Woba uvyibuka?

Woba warasomye witonze inomero z’Umunara w’Inderetsi za vuba? Raba rero nimba ushobora kwishura ibibazo bikurikira:

Ni mu buryo ubuhe Salomo ashobora kutubera akarorero ko kutuburira?

Imana yarahezagiye Umwami Salomo yongera iramukoresha. Ariko rero, mu gihe c’ingoma yiwe yarahevye gukurikiza impanuro ziva ku Mana. Yarubakanye n’umukobwa wa Farawo w’umupagani, yarabiriye abagore benshi, kandi yararetse abagore b’abapagani baramujana buhorobuhoro mu gusenga kw’ikinyoma. Turakwiye kwirinda kugenda turatsimbataza inyifato canke impengamiro zitabereye. (Gus. 7:1-4; 17:17; 1 Abm. 11:4-8)​—15/12, urupapuro rwa 10-12.

Kubera iki dushobora kuvuga ko Sara yari umugore yubaha Imana akaba n’umukenyezi w’agahore?

Igihe Imana yategeka Aburahamu kuva i Uri, vyasobanura ko yari gutandukana n’umuryango, abagenzi, akongera agaheba uburyo yari abayeho kugira aje iyo atazi. Yamara Sara yarasenyeye ku mugozi umwe na we, yizigiye yuko Imana yomuhezagiye. Yarubaha Aburahamu, akagaragaza kamere nziza.​—1/1, urupapuro rwa 8.

Kubera iki Yehova yasavye Aburahamu gutangako ikimazi umuhungu wiwe yakunda cane?

Birahambaye kwibuka yuko Imana itaretse ngo Aburahamu atangeko ikimazi Izahaki. Ubwo bwari uburyo bwo kwerekana ukuntu Imana yotanzeko ikimazi Umwana wayo Yezu, biyitwaye vyinshi.​—1/1, urupapuro rwa 23.

Ni ibiki vyerekana ko kuva mu kinjana ca mbere kubandanya, kw’isi hamye hariho abakirisu b’ukuri barobanuwe?

Muri wa mugani wa Yezu werekeye “ingano” n’“icatsi kibi,” “imbuto nziza” zagereranya “abana b’ubwami.” (Mat. 13:24-30, 38) Ico catsi kibi cokuranye n’ingano gushika kw’iyimbura. Ku bw’ivyo, naho tudashobora kuvuga tudakekeranya abari mu bagize umugwi w’ingano, bategerezwa kuba bamye bariho gushika mu gihe cacu.​—15/1, urupapuro rwa 7.

Ni ibintu ibihe bizoba bigashikana neza na neza kuri Harumagedoni?

Amahanga azosohora itangazo rihambaye ry’“Amahoro n’umutekano!” (1 Tes. 5:3) Intwaro zizohagurukira ry’ikinyoma. (Ivyah. 17:15-18) Abasavyi b’Imana b’ukuri bazoterwa. Iherezo rizoca rishika.​—1/2, urupapuro rwa 9.

Wokora iki kugira ngo utsinde agatima ko kugira agashari?

Ibintu bishobora kugufasha ni ibi: Nutsimbataze urukundo no kwiyumvamwo abavukanyi, niwifatanye n’abantu batinya Imana, nurondere gukora iciza, ‘nunezeranwe n’abanezerewe.’ (Rom. 12:15)​—15/2, urupapuro rwa 16-17.

Ni bande bavuga ururimi rw’ikinahuwatali, kandi ni igiki kiriko kirakorwa ku bwabo?

Rwari ururimi rw’Abaziteki ba kera, kandi ruracavugwa n’abantu umuliyoni umwe n’inusu bo muri Megizike. Ivyabona bariko baramamaza mu kinahuwatali, kandi bimwebimwe mu bisohokayandikiro vyacu biraboneka muri urwo rurimi.​—1/3, urupapuro rwa 13-14.

Igihe utanga impanuro, ni ingingo ngenderwako izihe ukwiye kugumiza mu muzirikanyi?

Nutahure ukuntu ibintu vyifashe koko. Niwirinde kwishura wihutagiza. Nushire mu ngiro Ijambo ry’Imana wicishije bugufi. Nimba bishoboka, nukoreshe ububiko bwa gitewokarasi. Niwirinde gufatira abandi ingingo.​—15/3, urupapuro rwa 7-9.

Yezu yahimirije abariko baramwumviriza ati: “Jana na we intambwe ibihumbi bibiri.” (Mat. 5:41) None yashaka kuvuga iki?

Ico gihe muri Isirayeli, Abaroma baganza ico gihugu barashobora guhata umuntu ngo abakorere igikorwa kinaka. Mu guhimiriza abariko baramwumviriza kujana n’umuntu intambwe ibihumbi bibiri, Yezu yashaka kuvuga yuko babwirizwa gukora n’umutima ukunze ibikorwa vyemewe n’amategeko abategetsi bari gushobora kubasaba gukora.​—1/4, urupapuro rwa 9.