Ikigabane ca Cumi na Gatanu
Wumvire Impanuro, Wemere Gutozwa Indero
1. (a) Ni kuki twese dukeneye guhanurwa no gutozwa indero? (b) Ni ikibazo ikihe dukeneye kurimbura?
“TWESE dutsitara muri vyinshi.” Ukwo ni ko Bibiliya ivuga muri Yakobo 3:2. Turashobora kwiyumvira ibihe vyinshi aho twananiwe kuba abantu Ijambo ry’Imana riduhimiriza kuba. Turemera icese rero yuko Bibiliya ivuga ukuri, igihe igira iti: “[“Wumvire impanuro, wemere gutozwa indero,” NW] kugira ng’ube umunyabgenge mu bihe vyo hanyuma.” (Imigani 19:20) Ntihabuze ivyo tumaze guhindura mu buzima bwacu kugira ngo tubuhuze n’inyigisho za Bibiliya. Ariko tuvyakira gute igihe Umukirisu mugenzi wacu aduhanuye ku kintu kinaka?
2. Twogira iki igihe ubwacu duhawe impanuro?
2 Bamwe baca bagerageza kwisigura, bagafatira mu rwara ibintu bikomeye, canke na ho bakavyegeka ku bandi. Mugabo birarushiriza kuba vyiza twumviye impanuro kandi tukayikurikiza. (Abaheburayo 12:11) Yamara ntiwumve, nta n’umwe akwiye kwitega ko abandi batagira agasembwa, eka mbere ntakwiye kuguma atanga impanuro ku tuntu tudahambaye, canke ku bintu Bibiliya irekera umuntu ngo abe ari we yihitiramwo. Vyongeye, kumbure nyene gutanga impanuro ntiyarimbuye ivyabaye vyose, ivyo akaba yoshobora kuvyerekwa mu buryo buranga icubahiro. Mugabo mu kiganiro gikurikira, reka dufate yuko nya mpanuro canke nya ndero umuntu yatojwe yari ibereye, ishingiye kuri Bibiliya. None umuntu akwiye kuvyakira gute?
Uburorero bwo Kudukebura
3, 4. (a) Bibiliya irimwo ibiki bishobora kudufasha gutsimbataza ukubona ibintu neza ku biraba impanuro n’ugutozwa indero? (b) Umwami Sauli yakiriye gute impanuro, hanyuma bivamwo iki?
3 Ijambo ry’Imana ririmwo ivyabaye koko vyerekeye abantu bahawe impanuro yari ikenewe. Rimwe na rimwe, nya mpanuro yaba iherekejwe n’ugutozwa indero. Umuntu umwe ivyo vyabayeko yari Umwami Sauli wa Isirayeli. Yarananiwe kugamburukira Yehova ku biraba ihanga ry’Abamaleki. Abamaleki bari bararwanije abasavyi b’Imana, hanyuma Yehova aca urubanza rw’uko baba Abamaleki canke ibitungwa vyabo hatogira na kimwe gisigazwa kitaranduwe. Mugabo Umwami Sauli yarakingiye ikibaba umwami wabo hamwe n’ibitungwa vyabo vyizavyiza.—1 Samweli 15:1-11.
4 Yehova yaciye atuma umuhanuzi Samweli gukangira Sauli. Sauli yavyakiriye gute? Yahaririye avuga yuko yanesheje koko Abamaleki, mugabo ngo ahitamwo gusa gukingira umwami wabo. Ariko rero, ivyo vyari binyuranye n’ibwirizwa rya Yehova. (1 Samweli 15:20) Ivyo kuziguriza ibitungwa, Sauli yagerageje kuvyegeka ku bantu mu kuvuga ati: ‘Natinye abantu, ndabumvira.’ (1 Samweli 15:24) Bisa n’uko icari kimuraje ishinga kwari uko yogumana iteka, mbere aranasaba Samweli ngo amutere iteka imbere y’abantu. (1 Samweli 15:30) Amaherezo, Yehova yaranse ko Sauli aba umwami.—1 Samweli 16:1.
