Ni Bande Ari Abasuku b’Imana Muri Iki Gihe?

“Ubushobozi bwacu buva ku Mana; ni yo yabuduhaye itugira aba[suku] b’isezerano rishasha.”​—2 ABAKORENTI 3:5, 6, UB.

1, 2. Ni ibanga irihe Abakirisu bose bo mu kinjana ca mbere bagiramwo uruhara, mugabo ibintu vyahindutse gute?

MU KINJANA ca mbere c’Igihe Cacu, Abakirisu bose baragira uruhara mw’ibanga rihambaye, rikaba ari ibanga ryo kwamamaza inkuru nziza. Bose bari barasizwe kandi bari abasuku b’isezerano rishasha. Bamwebamwe bari bafise ayandi mabanga, nk’ukwigisha mw’ishengero. (1 Ab’i Korinto 12:27-29; Abanyefeso 4:11) Abavyeyi bari bafise ivyo bategerezwa gukora mu muryango. (Ab’i Kolosayi 3:18-21) Mugabo bose baragira uruhara mu gikorwa nyamukuru kandi gihambaye c’ukwamamaza. Mu Kigiriki c’intango co mu Vyanditswe vya Gikirisu, iryo banga ryari di·a·ko·niʹa, ni ukuvuga ugukorera abandi, canke ubusuku.​—Ab’i Kolosayi 4:17.

² Uko igihe cagiye kirarengana, ibintu vyarahindutse. Hari umugwi watsimbataye, wamenyekanye ko ari abakuru b’idini, uwikumiriyeko agateka ko kwigisha. (Ivyakozwe 20:30) Abo bakuru b’idini kari akagwi gatoyi ko mu biyita Abakirisu. Abenshi cane basigaye bahavuye bitwa abayobokamana. Naho abayobokamana bigishijwe yuko bafise amabanga kanaka, harimwo n’ugutanga imperezwa zo kubungabunga abo bakuru b’idini, abenshi babaye gusa abumviriji ataco bakora mu vyerekeye ukwigisha.

3, 4. (a) Abantu bo mu Bitwa Abakirisu bacika abasuku gute? (b) Ni nde afatwa ko ari umusuku mu Bitwa Abakirisu, kandi ni kuki mu Vyabona vya Yehova bitameze ukwo?

³ Abakuru b’idini bivugisha ko ari abasuku (rivuye mu musuku, impinduro y’Ikilatini ya di·aʹko·nos, “umukozi”).a Kubera ico, baronkera impapuro z’imitsindo mu makaminuza canke mu maseminari maze bakatirwa. Inkoranyabumenyi imwe (The International Standard Bible Encyclopedia) ivuga iti: “‘Kwatira’ n’‘iyatira’ ubusanzwe ni amajambo yerekeza ku bukuru budasanzwe buhabwa abasuku canke abapadiri biciye ku birori vyashinzwe vyemewe, bujanye no gushimika ku vy’ubukuru bwo kumenyesha Ijambo canke gutanga amasakaramentu, kibure bwo kubigira vyompi.” Ni nde yatira abasuku? Inkoranyabumenyi yindi (The New Encyclopædia Britannica) ivuga iti: “Mu mashengero yagumije ikibanza c’ubwepisikopi, umusuku yatira yama nantaryo ari umusenyeri. Mu mashengero y’Abaperesubitero, ukwatira kugirwa n’umugwi w’abakuru b’iryo dini.”

⁴ Kubera ico, mu mashengero y’Abitwa Abakirisu, agateka ko kuba umusuku gahabwa bake cane. Yamara, ivyo si uko biri mu Vyabona vya Yehova. Kubera iki? Kubera ko mw’ishengero ry’Abakirisu bo mu kinjana ca mbere atari ukwo vyari bimeze.

Abasuku b’Imana mu vy’Ukuri Ni Bande?

5. Dukurikije Bibiliya, mu bakora bwa basuku harimwo na bande?

⁵ Dukurikije Bibiliya, abasenga Yehova bose, abari mw’ijuru no kw’isi ni abasuku. Abamarayika barasukuriye Yezu. (Matayo 4:11; 26:53; Luka 22:43) N’abamarayika “[barakorera] abazoragwa agakiza.” (Abaheburayo 1:14; Matayo 18:10) Yezu yari umusuku. Yavuze ati: “Umwana w’umuntu [ntiya]zanywe no gukorerwa, atar’ugukorera abandi.” (Matayo 20:28; Abaroma 15:8) Ku bw’ico, kubera abayoboke ba Yezu bategerezwa “[kugera] ikirenge mu ciwe,” ntibitangaje rero kubona na bo nyene bategerezwa kuba abasuku.​—1 Petero 2:21.

