Ni Gute Dushobora Kwirwanako mu “Bihe Bigoye”?

¹ Ukwifata nabi kw’ubutunzi, ugukurwa mu kazi, ubushomeri n’uruhombo, ni ibintu tumenyereye cane muri ibi bihe vya none. Naho abasavyi ba Yehova “[atari] ab’isi” yonkowe ku Mana, barategerezwa kuba mw’isi iri muri mwene urwo ruhagarara rwo mu vy’ubutunzi. (Yoh. 17:15, 16; 1 Kor. 7:31) Bivuye ku bwitwararitsi, abacungezi b’ingenzi bamwebamwe barandikiwe amakete yo kubasaba ngo bamenyeshe ingorane biboneye abavukanyi bahangana na zo, uburyo birwanako, hamwe n’imfashanyo be n’impanuro bikenewe.

² Ku bavukanyi benshi, ukwifata nabi kw’ubutunzi kuhari kwaruguruye uturyo two kwagura imirimo yabo ya gikirisu. Igishimishije, bamwe barakoresheje umwanya wabo mu gukora bavyishakiye muri ya porogarama yacu yo kwubaka Ingoro z’Ubwami. Abandi bariyunze ku mirongo y’abatsimvyi bafasha n’abasanzwe. Agatima k’ubwishakire kareza umutima!

³ Ku rundi ruhande, bamwebamwe basanze birushiriza kubagora kugumya uburimbane mu gihe bahanzwe n’ingorane z’ivy’amahera. Ba serugo b’Abakirisu bose bafise ibanga riremereye ryo kuronsa imiryango yabo ivyo ikeneye bikwiye. (1 Tim. 5:8) Mugabo umwitwarariko wo kuronka ivyobabeshaho warateye ingorane mu mibano imwimwe. Ubushomeri no gukurwa mu kazi vyarabongereje uguhagarika umutima, bisiga benshi biyumva ko ataco bamaze. Ikibabaje, muri ivyo bihe, uko Umukirisu abona udusembwa tw’abavukanyi biwe kurashobora kurenga urugero bigatuma agira inyiyumvo mbi, kandi akagabanya umwete yari afise mu murimo w’Ubwami. Uwuhagarikiye ivyo vyose kandi ategerezwa kuba abigira yigamba, ni wa mwansi ruhebwa wa Yehova, ya “mana y’iki gihe” Shetani wa Mucokoranyi. Ni igiki none wogira kugira ngo ushobore kuzigama ukutadohoka kwawe wongere ugume ukomeye mu vy’impwemu muri bino “bihe bibi bigoye”?—Imig. 27:11; 2 Kor. 4:4; 2 Tim. 3:1.

⁴ ‘Guma Uremuruye Ijisho Ryawe’: Rimbura agaciro k’amajambo ya Yezu agira ati: “Itara ry’umubiri n’ijisho. Ijisho ryawe [“riremuruye,” NW], umubiri wawe wose u[zo]ba uri n’umuco.” (Mat. 6:22) Egome, turakwiye kugira ubuzima buremuruye “[tuka]bona ivy’Ubwami bw’Imana vyonyene, ibindi vyose tukabishira inyuma.” (Umunara w’Inderetsi wo muri Mukakaro 1989, urupapuro rwa 17) Ivyo bishoboka gute?

⁵ Mu myaka mirongo iheze, imiryango myinshi y’Abakirisu yarashoboye kugumana urugero rw’ukubaho neza ata ngorane nyinshi zihabaye. Ico vyavuyemwo, nk’uko umucungezi w’ingenzi umwe abivuga, “abavukanyi bacu kenshi baragira ingorane y’ugutahura ico kugira ‘ubuzima buremuruye’ bisobanura, na canecane mu gihe benshi bitababereye ngombwa ko bagira ivyo bagabanije bimwe biboneka.” Kubera ko abo baba mu kibano citwararika cane ivy’amaronko n’ivy’ukwinezereza gusa, bariretse bacikishwa intumva n’ukuntu iyi si idatezura gushira hejuru ubuzima burangwa n’ukwinezereza.