5. Ni ibiki vyashikiye Umwami Uziya igihe yanka impanuro?
5 Umwami Uziya w’i Buyuda “[yaracumuye] k’Uhoraho Imana yiwe; kuko yinjiye mu rusengero rw’Uhoraho ngo [yose] imibavu.” (2 Ngoma 26:16) Mugabo abaherezi ni bo bonyene bari bemerewe kwosa imibavu. Aho umuherezi mukuru ageragereje kubuza Uziya, uwo mwami yaciye araka. None haciye haba iki? Bibiliya ivuga iti: “Imibembe isēsa mu ruhanga rwiwe, . . . kuk’Uhoraho amuteje indwara. Nuk’umwami Uziya arinda atanga akir’umunyamibembe.”—2 Ngoma 26:19-21.
6. (a) Ni kuki Sauli na Uziya bompi banse impanuro? (b) Ni kuki kwanka impanuro ari ingorane ikomeye cane muri iki gihe?
6 Ni kuki Sauli na Uziya bompi babonye ko kwakira impanuro bigoye? Ingorane nyamukuru yari ubwibone, umwe wese muri bo akaba yarishira hejuru kurenza urugero. Abantu benshi barikwegera intuntu kubera ako kageso. Basa n’abumva yuko kwemera icese impanuro vyoba vyerekana ko hariho aho bagoyagoya, canke ko bibakurako iteka. Mugabo ubwibone ni ubugoyagoye. Ubwibone buronona umuntu mu bwenge ku buryo ahengamira ku kwanka imfashanyo itangwa na Yehova biciye mw’Ijambo ryiwe no mw’ishirahamwe ryiwe. Ni co gituma Yehova atuburira ati: “Ubgibone bgitangira imbere y’uguhona, kand’umutima wihaya witangira imbere y’ukugwa.”—Imigani 16:18; Abaroma 12:3.
Twemere Impanuro
7. Ni ivyigwa vyiza ibihe dushobora gukura ku kuntu Musa yakiriye impanuro?
7 Ivyanditswe birimwo kandi uturorero twiza tw’abemeye impanuro, kandi turashobora kudukurako icigwa. Rimbura ivya Musa, uwo sebukwe yahaye impanuro ku kuntu yobigenza ku gikorwa kiremereye yari afise. Musa yaramwumviye maze buno nyene aca arabikurikiza. (Kuvayo 18:13-24) Naho Musa yari afise ubukuru buhambaye, ni kuki yashoboye kwakira impanuro? Ni uko yari umuntu yicisha bugufi. “[Musa] yar’umugwaneza kurusha abantu bose bo mw isi.” (Guharūra 12:3) Ubugwaneza buhambaye ukungana iki? Muri Zefaniya 2:3 harerekana ko buvamwo ubuzima.
8. (a) Ni ivyaha ibihe Dawidi yakoze? (b) Dawidi yakiriye gute igikangiro yari ahawe na Natani ? (c) Ivyaha vya Dawidi vyagize inkurikizi izihe?
8 Umwami Dawidi yarasambanye na Batisheba hanyuma agerageza kubipfukiranya mu kwicisha umugabo wiwe Uriya. Yehova yarungitse umuhanuzi Natani kugira ngo akangire Dawidi. Dawidi yaciye yigaya, ariyemerera ningoga ati: “Nacumuye k’Uhoraho.” (2 Samweli 12:13) Naho Imana yemeye ukwigaya kwa Dawidi, yocumukujwe n’inkurikizi z’ikibi yari yarakoze. Yehova yamubwiye yuko inkota “[a]ta ho izova mu rugo rw[i]we,” yuko abagore biwe bohawe “umubanyi w[i]we,” be n’uko umuhungu yovutse mu busambanyi bwiwe ‘yopfuye ata kabuza.’—2 Samweli 12:10, 11, 14.
9. Ni ibiki tudakwiye kwibagira igihe duhanuwe canke dutojwe indero?
9 Umwami Dawidi yari azi iciza kiva ku kwumvira impanuro iroranye. Rimwe na rimwe, yarashimira Imana ku bw’uwo yaba yabicishijeko ngo aronke nya mpanuro. (1 Samweli 25:32-35) Tweho twoba tumeze nk’ukwo? Nimba ari ko tumeze, tuzorindwa ukuvuga n’ukugira ibintu vyinshi vyoshobora gutuma twicuza. Mugabo vyogenda gute hamwe hoboneka ibintu bituma duhanurwa canke mbere tugatozwa indero? Ntitukibagire yuko ico ari ikimenyamenya c’urukundo rwa Yehova, bikaba vyotuma tumererwa neza ibihe bitazohera.—Imigani 3:11, 12; 4:13.