6. Yezu yerekanye gute yuko abigishwa biwe bakwiye kuba abasuku?

⁶ Gatoyi imbere yuko Yezu aduga mw’ijuru, yabwiye abigishwa biwe ati: “Ni mugende, muhindure [abantu bo mu] mahanga yose abigishwa, mubabatiza mw izina rya Data wa twese n’iry’Umwana n’iry’[im]pwemu [y]era; mubigishe kwitondera ivyo nabageze vyose.” (Matayo 28:19, 20) Abigishwa ba Yezu bategerezwa kuba abahindura abantu abigishwa​—ni ukuvuga abasuku. Abigishwa bashasha bahinduye bokwize kwitondera ibintu vyose Yezu yageze, harimwo n’icagezwe co kuja guhindura abantu abigishwa. Yaba umugabo canke umugore, uwukuze canke umwana, umwigishwa nyakuri wa Yezu Kirisitu yobaye umusuku.​—Yoweli 2:28, 29.

7, 8. (a) Ni ivyanditswe ibihe vyerekana yuko Abakirisu b’ukuri bose ari abasuku? (b) Ni ibibazo ibihe bivyuka ku vyerekeye iyatira?

⁷ Mu buryo buhuje n’ivyo, ku musi wa Pentekoti yo 33 G.C., abigishwa ba Yezu bose bari bahari, abagabo n’abagore, barafatanije mu kuvuga “ibitangaza vy’Imana.” (Ivyakozwe 2:1-11) Ikindi na co, intumwa Paulo yanditse ati: “Umutima [ni] wo umuntu yizeresha, akaronka ukugororoka: kand’akanwa akaba ari ko yāturisha, akaronka agakiza.” (Abaroma 10:10) Paulo ntiyerekeje ayo majambo ku mugwi mutoyi w’abakuru b’idini, mugabo yayerekeje ku ‘bari i Roma bose bakundwa n’Imana.’ (Abaroma 1:1, 7) Nk’ukwo nyene, ‘abera [bose] bari muri Efeso, b’abizigirwa bo muri Kristo Yesu’ bategerezwa “[kwambara] inkweto z’ivyo ubutumwa bgiza bg’amahoro bibīteguza.” (Abanyefeso 1:1; 6:15) Kandi abumvise bose iryo kete ryarungikiwe Abaheburayo bategerezwa ‘kugumya ukwatura ivyizigiro vyabo kutanyiganyiga.’​—Abaheburayo 10:23.

⁸ Ariko rero, ni ryari umuntu acika umusuku? Mu yandi majambo, ni ryari yatirwa? Kandi ni nde amwatira?

Kwatirwa bwa Musuku​—Bigirwa Ryari?

9. Yezu yatiwe ryari, kandi na nde?

⁹ Ku vyerekeye igihe umuntu yatirirwa be n’uwumwatira, rimbura akarorero ka Yezu Kirisitu. Ntiyari afise urupapuro rwemeza ko yatiwe canke icemezo c’umutsindo kivuye kw’iseminari yinaka cemeza yuko yari umusuku, vyongeye ntiyatiwe n’umuntu n’umwe. None ni kuki dushobora kuvuga yuko yari umusuku? Kubera amajambo yahumetswe ya Yesaya yarangukiye muri we. Agira ati: “[Im]pwemu [y]’Uhoraho [i]ri kuri jewe, ni co catumye andobanuza amavuta kugira ngo [mvuge] . . . ubutumwa bgiza.” (Luka 4:17-19; Yesaya 61:1) Ayo majambo nta makenga adusigamwo ngo Yezu ntiyashinzwe ibanga ryo kuvuga inkuru nziza. Yarishinzwe na nde? Kubera yasizwe impwemu ya Yehova ku bw’ico gikorwa, bigaragara yuko Yezu yatiwe na Yehova Imana. Ivyo vyabaye ryari? Impwemu ya Yehova yaje mu vy’ukuri kuri Yezu igihe yabatizwa. (Luka 3:21, 22) Rero, yatiwe igihe yabatizwa.

