Baranezereje imitima y’abavyeyi babo

“MWANA wanje, umutima wawe ni wagira ubgenge uwanje mutima bgite uzonezerwa” (Imigani 23:15). Vy’ukuri, abavyeyi bakirisu baranezerwa igihe abana babo baronse ubwenge canke ubukerebutsi buva ku Mana. Ku wa gatandatu igenekerezo rya 10 Nyakanga 2005, hari umugwi w’abantu 6.859 bo mu bihugu bitandukanye bari bitavye ibirori vyo gushikiriza impapuro z’umutsindo umugwi ugira 119 w’abasohoka Ishure ry’ivya Bibiliya ry’i Gileyadi rya Watchtower. Bose imitima yabo yaruzuye umunezero, na canecane abavyeyi b’abavukanyi n’abavukanyikazi 56 baronse impapuro z’umutsindo.

David Walker, akaba amaze igihe kirekire ari mu bagize umuryango wa Beteli yo muri Leta Zunze Ubumwe za Amerika, ni we yuguruye iyo porogarama n’isengesho rivuye ku mutima. Maze, umuhagarikizi wa porogarama ari we David Splane wo mu Nama Nyobozi y’Ivyabona vya Yehova yaciye atangura iyo porogarama mu kubwira abo ba sebibondo na ba inabibondo bari aho ati: “Murakwiriye gukezwa n’igishika cinshi. Kamere mwatsimbataje mu bahungu n’abakobwa banyu zarabavyuriye umutima wo kwinjira mu murimo w’ubumisiyonari”. Abo bavyeyi bashobora kuba bari bahagaritse umutima, kubera ko vuba abahungu n’abakobwa babo bari bagiye gufata urugendo bakaja gukorera ahantu ha kure. Ariko rero, umuvukanyi Splane yabasubirije umutima mu nda ati: “Ntimuhagarike umutima ku bijanye n’abana banyu. Yehova arashobora kubabungabunga cane kuruta kure n’iyo uko mwobigira”. Maze yaciye avuga ati: “Nimwiyumvire ivyiza abahungu n’abakobwa banyu bazokora. Hari abantu bacumukura bagiye kuronka impumurizo nyakuri ari bwo bwa mbere mu buzima bwabo”.

Ingene bazobandanya kuronsa abandi umunezero

Umuhagarikizi wa porogarama yaciye avuga amajambo yo guha ikaze abashikirizansiguro bane. Ubwa mbere, Ralph Walls wo mu bagize Komite y’ishami rya Leta Zunze Ubumwe za Amerika yaraciye irya n’ino umutwe-shimikiro uvuga ngo “Gume mukanuye”. Yarashimitse ku vy’uko uguhuma kwo mu buryo bw’impwemu ari kubi cane kuruta uguhuma kwo mu buryo bw’umubiri. Ishengero ry’i Lawodikiya ryo mu kinjana ca mbere ryarahumye mu buryo bw’impwemu. Abakirisu bo muri iryo shengero bari barahumye barahawe imfashanyo, mugabo vyama nantaryo ari vyiza cane ko twirinda mwene ukwo guhuma mu kuguma dukanuye mu buryo bw’impwemu (Ivyahishuriwe 3:14-18). Umushikirizansiguro yavuze ati: “Gume mukanuye, mwongere mubone abagabo bajejwe amabanga nk’uko Yehova ababona”. Abo baronse impapuro z’umutsindo ntibakwiye guhagarika umutima bidakenewe igihe hari ingorane mw’ishengero. Umukama Yezu Kirisitu arabona mwene ivyo ibintu vyose. Azokwitwararika kuraba yuko ibintu bitunganywa mu gihe kibereye.

Ubukurikira, Samuel Herd wo mu Nama Nyobozi yarishuye ikibazo cabaza giti: “Uriteguye?”. Nka kurya uwufata urugendo yitwaza ivyambarwa akeneye, ni ko n’abo baronse impapuro z’umutsindo bategerezwa kwama bambaye kamere ziranga wa muntu musha. Bategerezwa kugira impuhwe nka kumwe kwa Yezu. Igihe umugabo umwe yari arwaye imibembe yamubwira ati: “Ukunze, woshobora kumpumanura”, Yezu yamubwiye ati: “Ndakunze, humanuka” (Mariko 1:40-42). Umushikirizansiguro yaciye avuga ati: “Niba mwipfuza vy’ukuri gufasha abantu, ntimuzobura uburyo bwo kubigira”. Mu B’i Filipi 2:3 habwira abakirisu kubona ko ‘bagenzi babo babaruta’. Umuvukanyi Herd yavuze ati: “Kuba uwicisha bugufi birahambaye cane kuruta kugira ubumenyi. Nimwaba abantu bicisha bugufi ni ho gusa abo muzohura mu busuku bwanyu be n’abavukanyi n’abavukanyikazi banyu bo mw’ishengero bazokwungukira ku bumenyi bwanyu”. Yasozereye avuga yuko, hamwe abo bagira bahabwe impapuro z’umutsindo bobandanya kwambara urukundo rwa gikirisu, ari ho boba biteguriye kuja mu vyibare barungitswemwo, bizigiye badakeka ko bazororanirwa.​—Ab’i Kolosayi 3:14.

