Kwiga Igitabu Umuntu Ahambaye Kuruta Ababayeho Bose
1 Mu ndwi yo ku wa 3 Kigarama, tuzotangura kwiga igitabu Umuntu Ahambaye Kuruta Ababayeho Bose mu Nyigisho z’Igitabu z’Ishengero tugira. Ese ukuntu azoba ari umunezero gusubiramwo ubuzima n’ubusuku bwa Yezu Kirisitu! Kubera ko ico gitabu giteguwe mu buryo butandukanye gatoya n’ibindi bitabu tumaze kwiga, inyobozo nkeyi zishobora kuba ari kirumara.
2 Ico gitabu nta nomero gifise ku mpapuro, gutyo rero urutonde rwanditswe muri iki Gikorwa Dukorera Ubwami rutondeka ibigabane vyo kwiga, kenshi ku ndwi ku ndwi hakazokwigwa ibigabane bitatu canke bine. Ikigabane ca 35, c’111 n’ic’116 ni birebire kuruta ibindi, bizogaburwamwo ivyigwa bibiri kimwe kimwe cose. Umuvukanyi akwije ibisabwa amaze gusoma ikigabane cose (canke agatwe kose, nko ku kigabane ca 35, c’111 n’ic’116), umurongozi w’igitabu azoheza abaze ibibazo biri ku mpera y’ico kigabane kijanye n’ikigabane canke igihimba bihejeje gusomwa. Mu kigabane, inyishu ntizizokwama zikurikirana ku rutonde. Insasanuro ngufi kandi zitomoye zikwiye gushimikira ku mayagwa y’ico cigwa.
3 Inyuma y’aho, mukwiye gusoma ivyanditswe vyose vyatanzwe ku mpera y’ikigabane, umwanya ubibakundiye. Ivyanditswe birebire bishobora kugaburwamwo uduhimba dutoduto kugira ngo abamamaji batandukanye bashobore kugira uruhara mu kubisoma. Ibibazo bitomoye vyateguwe n’umurongozi bizofasha gusohora insasanuro ngirakimazi zerekana ukuntu ivyanditswe vyasomwe bifitaniye isano n’ivyashimikiweko mu gitabu. Ibibazo vyose be n’insasanuro zose bikwiye gufasha abitavye ikoraniro kwerekeza ivyiyumviro vyabo kuri Yezu Kirisitu, ku buzima bwiwe be no ku nyigisho ziwe.
4 Igitabu Umuntu Ahambaye kirimbura ubuzima bwa Yezu mu rutonde ibintu vyabereyemwo. Kwiha ishusho y’ukuntu ibintu vyagenda be no kugumiza mu muzirikanyi aho vyabereye, birashobora kudufasha vy’ukuri tukaguma tuvyibuka. Ni co gituma dukwiye kuraba neza yuko turimbura amasanamu ari mu mabara atandukanye kandi tukaja turaraba kenshi kw’ikarata iri ku ntango y’ico gitabu, ahakurikira amajambo y’intangamarara.
5 Intangamarara y’ico gitabu izorimburwa ku ndwi ya mbere. Mumaze gusoma ingingo zose ziri munsi y’agatwe, umurongozi azobaza ibibazo bijanye azoba yateguye. Iyo nyigisho ya mbere izoba itanze ishingiro ku bw’izindi zizogirwa mu kiringo c’umwaka uza. Urugero muzogezako mu kwererwa guhetura ayo mayagwa ruzova ahanini ku kuntu umwe wese mu bitaba ikoraniro azoba yiteguye. Umurongozi canecane akwiye kuba yiteguye neza ku ndwi ku ndwi kugira afashe umugwi kumenya neza wa muntu ahambaye kuruta ababayeho bose, ari we Umukama akaba n’Umucunguzi wacu, Yezu Kirisitu.