10. Ni nde ashoboza umusuku w’Umukirisu gucika ‘uwubishoboye’?

¹⁰ Tuvuge iki ku vyerekeye abayoboke ba Yezu bo mu kinjana ca mbere? Ubukuru bwabo bwa basuku na bwo nyene bwaje buva kuri Yehova. Paulo yavuze ati: “Ubushobozi bwacu buva ku Mana; ni yo yabuduhaye itugira aba[suku] b’isezerano rishasha.” (2 Abakorenti 3:5, 6, UB) Yehova ashoboza gute abamusenga kuba abasuku? Rimbura akarorero ka Timoteyo, uwo Paulo yise “umu[suku] w’Imana agabura ubutumwa bgiza bga Kristo.”​—1 Ab’i Tesalonike 3:2.

11, 12. Ni gute Timoteyo yateye imbere agana ku gucika umusuku?

¹¹ Amajambo akurikira yabwiwe Timoteyo aradufasha gutahura ingene yacitse umusuku. Agira ati: “Ariko weho ugume mu vyo wize, ukavyizezwa, kuk’uzi abākwigishije: kand’uzi yuk’uhereye mu buto bgawe wamye uzi ivyanditswe vyera bishobora kukumenyesha ubgenge bgo kukuzanira agakiza gaheshwa no kwizera Kristo Yesu.” (2 Timoteyo 3:14, 15) Umushinge w’ukwizera kwa Timoteyo, uwomusunikiye ku kwatura icese, bwari ubumenyi bw’Ivyanditswe. Ukwisomera kwoba ariko kwo kwonyene kwari gukenewe? Oya. Timoteyo yari akeneye gufashwa kugira ngo aronke ubumenyi nyakuri hamwe n’ubutahuzi bwo mu vy’impwemu bw’ivyo yasoma. (Ab’i Kolosayi 1:9) Gutyo, Timoteyo yari ‘yaravyizejwe.’ Kubera yari azi Ivyanditswe “uhereye mu buto,” abigisha biwe ba mbere bategerezwa kuba bari nyina wiwe na inakuru, se bikaboneka ko atizera.​—2 Timoteyo 1:5.

¹² Ariko rero, hari ibindi vyagize uruhara mu vy’ugucika umusuku kwa Timoteyo. Kimwe coco ni uko ukwizera kwiwe kwakomejwe n’ukwifatanya n’Abakirisu bo mu mashengero yo mu micungararo. Tubizi dute? Kubera igihe Paulo yahura na Timoteyo ari bwo bwa mbere, uwo musore “yashimwa na bene Data b’i Lusitira no muri Ikoniyo.” (Ivyakozwe 16:2) Ikigeretseko, muri iyo misi abavukanyi bamwebamwe barandikira amakete amashengero kugira ngo bayakomeze. Kandi abacungezi barabagendera kugira ngo babubake. Mwene izo ntunganyo zarafashije Abakirisu nka Timoteyo gutera imbere mu vy’impwemu.​—Ivyakozwe 15:22-32; 1 Petero 1:1.

13. Timoteyo yatiwe ryari ngo abe umusuku, kandi ni kuki wovuga yuko iterambere ryiwe ryo mu vy’impwemu ritahereye aho?

¹³ Kubera ibwirizwa Yezu yatanze ryanditse muri Matayo 28:19, 20, turashobora kudakeka yuko hari igihe kanaka ukwizera Timoteyo yari afise kwamusunikiye ku kwigana Yezu, gutyo arabatizwa. (Matayo 3:15-17; Abaheburayo 10:5-9) Ico cari ikimenyetso c’uko Timoteyo yiyeguriye Imana n’ubugingo bwiwe bwose. Igihe Timoteyo yabatizwa yacitse umusuku. Kuva ico gihe, ubuzima bwiwe, inkomezi ziwe n’ikintu cose yari afise cegukira Imana. Uwo wari umuce uri mu vy’ugusenga kwiwe, ukaba ari “umurimo mweranda.” (NW) Ariko rero, Timoteyo ico gihe ntiyaciye ahagarikira kuri ako gateka atewe. Yabandanije gukura mu vy’impwemu, acika umusuku ahumuye w’Umukirisu. Ivyo vyashitse kubera Timoteyo yifatanya rwose n’Abakirisu bahumuye nka Paulo, kubera ukwiyigisha ubwiwe be n’ukugira umwete mu gikorwa c’ukwamamaza.​—1 Timoteyo 4:14; 2 Timoteyo 2:2; Abaheburayo 6:1.