⁶ Mu gihe uhanuwe ngo ugire ubuzima buremuruye, uca wiyumvira iki? Kumbure wiyumvira yuko wigereranije n’ababanyi bawe usanga ubuzima bwawe mu vy’ukuri butaremerejwe nk’ubwabo, bushingiye ku cizigiro ca kazoza. Niwibuke ikigereranirizo Umunara w’Inderetsi watanze: “Abakirisu bumvira iyi mpanuro ya Yezu y’ukwitwararika ubwa mbere na mbere Ubwami bw’Imana, barateye intambwe nziza nziza baja imbere mu vy’ukuguma biga Bibiliya, mu vy’ukuja ku makoraniro hamwe no mu vy’igikorwa co mu ndimiro. Uko kuja imbere ni inkinzo ikomeye ituma umuntu atagwa. Ivyo vyogereranywa n’ukugenza ikinga. Abāgerageje kuguma kw’ikinga isa n’iyahagaze, barategera neza akamaro k’ukugenda uja imbere. Ni nk’uko nyene, igihe ugumye utera intambwe nziza nziza uja imbere ku bikorwa vya misi yose biraba ivy’umutima, urakingirwa ivy’ugutirimuka no kugwa.”—Flp. 3:16.

⁷ Aho kurimbura uburyo wogumya urugero wifitiye rwo kubaho, ni kuki utorimbura uburyo woremurura uburyo bwawe bwo kubaho? Umaze kutwibutsa kuba abagavye, nya Munara w’Inderetsi waduhimirije kutibagira yuko “ukwiremurura imitwaro bituma [tu]ronka umwanya munini w’ukwiyigisha, uw’ugutegura amakoraniro hamwe n’uw’ugufasha abandi . . . Umukirisu umwe w’umudandaza yavuze ati: ‘Igihe cose iciyumviro kinzamwo co kugura ikintu ntakeneye, canke gukora igikorwa atari ica nkenerwa, nca nigarura nibutse ivy’ukugira ubuzima [buremuruye]. Hari aho mpora nibabaza rwose.’ Ivyo si inyibutsa kuri umwe umwe wese muri twebwe? Igihe ushinga umugambi, akarorero nk’ukwubaka iyindi nzu canke gukora ikindi kintu, ni kuki utokwibaza uti: uyu mugambi wonkomeza mu vy’umutima hamwe n’abo mu rugo iwacu canke wombera intambamyi? Noba mu vy’ukuri nkeneye ibintu vyose ab’iyi si bahurumbira canke ntaco vyontwara n’aho noba ntabifise?” (Umunara w’Inderetsi wo muri Mukakaro 1989, urupapuro rwa 15) Ivyo twoba twari twaramenyereye ubu bishobora kuba bidashoboka mu vy’ubutunzi, canke mbere bikaba bitaranga ubukerebutsi uko ivy’ubutunzi bidabuka.

⁸ Ukugura ibintu kw’ideni mu buryo burenze urugero vyaratumye abavukanyi bamwebamwe basigara bari mu guhenuka mu vy’ubutunzi. Ugufata imyenda kutaranga ubukerebutsi kwarakweze amagume menshi. Ikirushirije kuba ciza ni ukuza uraziganya, ni ho uzoronka ayakwiye agushoboza kugura ikintu ayabona. Si ivy’imbeshere, kurindira imbere yo kugura vyarafashije benshi gutahura yuko ivyo bari bategekanije kugura mu vy’ukuri bitari nkenerwa.

