Urupfu Wewe Urubona Ute?

URUPFU ruguma ruri hejuru yacu mu buzima bwacu bwa misi yose, naho twoba dukomeye canke dutunze gute. Rushobora kuza kuduhitana tujabuka ibarabara canke turyamye. Ivyago nka ca gitero bagaterabwoba bagira ku wa 11 Nyakanga 2001 mu Gisagara ca New York n’ica Washington, D.C., bituma dutahura yuko “umwansi w’imperuka,” ni ukuvuga urupfu, akorakoranya abo ahitana abakuye mu nzego zose z’ubuzima no mu bantu b’imyaka iyo ari yo yose, rimwe na rimwe agahitana abantu ibihumbi mu minuta mikeyi.​—1 Abakorenti 15:26, UB.

Naho biri ukwo, ivy’urupfu bisa n’ibikwegēra abantu. Nta kintu coboneka cotuma hagurishwa ibinyamakuru vyinshi gusumba, canke cokwegera abantu benshi kuraba televiziyo, kurusha amaraporo avuga ivy’urupfu, canecane urupfu rw’abantu benshi bapfuye mu bintu vy’agacavutu. Abantu ntibashobora gusa n’abarambirwa n’ayo maraporo, rwaba urupfu rutewe n’intambara, icago c’icaduka, ubukozi bw’ikibi, canke indwara. Ukwo kwitwararika cane ivy’urupfu usanga guserurwa mu buryo butangaje kuruta igihe hapfuye abantu bahambaye be na ba rurangiranwa.

Ivyo vyose ntawobiharira. Abantu baguma bakwegērwa n’ivy’urupfu, urupfu rw’abandi. Ariko rero, igihe ubwabo bahanganye n’urupfu, ntibavyerekwa. Urupfu rwacu bwite ni ikintu abenshi muri twebwe badashaka no kwiyumvira.

Urupfu Rwoba Rudutesha Umutwe?

Kwiyumvira ivy’urupfu rwacu bwite vyama ari ibintu bibishe kandi niko bizokwama. Kubera iki ari ukwo biri? Ni kubera yuko Imana yadushizemwo icipfuzo gikaze co kubaho ibihe bidahera. Mu Musiguzi 3:11 havuga yuko “Yashize ivyiyumviro vy’ibihoraho mu mitima yabo.” Ivy’uko urupfu rutegerezwa gushika rero, vyatumye haba intambara yamaho mu bantu, amahane y’urudaca. Kugira bahangane n’iyo ntambara iri muri bo, bongere bahaze icipfuzo mvukanwa co kubandanya kubaho, abantu bariremaremeye inyigisho z’ubwoko bwose, guhera ku nyigisho y’ukudahwera kw’ubugingo gushika ku kwemera yuko umuntu iyo apfuye yongera kuvukira mu kindi kiremwa.

Uko biri kwose, urupfu ni ikintu gishika gitesha umutwe, gitera ubwoba, kandi ugutinya urupfu biri hose. Gutyo rero, ntidukwiye gutangazwa n’uko ikibano c’abantu muri rusangi basanga urupfu ari ikintu batazi uko bogifata. Kimwe coco, urupfu ruragaragaza ko kwihebera ivy’ugukurikirana ubutunzi no kurondera ubukuru ata co bimaze koko.

Umuntu Ari mu Gupfa Yoca Ashirwa Ukwa Wenyene?

Mu bihe vyashize, umuntu arwaye ari mu gucikana canke yakomeretse bikomeye, akenshi barareka agapfira i muhira iwe amenyereye kandi akunda. Uko ni ko kenshi vyagenda mu bihe vya Bibiliya, kandi ni ko bikiri no mu mico kama imwimwe. (Itanguriro 49:1, 2, 33) Mu bihe nk’ivyo, umuryango urahurira hamwe, n’abana bakaja mu baremesha ikiyago. Ivyo bituma umwe wese mu bagize umuryango yiyumvamwo ko atariko ababara wenyene, bigatanga kandi impumurizo iva ku gufadikanya iryo banga no gusangira umubabaro.

Ivyo biratandukanye cane n’ibiba mu kibano aho ukuganira ivy’urupfu ari ikizira; bibonwa ko ari ikintu kibabaza, aho kandi abana bakumirwa kubera icitwazo c’uko ngo vyoba “bibarengeye.” Mu buryo bwinshi, gupfa muri kino gihe biratandukanye n’uko vyahora, kandi akenshi umuntu agakunda gupfa ari wenyene. Naho abantu benshi bipfuza gupfira i muhira, bakipfira mu mahoro kandi umuryango ubitwararikanye urukundo, ibiteye agahinda ni uko benshi bapfira mu bitaro, bari mu bikoresho injojo biteye ubwoba vyo mu buhinga buhanitse, kenshi na kenshi bari bonyene kandi bari mu mubabaro. Ku rundi ruhande, abantu amamiliyoni barapfa mu buryo butazwi, bitavuye kw’ihonyabwoko, inzara, SIDA, ingwano y’abanyagihugu, canke gusa ku bworo.

Urupfu Ni Ikintu co Kuzirikanako

Bibiliya ntitubuza kwiyumvira ivy’uko tuzopfa. Nkako, mu Musiguzi 7:2 hatubwira hati: “Ni vyiza kuja mu nzu y’abagandaye kuruta kuja mu nzu y’intumire: kukw ari ryo herezo ry’abantu bose.” Igihe tuzirikanye ivy’uko urupfu rushobora gushika, twoshobora kureka imyitwarariko yacu ya misi yose, maze tukitunira ku vy’uko ubuzima ari bugufi. Ivyo birashobora kudufasha kubaho mu buryo burushirije kugira ico buvuze, aho kugira ubuzima butagira intumbero canke kubupfisha ubusa.

Wewe urupfu urubona ute? Woba warasuzumye inyiyumvo zawe, ivyo wemera, ivyizigiro vyawe, be n’ivyo utinya ku bijanye n’iherezo ry’ubuzima bwawe?

Nk’uko bimeze ku buzima, urupfu ni ikintu kirengeye umuntu ku buryo adashobora kugisigura no kugitahura. Umwe wenyene ashobora kwizigirwa ku vy’ico kibazo ni Umuremyi wacu. Aho ari ni ho hari “isōko y’ubu[zima]” kandi ni we “ashobora gukūra mu rupfu.” (Zaburi 36:9; 68:20) Naho bishobora gusa n’ibitangaje, kugira umwihwezo w’ivyo abantu benshi bemera ku bijanye n’urupfu hishimikijwe Ijambo ry’Imana, biraza kuduhumuriza no kuturemesha. Biraza guhishura yuko atari ngombwa ngo urupfu rube iherezo ry’ibintu vyose.

[Iciyumviro ku rup. 4]

Ukuba urupfu rushobora kudushikira, biradufasha kubaho mu buryo burushirije kugira ico buvuze