Ibibazo vy’abasomyi

Tuzi gute ko amajambo adondora ubukerebutsi ari mu Migani 8:22-31 yerekeza kuri Yezu Kirisitu imbere y’uko aba umuntu nkatwe?

Ayo majambo yahumetswe yo mu gitabu c’Imigani adondora ubwenge, ari bwo bukerebutsi, agira ati: “Uhoraho [“yatumye mbaho”, NW] mw itanguriro ry’inzira ziwe, ataratangura na kimwe mu bikorwa vyiwe vya kera. . . . Imisozi miremire itarashirwaho, bo n’udusozi, nari naravutse. . . . Igihe yashirah’ijuru ni ho nari ndi: . . . ico gihe nari kumwe na yo, nd’umukozi w’umuhanga: kand’imisi yose narayihimbara, nama niginagura imbere yayo; . . . mpimbarwa n’abana b’abantu”.

Ico canditswe ntigishobora kuba kiriko kiravuga gusa ubukerebutsi bw’Imana canke ubukerebutsi busanzwe budafadika canke ngo bubonwe n’amaso. Uti kubera iki? Kubera yuko ubukerebutsi budondorwa muri ico canditswe Yehova ‘yatumye bubaho’ canke buremwa, nka yo ntango y’inzira ziwe. Yehova Imana yamyeho kandi yamye afise ubukerebutsi (Zaburi 90:1, 2). Ubukerebutsi bwiwe ntibwagize intango; ntibwaremwe canke ngo hagire uwutuma bubaho. ‘Ntibwavutse’. N’ikindi kandi, ubwo bukerebutsi bwerekanwa ko buvuga kandi bukora, ugaca rero ubona ko bugereranya ikiremwa.​—Imigani 8:1.

Igitabu c’Imigani kivuga yuko kera cane Bwenge, ari we Bukerebutsi, yari kumwe na Yehova Umuremyi, ari “umukozi w’umuhanga”. Nta gukeka ko ivyo vyerekeza kuri Yezu. Kera cane imbere y’uko Yezu aza ngaha kw’isi, yakoranye cane na Yehova ku buryo Ijambo ry’Imana rigira riti: “Ni uw’imbere y’ibindi bintu vyose kandi biciye kuri we ibindi bintu vyose vyarabeshejweho”.​—Ab’i Kolosayi 1:17, NW; Ivyahishuriwe 3:14.

Birabereye kubona Umwana w’Imana adondorwa ko ari ubukerebutsi, kuko ari We yahishuye imigambi y’ubukerebutsi ya Yehova be n’amategeko aranga ubukerebutsi yiwe. Igihe Yezu atari bwabe umuntu nkatwe, yari Jambo w’Imana, ni ukuvuga Umuvugizi wayo (Yohana 1:1). Adondorwa ko ari we “bushobozi bg’Imana . . . n’ubgenge bg’Imana”, ari bwo bukerebutsi bwayo (1 Ab’i Korinto 1:24, 30). Ese ukuntu ayo ari amajambo meza igitangaza adondora Umwana w’Imana, uwatanze ubuzima bwiwe kugira bubere abantu incungu abitumwe n’uko yahimbarwa na bo!​—Yohana 3:16.

[Ifoto ku rup. 31]

‘Imisozi itarashirwaho, nari naravutse’