Kamere z’Agaciro Ntangere zo Gutsimbataza
10. Ni kamere iyihe Yezu yerekanye ko ari nkenerwa ku bokwinjiye mu Bwami?
10 Kugira ngo tugiriranire ubucuti bwiza na Yehova be n’abavukanyi bacu b’Abakirisu, birakenewe ko dutsimbataza kamere zimwezimwe. Yezu yarerekanye imwe muri zo igihe yahagarika akana hagati y’abigishwa biwe hanyuma akavuga ati: “Ni mutirimbura ngo mucike nk’abana bato, ntimuzoruha mwinjira mu bgami bgo mw ijuru. Nuk’ūzokwicisha bugufi nk’aka kana ni we mukuru mu bgami bgo mw ijuru.” (Matayo 18:3, 4) Abigishwa ba Yezu bari bakeneye gutsimbataza ukwicisha bugufi, kuko bari bamye bahazuka hagati yabo barondera kumenya umukuru muri bo.—Luka 22:24-27.
11. (a) Dukeneye kwicisha bugufi imbere ya bande, kandi kubera iki? (b) Nimba twicisha bugufi, tuzokwakira gute impanuro?
11 Intumwa Petero yanditse ati: “Mwese mukenyere ukwicisha bugufi kugira ngo mukorerane: kukw Imana irwanya abībona, arikw abicisha bugufi ikabaha ubuntu.” (1 Petero 5:5) Turazi yuko dukeneye kwicisha bugufi imbere y’Imana, mugabo ico canditswe cerekana yuko dukeneye kandi kwicisha bugufi ku bo dusangiye ukwemera. Nimba twicisha bugufi kuri bo, ntituzobabara igihe abandi batugiriye inama zibereye, ahubwo tuzogira ico tubigiyeko.—Imigani 12:15.
12. (a) Ni kamere iyihe ihambaye ijana cane n’ukwicisha bugufi? (b) Ni kuki dukwiye kwitwararika ico uko twigenza kugira ku bandi?
12 Ikintu kijana cane n’ukwicisha bugufi ni ukwitwararika ineza y’abandi. Intumwa Paulo yanditse ati: “Ntihagire umuntu ababara ivyiwe, arikw ababare ivya mugenzi we. . . . Nukw iyo murya, canke munywa, canke mukora ikindi kintu cose, mube mukorera vyose gushimisha Imana. Ntimubere Abayuda igitsitaza, cank’Abagiriki, cank’ishengero ry’Imana.” (1 Ab’i Korinto 10:24-33) Paulo ntiyavuze yuko tubwirizwa kwigizayo ibintu umuntu yikundira vyose, mugabo yaduhimirije kutagira ikintu na kimwe dukora cohava gituma uwundi muntu akora ivyo ijwi ryo mu mutima ryamubwiye ko ari bibi.
13. Ni akarorero akahe koshobora kwerekana ko twoba canke tutoba dushira mu ngiro impanuro zo mu Vyanditswe?
13 Woba ushira ineza y’abandi bantu imbere y’ivyo wewe ubwawe wikundira? Twese dukwiye kwiga kubigira. Hariho uburyo bwinshi bwo kubigira. Rimbura nk’akarorero ivy’inyambaro be n’ukwitunganya. Ivyo ni ibintu bivana n’ukuntu umuntu ubwiwe abishaka yisunze inyobozo zo mu Vyanditswe zerekeye ukwifata rupfasoni, ukuba uwusesuka n’umunyesuku. Mugabo hamwe bokubwira yuko biturutse ku mico y’abantu bo mu kibano iwanyu ukuntu wambara canke ukuntu witunganya vyabujije abandi kwumviriza ubutumwa bw’Ubwami, mbega wogira ivyo uhinduye? Nta gukeka, gufasha uwundi muntu akazoronka ubuzima bwamaho ni vyo bihambaye kuruta ukugira ibiduhimbara twebwe ubwacu.
