Woba uriko urigana Yehova mu kubabara abandi?

“MUYIKORERE amaganya yanyu yose, kukw ibababara” (1 Petero 5:7). Mbega akamo karangwa igishika! Yehova Imana aritwararika abasavyi biwe. Turashobora kwumva dutekaniwe turi mu maboko yiwe.

Turakwiye gutsimbataza umutima nk’uwo wo kubabara abandi kandi tukawugaragaza. Kubera ko turi abanyagasembwa, turakeneye kuba maso ku mitego minaka igihe twitwararika abandi. Imbere yuko twihweza imwimwe muri iyo mitego, reka tubanze turabe bumwebumwe mu buryo Yehova agaragarizamwo ko yitwararika abasavyi biwe.

Wa mwanditsi wa Zaburi Dawidi, akoresheje ikigereranyo c’umwungere, yaradondoye ukuntu Imana yitwararika abasavyi bayo, mu kuvuga ati: “Uhoraho ni we mwungere wanje, sinzokena. Amvyagiza mu canya c’ubgatsi butotahaye: andōngōrera i ruhande y’amazi adasūma: aremesha umutima wanje. . . . Mbere naho noca mu mwonga w’igitūtu c’urupfu sinzogira ikibi ntinya; kuk’uri kumwe nanje”.​—Zaburi 23:1-4.

Kubera ko Dawidi ubwiwe yari yarabaye umwungere, yari azi ico kwitwararika ubusho bisaba. Umwungere arakingira intama ziwe ibikoko vyozirya, nk’intambwe, ibingira n’idubu. Aguma araba ko ubusho budasanzara, akarondera intama yazimiye, imyagazi irushe akayitwara mu gikiriza akongera akavura iyirwaye n’iyakomeretse. Ku musi ku musi arazironsa amazi yo kunywa. Ivyo ntibisobanura yuko umwungere acungera akantu kose intama zikora. Intama ziragira umwidegemvyo ariko zikingiwe.

Ukwo ni ko Yehova yitwararika abasavyi biwe. Intumwa Petero yasiguye ati: ‘Muzigamwa n’ubushobozi bw’Imana’. Imvugo yakoreshejwe ng’aho ngo ‘kuzigamwa’, ijambo ku rindi isobanura “kuguma uhanzwe ijisho” (1 Petero 1:5). Yehova abitumwe n’uko atwitwararika vy’ukuri, yama na ntarya aduhanze ijisho, yiteguriye kudufasha igihe cose tubimusavye. Ariko rero, Yehova yaturemye dufise ubushobozi bwo kwihitiramwo, ku bw’ivyo ntiyama yahaserutse mu bintu vyose dukora canke mu ngingo zose dufata. Dushobora gute none kwigana Yehova mu kwitwararika abandi?

Niwigane Imana mu kwitwararika abana bawe

“Abana ni bo ngabire Uhoraho agaba”. Ku bw’ivyo, abavyeyi barakwiye gukingira abana babo no kubitwararika (Zaburi 127:3). Ivyo vyoshobora kuba birimwo gufasha abana guserura ivyiyumviro vyabo be n’ukuntu biyumva, maze abavyeyi bagaca bavyisunga mu vyo bagiranira na bo. Igihe abavyeyi bagerageje gucungera akantu kose abana babo bagize, bakirengagiza rwose ivyipfuzo vyabo, vyomera nk’ivy’umwungere agerageza gucungera intama ziwe mu kuzishira ku biziriko. Nta mwungere yokwipfuza gucungera intama ziwe muri ubwo buryo, eka na Yehova ntaturagira gutyo.

