehova ngo adufashe guhoza abafise iyo ngorane.

Igihe watwiganira ingene Yehova yabafashije kwihanganira ibihe bigoye mwaciyemwo, wavuze ko yabatwaye «nk’amagi mabisi.» Washatse kuvuga iki?

Mats: Iyo mvugo ikomoka ku mvugo yo mu giswahili ivuga ngo «Tumebebwa kama mayai mabichi», ni ukuvuga ngo «twatwawe nk’amagi mabisi.» Nka kurya nyene umuntu atwara amagi mabisi yengenga kugira ngo ntameneke, ni ko na Yehova yatwitwararitse yengenga mu bikorwa twagiye turashingwa. Twamye turonka ivyo dukeneye, mbere n’ibirenze. Kimwe mu vyatweretse ko Yehova adukunda kandi atwitwararika, ni impuhwe twagiye turagaragarizwa n’Inama Nyobozi.

Ann-Catrin: Reka ndababwire akarorero k’ingene Yehova yatwitwararitse yengenga. Umusi umwe nararonse telefone imbwira ko papa aremvye cane kandi ko bamutwaye mu bitaro bimwe vyo muri Suwede. Umugabo wanje ntiyari bwakire neza malariya. Vyongeye, kubera ko ata mahera twari dufise yo kugura itike y’indege yotujana iwacu, twabonye ko vyoba vyiza tugurishije umuduga wacu. Ariko twaciye turonka telefone zibiri ziduhamagara: Iya mbere yari iy’umugabo n’umugore bari bumvise uko ivyacu vyifashe baca bipfuza kuturihira itike yo kugenda. Iyindi na yo yaje iva ku mudada yitereye mu myaka yari yaraziganije uduhera mu gasandugu yanditseko ngo «Ku bw’uwuri mu nkenero.» Mu mwanya mutoyi gusa, Yehova yari ahaserutse.—Heb. 13:6.

Musubije amaso inyuma mu myaka 50 mumaze mu murimo w’gihe cose, ni ivyigwa ibihe mwahakuye?

Ann-Catrin: Nahavuye ntahura ko inkomezi zacu ziva ku ‘kuguma dutekanye kandi tukizigira’ Yehova. Igihe tumwizigiye, urugamba turimwo aca arugira rwiwe. (Yes. 30:15; 2 Ngo. 20:​15, 17) Kubera ko twemeye gukorera Yehova uko dushoboye kwose mu gikorwa cose yadushinze, twarironkeye imihezagiro myinshi tutopfuye turonse iyo tuja mu bindi.

Mats: Icigwa nyamukuru nize ni ukwiheka kuri Yehova mu bihe vyose, maze nkibonera ingene anserukako. (Zab. 37:5) Nta gihe na kimwe yigeze ananirwa kunshigikira. N’ubu turacavyibonera mu murimo dukorera muri Beteli yo muri Birmaniya.

Turizigiye yuko abakiri bato bipfuza kwagura umurimo wabo, na bo nyene bazokwibonera urukundo rudahemuka nk’urwo Yehova yatugaragarije. Nta gukeka ko nibemera ko Yehova abakoresha, bazokurira aho bazoterwa hose.