Akarorero wokwigana—Ba baheburayo batatu

Hananiya, Mishayeli na Azariya bahagaze mu kiyaya ca Dura, hafi ya Babiloni. Abantu babakikuje bose barunamye imbere y’igishusho amahero. Abo basore naho bahanganye n’akosho k’urunganwe be n’iterabwoba ry’umwami, baguma bashikamye. Babigiranye icubahiro ariko batanyiganyiga, barabwira Nebukadinezari ko ingingo bafashe yo gukorera Yehova ari ntabanduka.—Daniyeli 1:6; 3:17, 18.

Abo basore bari bakiri bato igihe bajanwa i Babiloni. Kubona barabaye intahemuka bakiri bato, bakanka kurya ibifungurwa bishobora kuba vyarabuzwa n’Itegeko ry’Imana, vyarabateguriye guhangana n’ibigeragezo bikomeye mu nyuma. (Daniyeli 1:6-20) Bariboneye ko kwubaha Yehova ari yo ngendo iranga ubukerebutsi. Woba nawe wiyemeje kwumira ku ngingo ngenderwako z’Imana naho woba uhanganye n’akosho k’urunganwe? Niwiga kugamburukira Yehova mu bintu bisa na bitobito ukiri muto, uzoba witeguriye neza kuguma uri intahemuka mu nyuma niwashikirwa n’ibigeragezo bikomeye mu buzima.—Imigani 3:5, 6; Luka 16:10.