Numenyekanishe Izina rya Yehova n’Ibikorwa Vyiwe

¹ “Ni mushime [Yehova], mwambaze izina ryiwe; mumenyekanishe ibikorwa vyiwe mu mahanga. . . . Imitima y’abarondera [Yehova] inezerwe.” (Zab. 105:1, 3) Umwanditsi wa Zaburi ari na we yanditse ayo majambo, yaragize umunezero mwinshi mu kubwira abandi ivyerekeye Yehova hamwe n’ “ibikorwa” vyiwe. Ni ibikorwa nyabaki? Mu buryo butarimwo gukekeranya, ni bimwe bijanye n’inganji y’ubuninahazwa y’Imana hamwe n’ “[“inkuru nziza,” NW] [y’]agakiza kiwe.”—Zab. 96:2, 3; 145:11, 12.

² Uko twegereza ikiringo c’Icibutso c’umwaka w’2001, turafise impamvu nyinshi zo kunezererwa ibikorwa Yehova agirana natwe. Tukabigira gute? Nta gukeka, Ingaburo y’Umukama yo ku Mugoroba, ni ryo himbaza rihambaye mu mwaka ku Bakirisu b’ukuri bose. Nta wundi musi uriho w’agaciro nk’uwo uravye ubuhambare, intumbero, canke uburyo uhimbazwa. Iki ni igihe c’uko twese twibuka ico Yehova na Yezu bagize mu kuturonsa uburyo bwo kurokoka. Ntibitangaje yuko mu kiringo c’Icibutso mu bisanzwe twitega kubona iyongerekana ry’igikorwa kirangurwa mu murimo wo mu ndimiro, uko tumenyekanisha ‘inkuru nziza y’agakiza’!

³ Woba Uzokora Ubutsimvyi bw’Ugufasha? Mu kwezi kwa Ndamukiza kw’umwaka uheze, igitigiri c’agaheta c’abashika ku 4.869 bariyandikishije bwa batsimvyi bafasha. Muri uyu mwaka, twoba tuzoshobora kugira Ntwarante na Ndamukiza amezi adasanzwe yo kurushiriza gukora mu busuku? Ukwezi kwa Ntwarante gufise iya Gatandatu itanu, Ndamukiza na kwo kukagira imisi y’Iyinga itanu. Mu gutegekanya gukora umusi wose ku mawikendi, abamamaji batari bake bakora igihe cose babonye yuko gukora ubutsimvyi bw’ugufasha bibashobokera. Kugira ngo akwize amasaha 50 asabwa ku kwezi, umutsimvyi mufasha akeneye gukwiza incahagati y’amasaha nka 12 ku ndwi. Rimbura witonze intonde tugirirwa inama mu kumba kari ku rupapuro rwa 4. Hoba hari imwe muri zo izohuza n’uko ivyawe vyifashe? Nimba ata yirimwo na ho, kumbure urashobora gutunganya urutonde rwawe bwite kugira ngo ukore ubutsimvyi bw’ugufasha muri aya mezi ya Ntwarante na Ndamukiza.

⁴ Abakurambere barakwiye gutangura ubu kwubaka ugushwashwanukira n’ugushigikira ivy’ukwongereza umurimo. Mu mwaka uheze, mw’ishengero rimwe aho abakurambere bose n’abakozi b’ishengero biyandikishije kuba abatsimvyi bafasha, 64 mu bamamaji 121 barakoze ubutsimvyi muri Ndamukiza! Ishengero ryaragize kandi akanyamuneza ko kubona abamamaji batarabatizwa batandatu batangura gutanga raporo muri Ntwarante na Ndamukiza. Mu vy’ukuri, nta gihe ciza kuruta ico kiriho ku bana no ku bashasha co kubaza abakurambere nimba bakwije ibisabwa kugira ngo batangure kujamwo mu gikorwa co gushinga intahe ku mugaragaro.

⁵ Akigoro Karushirije Karazana Imihezagiro: Amashengero yishingiye ihangiro zidasanzwe hamwe n’akigoro aranezererwa imihezagiro myinshi. Amashengero amwamwe arashobora gushimika bidasanzwe ku guhetura icibare kidakunda gukorerwamwo, akitunira ku buryo butari bumwe bw’ugushinga intahe, canke bagashimika ku gushinga intahe hakoreshejwe telefone—ubwo bukaba ari uburyo kirumara bwo kuganira n’abataboneka ku mihana hamwe n’ababa ahantu bigoye kubashikira.

⁶ Amagara make canke ukuba umuntu ageze kure mu myaka vyoba ari ngombwa ngo bice bibuza umuntu kuja muri uwo murimo uko bishoboka kwose? Ivyo si ko vyama kuri bose. Akarorero, umuvukanyikazi w’imyaka 86 yari arwaye kanseri, yarakoze ubutsimvyi bw’ugufasha muri Ndamukiza naho yari yaravyimvye amaguru. Ugushinga intahe hakoreshejwe telefone vyaratumye ashobora kugira uruhara rwuzuye muri uwo murimo, arongerereza ugushemeza Yehova kwiwe. Ivyo vyaramuvyuriye ingiro biyivyurira n’ishengero.

⁷ Niwitegurire Neza Icibutso: Muri uyu mwaka Icibutso kizogirwa kw’igenekerezo rya 8 Ndamukiza. Kubera ko uyo ari uw’Iyinga, bikwiye kuzoshobokera abandi benshi kucitaba. Turashobora kuzoronka igitigiri kinini kuruta tutaribwigere dushikako mu gihe tworangura uruhara rwacu (1) mu kucitaba twebwe ubwacu no (2) mu gutumira abandi ngo baze kwifatanya natwe ku Cibutso. Ni nde dukwiye gutumira?