Mark Noumair, umwe mu bigisha b’i Gileyadi, yaratumye abantu batangura kwibaza ibibazo igihe yavuga umutwe w’insiguro yiwe wavuga uti: “Woba uzoguma ubigira?”. Ivyo bogumye bagira ni ugukenguruka ukumera neza kwa Yehova. Muri Zaburi 103:2 havuga hati: “Mutima wanje, himbaza Uhoraho; ntiwibagire ivyiza yakugiriye vyose”. Abisirayeli ntibakengurutse manu yababeshaho, baraheza bayita “ivyo kurya bitagira ikimazi” (Guharūra 21:5). Uko hagiye haraca igihe, agaciro k’iyo manu ntikahindutse, ahubwo abo Bisirayeli ni bo batabaye bakiyikenguruka. Uwo mwigisha yavuze ati: “Nimwibagira ivyo Yehova yakoze kandi mukareka umurimo murangurira mu mahanga ukaba ikintu gisanzwe, bizogira ico bihinduye ku kuntu mubona igikorwa Yehova yabashinze”. Muri Zaburi 103:4 havuga yuko Yehova ‘akwambika igitsibo c’ubuntu-mvarukundo’ (NW). Abo basohotse iryo shure bazokwibonera ubuntu-mvarukundo bw’Imana mu mashengero mashasha bazoba barimwo.

Uwundi mwigisha w’i Gileyadi yitwa Lawrence Bowen yaraciye irya n’ino ikiganiro kivuga ngo “Yoba izogushikira?”. Yavuze yuko abo muri uwo mugwi ugira 119 w’abasohoka Ishure ry’i Gileyadi baronse inyigisho zikomeye zizotuma baba abamisiyonari baroranirwa. Yamara ubu, barakeneye kwumira kuri Yehova no ku gikorwa yabashinze. Mu Vyahishuriwe 14:1-4, bamwe 144.000 badondorwa ko “[ari] bo bakurikira wa Mwagazi ah’aja hose”. Abari muri uwo mugwi bose barumira badahemuka kuri Yehova no ku Mwana wiwe naho bashikirwa n’ibigeragezo bimeze gute, kandi barashika kw’ihangiro ryabo. Umushikirizansiguro yavuze ati: “Naho haza iki, na twebwe turumira kuri Yehova no ku gikorwa yadushinze”. Abo bene kuronka impapuro z’umutsindo babigenjeje gutyo, imihezagiro ya Yehova ‘izobashikira’.​—Gusubira mu vyagezwe 28:2.

Kwama ivyamwa mu murimo wabo

Ku mpera imwimwe yose y’umushamvu mu gihe c’ivyigwa, abo banyeshure baragira uruhara mu busuku bwo mu ndimiro. Wallace Liverance, umunyamabanga w’Ishure ry’i Gileyadi, igihe yavugana na bo ibijanye n’iyo porogarama, vyaribonekeje ko bari bararoraniwe. Baramamaje inkuru nziza mu ndimi zitari munsi ya cumi bongera baratanguza inyigisho za Bibiliya zitari nke. Umuvukanyi umwe n’umugore wiwe mu bari kuri iryo shure baratanguye kwigana Bibiliya n’umugabo umwe w’Umushinwa. Bamaze kumugendera kabiri, baramubajije ingene abona ibijanye no kumenya Yehova. Yaciye azingurura Bibiliya yiwe abasaba gusoma Yohana 17:3. Yabona ko ari mu nzira ijana mu buzima.

