Ikigabane ca Mirongo Ibiri na Rimwe
Umugambi wa Yehova Uzororanirwa Bimwe Biteye Igomwe
1, 2. (a) Umugambi Yehova afise ni uwuhe ku biraba ibiremwa vyiwe vy’ubwenge? (b) Ni bande bari bagize umuryango w’Imana w’abayisenga wunze ubumwe?
IBIREMWA vy’ubwenge vyose vyunze ubumwe mu gusenga ya Mana yonyene y’ukuri, kandi vyose bikinovora umwidegemvyo w’akaroruhore nk’abana b’Imana, emwe, uwo ni wo mugambi wa Yehova uranga urukundo. Ni na co abakunda ukugororoka bose bipfuza cane.
2 Yehova yatanguye gushitsa uwo mugambi w’agakomeye igihe yatangura ibikorwa vyiwe vy’irema. Uwo yaremye ubwa mbere yari Umwana wiwe, kuva aho uyo azukiye akaba ari “ugukayangana kw’ubgiza [bw’Imana], n’ishusho y’akameremere kayo.” (Abaheburayo 1:1-3) Uwo Mwana yari uwudasanzwe, akaba uwo Imana yari yariremeye. Mu nyuma, ibindi vyose vyari kubaho biciye kuri uyo Mwana: habanza abamarayika bo mw’ijuru, maze hakurikira abantu bo kw’isi. (Yobu 38:7; Luka 3:38) Ivyo biremwa vyose vyagize umuryango ukwiye hose. Kuri abo bose, Yehova yari Imana, Segaba w’Ijuru n’Isi, akaba na we Se wabo w’umunyarukundo.
3. (a) Ni igiki twese twarazwe n’abavyeyi bacu ba mbere? (b) Ni intunganyo izihe ziranga urukundo Yehova yagize ku bw’abakomoka kuri Adamu?
3 Igihe abavyeyi bacu ba mbere bacirwa urwo gupfa bazira ugukora icaha nkana, barirukanywe muri Edeni, hanyuma Imana irabaheba. Ntibasubiriye kuba abo mu muryango wayo ukwiye hose. (Itanguriro 3:22-24; Gusubira mu Vyagezwe 32:4, 5) Twese aha ni bo dukomokako, ari co gituma twavukanye impengamiro z’ugukora icaha. Mugabo Yehova yari azi yuko hariho abakomoka kuri Adamu na Eva bokunze ukugororoka. Ni co gituma Yehova abitumwe n’urukundo yashizeho intunganyo vyociyeko kugira bashobore gushikira “ukwidegemvya, gufatana n’ubgiza bg’abana b’Imana.”—Abaroma 8:20, 21.
Isirayeli Yaratakaje Ikibanza c’Ubutoni
4. Ni agateka akahe Yehova yahaye Isirayeli ya kera?
4 Imyaka 2.500 inyuma y’iremwa rya Adamu, hariho abantu Yehova yahaye agateka ko kugiranira na we imigenderanire idasanzwe. Yatoye Isirayeli ya kera ngo ibe igisata ciwe, hanyuma abaha Ivyagezwe vyiwe. (Itanguriro 12:1, 2) Yabagize ihanga kandi arabakoresha mu bijanye n’umugambi wiwe. (Gusubira mu Vyagezwe 14:1, 2; Yesaya 43:1) Ariko rero, bari bakiri mu migozi y’icaha n’urupfu, ari co catumye batagira umwidegemvyo Adamu na Eva bari bafise mu ntango.
5. Abisirayeli batakaje gute ikibanza kidasanzwe bari bafise imbere y’Imana?
5 Naho vyari ukwo, Abisirayeli bari bafise ikibanza c’ubutoni ku Mana. Bari kandi bafise ibanga ryo kwubaha Yehova nka we Se, no gukora ngo bahuze n’umugambi wiwe. Yezu yarashimitse ku kuntu gushitsa iryo banga bari bajejwe cari ikintu gihambaye. (Matayo 5:43-48) Ariko rero, ihanga rya Isirayeli ntiryakoze ivyo. Naho abo Bayuda bavuga ngo “dufise Data umwe, n’Imana,” Yezu yaravuze icese yuko ivyo bakora hamwe n’agatima bagaragaza vyerekana ko babesha. (Yohana 8:41, 44, 47) Mu 33 G.C., Imana yarahagaritse Ivyagezwe, hanyuma ubucuti budasanzwe Isirayeli yari ifitaniye n’Imana burahera. Mugabo none ivyo vyoba vyasigura yuko abantu batokwigeze batona ku Mana?
