Umugwi ugira 124 w’abasohoka ishure ry’i Gileyadi

Abamisiyonari bagereranywa n’inzige

UKO amezi atandatu ahaciye, Ishure ry’ivya Bibiliya ry’i Gileyadi rya Watchtower riragira porogarama yo gutanga impapuro z’umutsindo, muri yo abagize umuryango wa Beteli wo muri Leta Zunze Ubumwe za Amerika bose bakaba batumirwa. Ku wa 8 Ntwarante 2008, abashitsi baje bava mu bihugu birenga 30 barifatanije n’uwo muryango wa Beteli ku bw’ibirori vyo guha impapuro z’umutsindo abanyeshure bo mu mugwi ugira 124 w’Ishure ry’i Gileyadi. Abantu 6.411 bari bitavye ivyo birori baranezeranywe n’abo banyeshure ku bw’uwo musi udasanzwe kuri bo.

Umuhagarikizi w’iyo porogarama, umuvukanyi Stephen Lett wo mu Nama Nyobozi, yatanguje iyo porogarama n’insiguro ivuga ngo “Nimwifadikanye n’inzige za Yehova zo mu buryo bw’ikigereranyo.” Mu Vyahishuwe 9:1-4, umugwi mutoyi w’abakirisu basizwe basubiye ku murimo wa Yehova mu 1919, ugereranywa n’igitero c’inzige zitanguye gukora. Abanyeshure baribukijwe yuko, kubera ko bari mu bagize “izindi ntama,” bifatanije n’ico gitero c’inzige co mu buryo bw’ikigereranyo.​—Yoh. 10:16.

Umuvukanyi Lon Schilling, uno akaba ari mu bagize Komite y’ishami yo muri Leta Zunze Ubumwe za Amerika, yaciye atanga insiguro ikurikira ivuga ngo “Nimwunganirane.” Yari ishingiye ku karorero dusanga muri Bibiliya ka Akwila na Pirisika, bano bakaba bari abakirisu bubakanye bo mu kinjana ca mbere. (Rom. 16:3, 4) Uwo mugwi w’Ishure ry’i Gileyadi wari ugizwe n’abagabo 28 be n’abakenyezi babo. Baribukijwe yuko kugira ngo baroranirwe mu murimo w’ubumisiyonari, bari bakeneye kuguma bakomeje ubucuti bafitaniye mu mubano wabo. Bibiliya nta na hamwe ivuga Akwila ngo ireke kuvuga umukenyezi wiwe Pirisika. Ku bw’ivyo, intumwa Paulo be n’ishengero baguma bababona ko ari umugabo n’umugore. Muri ubwo buryo nyene, abamisiyonari bubatse muri iki gihe barakwiye gukorera hamwe, bagasengera hamwe, kandi ingorane zidasanzwe bahura na zo mu murimo barangurira mu mahanga bakazitorera umuti bari kumwe, gutyo bakunganirana.​—Ita. 2:18.

Insiguro yakurikiye yari ifise umutwe uvuga ngo “Nimwitabire ukumera neza kwa Yehova,” yashikirijwe na Guy Pierce wo mu Nama Nyobozi. Umuvukanyi Pierce yarasiguye yuko kuba umuntu mwiza bisobanura n’ibindi uretse gusa kwirinda gukora ikibi. Umuntu mwiza akora ibintu vyiza ku bw’ineza y’abandi. Yehova Imana ni mwiza ku rugero rwo hejuru cane. (Zek. 9:16, 17) Ukumera neza kw’Imana be n’urukundo rwayo birashobora kutuvyurira umutima wo gukorera abandi ibintu vyiza. Mu gukeza abo banyeshure, umuvukanyi Pierce yasozereye avuga ati: “Mwamye mukora ivyiza. Turizigiye tudakeka yuko muzobandanya kwitabira ukumera neza kw’Imana mu gukora ivyiza mu gikorwa ico ari co cose Yehova ashobora kubashinga muri kazoza.”

Ubukurikira, Michael Burnett, uwahoze ari umumisiyonari ariko akaba aherutse kugenwa ngo abe umwigisha mw’Ishure ry’i Gileyadi, yashikirije insiguro ivuga ngo “Nimuyambare nk’igishizwe mu ruhanga hagati y’amaso yanyu.” Abisirayeli bategerezwa kuguma bibuka ukuntu Yehova yabarokoye ku gitangaro ku bw’ineza yabo akabakura mu Misiri, nk’aho boba bambaye ikintu ‘gishizwe mu ruhanga’ hagati y’amaso yabo. (Kuv. 13:16) Abo banyeshure bahimirijwe kwibuka inyigisho umuyoro baronkeye mw’Ishure ry’i Gileyadi nk’aho boba bayambaye nk’ikintu gishizwe mu ruhanga hagati y’amaso yabo. Umuvukanyi Burnett yarashimitse ku gituma bakeneye kwicisha bugufi be n’ukwifata ruto hamwe no gushira mu ngiro ingingo ngenderwako zo muri Bibiliya igihe batorera umuti ukutumvikana ukwo ari kwo kwose kwokwaduka hagati yabo n’abandi bamisiyonari canke hagati yabo n’abandi bantu.​—Mat. 5:23, 24.

