Dushobora Gute Gutuma Imisi Yacu Igira Ico Imaze mu Nyonga za Yehova?

“Ejo, hari ahantu hatakariye umwanya w’amasaha abiri y’agaciro agereranywa n’izahabu, isaha imwimwe yose ikaba yari igizwe n’iminuta mirongo itandatu y’agaciro kanini igereranywa na diyama, hakaba hari hagati y’izuba riserutse n’izuba rirenze. Uwo mwanya nta n’uwuzowutora ngo ahabwe ikibonamaso, kubera yuko watakaye ubutakigaruka!”​—Lydia H. Sigourney, umwigisha w’Umunyamerika (1791-1865).

IMISI ubuzima bwacu bumara bisa n’uko ari mike, kandi ishira ningoga. Umwanditsi wa Zaburi Dawidi yarazirikanye ku kuntu ubuzima ari bugufi hanyuma avyurirwa umutima wo gusenga ati: “Uhoraho, mmenyesha iherezo ryanje, n’urugezo rw’imisi yanje, uko rureha, mmenye ko nd’igikenya. Erega wahinduye imisi yanje nk’intambge z’intoke; igihe c’ukubaho kwanje kuri wewe ni nk’ubusa.” Icari kiraje ishinga Dawidi kwari ukubaho mu buryo buhimbara Imana, mu vyo avuga no mu vyo akora. Mu guserura ukuntu yisunga Imana, yavuze ati: “Ni wewe nizigira.” (Zaburi 39:4, 5, 7) Yehova yarateze ugutwi. Kukaba nkako yararimbuye ibikorwa vya Dawidi maze amuronsa impera yisunze ivyo bikorwa.

Biroroshe kugira vyinshi umuntu akora ku munuta wose w’umusi no gutwarwa n’ubuzima burimwo ukwihuta kandi bwuzuye ibikorwa. Ivyo bishobora gutuma tugira umwitwarariko utera amaganya, canecane kubera ko dufise vyinshi vyo gukora no kwiga, umwanya wo kubigira na wo ukaba ari muto. Ikituraza ishinga coba ari nka kimwe caraza ishinga Dawidi, ni ukuvuga kubaho dufise intumbero yo kwemerwa n’Imana? Tuvugishije ukuri, Yehova arihweza kandi agasuzuma yitonze umwe wese muri twebwe. Yobu, umugabo yatinya Imana, haraciye nk’imyaka 3.600 yemeye icese yuko Yehova yabona inzira ziwe kandi agaharura intambuko ziwe zose. Yobu yabajije mu buryo bwo kuzirikana ati: “Noyishura iki, igihe ije kumbazaguza?” (Yobu 31:4-6, 14) Birashoboka ko dutuma imisi yacu igira ico imaze mu nyonga z’Imana mu gushinga ivy’impwemu bikaba ari vyo biza imbere y’ibindi, mu kugamburuka amabwirizwa yayo be no mu gukoresha umwanya wacu mu buryo buranga ubukerebutsi. Nimuze dusuzume twitonze ivyo bintu.

Ibintu vy’Impwemu Tubigire co Kintu Nyamukuru Twitwararika

Ivyanditswe vyahumetswe biraduhimiriza mu buryo bukwiriye ko twoshinga ivy’impwemu bikaza imbere y’ibindi igihe bivuga biti: “Murobanure [“ibintu bihambaye kuruta,” NW].” Ivyo bintu bihambaye ni ibiki? Inyishu irimwo kugira “ubumenyi ntagakosa be n’ubukerebutsi bushitse.” (Ab’i Filipi 1:9, 10, NW) Kugira ngo turonke ubumenyi bwerekeye imigambi ya Yehova bisaba ko dukoresha umwanya wacu mu buryo buranga ubukerebutsi. Ariko rero, kugira ibintu vy’impwemu co kintu nyamukuru twitwararika bizotuma tugira ubuzima buhimbaye kandi bumara akanyota.