14. Ni kuki bihambaye ko dutsimbataza ukwicisha bugufi kandi tukitwararika abandi?
14 Mu vyo kuba abicisha bugufi no kwerekana ko twitwararitse abandi, Yezu yaratanze akarorero, mbere aroza ibirenge abigishwa biwe. (Yohana 13:12-15) Ijambo ry’Imana rimuvugako ibi: “Mugire wa mutima muri mwebge wari muri Kristo Yesu. Uwo, naho yar’asanganywe ishusho y’Imana, ntiyiyumviriye yuko kuringanira n’Imana ar’ikintu co kwumirako: ariko yīsiga ubusa, yābīra ishusho y’umugurano, acika ūsa n’abantu. Kand’abonetse afise ishusho nk’iy’umuntu, yicisha bugufi, araga[mbur]uka no gushitsa ku rupfu.”—Ab’i Filipi 2:5-8; Abaroma 15:2, 3.
Ntukanke Gutozwa Indero na Yehova
15. (a) Ni ibintu nyabaki dukeneye guhindura kugira ngo tugire kamere ihimbara Imana? (b) Yehova akoresha iki mu kuduha impanuro no mu kudutoza indero?
15 Kubera ko twese turi abacumuzi, birasaba ko tugira ivyo duhinduye mu nyifato yacu no mu kuntu twigenza nimba dushaka kugaragaza kamere y’Imana yacu. Turakeneye kwambara “umuntu musha.” (Ab’i Kolosayi 3:5-14) Impanuro n’ugutozwa indero biradufasha kubona aho bikenewe ko tugira ivyo duhinduye kandi tukabona n’ukungene twobihindura. Isôko nyamukuru ry’amabwirizwa dukeneye ni Bibiliya ubwayo. (2 Timoteyo 3:16, 17) Ibisohokayandikiro bishingiye kuri Bibiliya hamwe n’amakoraniro atunganywa n’ishirahamwe rya Yehova, biradufasha gushira mu ngiro Ijambo ry’Imana. No mu gihe tuba twari tumaze kwumva iyo mpanuro, twoba tuzobona ko tuyikeneye kandi tukagerageza gutunganya ibitagenda neza?
16. Ni imfashanyo iyihe Yehova aduha umwumwe ukwiwe?
16 Yehova aratwitwararikana urukundo, akadufasha mu ngorane zacu. Abantu amamiliyoni barafashijwe biciye ku kugirirwa inyigisho za Bibiliya zo ku mihana. Abavyeyi barahanura abana babo kandi bakabatoza indero kugira ngo babarinde kwigenza mu buryo bwoshobora gutera intuntu mu mutima. (Imigani 6:20-23) Mw’ishengero, kenshi bamwe usanga basaba abasuku bazi utuntu n’utundi ngo babahanure canke babagire inama, kugira ngo babone gutunganya neza utwigoro bahora bagira mu gikorwa co mu ndimiro. Hari igihe abakurambere basabana impanuro, canke bakazisaba abandi bazi utuntu n’utundi mu busuku. Abakwije ibisabwa mu vy’impwemu barakoresha Bibiliya kugira ngo bafashe abakeneye impanuro, ivyo bakabigirana ubugwaneza. Mu gihe utanga impanuro, uribuka “[kwiyubara] ubgawe, nawe nyene woye kwoshwa nabi.” (Ab’i Galatiya 6:1, 2) Emwe, twese turakeneye impanuro n’ugutozwa indero kugira ngo dusenge ya Mana yonyene y’ukuri twunze ubumwe.
Ikiganiro c’Isubiramwo
• Yehova adufasha gute abigiranye urukundo kugira ngo tubone aho ubwacu dukeneye kugira ivyo duhinduye?
• Ni kuki benshi bagira ingorane yo kwemera impanuro ikenewe, kandi ivyo bikomeye ku rugero rungana iki?
• Ni kamere z’agaciro ntangere izihe zizodufasha kuba abantu bakira impanuro, kandi Yezu yatanze akarorero gute muri ivyo?
[Ifoto ku rup. 142]
Uziya yaranse impanuro bituma afatwa n’imibembe
[Ifoto ku rup. 142]
Musa yarungukiye ku kwemera impanuro ahawe na Yetiro