14. Muri iki gihe, ni gute umuntu ari “mu mero nziza y’umutima ituma aronka ubuzima budahera” atera imbere agana ku kuba umusuku?

¹⁴ Muri iki gihe, kwatirwa ku bw’ubusuku bwa gikirisu ni nk’ukwo nyene. Umuntu ari “mu mero nziza y’umutima ituma [a]ronka ubuzima budahera,” (NW) arafashwa kumenya ivyerekeye Imana n’imigambi yayo biciye ku kwiga Bibiliya. (Ivyakozwe 13:48) Uwo muntu ariga gushira mu ngiro ingingo za Bibiliya mu buzima bwiwe no gusenga Imana mu buryo buri n’ico buvuze. (Zaburi 1:1-3; Imigani 2:1-9; 1 Ab’i Tesalonike 5:17, 18) Arifatanya n’abandi bizera kandi akungukira ku ntunganyo no ku ndinganizo zishirwaho na “wa mushumba w’umwizerwa kandi w’incabgenge.” (Matayo 24:45-47, NW; Imigani 13:20; Abaheburayo 10:23-25) Gutyo, aratera imbere mu buryo bw’ukwiga buri ku rutonde.

15. Ni igiki kiba igihe umuntu abatijwe? (Raba n’akajambo k’epfo.)

¹⁵ Amaherezo, umutohoji wa Bibiliya, amaze gutsimbataza urukundo akunda Yehova Imana akongera akagira ukwizera gukomeye mu nkuka y’incungu, aripfuza kwiyegurira wese Se wo mw’ijuru. (Yohana 14:1) Ukwo kwiyegura akugirira mw’isengesho yiturira ubwiwe hanyuma maze akabatizwa bwa kimenyetso co ku mugaragaro c’ico yagiriye mu mwiherero. Ukubatizwa kwiwe ni ibirori vy’ukwatirwa agirirwa kubera ko ico ari igihe aba yemewe icese bwa mukozi (di·aʹko·nos) w’Imana yiyeguye bimwe vyuzuye. Ategerezwa kuguma yitandukanije n’isi. (Yohana 17:16; Yakobo 4:4) Yishikanye wese ngo ‘abe ikimazi kizima cera, gihimbara Imana’ atiziganya kandi ataco asavye. (Abaroma 12:1)b Ni umusuku w’Imana, yigana Kirisitu.

Ubusuku bwa Gikirisu Ni Iki?

16. Amwamwe mu mabanga Timoteyo yari afise bwa musuku ni ayahe?

¹⁶ Ubusuku bwa Timoteyo bwarimwo n’iki? Yari afise amabanga adasanzwe bwa musangirangendo wa Paulo. Maze igihe yacika umukurambere, Timoteyo yarakoze aratama yigisha yongera akomeza Abakirisu bagenziwe. Mugabo umuce nyamukuru w’ubusuku bwiwe wari uw’ukwamamaza inkuru nziza no guhindura abantu abigishwa, nk’uko vyari bimeze kuri Yezu na Paulo. (Matayo 4:23; 1 Ab’i Korinto 3:5) Paulo yabwiye Timoteyo ati: “Ariko weho, wirinde muri vyose, wihanganire imibabaro, ukore igikorwa c’umuvuzi w’ubutumwa bgiza, ushitse [“ubusuku bwawe,” NW].”​—2 Timoteyo 4:5, ni twe tubihiritse.

17, 18. (a) Ni mu busuku ubuhe Abakirisu bajamwo? (b) Igikorwa c’ukwamamaza gihambaye ukungana iki ku musuku w’Umukirisu?

