Ibiremwa vyose bikiyobokera ubutegetsi bw’Imana, vyarangwa n’ubumwe n’amahoro

Kubera iki dukeneye Ubwami bw’Imana?

Igihe abantu batangura kubaho, Umuremyi wacu, uwitwa Yehova, ni we wenyene yari Umutware. Yategeka abantu abigiranye urukundo. Yarabateguriye ahantu heza cane ho kuba, ni ukuvuga mw’itongo ryo muri Edeni, yongera abaronsa umukimba w’ibifungurwa. Ikigeretseko, yarashinze abantu igikorwa gihimbaye. (Itanguriro 1:28, 29; 2:8, 15) Abantu bari kwiberaho mu mahoro iyo baguma bagamburukira ubwo butegetsi bw’Imana burangwa urukundo.

Adamu yakiriye ca camwa Imana yababuza, agihawe na Eva. — Abantu ba mbere baranse ko Imana ibabera Umutware

Bibiliya ivuga ko hari umumarayika w’umugarariji, uwahavuye yitwa Shetani wa Mucokoranyi, yarwanije uburenganzira Imana ifise bwo gutegeka. Yavuze akikiriza yuko abantu borushirije guhimbarwa badategekwa n’Imana. Ikibabaje, abavyeyi bacu ba mbere Adamu na Eva barifatanije na Shetani mu kugarariza Imana.—Itanguriro 3:1-6; Ivyahishuwe 12:9.

Kubera ko Adamu na Eva bagararije ubutegetsi bw’Imana, baratakaje Iparadizo barimwo be n’icizigiro co kubaho ibihe bidahera bafise amagara meza. (Itanguriro 3:17-19) Ico kintu bakoze caragize ingaruka no ku bana babakomotseko. Bibiliya ivuga ko kuba Adamu yaracumuye vyatumye ‘igicumuro cinjira mw’isi maze na co gikwega urupfu.’ (Abaroma 5:12) Igicumuro carakweze n’ikindi kintu kibabaje. Nk’uko Bibiliya ivyerekana, “umuntu yaganje uwundi mu kumugirira nabi.” (Umusiguzi 8:9) Mu yindi mvugo, igihe abantu bitegeka bivamwo ingorane.

INGENE INTWARO Z’ABANTU ZATANGUYE

Nimurodi ahagaze n’ubwibone bwinshi. Inyuma yiwe, hari abantu bariko barubaka. — Nimurodi yaragararije Yehova

Umuntu wa mbere avugwa muri Bibiliya yabaye umutegetsi kw’isi ni Nimurodi, kandi yaragararije ubutegetsi bwa Yehova. Kuva mu gihe ca Nimurodi, abantu bafise ubukuru bagiye barabukoresha nabi. Mu myaka nka 3.000 iheze, Umwami Salomo yavuze ati: “[Narabonye] amosozi y’abahahazwa, mugabo nta muhoza bari bafise; kandi ku ruhande rw’ababahahaza hari ububasha.”—Umusiguzi 4:1.

N’ubu ni ko bikimeze. Mu 2009, raporo imwe ya ONU yavuze ko biguma birushiriza kwibonekeza yuko gutwara nabi ari “kimwe mu bintu nyamukuru biteza ingorane ziri mw’isi.”

IBINTU BIGIYE GUSUBIRA MU BURYO

Isi irakeneye abatware beza be n’intwaro nziza. Kandi ivyo nyene ni vyo Imana yadusezeraniye!

Amafoto: Ingaruka ziva ku ntwaro z’abantu. 1. Umugore wo muri Aziya yicaye ku kabarabara kabi, ateruye umwana ariko aramuririrako. 2. Umutama arwariye mu bitaro. 3. Abasoda bari ku rugamba bariko bararasa. 4. Abari mu myiyerekano barakaye, bakaba bariko barasemerera bafise n’ivyapa. 5. Umugore n’umukobwa wiwe bahagaze imbere y’inzu yabo, bakaba basanze ibiyo vy’umuryango vyamenaguritse. 6. Igisagara cuzuyemwo ivyuka bizanana mu matiyo, hamwe n’ibitsinga vy’umuyagankuba. — Nta ntwaro n’imwe y’umuntu, mbere naho yoba yari nziza gute, yashoboye gutorera umuti ingorane zikomeye zihanze abantu

Imana yarashinze Ubwami, ni ukuvuga intwaro izosubirira intwaro zose z’abantu, kandi ni bwo ‘bwonyene buzohangama gushika ibihe bidahera.’ (Daniyeli 2:44) Ubwo Bwami ni bwo abantu amamiliyoni bamye basenga basaba. (Matayo 6:9, 10) Ariko Imana si yo ubwayo izoganza ubwo Bwami. Ahubwo, yagenye uwigeze kuba umuntu ngo abe ari we aba Umutware wabwo. None Imana yagenye nde?