Intumwa Paulo aratwibutsa “[kuguma t]umeny[a] neza ibihimbara Umwami wacu.” Ukumenya neza tugira gutegerezwa kuba kurimwo kwisuzuma tukaraba imvo dukorana be n’ivyipfuzo dufise mu mutima. Iyo ntumwa irabandanya iti: “Mutahure ivy’Umwami wacu agomba ivy’ari vyo.” (Abanyefeso 5:10, 17) None ni ibiki Yehova abona ko vyemewe? Umugani umwe wa Bibiliya wishura uti: “Ikir’imbere ya vyose n’ub[ukerebutsi]: nuko wironkere ub[ukerebutsi]; mber’ivy’ufise vyose ubihebere ugutahura. Bushire hejuru, na bgo buzogukuza.” (Imigani 4:7, 8) Yehova aranezerezwa n’umuntu aronka ubukerebutsi buva ku Mana kandi akabukoresha. (Imigani 23:15) Iciza c’ubukerebutsi nk’ubwo ni uko budashobora gukurwaho. Kukaba nkako, bucika uburinzi be n’inkinzo bidukingira ‘inzira y’ikibi n’abantu bavuga ibintu bibi.’​—Imigani 2:10-15.

Ese ukuntu rero biranga ubukerebutsi kunanira impengamiro iyo ari yo yose yo kugira agatima ko kutanegwa ibintu vy’impwemu! Turakeneye gutsimbataza agatima ko gukenguruka ivyo Yehova avuga be n’ukumutinya kwiza. (Imigani 23:17, 18) Naho inyifato nk’iyo yo mu muzirikanyi umuntu ashobora kuyironka igihe ico ari co cose mu buzima, ni vyiza gushiraho ico citegererezo ciza be no kwinjiza ingingo ngenderwako za Bibiliya muri kamere yacu mu gihe c’ubuto. Umwami w’inkerebutsi Salomo avuga ati: “Kandi wame wibuka Umuremyi wawe mu misi y’ubusore bgawe.”​—Umusiguzi 12:1.

Uburyo bwimbitse kuruta bwo gutsimbataza ugukengurukira Yehova ni isengesho umutura ku musi ku musi. Dawidi yaremeye icese ko bihambaye kwizigira Yehova, kuko yinginze ati: “Umva [u]gusenga kwanje, Uhoraho we, tegera ugutwi ugutakamba kwanje; ntiwicire amatwi amarira yanje.” (Zaburi 39:12) Ubucuti bugera ibwina dufitaniye n’Imana mu bihe bimwebimwe bwoba bukora ku nyiyumvo zacu gushika n’aho bituma dukorora amasozi? Nkako, uko turushiriza guserurira Yehova ivyerekeye ibintu vyacu bwite biri mu mutima tukongera tukazirikana kw’Ijambo ryiwe, ni ko arushiriza kutwiyegereza.​—Yakobo 4:8.

Twige Kugamburuka

Musa ni uwundi muntu yari afise ukwizera yemera icese kwisunga Imana. Nka kumwe kwa Dawidi, Musa yarashoboye kubona yuko ubuzima bwuzuye ingorane. Ni co gituma yinginze Imana ngo imwereke ‘ingene aharura imisi yiwe mu buryo butuma atunga umutima w’ubukerebutsi.’ (Zaburi 90:10-12) Umutima w’ubukerebutsi umuntu yowuronka gusa mu kwiga no mu kubaho yisunga ivyagezwe vya Yehova n’ingingo ngenderwako ziwe. Musa ivyo yari abizi, ari na co gituma yagerageje kwinjiza ukwo kuri guhambaye mw’ihanga rya Isirayeli mu kubasubiriramwo ivyagezwe vy’Imana be n’amateka yayo, imbere y’uko begukira ca Gihugu c’Isezerano. Umwami uwo ari we wese Yehova yari guhitamwo mu nyuma kugira ngo ategeke Isirayeli yategerezwa kwiyandikira ikopi y’Ivyagezwe akongera akayisoma imisi yose y’ukubaho kwiwe. Kubera iki? Kugira ngo ashobore kwiga gutinya Imana. Ivyo vyobaye ari ukugeza ukugamburuka kw’umwami. Vyomukingiye kugira umutima wo kwishira hejuru y’abavukanyi biwe kandi vyotumye arambira ku ngoma. (Gusubira mu Vyagezwe 17:18-20) Uwo muhango Yehova yarasubiye kuwutanga igihe yabwira Salomo umuhungu wa Dawidi ati: “Ni wagendera mu nzira zanje, ukitondera amabgirizwa yanje n’ivyagezwe vyanje, nk’uko so Dawidi yagenjeje, nzoguha kuramba.”​—1 Abami 3:10-14.