¹⁷ Ni ko biri no ku basuku b’Abakirisu muri iki gihe. Baragira uruhara mu busuku burangurwa icese, mu gikorwa co kwamamaza, mu kuyobora abandi ku bukiriro bushingiye ku nkuka ya Yezu no kwigisha abicisha bugufi kwambaza izina rya Yehova. (Ivyakozwe 2:21; 4:10-12; Abaroma 10:13) Baratanga icemeza kivuye muri Bibiliya c’uko Ubwami ari co cizigiro conyene kiriho ku bwoko-muntu bucumukura, kandi bakagaragaza yuko no muri iki gihe ibintu bigenda neza kuruta mu gihe tubaho dukurikiza ingingo ziva ku Mana. (Zaburi 15:1-5; Mariko 13:10) Mugabo umusuku w’Umukirisu ntiyamamaza injili y’ivyo gutunganya ikibano. Ahubwo, yigisha yuko ‘kwubaha Imana . . . kuzana isezerano ry’ubu[zima] bga none n’ubuzoza.’​—1 Timoteyo 4:8.

¹⁸ Ni ko, benshi mu basuku barafise uburyo bwiyongereye bwo gusukura, ubushobora kuba butandukanye ku Mukirisu n’uwundi. Benshi barafise amabanga y’umuryango. (Abanyefeso 5:21–6:4) Abakurambere hamwe n’abakozi b’ishengero barafise amabanga mw’ishengero. (1 Timoteyo 3:1, 12, 13; Tito 1:5; Abaheburayo 13:7) Abakirisu batari bake barafasha mu kwubaka Ingoro z’Ubwami. Bamwebamwe barafise agateka keza igitangaza ko gukora bavyishakiye muri imwe mu mazu ya Beteli y’ishirahamwe Watch Tower Society. Ariko rero, abasuku bose b’Abakirisu baragira uruhara mu kwamamaza inkuru nziza. Nta n’umwe akuwemwo. Ukugira uruhara muri ico gikorwa ni vyo vyerekana icese ko umuntu ari umusuku nyakuri w’Umukirisu.

Inyifato y’Umusuku w’Umukirisu

19, 20. Ni inyifato iyihe abasuku b’Abakirisu bategerezwa gutsimbataza?

¹⁹ Benshi mu basuku bo mu Bitwa Abakirisu bitega guhabwa icubahiro kidasanzwe, kandi bakagira amazina y’icubahiro nk’aya ngo “pasitori” be na “patiri.” Ariko rero, umusuku w’Umukirisu arazi yuko Yehova we nyene ari we akwiriye icubahiro kigera iyo. (1 Timoteyo 2:9, 10) Nta musuku w’Umukirisu asaba mwene ico cubahiro kiri hejuru canke ngo arondere amazina y’icubahiro adasanzwe. (Matayo 23:8-12) Arazi yuko insobanuro y’ishimikiro ya di·a·ko·niʹa ari “ugukorera [abandi].” Irivuga rijanye n’iryo jambo rimwe na rimwe rikoreshwa muri Bibiliya ku vyerekeye imirimo ikorerwa abantu, nk’ugusereva ku meza. (Luka 4:39; 17:8; Yohana 2:5) Naho rero ikoreshwa ryaryo mu bijanye n’ubusuku bwa gikirisu riri hejuru kuruta, di·aʹko·nos aguma ari umukozi.

²⁰ Nta musuku w’Umukirisu rero afise imvo yo kwiyumva ko ahambaye. Abasuku nyakuri b’Abakirisu​—eka n’abafise amabanga adasanzwe mw’ishengero—​ni abashumba bicisha bugufi. Yezu yavuze ati: “Ūgomba kuba mukuru muri mwebge az’abe umu[suku] wanyu; kand’ūgomba kuba uw’imbere az’abe umuja wanyu.” (Matayo 20:26, 27) Igihe yariko yereka abigishwa biwe inyifato igororotse bakwiye gutsimbataza, Yezu yarabogeje ibirenge, aba akoze igikorwa c’umushumba wo hasi kuruta bose. (Yohana 13:1-15) Ese ukuntu ari umurimo uciye bugufi! Ni co gituma, abasuku b’Abakirisu basukurira Yehova Imana na Yezu Kirisitu babigiranye ukwicisha bugufi. (2 Ab’i Korinto 6:4; 11:23) Baragaragaza ukwicisha bugufi kwo mu muzirikanyi mu gukoreranira. Kandi igihe bamamaza inkuru nziza, barasukurira abantu nka bo batizera batiziganya.​—Abaroma 1:14, 15; Abanyefeso 3:1-7.