Gutororokanya ‘Ibintu vyo mw’Ijuru’
6. Intumbero y’ “ubuyobozi” Paulo yavuze mu Banyefeso 1:9, 10 ni iyihe?
6 Intumwa Paulo yarerekanye yuko hariho bamwe mu muryango w’abantu bogiraniye n’Imana ubucuti budasanzwe. Nk’akarorero, ku biraba indinganizo Yehova yagize yotumye abagaragaza ukwizera bacika abo mu nzu yayo, Paulo yanditse ati: “[Imana ya]twātiye ibanga ry’ivy’igomba, nk’uko vyayihimbaye, ibigabiye kera muri we, vy’[“ubuyobozi,” NW] [bwa] vyose, igihe gikwiye gishitse, [ni ukuvuga] gukoraniriza vyose muri Kristo, ibiri mw ijuru n’ibiri mw isi.” (Abanyefeso 1:9, 10) Ubwo “buyobozi” buhagaze kuri Yezu Kirisitu. Biciye kuri we, abantu baragirwa abemewe n’Imana. Bakeyi muri bo biteze kuba mw’ijuru. Abandi amasinzi menshi na bo bakazoba kw’isi ibihe bidahera.
7. Ni bande bavugwa ko ari ‘ibintu vyo mw’ijuru’?
7 Ubwa mbere, guhera kuri Pentekote yo mu 33 G.C., hitwararitswe ‘ibintu vyo mw’ijuru,’ ni ukuvuga abobaye abaraganwa na Kirisitu mu Bwami bwo mw’ijuru. Hishimikijwe ukwizera bafise mu gaciro k’inkuka ya Yezu, Imana yabise abagororotsi. (Abaroma 5:1, 2) Mu nyuma, harashizwemwo Abayuda n’Abanyamahanga, ‘ibintu vyo mw’ijuru’ bikaba vyobaye 144.000. (Ab’i Galatiya 3:26-29; Ivyahishuriwe 14:1) Amasigarira gusa yabo ni bo bakiri kw’isi.
Gutororokanya ‘Ibintu vyo mw’Isi’
8. Ni bande bavugwa ko ari ‘ibintu vyo mw’isi,’ kandi bafitaniye ubucuti nyabaki na Yehova?
8 Ubwo buyobozi nyene buriko buratororokanya ‘ibintu vyo mw’isi.’ Abantu amamiliyoni ubu bariko baratororokanywa kugira ngo bazobe kw’isi ibihe bidahera. Bunze ubumwe n’amasigarira ya basamuragwa b’Ubwami, barashimagiza izina rya Yehova kandi bagashira hejuru ugusengwa kwiwe. (Yesaya 2:2, 3; Zefaniya 3:9) Vyongeye Yehova bamwita “Data” kubera ko bemera icese ko ari we soko ry’ubuzima. Kandi baremerwa n’Imana hishimikijwe ukwizera bafise mu maraso yasheshwe ya Yezu. (Ivyahishuriwe 7:9, 14) Mugabo kubera ko bakiri abanyagasembwa, kwemezwa icese bimwe bishitse yuko ari abana b’Imana biracari ivyo muri kazoza.