⁹ Nutange Akarorero Keza: Ku ruhande rwawe urashobora gukora vyinshi kugira ngo ufashe abo mu muryango wawe. Niwigishe abana bawe akamaro k’ugukoresha amahera mu buryo buhimbara Yehova. Bafashe kandi gutsimbataza ‘ijisho riremurutse.’ Nushimike ku kwitwararika ivy’impwemu kuruta ivy’isi. Niwibuke ko abana bazokwigana. Uburyo bakoresha amahera mubatekerera birashobora kugaragaza neza uburyo ukoresha amahera yawe. Niwibaze, uti Ubwo nditwararika kubika ntahorereza amahera ku bw’intererano y’igikorwa c’Ubwami? Noba nshitsa neza ivyo nasezeranye vyo gutanga amahera yo gushigikira ukubungabunga Ingoro y’Ubwami, abatsimvyi badasanzwe, abamisiyonari, hamwe n’igikorwa c’Ubwami kirangurirwa kw’isi yose? Na canecane ubu turiko turashikiriza ibisohokayandikiro vyacu twisunze ya ndinganizo y’ivy’intererano, dushaka kugumiza mu muzirikanyi yuko urugero runini rw’ugushigikira igikorwa kirangurirwa kw’isi yose ruri kuri twebwe.

¹⁰ Ni uburyo bw’ukubaho bumeze gute dushira imbere y’abana bacu? Twoba tubaremesha gufata ideni ry’agacamutwe kugira ngo bazokwironkere inzu yabo bwite? Twoba duhanura abagiye kurushinga ko bogira ivyuma vyo mu nzu bigezweko vyose kuva bacubakana? Insasanuro zacu zoba zibaremesha gukoresha imyaka yabo ya mbere y’ubugeni mu busuku bw’igihe cose? Izo nyifato zoba zifasha abakiri bato kwubakira ubuzima bwabo ku mishinge ikomeye? Turavye ukuntu ibihe vyacu vyihuta, ese ukuntu ari ivy’ubukerebutsi gutsimbataza ubuzima bukomeye mu vy’impwemu kandi buremuruye!—Flp. 1:27.

¹¹ Nukorane Amakenga mu vy’Urudandaza: Mu mezi ya vuba yabayemwo ihindagurika ry’ivy’ubutunzi, abari bagumije ubuzima buremuruye baravyifashemwo neza kuruta. Turemera icese ukuri kw’imburizi ya Paulo igira iti: “Ntimuzimire: Imana yo nticokorwa; kukw ic’umuntu abiba cose ari co azokwimbura.” (Gal. 6:7) Ingorane izo ari zo zose z’ivy’ubutunzi zidushikira muri iki gihe zirashobora kuba zijanye n’ukunanirwa gukorana amakenga. “Umunyamakenga iy’abonye ikibi kije arīkinga, arikw imburabgenge zikomeza inzira zikīgabura.” (Imig. 22:3) Ni ibiki none umwe wese muri twebwe ashobora gukora kugira ngo twiyemeze yuko tubandanya gukorana amakenga?

¹² Ikigereranirizo Yezu yatanze kirabereye cane: “Ni nde muri mwebwe agomba kwubaka umutara w’amatafari muremure, [at]obanza kwicara, akarimbura igitigiri c’amahera yowubaka, ngw amenye yukw afise ayowunonosora? Ngo kumbure yoba ahejeje kwubaka amatafari y’itanguriro, ntashobore kuwuzuza; ababibonye bose bagatangura kumutwenga bat’Uyu yatanguye kwubaka, nt[iy]ashobora kwuzuza.” (Luka 14:28-30) Egome dutegerezwa guharura igiciro c’umutahe w’umugambi w’ubucuruzi. Mugabo urashobora kubaza uti, ni nde yomenye imbere y’igihe ukuntu ibi bihe vyocitse ibigoye?

¹³ Ni igiki cashitse igihe itongo ry’umugabo umwe ryamera cane? Yiyumviriye yuko hamwe yosambura ibigega vyiwe maze akubaka ibindi bininibinini, yoca avuga ati: “Mutima, ufise ibintu vyinshi bizohitikirana imyaka myinshi, ruhuka, urye, unywe, unezerwe.” Mugabo ni igiki Imana yamubwiye? “Wa gipfu we, mur’iri joro barakwaka ubugingo bgawe: non’ivyo wohitikiranije bizoba ivya nde?” None ni icigwa nyabaki dukwiye gukura muri ivyo? Yezu arasigura ati: “Umuntu yishingurira ni kw amera, atar’umutunzi mu vy’Imana.” Niwibuke rero yuko ari ibihambaye ko dusuzuma ivyo dutegekanya gukora, twisunze uko Yehova abona ibintu!—Luka 12:16-21.

