‘Mana, kubera iki waretse ibi bikaba?’
RICARDO aracibuka yicaranye na Maria umugore wiwe mu cumba barindiriramwo muganga.a Nta n’umwe muri bo yaronse intege zo gusoma inyishu z’ibipimo vyo kwa muganga Maria yari aherutse kugirisha. Haciye akanya, Ricardo yaruguruye ibahasha, baca bihutira kuraba izina ry’indwara yari yatowe. Baciye babona ijambo “kanseri,” maze bompi baca batangura kwiyuha iryosi kubera batahura insobanuro yuzuye y’iryo jambo.
Ricardo yibuka ibi: “Uwo muganga yari umunyabuntu cane, mugabo biboneka yuko yatahuye ukuntu ivyo bintu vyari bikomeye kubera yaguma atubwira yuko dukwiye kwizigira Imana.”
Imbere y’uko Maria atangura kuvurwa hakoreshejwe uburyo busaba gukoresha imishwarara iturira utugingo tumaze gufatwa na kanseri (radiothérapie), umuganga wiwe yarabonye ko hari ukuntu ukuguru kwiwe kw’iburyo kutaguma hamwe bikaba ari ibintu vyapfa kwiyadukiza. Ibindi bipimo vyerekanye yuko kanseri yari yamaze gukwiragira gushika no mu bwonko. Haheze indwi imwe gusa avurwa, bwa buryo bwo kumuvura bwarahagaritswe. Maria yaciye aba nk’uwapfuye ari vyo bita kuja muri koma, hanyuma apfa haheze amezi abiri. Ricardo asigura ati: “Naranezerewe kubona ugucumukura yari arimwo kwari kurangiye, mugabo naratuntuye cane kubona tutakiri kumwe gushika n’aho na jewe nyene nsanga ndiko nipfuza yuko nopfa. Akenshi, naratakambira Imana nti: ‘Kubera iki waretse ibi bikaba?’”
Iyo ivyago vyadutse, ibibazo biba vyinshi
Nka kumwe kwa Ricardo, abantu badaharurika hirya no hino kw’isi babwirizwa guhangana n’ugucumukura. Akatari gake, usanga abatazi ico bazira ari bo bacumukura. Iyumvire intuntu y’akavunamutima isinzikaje umuryango w’abantu iterwa n’amatati adatezura aba arimwo n’ibirwanisho! Canke rimbura umubabaro ugirwa n’abantu batari bake bashikirwa n’ivyo gusambanywa ku nguvu, kwonona abana, ubukazi bwo mu muryango n’ayandi mabi akorwa n’abantu. Muri kahise hose, akarenganyo be n’umubabaro abagabo n’abagore bamye bagiriranira bisa n’uko bitigeze bigira umupaka. (Umusiguzi 4:1-3) Ku bw’ivyo, abashikirwa n’ivyago vy’ivyaduka canke indwara zo mu mutima, mu bwenge, no ku mubiri baragira umubabaro mwinshi. Ntibitangaje kubona abantu benshi bibaza bati: “Ni kubera iki Imana ireka hakaba mwene ukwo gucumukura?”
Mbere no ku bafise ivyo bemera mw’idini, guhangana n’ugucumukura ntivyigera biborohera. Na wewe nyene woshobora kwibaza igituma Imana y’inyarukundo ikaba na mushoboravyose, ishobora kureka abantu bagacumukura. Kuronka inyishu imara akanyota kandi y’ukuri kuri ico kibazo kigoye gutahura, birahambaye ku bw’amahoro yacu yo mu muzirikanyi be no ku bw’ubucuti tugirana n’Imana. Bibiliya iratanga mwene iyo nyishu. Turakwinginze urimbure ico ivuga nk’uko vyerekanwa mu kiganiro gikurikira.
[Akajambo k’epfo]
a Amazina yarahinduwe.
[Amafoto ku rup. 3]
Muganga yaguma atubwira yuko dukwiye kwizigira Imana