Wewe n’uwo mwubakanye mwoba museruranira akari ku mutima?

“AGAKETE k’urukundo k’umuntu w’imyaka 60”. Uwo ni wo wari umutwe-shimikiro w’ihiganwa ryari ryateguwe n’ibanki imwe yo mu Buyapani, hakaba haciye imyaka mikeyi bibaye. Iryo higanwa ryahimiriza Abayapani bageze mu myaka ya 50 na 60 guserurira abo bubakanye “akari ku mutima”. Umwe mu bahiganwa yandikiye umukenyezi wiwe ati: “Ndazi ko biza kugutwenza, yamara sinogenda ntabikubwiye. Ico mfise ku mutima ni iki: Ndagukengurukiye kuba warubakanye nanje”.

Mu mico kama itari mike, ushizemwo n’imwimwe yo mu bihugu vyo muri Aziya yo mu Buseruko, ntibaremesha abantu guserura uko biyumva ata guhisha. Yamara, abantu barenga 15.000 baritavye iryo higanwa ryo kwandika agakete k’urukundo. Iryo higanwa ryarakunzwe cane ku buryo hatunganijwe n’irigira kabiri, maze harasohorwa n’ibitabu bishingiye kuri utwo dukete. Ivyo vyarerekanye yuko, naho abantu benshi batabiserura, imbere mu mutima bipfuza rwose guserura ukuntu biyumva ku vyerekeye abo bubakanye bakunda cane. Ariko rero, abandi baranka kubigira. Kubera iki? Bishobora kuba biterwa n’uko bibasaba akigoro kanaka be n’ubuhanga bunaka kugira ngo bashobore gutuma abandi, nk’akarorero abo bubakanye, batahura ukuntu biyumva.

Hitoshi Kato, uwanditse igitabu ku bijanye no gukukuruka, avuga yuko mu bubakanye bageze mu zabukuru bo mu Buyapani, imanza nyinshi zo kwahukana zitanguzwa n’abakenyezi kubera ishavu ryashinze imizi baba bari bamaze imyaka n’imyaka batara mu nda. Avuga ati: “Mugabo, biba kandi bitumwe n’uko bataseruranira akari ku mutima igihe haba hashitse ingorane”.

Haciye igihe gito umugabo akukurutse yoshobora gutangara abonye umukenyezi wiwe amusavye ko bokwahukana. Abo bubakanye bashobora kuba bari bamaze imyaka myinshi bataganira ku kuntu umwe abona uwundi. Umugabo n’umugore bashobora kuba baragerageza guseruranira akari ku mutima mugabo ntibashobore kuguma bayaga bumvikana. Aho kurushiriza gukomeza ubucuti bwa somambike, bama basanga bagiye mu mitongano.

None umugabo n’umugore bashobora gute gutorera umuti ivyo badahurizako mu mahoro kandi bagaseruranira akari ku mutima mu buryo buhimbaye? Woshobora gushimishwa no kumenya yuko inama ngirakimazi kuruta izindi utazisanga mu gitabu giheruka kwandikwa n’umuhanuzi mu vy’ingo, ariko ko uzisanga mu gitabu ca kera cane kimaze ibinjana n’ibindi gikundwa n’abantu, ico na co kikaba ari Bibiliya.