Ukugamburuka ni ikintu Imana ibona ko gikomeye. Hamwe twofata imice imwimwe y’ivyo Yehova adusaba be n’amabwirizwa yiwe nk’ibidahambaye, nta gukeka ko atoreka kubona inyifato nk’iyo. (Imigani 15:3) Kumenya ivyo bintu bikwiye kudusunikira ku kuguma duha agaciro kari hejuru ubuyobozi bwa Yehova bwose, naho kubigira bitokwama nantaryo vyoroshe. Uko twihatira kwumvira ivyagezwe vy’Imana n’amabwirizwa yayo, Shetani arakora uko ashoboye kwose kugira ngo ‘atubuze.’​—1 Ab’i Tesalonike 2:18.

Birahambaye canecane kugamburuka impanuro yo mu Vyanditswe idusaba gukoranira hamwe ku bw’ugusenga n’ukwifatanya n’abandi. (Gusubira mu Vyagezwe 31:12, 13; Abaheburayo 10:24, 25) Ku bw’ivyo, birakwiye ko twibaza duti: ‘Noba mfise umwiyemezo be n’ugukomera ku muheto bikenewe kugira ngo nkore ikintu c’ingirakamaro koko?’ Gufata minenegwe ivyo kwifatanya n’abandi be n’amacishabwenge turonkera ku makoraniro ya gikirisu kubera ukugerageza kwironderera amahera menshi, vyoshobora gutuma ubucuti dufitaniye na Yehova bugoyagoya. Intumwa Paulo yanditse ati: “Gukunda amahera ntikube mu ngeso zanyu; ivyo mufise bibabumbe; kuk[o Yehova] yavuze [a]ti Nta ho nzoguhemukira, nta ho nzoguta.” (Abaheburayo 13:5) Kugamburuka amabwirizwa ya Yehova n’umutima ukunze birerekana ko twizigira ata gukeka yuko azotubungabunga.

Yezu yarize kugamburuka kandi yarahungukiye. Ivyo birashoboka no kuri twebwe. (Abaheburayo 5:8) Uko turushiriza gutsimbataza ukugamburuka, ni ko birushiriza kutworohera kugamburuka mbere no mu bintu bitobito. Ni vyo, bitumwe n’ukutadohoka kwacu, vyoshoboka ko dutegerezwa kwihanganira ugufatwa nabi n’abandi, mbere n’igihe badufashe mu buryo bubabaza. Ivyo bishobora kuba canecane aho dukorera, kw’ishure canke mu rugo rurimwo abantu badasangiye ukwemera. Yamara, turahumurizwa n’amajambo yabwiwe Abisirayeli yuko baramutse ‘bakunze Yehova mu kumwumvira, no mu kwifatanya na we akaramata, yobaye ubuzima bwabo n’ukuramba kwabo.’ (Gusubira mu Vyagezwe 30:20) Uwo muhango nyene ni wo na twebwe duhabwa.

Dukoreshe Umwanya mu Buryo Buranga Ubukerebutsi

Gukoresha umwanya wacu mu buryo buranga ubukerebutsi bizodufasha kandi gutuma imisi yacu igira ico imaze mu nyonga za Yehova. Umwanya si nk’amahera ashobora kubikwa, utegerezwa gukoreshwa, atari aho naho uzotakara. Isaha yose irenganye iba igiye akagirire. Kubera yuko hama hari vyinshi vyo gukora biruta ivyo dushobora kurangura, twoba turiko turakoresha umwanya wacu mu buryo bizodufasha gushikira intumbero twishingiye mu buzima? Intumbero nyamukuru y’Abakirisu bose ikwiye kuba iyo kugira uruhara ubudahorereza mu gikorwa co kwamamaza Ubwami no guhindura abantu abigishwa.​—Matayo 24:14; 28:19, 20.

Dukoresha umwanya wacu mu buryo buranga ubukerebutsi igihe gusa tumaze gutahura bimwe bigera ibwina agaciro kawo. Mu Banyefeso 5:16 haraduhimiriza mu buryo bubereye ‘kwicungurira umwanya ubereye,’ ivyo bikaba birimwo “kuwugura,” kureka ibintu bidahambaye cane. Bisobanura kugabanya ibintu dukurikirana bitakaza umwanya. Kurorera televiziyo birenze urugero canke kurondera amakuru kuri Internet, gusoma amakuru yo mw’isi ata co yungura, canke gukurikirana ivyo kwisamaza n’ivyo kwinezereza mu buryo burenze urugero birashobora kuturuhisha cane. Vyongeye, ukwirundaniriza birenze urugero ibintu vy’umubiri kurashobora kudutwara umwanya ukenewe kugira ngo turonke umutima w’ubukerebutsi.