¹⁴ Intumwa Paulo aradufasha kubona ibintu neza igihe yihanikiriza Timoteyo ati: “Ariko kwubaha Imana gufatanije no kubūmbga n’ivy’ufise kuvamw inyungu nyinshi koko: kukw ata co twazanye mw isi kand’ata co dushobora kuyivanamwo. Arikw iyo dufise ivyo turya n’ivyo twamba[ra] biba bitubūmvye.” (Ni twe tubihiritse.) Raba imburizi Paulo yongeyeko: “Arikw abagomba kuba abatunzi bagwa mu nyosha no mu mutego no mu kwifuza kwinshi kw’ubupfu gusinzikaza, kudobeza abantu mu bibonona bikabarandura.”—1 Tim. 6:6-9.

¹⁵ Niwirinde kugira ibirengeye ubushobozi bwawe mu vy’amahera. Nufate akarorero ka Yozefu mu Misiri. Igihe ibintu vyari bimeze neza yaregeranije ibifungurwa. Maze ibintu bihindutse, yari afise ivya nkenerwa yofashishako n’abandi. Ukwiye rero gutegekanya mu kigega cawe ibikwiye kugira ngo uze wironse ivyo ukeneye ingorane nizaduka.—Ita. 41:46-57.

¹⁶ Nurondere Imfashanyo: Ihindagurika ry’ivy’ubutunzi bwo mw’isi ntiryobura kugira ico rikoze ku muntu mu vy’impwemu. None yoca agira iki? Kurikira inama umwigishwa Yakobo atugira: “N’asenge . . . n’atumekw abashingantahe b’ishengero.” (Ni twe tubihiritse.) Abakurambere b’ishengero mu vy’ukuri bakora bwa soko ry’impumurizo n’imfashanyo ngirakimazi. Yakobo ahanura ati: “[Bamusengere], bamusīge amavuta ya elayo mw izina ry’Umwami wacu. Kand’ugusenga gufatanije n’ukwizera kuzokiza umurwayi, Umwami azomuvyura.”—Yak. 5:13-16.

¹⁷ Bakurambere, nimuvugane impuhwe. Nimutsimbataze uburyo bw’ukwegera butuma umuntu agira ukwizigira. Ivyo bizotuma uwari yadendebukiwe abizigira. Maze “muremeshe.” (1 Tes. 5:14) Ntivyigera bikenerwa kuvugisha umuntu mumukankamira canke mumuryagagura. Nta vyiza vyinshi biva ku gushimika ku kuntu umuntu yagize ibitaranga ubukerebutsi. Ahubwo nimwubake. Nimukeze umuntu ku bwizerwe yagize. Nimube kirumara. Nimufashe umuntu kugira ateganye ikigega ngirakimazi. Aho ari ngombwa, nimufashe umuntu kumenya imfashanyo Leta ishobora gutanga izo ari zo hanyuma mumufashe kwuzuza inkaratasi zisabwa. Birumvikana ko mu gihe ingorane z’ivy’amahera zisize umuvukanyi mu ruzu, muribuke ibanga mujejwe rishingwa n’ivyanditswe ryo kubonana n’abakurambere bagenzi banyu kugira ngo murabire hamwe imfashanyo ishobora gutangwa.—Yak. 2:15-17.

¹⁸ Uko ya “marushwa ahambaye” yegereza kandi ivy’ubutunzi bw’iyi si bigatera vyunyuka, ese twese twohungira mu cizigiro cacu c’Ubwami! Niwibuke isezerano Yehova yahaye Baruki wa munyamabanga wa Yeremiya. Mu gishingo co “kurondera ibintu bihambaye” ubu, guma uhanze amaso ku nyungu z’Ubwami, kuko “ubugingo bwawe,” ubuzima bwawe, ari bwo gusa Yehova yemera kuzokiza.—Yer. 45:5, NW; Mat. 24:21, 22.