Anthony Morris wo mu Nama Nyobozi yaciye abaza ibibazo abavukanyi bari mu bagize Komite z’ishami zitatu zitandukanye, iyo muri Côte d’Ivoire, iyo muri Équateur, be n’iyo muri République dominicaine. Abo bavukanyi barakuye amazinda abo bagira basohoke iryo shure yuko Komite z’ishami ziteganye igishika ugushika kwabo be n’uko zizobafasha kumenyera ivyibare vyabo bishasha.

Ubukurikira, Leonard Pearson wo mu bagize umuryango wa Beteli yo muri Leta Zunze Ubumwe za Amerika yaraganiriye n’abavukanyi batatu bo muri Komite z’ishami, umwe akaba yari yavuye muri Repubulika iharanira demokarasi ya Kongo, uwundi muri Papouasie-Nouvelle-Guinée, uwundi na we muri Uganda. Abo bavukanyi bararemesheje abo bagira basohoke iryo shure kugira uruhara bimwe bishitse mu busuku bwo mu ndimiro. Abamisiyonari bubakanye babiri bamaze imyaka irenga 21 muri Kongo barafashije abantu 60 gushika ku kwiyegura no ku kubatizwa. Ubu barongora inyigisho za Bibiliya 30, kandi 22 mu bo bigana Bibiliya baritaba amakoraniro y’ishengero. Kubera iryo sarura rihambaye ryo mu vy’impwemu ririko riraba, ubu ni igihe ciza utoraba co gukora ubumisiyonari.

Gushinga intahe babona ko ibintu vyihutirwa

Gerrit Lösch wo mu Nama Nyobozi ni we yashikirije insiguro yo gusozera. Umutwe w’insiguro yiwe wavuga ngo “Tuvuge ivyerekeye Imana twongere dushingire intahe Yezu mu musi w’Umukama”. Amajambo “intahe”, “abashinga intahe”, “gushinga intahe”, aboneka incuro 19 mu gitabu c’Ivyahishuriwe. Gutyo, Yehova aratomora neza igikorwa ashaka ko abasavyi biwe bakora. Ni ryari none twoshinga mwene iyo ntahe? Mu gihe c’“umusi w’Umukama” (Ivyahishuwe 1:9, 10, UB). Uwo musi watanguye mu 1914, ukaba ubandanya no muri iki gihe cacu, kandi uzobandanya gushika no muri kazoza. Amajambo ari mu Vyahishuriwe 14:6, 7 arerekana ko igikorwa co kuvuga ivyerekeye Imana gishigikiwe n’abamarayika. Mu Vyahishuriwe 22:17 herekana ko amasigarira y’abakirisu basizwe ari yo ashinzwe ibanga ryo kuyobora igikorwa co gushingira intahe Yezu. Mugabo twese dutegerezwa kwungukira kuri ako gateka ubu. Mu murongo wa 20, Yezu adondorwa ariko avuga ati: “Ndaza vuba”. Umuvukanyi Lösch yahimirije abari ng’aho bose ati: “Tere akamo abantu muti: ‘Ngwino mwakire amazi y’ubuzima ku buntu’. Yezu araje vuba. Twoba twiteguye?”.

Fred Rusk, uwamaze imyaka 11 ari umwigisha wo kw’Ishure ry’i Gileyadi, ni we yarangije iyo porogarama n’isengesho ryo gukengurukira Yehova ryakoze ku mutima abari bitavye ivyo birori bose. Emwe, yari insozero ibereye y’uwo musi w’umunezero mwinshi.

[Uruzitiro ku rup. 13]

IBIRANGA ABARI BITAVYE IRYO SHURE

Igitigiri c’ibihugu bavuyemwo: 10

Igitigiri c’ibihugu barungitswemwo: 25

Igitigiri c’abanyeshure: 56

Incahagati y’imyaka y’amavuka: 32,5

Incahagati y’imyaka bamaze mu kuri: 16,4

Incahagati y’imyaka bamaze mu busuku bw’igihe cose: 12,1

[Ifoto ku rup. 15]

Umugwi ugira 119 w’abasohoka Ishure ry’ivya Bibiliya ry’i Gileyadi rya Watchtower

Mu rutonde rukurikira, imirongo iharurwa uhereye imbere uja inyuma, amazina na yo akaba atondetse uhereye ibubamfu uja iburyo ku murongo umwumwe wose.

(1) Helgesen, S.; Daugaard, H.; Pierluissi, A.; Joseph, I.; Racanelli, C. (2) Byrge, T.; Butler, D.; Freedlun, J.; Nuñez, K.; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O.; Doumen, A. (4) Tirion, A.; Connally, L.; Fournier, C.; Gil, A.; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.