Hariho ababayo​—None ni bande?

I Buraya, umutamakazi umwe arinjira mu rusengero afise ishapule mu minwe maze agapfukama imbere y’igishusho ca Mariya n’icubahiro cinshi. Muri Afrika, abagize umuryango umwe barasuka inzoga iruhande y’imva y’incuti bubaha. Muri Amerika, umusore umwe arisonzesha akongera akazirikana, yizeye ko aza kuvugana n’uwo yibwira ko ari umumarayika amurinda. Muri Aziya, umuherezi umwe araturira ibintu bikozwe mu mpapuro z’amabara bwa kimazi ashikaniye imizimu y’aba kera.

ABO bantu bahuriye ku ki? Bose bemera yuko mu karere k’impwemu hariho ibiremwa vy’impwemu bifise ubwenge abantu bashobora kwitura, bino bikaba bishoboye kugira akosho gakomeye ku buzima bwabo. Ariko ntiwumve, ico si ikintu gishasha canke gitangaje. Igitangaje ni uko hariho ivyiyumviro vyinshi cane bidahuza usanga abantu bafise ku bijanye n’ababa mu karere k’impwemu abo ari bo.

Abisilamu basenga Imana imwe, Allah.a Mu madini y’abiyita abakirisu, bavuga yuko Imana ari Ubutatu, ikaba igizwe na Mana Data, Mana Mwana na Mana Mutima Mweranda ari we Mpwemu Yera. Abo mw’idini ry’Abahindu na bo bemera yuko hariho imana n’imanakazi zirenga igihumbi. Abandi bavuga yuko impwemu canke imizimu biba mu bikoko bimwebimwe, mu biti bimwebimwe, mu bitandara bimwebimwe no mu nzuzi zimwezimwe. Hari n’abandi usanga ivyo bemera vyisunga ibitabu, amasenema n’ibiganiro vyo ku mboneshakure bivuga ivyerekeye abamarayika n’amadayimoni, imizimu n’ibisigo, imana n’imanakazi.

Nk’uko nyene usanga hari ivyiyumviro vyinshi kandi bidahuza ku bijanye n’imana zisengwa, ni na ko hari ivyiyumviro vyinshi kandi bidahuza ku bijanye n’uburyo bwo kuziyegereza. Birumvikana yuko uburyo bwose bwo kuziyegereza budashobora kuba bubereye. Vyiyumvire muri ubu buryo: Imbere y’uko dutelefona, turakenera kumenya uwo dushaka gutelefona, tugakenera no kuba tuzi neza yuko uwo muntu abaho koko kandi yiteguriye kutwitaba. Tugerageje kuvugana n’umuntu twiyumvira gusa mu bwenge bwacu ariko atabaho, twoba turiko turata umwanya. N’icoba kibabaje kuruta ico, kuvugana n’umwangushi vyoshobora kudukwegera.

None ni bande vy’ukuri baba mu karere k’impwemu? Bibiliya irishura ico kibazo ariko kandi igasigura uwo twovugana uwo ari we be n’ico twomwitegako. Shishikara usome. Hari aho wotangara umenye ico Bibiliya iduhishurira.

[Akajambo k’epfo]