Dushime ubuntu-mvarukundo bwa Yehova
Tuzokwibuka urupfu rwa Kirisitu ku wa 24 Ntwarante
1. Yehova yatugaragarije gute ubuntu-mvarukundo?
1 Umwanditsi wa Zaburi yatangaje ati: “Abo ni bashimire Uhoraho ukugira neza kwiwe [canke “ku bw’ubuntu-mvarukundo bwiwe”, NW], n’ibikorwa bitangaje yakoreye abana b’abantu!” (Zab. 107:8). Ubuntu-mvarukundo bw’Imana burimwo n’ibindi uretse ikibabarwe ifitiye abantu. Ivyo biratomorwa muri aya majambo yo gushemeza yahumetswe agira ati: “[“Ubuntu-mvarukundo bwawe”, NW], Uhoraho, [bw]arandamiye” (Zab. 94:18). Mbega ubuntu-mvarukundo ntangere Yehova yagaragaje mu gutanga Umwana wiwe w’ikinege ku bwacu!—1 Yoh. 4:9, 10.
2. Twokwerekana gute ko dushimira Yehova?
2 Uko Icibutso c’urupfu rwa Kirisitu cegereza, twoshimira gute “ya Mana y’ubuntu-mvarukundo” (Zab. 59:17, NW)? Vyoba vyiza umwe wese muri twebwe afashe umwanya wo kuzirikana ku misi ya nyuma y’ubuzima bwa Yezu kw’isi (Zab. 143:5). Vyoba ngirakamaro kandi umwe wese akurikije rwa rutonde rudasanzwe rwo gusoma Bibiliya rushirwaho ku bw’Icibutso rwerekanwa mu gatabu Twihweze Ivyanditswe ku musi ku musi—2005, kandi niba bishoboka, akongera agasoma akagira n’ubushakashatsi mu kigabane ca 112-116 mu gitabu Umuntu Ahambaye no mu bindi bisohokayandikiro bishingiye kuri Bibiliya. Nuzirikane ku mirongo usoma wongere uyiyumvireko cane (1 Tim. 4:15). Kuzirikana kw’Ijambo ry’Imana tujanisha n’isengesho biragaburira imitima yacu eka mbere bikerekana n’urukundo dukunda Yehova.—Mat. 22:37.
3, 4. (a) Twokwigana gute agatima abavukanyi bacu bo muri Liberiya bagaragaje? (b) Ni bande utegekanya gutumira ku Cibutso?
3 Nuvyurire abandi umutima wo gushimira Imana: Mu mwaka uheze, abantu 16.760.607 ni bo bitavye Icibutso kw’isi yose. Mu kigwati kimwe co muri Liberiya, abavukanyi baho barandikiye ikete umukuru w’igisagara bamumenyesha icipfuzo bafise co guhimbariza Imfungurwa z’Umukama zo ku mugoroba muri ico gisagara arongoye. Uwo mukuru yarahaye abo bavukanyi uruhusha rwo gukoresha ikibuga c’umupira c’aho hantu ku bw’urwo rubanza yongera aranatunganya ivy’uko muri ako karere kose hashikirizwa itangazo rijanye n’urwo rubanza, ritumira abantu kurwitaba. Naho muri ico gisagara hariho abamamaji batanu gusa, ico Cibutso citabwe n’abantu 636!
4 Natwe twoshima kugira nk’ukwo nyene tugafasha abantu benshi bashoboka kugira ngo baze kwifatanya natwe guhimbaza Icibutso. Kubera iki utogira urutonde rw’abo wipfuza kuzotumira? Ishusho iri ku gipfukisho c’inyuma ca Réveillez-vous ! yo ku wa 8 Ntwarante be n’iyiri ku gipfukisho c’inyuma c’Umunara w’Inderetsi wo ku wa 15 Ntwarante ziratumira abantu kuza kuri ico Cibutso. Urashobora gukoresha n’udupapuro tw’ubutumire bw’Icibutso. Kuri utwo dupapuro, niwandikishe imashini canke wandike mu ndome ziboneka neza igihe be n’ikibanza Icibutso kizoberako, maze umuntu wese uzotumira umuhe kamwekamwe. Uko igenekerezo rya 24 Ntwarante ryegereza, urasubira kuraba umwe wese kugira umwibutse mwongere munonosore intunganyo izo ari zo zose mwagize zijanye n’uwo musi.
5. Tworemesha gute abatohoji ba Bibiliya kwitaba Icibutso?
5 Twofasha gute abatohoji ba Bibiliya bataritaba amakoraniro kugira ngo bitabe urwo rubanza bongere barwungukireko bimwe bishitse? Igihe cose mwize, nuze urafata akanya k’iminuta mikeya ko kumufasha gutahura akamaro ko guhimbaza Icibutso. Amayagwa meza wokoresha ushobora kuyasanga mu Munara w’Inderetsi wo ku wa 15 Ntwarante 2004, ku rupapuro rwa 3-7, no mu gitabu Comment raisonner ku rupapuro rwa 241-245 (mu co mu giswahili ni ku rupapuro rwa 352-356).
6. Ni kubera iki bihambaye ko ku Cibutso duha ikaze abashitsi?
6 Nuhe ikaze abashitsi: Ku Cibutso, niwegere abashitsi maze ubahe ikaze (Rom. 12:13). Nutunganye ivy’uko wicarana n’abo watumiye kandi urabe ko bafise Bibiliya n’igitabu c’indirimbo. Twoshima canecane kugira akigoro ko kuramutsa n’igishika abavukanyi be n’abavukanyikazi bahororokewe bihase bakaza ku Cibutso. Tubitwararikanye urukundo, vyoshobora kubafasha bagasubira kwifatanya n’ishengero badahorereza (Luka 15:3-7). Kuri urwo rubanza rweranda kuruta izindi zose, nimuze dukore uko dushoboye kwose kugira ngo turemeshe abandi kwifatanya natwe gushimira Yehova ku bw’ “ubuntu-mvarukundo [bwiwe] bwiza igitangaza”.—Zab. 31:21, NW.