Abashigikira ivyo gukoresha neza umwanya bavuga bati: “Ntibishoboka ko ukoresha neza umwanya wawe nimba ata mahangiro atomoye wishingiye.” Baratanga ibintu bitanu umuntu yokwisunga mu gushinga amahangiro bakavuga ko ayo mahangiro yoba: atomoye, ushobora kubona aho ugejeje, ushobora kuyashikako, ari amahangiro ashoboka koko kandi ari ku rutonde.

Ihangiro nyamukuru rimwe ni iryo kuryohora ubusomyi bwacu bwa Bibiliya. Intambwe ya mbere ni iyo gutuma ihangiro ryacu riba iritomoye, na ryo akaba ari ugusoma Bibiliya yose uko ingana. Intambwe ikurikira ni iyo gutuma dushobora kubona aho tugejeje ihangiro ryacu. Mu kubigira, turashobora gushinga ukuntu twogenda dutera imbere. Amahangiro akwiye gutuma twihata kandi tutaguma ha handi. Ategerezwa kandi kuba ari ayo umuntu ashobora gushikako kandi akaba ari amahangiro ashoboka koko. Umuntu ategerezwa kurimbura ubushobozi afise, ubuhanga bwiwe be n’umwanya afise. Kuri bamwebamwe, bishobora gusaba umwanya munini kugira ngo arangure nya hangiro. Ubwa nyuma, ihangiro ryacu rikeneye gushirwa ku rutonde. Gushinga itariki ikintu kizosozerererwako birashobora gutuma turushiriza kwitwararika gukora ico kintu.

Abagize umuryango wa Beteli ku mubumbe wose, bakorera ku cicaro gikuru c’Ivyabona vya Yehova canke kuri rimwe mu mashami yo kw’isi yose, barafise ihangiro ritomoye ryo gusoma Bibiliya yose uko ingana mu mwaka wabo wa mbere wo kuri Beteli. Baratahura yuko ubusomyi bwa Bibiliya nzanakunguko butuma bakura mu vy’impwemu kandi bugatuma barushiriza kugiranira ubucuti bwa hafi na Yehova, we ariko arabigisha ibibagirira akamaro. (Yesaya 48:17) Twoba na twe dushobora kugira ugusoma Bibiliya ubudahorereza ryo hangiro ryacu?

Ivyiza Biva mu Gutuma Imisi Yacu Igira Ico Imaze

Kwitwararika ubwa mbere na mbere ibintu vy’impwemu bizovamwo imihezagiro itagira uko ingana. Kimwe coco, bituma turushiriza kwumva ko hari ivyo dushikako kandi tukarushiriza kwumva ko dufise intumbero mu buzima. Uguserurira Yehova akari ku mutima ubudahorereza mw’isengesho dutura rivuye ku mutima bituma turushiriza kumwiyegereza. Ico gikorwa nyene co gusenga kirerekana yuko tumwizigira. Gusoma ku musi ku musi Bibiliya n’ibisohokayandikiro bishingiye kuri yo bitangwa na “wa mushumba w’umwizerwa kandi w’incabwenge” birerekana ko dufise umutima ukunze wo kwumviriza Imana igihe ituyagira. (Matayo 24:45-47, NW) Ivyo biradufasha kuronka umutima w’ubukerebutsi kugira ngo dufate ingingo nziza twongere tugire amahitamwo meza mu buzima.​—Zaburi 1:1-3.

Turahimbarwa no kugamburuka amabwirizwa ya Yehova, kubera yuko kubigira atari umuzigo. (1 Yohana 5:3) Uko dutuma umusi wose ugira ico umaze mu nyonga za Yehova, turakomeza ubucuti dufitaniye na we. Turacika kandi abashigikira vy’ukuri Abakirisu bagenzi bacu mu vy’impwemu. Ibikorwa nk’ivyo biratuma Yehova Imana anezerwa. (Imigani 27:11) Vyongeye, nta yindi mpera nini yoza iruta ugushimwa na Yehova ubu be n’imyaka yose!

[Ifoto ku rup. 21]

Abakirisu bafatana uburemere ibintu vy’impwemu

[Amafoto ku rup. 22]

Woba uriko urakoresha umwanya wawe mu buryo buranga ubukerebutsi?

[Ifoto ku rup. 23]

Turakomeza ubucuti dufitaniye na Yehova uko dutuma umusi wose ugira ico umaze kuri we