Naratahuye ukuntu ubuzima ari ubw’agaciro
Hari mu gitondo co ku wa 16 Ndamukiza 2007. Igihe nari nituniye mu mfuruka yo mu biro biri kw’igorofa igira kabiri mu nyubakwa yitwa Norris Hall iri mu kigo kimwe ca kaminuza yo muri Virginie (Virginia Tech), nararonse akaryo ko gusubira kwibuka ukuntu dukwiye kwama dukenguruka ku bw’umusi umwumwe wose w’agaciro tuba tumaze turi bazima.
Nari mu biro vyanje ndiko nitegurira kuja mw’igorofa ya mbere gutora amakete yanje. Hari umwigisha yaciye aza kunsaba ko noja mu biro vyiwe kumufasha kuraba ingorane orodinateri yiwe yari ifise. Tugira twinjire mu biro vyiwe, twagiye twumva amasasu menshi avugira mw’igorofa ya mbere. Kubera yuko tutari tuzi ibiriko biraba, twaciye tunyaragasa kwinjira mu biro, turugara umuryango, maze turarindira duhagaritse umutima twibaza uko biza kutugendera. Narinyegeje mu mfuruka maze nca ntura Yehova Imana isengesho rivuye ku mutima ndamusaba ko yompa ubuyobozi kugira ngo nshobore guhangana n’ikintu ico ari co cose cari kigiye gushika.
Igihe twari tukirindiriye, naciye nibuka ikintu kimwe cari kimaze imyaka 15 kibaye. Ico gihe nakora ndi umukanitsi mw’ihinguriro rimwe ryakora imiduga. Akantu kamwe gatoya karimwo igitoro uwo twakorana yari afise mu minwe karatse umuriro. Kubera yuko yari yatekewe n’ubwoba, yaciye anterera mu maso ako kantu kariko karaka atabishaka. Mpemye, imyotsi yaciye inyinjiramwo kandi narahiye mu maso ndasinzikara. Kajugujugu yaciye injana mu kigo kimwe kivura abantu bahiye, nca ndahamara amezi atatu n’igice bamvura ijoro n’umurango kugira barabe ko norokoka. Maze amezi atanu bamvura bongera bamenyereza gusubira kumera nk’uko nahora, narashoboye gusubira i muhira, nkenguruka cane kubona nari nkiri muzima. Ico kintu cabaye caranyigishije kubona ko umusi wose mba maze ndi muzima uba ari uw’agaciro. Carakomeje kandi umwiyemezo mfise wo gukoresha ubuzima bwanje mu gikorwa c’uwabumpaye, ni ukuvuga Yehova Imana, kuko ndi Icabona ciwe.—Zaburi 90:12; Yesaya 43:10.
Kubera yuko ntari ngishoboye gukora ndi umukanitsi w’imiduga bivuye ku ngorane zatewe n’ubwo bushe, naciye niga ivyo gukora za orodinateri maze ndaronka akazi muri ya kaminuza (Virginia Tech). Ni co gituma muri ico gitondo nari muri iyo nyubakwa yitwa Norris Hall.
Igihe ayo masasu yari akiriko aravuga, ntitwigeze tumenya ko mw’igorofa riri neza na neza munsi yacu hariko haraba ubwicanyi bugizwe n’umuntu yariko ararasa bwahitanye abantu benshi gusumba abandi bose bishwe muri ubwo buryo muri kahise ka Leta Zunze Ubumwe za Amerika. Ubwo bwicanyi bwarangiye aho uwo muntu yariko ararasa yirasiye, amaze kwica abantu 32 ataco bazira. Haheze nk’iminuta 20 ivyo vyose bitanguye, twarumvise abapolisi bari muri koridoro. Twarabahamagaye, maze baraduherekeza badushikana ahantu hatagira inkomanzi.
Ico kintu gitesha umutwe cabaye caranyeretse ukuntu ubuzima bushobora guhagarara giturumbuka be n’uko atawumenya igishobora kudushikira. (Yakobo 4:14) Ese ukuntu bihambaye ko twizigira Umutanzi w’ubuzima ari we Yehova Imana, tukongera tukabona ko umusi umwumwe wose tuba tumaze ari ingabirano y’agaciro aba aduhaye!—Zaburi 23:4; 91:2.
[Abo dukesha ifoto ku rup. 30]
AP Photo/The Roanoke Times, Alan Kim