Marikoa yiyemerera ati: “Naramaze imyaka n’iyindi nza ndabwira abana banje nti: ‘Mukwiye gukora ibi, ntimukwiye gukora biriya’. Ico gihe, nibaza ko ico ari co nategerezwa gukora ka buvyeyi. Sinigera ndababwira akajambo ko kubakeza, canke ngo nseruranire nabo vy’ukuri akari ku mutima”. Umwigeme wa Mariko yarashobora kumara kuri telefone amasaha n’ayandi ariko arayaga n’abagenzi biwe, ariko ntiyashobora kumara umwanya muremure ariko arayaga na nyina. Mariko abandanya ati: “Naciye mbona ko hariho itandukaniro, igihe uwo mwigeme wanje yaba ariko arayaga n’abagenzi biwe, yarakoresha utujambo tugaragaza impuhwe nka ‘Ego hewe, uzi yuko ivyo ari vy’ukuri’ canke ngo ‘Na jewe ni uko’. Naratanguye gukoresha mwene utwo tujambo kugira mfashe umwigeme wanje guserura ukuntu yiyumva, kandi bidatevye ibiyago vyacu vyahavuye biza biramara umwanya munini kandi birarushiriza kuryoha”. Ivyo birerekana ukuntu bihambaye guseruranira neza akari ku mutima, ibikunze kugirwa mu guhana ijambo atari mu kuryihariza.

Abavyeyi barakeneye gufasha abana babo guserura ukuntu biyumva be n’ivyipfuzo vyabo, yamara n’abana barakeneye gutahura yuko ukuba abavyeyi babitwararika bibarinda. Bibiliya irahanura abana kwumvira abavyeyi babo, maze igaca ivuga igituma iti: “Kugira ng’uronke amahoro, urambire kw isi” (Abanyefeso 6:1, 3). Abana bajijutse mu buryo bukomeye ku bijanye n’ivyiza biva mu kugamburuka, birarushiriza kuborohera kwumvira.

Mu kwitwararika ubusho bwa Yehova

Ubwitwararitsi buranga urukundo Yehova atugaragariza bubonekera mw’ishengero rya gikirisu. Yezu Kristu, we Mutwe w’ishengero, arayobora abakurambere kugira ngo bitwararike ubusho bwiwe (Yohana 21:15-17). Ijambo ry’ikigiriki ryahinduwe ngo umucungezi, rirafitaniye isano n’irivuga risobanura ngo “kuraba witonze”. Petero, mu gushimika ku kuntu ivyo bikwiye gukorwa, asaba abakurambere ati: “Muragire ubusho bg’Imana bgo muri mwebge, mutaburagira nk’abagōberewe, ariko mubikunze, nk’ukw Imana igomba: ntimuburagirishwe no kurondera inyungu mbi, ariko muburagire mushize igikonyo. Kandi ntimuragire nk’abatwaza amanyama amasho mwagabanganirijwe, ariko mube ivyitegererezo vy’ubusho”.​—1 Petero 5:2, 3.

Mu vy’ukuri, igikorwa abakurambere bakora kirasa n’ic’abungere. Abakurambere bakirisu bategerezwa kwitwararika abarwaye mu buryo bw’impwemu, bakababogora kugira ngo uburyo babayeho bugaragaze ko bisunga ingingo ngenderwako zigororotse. Abakurambere barafise ibanga ryo kwungunganya ibikorwa birangurwa n’ishengero, gushiraho intunganyo zijanye n’amakoraniro no kuraba ko mw’ishengero haguma hari urutonde.​—1 Ab’i Korinto 14:33.

Ariko rero, amajambo ya Petero yavuzwe imbere y’aha, aratwereka akaga abakurambere bogwamwo mu gihe ‘botwaza amanyama’ ishengero. Ikintu kimwe gishobora kwerekana ko umukurambere atwaza amanyama ishengero ni igihe ashinze amategeko adakenewe. Umukurambere abitumwe n’uko yiyumvamwo cane yuko ategerezwa gukingira ubusho, yoshobora kurenza urugero. Mw’ishengero rimwe ryo muri Aziya yo mu Buseruko, abakurambere barashinze amategeko yokwisungwa mu kuramukanya mu Ngoro y’Ubwami, nk’akarorero barashinze itegeko ryerekana uwukwiye gutangura kuvuga. Ayo mategeko bayashinze bibaza ko kuyakurikiza vyogize ico biterere ku mahoro y’ishengero. Naho ata gukeka ko imvo zabibatumye zari nziza, abo bakurambere boba bariko barigana ukuntu Yehova yitwararika abasavyi biwe? Mu buryo buri n’ico buvuze, ukuntu intumwa Paulo yabona ibintu kwaragaragariye mu majambo yavuze agira ati: “S’uko tuganza ukwizera kwanyu, ariko dukorana namwe mu bibungura umunezero: kuk’ukwizera ari kwo muhagazemwo” (2 Ab’i Korinto 1:24). Yehova arizigiye abasavyi biwe.