⁸ Nusuzume mu two uhora wiyandikira tw’umurimo wawe wo mu ndimiro, wihweze amazina y’abo bagaragaje ugushimishwa n’ukuri, naho woba udahora ubagendera udahorereza. Indwi zibiri canke zitatu imbere y’uko Icibutso kiba, niwitunire ku kugendera abo bose ufise ubutumire bw’Icibutso. Mu gihe ivyawe vyoba bigukundiye, nusabe aboshima kucitaba ko wobafasha mu vy’ukwiyunguruza.

⁹ Mu mashengero amwamwe, usanga udukaratasi tw’ubutumire tudakoreshwa twose. Abanyamabanga b’amashengero barakwiye kuraba neza yuko udukaratasi tw’ubutumire badutanzwe hakiri kare bihagije kugira ngo twose tugabanganywe. Hari aho woshima kwandika n’imashini canke n’iminwe mu ndome zibona, isaha n’ikibanza Icibutso kizoberako ku mpera y’ako gakaratasi k’ubutumire. Canke urashobora gutanga agakaratasi k’ubutumire kerekana aderese y’Ingoro y’Ubwami nimba ari ho Icibutso kizogirirwa. Biribukijwe yuko mu bihe vyinshi udukaratasi tw’ubutumire dukwiye gushikirizwa umunyamuhana amaso mu yandi.

¹⁰ Niwibuke Abahororokewe: Biratera akanyamuneza igihe abatohoji ba Bibiliya biyeguriye Yehova kandi ivyo bakabigereranya mu kwibizwa mu mazi. Ariko rero, uko umwaka utashe, bamwebamwe muri twebwe barahagarika kwifatanya natwe, bagahagarika kuyagira abandi ivyerekeye izina rya Yehova n’ibikorwa vyiwe. Ivyo ntivyobura kuturaza ishinga. Naho abahororokewe benshi batahevye ukuri, bashobora kuba bahagaritse kwamamaza bivuye ku gucika intege, ku ngorane bisangije, canke ku yindi myitwarariko y’ubuzima. (Mat. 13:20-22) Abagoyagoya mu vy’impwemu barakeneye gufashwa ngo bagaruke mw’ishengero imbere y’uko bamirazwa n’urunkwekwe rwa Shetani. (1 Pet. 5:8) Muri iki kiringo c’Icibutso dushaka kugira akigoro kadasanzwe mu gufasha abahororokewe bakwije ibisabwa kugira ngo basubire kujamwo mu kwamamaza inkuru nziza.

¹¹ Umunyamabanga w’ishengero akwiye kumenyesha abarongozi b’inyigisho z’igitabu uwo ari we wese mu mugwi wabo yahororokewe. Komite y’Umurimo y’Ishengero izoja imbere mu kuringaniza ivy’ukugendera cungere abo bose bahororokewe. Mu gihe bibonetse ko uwo muntu yokwungukira ku nyigisho ya Bibiliya agiriwe, umucungezi w’umurimo azoringaniza ivy’ukumusahiriza amaze kuganira n’abandi bo mu bagize komite y’umurimo ku vyerekeye uwoba abereye kurongora nya nyigisho. Naho bishobora kuba bidakenewe ko iyo nyigisho irongorwa mu kiringo kirekire, uwagenywe ngo ayirongore arashobora gutanga raporo y’umwanya, amasubirayo hamwe n’inyigisho ya Bibiliya.

¹² Mu kwezi kwa Ndamukiza k’umwaka uheze, umuvukanyikazi umwe yariko arakora inzu ku nzu aha ikinyamakuru umugabo umwe akiri muto kw’ibarabara. Nya mugabo yamuhishuriye yuko umugore wiwe yari Icabona yahororokewe. Uwo mugabo yaciye abaza aho Ingoro y’Ubwami iri maze aca asaba uno muvukanyikazi ko yomugendera akagendera n’umukenyezi wiwe. Ico vyavuyemwo, uwo mugabo n’umugore bubakanye baritavye ikoraniro ryakurikiye hanyuma aremera inyigisho ya Bibiliya.

¹³ Niwitegurire Igikorwa Ciyongereye! Umwanditsi wa Zaburi we yavuze yuko dukwiye kumenyekanisha izina rya Yehova n’ibikorwa vyiwe, yongeyeko ati: “Mumuririmbire, mumuririmbire ishimwe; muvuge ibikorwa vyiwe vyose bitangaje. Mwirate izina ryiwe ryera.” (Zab. 105:2, 3) Nimuze twerekane ko turajwe ishinga n’izina rihambaye rya Yehova hamwe n’ “ibikorwa vyiwe bitangaje” mu kwongerereza utwigoro twacu mu busuku, ico kiringo c’Icibutso tukigire igihambaye kuruta ivyahabaye vyose!

[Box on page 4]

Uburyo Butandukanye bwo Kugira Urutonde rw’Amasaha 12 ku Mushamvu yo Gukora Ubutsimvyi bw’Ugufasha

Umusi Amasaha

Ku wa Mbere 1 2 − −

Ku wa Kabiri 1 − 3 −

Ku wa Gatatu 1 2 − 5

Ku wa Kane 1 − 3 −

Ku wa Gatanu 1 2 − −

Ku wa Gatandatu 5 4 3 5

Ku w’Iyinga 2 2 3 2

Yose hamwe: 12 12 12 12

Hoba hari rumwe muri izo ntonde ruzogushobokera?

Nimba atarwo, ni kuki utokwigirira urundi rw’iwawe?