Gutahura insobanuro y’ibimenyetso birahambaye rwose!

“Mu ntango nibaza ko umuhungu wacu Andreas yariko ameneka umutwe gusa. Mugabo yahavuye abura akayabagu aragira n’umucanwa mwinshi cane. Umutwe wararushirije kumeneka, maze ntangura guhagarika umutima. Umunega wanje ashitse i muhira, twaciye dutwara Andreas kwa muganga. Muganga yarasuzumye ibimenyetso, ubwo nyene aca arungika Andreas mu bitaro. Ntikwari ukumeneka umutwe gusa. Andreas yari arwaye indwara ya mugiga. Yaravuwe maze bidatevye arasubira kugira amagara meza”.​—Vyavuzwe na inabibondo umwe wo mu Budagi yitwa Gertrud.

ABAVYEYI benshi bashobora kuba bamenyereye kubona ibintu nk’ivyo vyashikiye Gertrud. Bararaba ibimenyetso vyerekana ko umwana wabo yoba arwaye. Naho atari indwara zose zikomeye, abavyeyi bokwibonera inkurikizi zibabaje hamwe bokwirengagiza ibimenyetso vyerekana ko umwana wabo arwaye. Kuraba ibimenyetso umuntu agaca akora ikibereye vyoshobora kugira ikintu kinini bimaze. Ivyo birahambaye rwose.

Gutahura ibimenyetso no guca umuntu agira ico akoze, birahambaye rwose no mu bindi turetse ivy’amagara. Akarorero kavyerekana neza ni ca cago caterwa na vya bisebuzi bininibinini kandi bikomeye vyataziriwe tsunami vyatewe na nyamugigima muri Kigarama 2004 mu turere dukikuje Ibahari Indiyano. Amashirahamwe ya Leta yo muri Ositaraliya no muri Hawayi yaramenye ko mu Buraruko bw’izinga rya Sumatra hariko haba ca nyamugigima gikomeye cane, maze aca arabona imbere y’igihe akaga coshoboye gutera mu nyuma. Yamara, nta buryo bwari buhari kugira ngo abari mu turere tugeramiwe bashobore kuburirwa canke bashobore kugira ico bakoze. Ingaruka vyagize ni uko abantu barenga 220.000 bahasize ubuzima.

Ibimenyetso bihambaye cane kuruta

Igihe Yezu Kirisitu yari kw’isi, hari icigwa yahaye abariko bamwumviriza kijanye n’ukuraba ibimenyetso no guca umuntu agira ico akoze. Yariko avuga ikintu cari gihambaye rwose. Bibiliya ivuga iti: “Abafarisayo n’Abasadukayo baraza, barondera kw abereka ikimenyetso kiva mw ijuru, bamugeza. Na we arabishura, at’Iyo bugorovye, muravuga muti Buca haba umuco, kukw ijuru ryirasiye. Mu mutwenzi, muravuga muti Hagira hafurungane, kukw ijuru ryirasiye, kandi ryiraburaniwe. Murazi kugenzura ijuru uko risa, arikw ibimenyetso vy’ibihe ntimuzi kubigenzura”.​—Matayo 16:1-3.

Mu kuvuga ivy’“ibimenyetso vy’ibihe”, Yezu yarerekanye ko Abayuda bo mu kinjana ca mbere bamwumviriza bari bakwiye kubona ko ibihe bari babayemwo vyihuta. Urunkwekwe rw’ibintu rw’Abayuda rwari rwimirije gushikirwa n’icago gikomeye cogize ico gikoze kuri abo Bayuda bose. Hasigaye imisi mikeyi ngo Yezu apfe, yarabwiye abigishwa biwe ivyerekeye ikindi kimenyetso, ico na co kikaba ari ca kimenyetso c’ukuhaba kwiwe. Ivyo yavuze ico gihe birahambaye rwose ku bantu bose muri iki gihe.