Uretse ko abakurambere bitwararika abandi birinda gushinga amategeko adashingiye ku Vyanditswe, barerekana ko babitwararika vy’ukuri mu kutabamenera ibanga. Baramiza ku muzirikanyi iyi mpanuro iva ku Mana igira iti: “Ntumenere ibanga uwundi”.​—Imigani 25:9.

Intumwa Paulo yasanishije ishengero ry’abakirisu basizwe n’umubiri w’umuntu mu kuvuga ati: “Imana yafatanije umubiri hamwe . . . kugira ng’umubiri ntiwireme ibice, arikw ingingo zibabarane kumwe” (1 Ab’i Korinto 12:12, 24-26). Imvugo y’ikigiriki yahinduwe ngo ‘kubabarana kumwe’, ijambo ku rindi isobanura ko ‘umwe akwiye kurazwa ishinga n’uwundi’. Abagize ishengero rya gikirisu bakwiye kwitwararikana cane.​—Ab’i Filipi 2:4.

Abakirisu b’ukuri boshobora gute kwerekana ko ‘umwe arazwa ishinga n’uwundi’? Boshobora kwerekana ko bitwararika abandi bo mw’ishengero biciye ku masengesho batura no mu gufasha mu buryo bufadika abari n’ivyo bakenye. Ivyo birafasha abandi bakagaragaza iciza kiri muri bo. Raba ukuntu Tadataka yafashijwe biciye kuri mwene ukwo kwitwararika abandi kuranga urukundo. Igihe yabatizwa afise imyaka 17, yari we wenyene mu muryango wiwe yakorera Yehova. Yigana ati: “Mw’ishengero hariho umuryango wakunda kuntumira kugira dusangire akajumbu twongere tunezeranwe. Hafi buri gitondo ngiye kw’ishure, narakunda guca muri uwo muryango kugira twihweze icanditswe c’umusi ca Bibiliya. Nararonka impanuro zijanye n’ukuntu novyifatamwo mu ngorane zo kw’ishure, maze tugasengera hamwe ku bijanye na zo. Narigiye kuri uwo muryango agatima ko gutanga”. Muri iki gihe, Tadataka ariko arashira mu ngiro ivyo yize mu gukorera kuri bimwe mu biro vy’ishami vy’Ivyabona vya Yehova.

Intumwa Paulo yaratugabishije ku bijanye n’umutego vyibonekeza ko dushobora kugwamwo igihe twitwararika abandi. Yaravuze abagore bamwebamwe “[baregetanya] bīta mu bitar’ivyabo, bavuga ivyo badakwiye” kuvuga (1 Timoteyo 5:13). Naho bibereye ko twitwararika abandi, dutegerezwa kuba maso kugira ngo ntiduhave dusanga twashitse aho twisuka mu vy’abo. Kwitwararika abandi mu buryo burenze urugero birashobora kwigaragaza igihe ‘tuvuga ivyo tudakwiye’ kuvuga, nko mu kuvuga amajambo yo kubanebagura.

Vyoba vyiza twibutse ko abakirisu bashobora gutandukana mu buryo batunganya ivyabo, mu vyo bahitamwo gufungura be no mu buryo bwo kwiruhura bubereye bahitamwo. Umwe wese arafise umwidegemvyo wo guhitamwo ico ari bukore igihe atarenze ku ngingo ngenderwako zo muri Bibiliya. Paulo yakebuye abakirisu b’i Roma ati: “Twoye guhinyurana . . . dukurikire ivy’amahoro n’ivyo gukomezanya” (Abaroma 14:13, 19). Uburyo twitwararikana mw’ishengero bimwe bivuye ku mutima, bukwiye kugaragarira mu kuntu twiteguriye gufashanya, ntibukwiye kugaragarira mu kwisuka mu vy’abandi. Twitwararikanye muri ubwo buryo, urukundo be n’ubumwe birasagamba mu muryango no mw’ishengero.

[Akajambo k’epfo]

[Ifoto ku rup. 19]

Nufashe abana bawe guserura ivyiyumviro vyabo n’ukuntu biyumva mu kubakeza no mu kubagaragariza impuhwe