9. Ni umuhango uwuhe mu Baroma 8:21 haha abantu?
9 Abo bafise ivyizigiro vyo kuba kw’isi ubu barindiriye igihe ibiremwa-bantu vyose “bizocungurwa ngo ntibibe ibija vyo kubora.” (Abaroma 8:21) Uwo mwidegemvyo uzotangura Kirisitu be n’ingabo zo mw’ijuru bamaze gusozera ya marushwa ahambaye, biciye ku kiringo c’agaheta ca Harumagedoni. Ivyo bizotuma urunkwekwe rubi rw’ibintu rwa Shetani rwose rusangangurwa, hace hakurikira imihezagiro yo kuri ya Ngoma ya Kirisitu y’Imyaka Igihumbi, aho Kirisitu azoba ari mu bubasha bw’Ubwami.—Ivyahishuriwe 19:17-21; 20:6.
10. Abasavyi ba Yehova bazoririmba ururirimbo uruhe rw’ishemezo?
10 Ese ukuntu bizoba biteye akamwemwe igihe abasavyi ba Yehova bo kw’isi bazoba bunze ubumwe mu gusubiramwo inyiyumvo z’abasavyi biwe bo mw’ijuru, bo bamenyekanisha icese n’akanyamuneza bati: “Ibikorwa vyawe birahambaye kandi biratangaza, Mwami Mana ushobora vyose; inzira zawe n’iz’ukugororoka n’ukuri, Mukama w’amahanga. Ni nde atazogutinya ga Mwami, cank’atazohimbaza izina ryawe? Kukw ari wewe wenyene wera, amahanga yose azoza akwikubite imbere, agusenge, kukw amateka yawe agororotse aseruwe.” (Ivyahishuriwe 15:3, 4) Egome, abasavyi ba Yehova bose bazokwunga ubumwe mu gusenga ya Mana yonyene y’ukuri. Eka n’abapfuye bazozurwa bahabwe akaryo ko kujamwo mu kuduza amajwi yabo bashemeza Yehova.—Ivyakozwe 24:15.
Umwidegemvyo w’Igitangaza Ugiye Kuza
11. Ni umwidegemvyo mwiza igitangaza uwuhe abazorusimba kuri ya marushwa ahambaye bazogira?
11 Ya marushwa ahambaye na ca kiringo cayo c’agaheta ca Harumagedoni bimaze guhanagura ububisha kw’isi, Shetani wa Mucokoranyi ntazoba akiri “ikimana c’iyi si.” (UB) Abasenga Yehova ntibazoba bacirirwa bararwana n’akosho kabi ka Shetani. (2 Abakorenti 4:4; Ivyahishuriwe 20:1, 2) Idini y’ikinyoma ntizoba ikivuga Yehova uko atari canke ngo isubire kuba inkwezi y’amacakubiri mu kibano c’abantu. Abasavyi b’Imana y’ukuri ntibazoba bakigirirwa akarenganyo canke ngo bacurwe bufuni na buhoro n’abategetsi b’abantu. Ese ukuntu uzoba ari umwidegemvyo mwiza igitangaza!
12. Bose bazokizwa gute icaha be n’ingaruka zaco?
12 Kubera ko Yezu ari “Umwagazi w’intama w’Imana ukūrah’icaha c’abari mw isi,” azokoresha agaciro k’inkuka yiwe kugira ngo ahanagure ivyaha vy’abantu. (Yohana 1:29) Igihe Yezu yari kw’isi akarekurira umuntu ivyaha, yakiza nyene kurekurirwa bwa kimenyamenya c’uko azobihanagura koko. (Matayo 9:1-7; 15:30, 31) Muri ubwo buryo nyene, Kirisitu Yezu, we Mwami wo mw’ijuru w’Ubwami bw’Imana, azokiza ku gitangaro impumyi, ibiragi, ibipfamatwi, ibimuga, abarwaye mu mutwe n’abarwaye iyindi ndwara iyo ari yo yose. (Ivyahishuriwe 21:3, 4) Abagamburuka bose, ‘icabagera c’icaha’ kizoba cahinduwe ubusa kugira ngo ivyiyumviro vyabo be n’ibikorwa vyabo bibe ibihimbaye, kuri bo ubwabo no ku Mana. (Abaroma 7:21-23) Mu mpera ya ya Myaka Igihumbi, bazoba barakuwemwo agasembwa, bari mw’ ‘ishusho ya ya Mana yonyene y’ukuri kandi basa na yo.’—Itanguriro 1:26.