Mark Noumair, uno akaba amaze igihe kirekire ari umwigisha wo mw’Ishure ry’i Gileyadi yatanze insiguro ivuga ngo “Ni ururirimbo uruhe ruzoririmbwa ku biberekeye?” Mu bihe vya kera, kwigina intsinzi abantu baba batahukanye mu ntambara mu kuririmba, cari ikintu kimenyerewe. Imwe muri mwene izo ndirimbo irashira ku mugaragaro ukuntu abantu bo mu muryango wa Rubeni, uwa Dani be n’uwa Asheri bari abantu batitanga, mu gihe abo mu muryango wa Zebuloni bobo bashimagizwa kubera agatima ko kwitanga bari bafise. (Abac. 5:16-18) Nka kurya kw’amajambo yo mu ruririmbo, ibikorwa umukirisu wese akora amaherezo abandi barabimenya. Umwete umuntu agira mu gikorwa c’Imana be no kuguma ari intadohoka ku rutonde rwa gitewokarasi bizotuma ashimwa na Yehova vyongere bibere akarorero keza abavukanyi biwe. Uko abandi bagize ishengero bumviriza ururirimbo rwo mu buryo bw’ikigereranyo rugizwe n’ibikorwa vyacu, baravyurirwa umutima wo kwigana ako karorero keza.

Mu bigize ukumenyerezwa abanyeshure baronkera muri iryo Shure ry’i Gileyadi harimwo n’ukwamamaza; ni co gituma abagize umugwi wa 124 bose hamwe bamaze amasaha nka 3.000 mu gikorwa co kwamamaza. Igihe umuvukanyi Sam Roberson wo mu Rwego rujejwe amashure y’ivya gitewokarasi yariko arashikiriza insiguro ivuga ngo “Mukurikize ubuyobozi bw’impwemu nyeranda,” abanyeshure baramwiganiye ibintu bitari bike biboneye mu murimo wo mu ndimiro, bimwebimwe muri vyo bikaba vyarasubiwemwo mu buryo bw’udukino. Ivyo vyabonywe biremesha vyakurikiwe n’ikiganiro co kubaza ibibazo, cashikirijwe n’umuvukanyi Patrick LaFranca wo muri Komite y’ishami yo muri Leta Zunze Ubumwe za Amerika, akaba yabibaza abasohotse Ishure ry’i Gileyadi ubu bakorera mu bihugu bitandukanye. Abo banyeshure barakengurutse impanuro ngirakamaro bahawe n’abo bavukanyi.

Anthony Morris wo mu Nama Nyobozi yashirikije insiguro ya nyuma yavuga ngo “Muribuka yuko ibintu biboneka ari ivy’igihe gito.” Ivyanditswe bituremesha kwibanda ku mihezagiro yo muri kazoza Yehova azoduha aho kwibanda ku kigeragezo ico ari co cose c’igihe gito coshobora kuba kiriko kiradushikira. (2 Kor. 4:16-18) Ubukene butagira izina, akarenganyo, agahahazo, indwara be n’urupfu ni ibintu bishika vy’ukuri twese twibonera muri iki gihe. Abamisiyonari boshobora gushikirwa na bimwebimwe muri ivyo bintu bibabaje. Ariko kwibuka ko ivyo bintu ari ivy’igihe gito bizodufasha kugumana uburimbane mu vy’impwemu be no kugumana icizigiro.

Porogarama yarangiye abanyeshure bose bari ku mukiruruko, bumviriza impanuro za nyuma bariko barahabwa n’umuvukanyi Lett. Yabaremesheje kudatana n’akabando maze avuga ati: “Nta kintu na kimwe kizotuma tudohoka nimba Yehova ari ku ruhande rwacu.” Yahimirije abo bamisiyonari bashasha kuba nk’inzige, bagakomera kw’ibanga mu murimo barangurira Yehova bakongera bakaguma bafise umwete, ari intahemuka kandi bagamburuka ibihe vyose.

[Ifoto ku rup. 30]

IBIRANGA ABITAVYE IRYO SHURE

Igitigiri c’ibihugu bavuyemwo: 7

Igitigiri c’ibihugu barungitswemwo: 16

Igitigiri c’abanyeshure: 56

Incahagati y’imyaka y’amavuka: 33,8

Incahagati y’imyaka bamaze mu kuri: 18,2

Incahagati y’imyaka bamaze mu busuku bw’igihe cose: 13,8

[Ifoto ku rup. 31]

Mu rutonde rukurikira, imirongo iharurwa uhereye imbere uja inyuma, amazina na yo akaba atondetse uhereye ibubamfu uja iburyo ku murongo umwumwe wose.

[Ifoto ku rup. 31]

Umugwi ugira 124 w’abasohoka Ishure ry’ivya Bibiliya ry’i Gileyadi rya Watchtower

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J.; (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Ifoto ku rup. 32]

Ishure ry’i Gileyadi rigirirwa mu Kigo ntanganyigisho c’Ivyabona vya Yehova