Ibibazo vy’abasomyi

Shetani wa Mucokoranyi yoba ashoboye kumenya ibiri mu muzirikanyi w’umuntu?

Naho tudashobora kuvyemeza neza, bisa n’uko yaba Shetani canke amadayimoni yiwe, badashoboye kumenya ivyiyumviro vyacu.

Rimbura amazina Shetani ahabwa yo kumudondora. Yitwa Shetani (Umunanyi), Mucokoranyi (Mureganyi), Inzoka (icitiranwa c’Umuhumvyi), Uwosha abandi be n’Umunyabinyoma (Yobu 1:6; Matayo 4:3; Yohana 8:44; 2 Ab’i Korinto 11:3; Ivyahishuriwe 12:9). Nta na rimwe muri ayo mazina adondora Shetani ryerekana ko ashoboye kumenya ibiri mu mizirikanyi.

Ariko rero, Yehova Imana we adondorwa ko ari “[u]musuzumyi w’imitima” (Imigani 17:3, NW; 1 Samweli 16:7; 1 Ngoma 29:17). Mu Baheburayo 4:13 hagira hati: “Imbere yayo nta caremwe gihishijwe, ariko vyose vyambaye ubusa, biragaragara, imbere y’inyonga z’Iyizotubaza ivyo twakoze”. Ntibitangaje kubona Yehova yarahaye Umwana wiwe Yezu ubushobozi bwo gusuzuma imitima. Yezu yazutse yavuze ati: “[Ni] jewe nsesa mu mishaha no mu mitima, kandi nzokwishura umuntu wese wo muri mwebge ibihwanye n’ivyo mwakoze”.​—Ivyahishuriwe 2:23.

Bibiliya ntivuga ko Shetani ashoboye gusesa imitima y’abantu n’imizirikanyi yabo. Ivyo birafise ico bivuze, kubera intumwa Paulo adukura amazinda yuko abakirisu ‘batayobewe imigabo ya Shetani’ (2 Ab’i Korinto 2:11). Ni co gituma bidakenewe ko tugira ubwoba bw’uko Shetani yoba afise ubushobozi budasanzwe tutazi na gato.

Naho ari ukwo, ivyo ntibishaka kuvuga yuko Umwansi wacu adashobora kumenya aho tugoyagoya. Shetani aramaze ibinjana n’ibindi yiga inyifato y’abantu. Ntakeneye kwirirwa aramenya ibiri mu mizirikanyi yacu kugira ngo atahure inyifato duhitamwo kwisunga, yihweze ivy’ukwinezereza dukurikirana canke yumvirize ibintu tuvuga, n’ibindi. Mu maso hacu be n’ibimenyetso vy’umubiri birashobora kwerekana ico twiyumvira canke uburyo tumerewe.

Ariko rero, Shetani akoresha canecane amayeri nk’amwe yakoresha mw’itongo ryo muri Edeni, ni ukuvuga ibinyoma, uruhendo be n’amakuru atari yo (Itanguriro 3:1-5). Naho bidakenewe ko abakirisu batinya yuko Shetani azomenya ibiri mu mizirikanyi yabo, barafise imvo yumvikana yo kwitwararika ivyiyumviro Shetani yogerageza gushira mu mizirikanyi yabo. Ashaka ko abakirisu baba abantu “bononekaye ubgenge, bakūwekw ivy’ukuri” (1 Timoteyo 6:5). Ntibitangaje kubona isi ya Shetani isohora amakuru menshi be n’ivyo kwinezereza vyinshi vyonona. Kugira ngo abakirisu ntibatwarwe n’ivyo bintu, bategerezwa gukingira imizirikanyi yabo mu kwambara “inkofero y’agakiza” (Abanyefeso 6:17). Ivyo babigira mu kwuzuza imizirikanyi yabo ukuri kwa Bibiliya no mu kwirinda ibintu vyonona vyo muri iyi si ya Shetani.

Shetani ni umwansi akomeye. Mugabo ntibikenewe ko tumutinya canke ngo dutinye amadayimoni yiwe. Muri Yakobo 4:7, hadukura amazinda hati: “Murwanye wa Murwanizi, na we azobahunga”. Dukurikije iyo mpanuro, tuzoshobora kuvuga nka kumwe kwa Yezu yuko Shetani ata kintu afise muri twebwe.​—Yohana 14:30.