13. Mu mpera y’Ingoma y’Imyaka Igihumbi, ni igiki Kirisitu azogira, kandi kizovamwo iki?
13 Igihe abantu Kirisitu azoba yamaze kubakuramwo agasembwa, azoca asubiza Se ubukuru yari yaramuhaye bwo gukora ico gikorwa: “Azoshikiriza Imana ubgami, ni yo Data wa twese, ni yamara gukūrah’ubukuru bgose, n’ububasha bgose, n’ubushobozi bgose. Kuko guhangama azokwama ahangamye gushitsa ah’azoshirira abansi biwe bose musi y’ibirenge vyiwe.” (1 Ab’i Korinto 15:24, 25) Ingoma y’Ubwami bwo muri iyo Myaka Igihumbi buzoba bwashikije neza umugambi wabwo; ntibizoba rero bigikenewe ko iyo ntwaro y’inyongera igumaho hagati ya Yehova n’abantu. Kandi kubera ko icaha n’urupfu bizoba vyakuweho buhere, n’abantu bakazoba bacunguwe, ntibizoba bigikenewe ko Yezu aba Umucunguzi. Bibiliya isigura iti: “Umwana ubgiwe azoganzwa n’Iyamuhaye inganji ya vyose, ngw Imana ibe vyose [kuri b]ose.”—1 Ab’i Korinto 15:28.
14. Abantu batagira agasembwa bose bazogirirwa iki, kandi kubera iki?
14 Inyuma y’ivyo, abantu batagira agasembwa bazohabwa akaryo ko kwerekana yuko bahitamwo ugukorera Imana yonyene y’ukuri ibihe bidahera. Ni co gituma imbere yo gufatwa vy’ukuri yuko ari abana b’Imana, Yehova azoshira kw’isuzumwa rya nyuma abantu bose bazoba batagira agasembwa. Shetani n’amadayimoni yiwe bazorekurwa bave muri ca gisumanyenzi. Ivyo nta kibi kiramba bizozanira abakunda Yehova vy’ukuri. Mugabo abo bose bazohemuka bakaja mu kugambararira Yehova, bazohonywa ubutagisubira kubaho, bahonerezwe hamwe na wa mugarariji wo mu ntango be n’amadayimoni yiwe.—Ivyahishuriwe 20:7-10.
15. Ibintu bizokwongera kumera gute mu biremwa vya Yehova vyose vy’ubwenge?
15 Abo bantu bose batagira agasembwa bazoba bashigikiye ukugaba n’ukuganza kw’Imana muri iryo suzumwa rya nyuma, Yehova azoca abafata nk’abana biwe. Guhera ico gihe, bazoronka umwidegemvyo w’abana b’Imana bimwe bishitse, babe mu bagize umuryango w’Imana ukwiye hose. Ibiremwa vyose vy’ubwenge vyo mw’ijuru no kw’isi bizosubira kwunga ubumwe mu kuyisenga nka yo Mana yonyene y’ukuri. Umugambi wa Yehova uzoba waroraniwe bimwe biteye igomwe! Woba ushaka kuba muri uwo muryango uhimbawe, uzoba ukwiye hose kandi w’abazobaho ibihe bidahera? Nimba ubishaka, tukuremesheje gushira ku mutima ico Bibiliya ivuga muri 1 Yohana 2:17, iti: “Isi irikw irashirana n’ivyipfuzo vyayo, arik’ūkora ivy’Imana igomba yamah’ibihe bidashira.”
Ikiganiro c’Isubiramwo
• Imbere y’uko haba ubugarariji muri Edeni, ni imigenderanire iyihe abasenga Yehova bose bari bafitaniye na we?
• Ni ibanga irihe abasavyi b’Imana bafise?
• Ni bande bakirindiriye kuzoba abana b’Imana, kandi ivyo bijanye gute n’umugambi Yehova afise ku biraba ugusenga mu bumwe?
[Ifoto ku rup. 190]
Abantu bagamburuka bazokwinovora ubuzima mw’iparadizo izoba ikwiye ku mubumbe wose