Ihangane mu Busuku

21. Paulo yahawe impera gute ku bw’ukwihangana mu busuku?

²¹ Kuri Paulo, kuba umusuku vyasavye ukwihangana. Yabwiye Abakolosayi yuko yacumukuye cane kugira ngo yamamaze inkuru nziza kuri bo. (Ab’i Kolosayi 1:24, 25) Ariko rero, kubera yihanganye benshi baremeye inkuru nziza maze baracika abasuku. Baravyawe bwa bana b’Imana n’abavukanyi ba Yezu Kirisitu, bafise icizigiro co gucika ibiremwa vy’impwemu biba kumwe na we mw’ijuru. Ese ingene ari impera ininahaye ku bw’ukwihangana!

22, 23. (a) Ni kuki abasuku b’Abakirisu muri iki gihe bakeneye ukwihangana? (b) Ni ivyamwa vyiza igitangaza ibihe biva ku kwihangana kw’Umukirisu?

²² Ukwihangana kurakenewe muri iki gihe ku bantu vy’ukuri ari abasuku b’Imana. Benshi usanga barwana ku musi ku musi n’indwara canke imibabaro iva ku busaza. Abavyeyi barakora bagatama kugira barere abana babo, benshi muri bo bakabigira batagira uwo bubakanye. Abana kw’ishure barananira utwosho tutari two tubari irya n’ino babigiranye umutima rugabo. Abakirisu benshi barahangana n’ingorane zikomeye z’ivy’ubutunzi. Kandi benshi baracumukuzwa n’uruhamo canke bagahangana n’amagume kubera “ibihe bigoye” vyo muri iki gihe! (2 Timoteyo 3:1) Egome, abasuku ba Yehova hafi imiliyoni zitandatu muri iki gihe barashobora kwifatanya n’intumwa Paulo mu kuvuga bati: “Twishimagiza muri vyose nk’aba[suku] b’Imana, twihangana cane mu marushwa, mu mibabaro, mu vyago.” (2 Ab’i Korinto 6:4) Abasuku b’Abakirisu ntibaheba. Mu vy’ukuri barakwiye gukezwa ku bw’ukwihangana kwabo.

²³ Vyongeye, nk’uko kwabigize ku vyerekeye Paulo, ukwihangana kurama ivyamwa vyiza igitangaza. Bivuye ku kwihangana, turazigama ubucuti bwa somambike dufitaniye na Yehova maze bigatuma umutima wiwe unezerwa. (Imigani 27:11) Turakomeza ukwizera kwacu bwite kandi tugahindura abantu abigishwa biyongera ku muvukano wa gikirisu. (1 Timoteyo 4:16) Yehova yarabungabunze abasuku biwe yongera arahezagira ubusuku bwabo muri iyi misi y’iherezo. Ico vyavuyemwo ni uko amasigarira ya vya 144.000 batororokanijwe, kandi abandi bantu amamiliyoni bakaba bafise icizigiro ntakekeranywa co kwinovora ubuzima budahera kw’isi y’iparadizo. (Luka 23:43; Ivyahishuriwe 14:1) Vy’ukuri, ubusuku bwa gikirisu ni inseruro y’ikigongwe ca Yehova. (2 Ab’i Korinto 4:1) Ese twese twobuha agaciro vyongeye tugakura ubwatsi kubona ivyo buvamwo bizokwamaho ibihe bidahera.​—1 Yohana 2:17.

[Utujambo tw’epfo]

Woshobora Kubisigura?

• Ni ibanga irihe Abakirisu bose bo mu kinjana ca mbere bagizemwo uruhara?

• Umusuku w’Umukirisu yatirwa ryari kandi yatirwa na nde?

• Umusuku w’Umukirisu akwiye gutsimbataza inyifato iyihe?

• Ni kuki umusuku w’Umukirisu akwiye kwihangana igihe ahanamiwe n’ingorane?

[Ifoto ku rup. 16, 17]

Timoteyo yigishijwe Ijambo ry’Imana kuva mu buhinja. Yacitse umusuku yatiwe igihe yabatizwa

[Ifoto ku rup. 15]

Ibatisimu igereranya ukwiyegurira Imana kandi ni ikintu cerekana ko umuntu yatiwe ngo abe umusuku

[Ifoto ku rup. 18]

Abasuku b’Abakirisu bari n’umutima ukunze wo gukorera abandi