Ikigabane ca Cumi na Gatatu
Ishengero Ryinshi Imbere y’Intebe ya Yehova
1. (a) Imbere y’uko abasavyi b’Imana b’imbere y’Ubukirisu canke bamwe 144.000 baronka impera yabo, ni igiki gitegerezwa kubashikira? (b) Ni igiki kizoshobokera “ishengero ryinshi” ry’abariho muri iki gihe?
ABASAVYI b’Imana b’abizerwa guhera kuri Abeli gushika kuri Yohani Umubatizi, bashize ukugomba kw’Imana mu kibanza ca mbere mu buzima bwabo. Yamara, bose barapfuye, barindira kuzozukira kuba kw’isi, mw’isi nshasha y’Imana. Bamwe 144.000 bazotwara bari kumwe na Kirisitu mu Bwami bw’Imana bwo mw’ijuru, na bo nyene bategerezwa gupfa imbere y’uko baronka impera yabo. Ariko rero, mu Vyahishuriwe 7:9 harerekana yuko muri iyi misi y’iherezo, hobayeho “ishengero ryinshi” riva mu mahanga yose ritoshikiwe n’urupfu, mugabo ryokwiteze kubaho ibihe bidahera kw’isi. Muri abo woba urimwo?
Ishengero Ryinshi Abo Ari Bo
2. Ni ibiki vyatumye akaranga ka rya shengero ryinshi ryo mu Vyahishuriwe 7:9 gatahurwa neza?
2 Mu 1923, abasavyi ba Yehova baratahuye yuko “intama” zivugwa muri wa mugani wa Yezu dusanga muri Matayo 25:31-46 hamwe n’ “izindi ntama” yavuze nk’uko vyanditswe muri Yohana 10:16 ari abantu bazoronka akaryo ko kubaho ibihe bidahera kw’isi. Mu 1931, abavuzwe muri Ezekiyeli 9:1-11 yuko bashirwako ikimenyetso mu ruhanga na bo nyene vyabonywe ko ari abafise icizigiro co kuba kw’isi. Maze mu 1935 vyaramenyekanye yuko nya shengero ryinshi ari igice c’umugwi w’izindi ntama Yezu yavuze. Muri iki gihe, iryo shengero ryinshi ry’abatoneshejwe riharurwa mu mamiliyoni.
3. Ni kuki imvugo ngo “bahagaze imbere y’iyo ntebe” atari ukuvuga umugwi w’abaja mw’ijuru?
3 Mu Vyahishuriwe 7:9, nya shengero ryinshi ntiribonwa riri mw’ijuru. Ukuba “bahagaze imbere y’iyo ntebe” y’Imana ntibisaba ko baba bari mw’ijuru. Ahubwo gusa bari imbere y’inyonga z’Imana. (Zaburi 11:4) Ivy’uko ishengero ryinshi atari umugwi w’abaja mw’ijuru, ari na ryo “ata woshobora kuriharūra,” biraboneka ugereranije igitigiri cabo kitavugwa n’igitigiri canditswe mu Vyahishuriwe 7:4-8 no mu Vyahishuriwe 14:1-4. Ngaho havuga ko igitigiri c’abatowe kw’isi ngo baje mw’ijuru ari 144.000.
4. (a) “[U]mubabaro mwinshi” rya shengero ryinshi rirokoka ni ukuvuga iki? (b) Nk’uko bivugwa mu Vyahishuriwe 7:11, 12, ni bande bitegereza ishengero ryinshi kandi bagafadikanya na ryo mu gusenga?
4 Mu Vyahishuriwe 7:14 havuga ivy’ishengero ryinshi hati: “Aba n’abāvuye muri wa mubabaro mwinshi.” Bararokoka amarushwa ababaje atari bwigere abaho kuva umuntu abayeho. (Matayo 24:21) Igihe bazokwitirira Imana na Kirisitu ubukiriro bwabo babigiranye ugukenguruka, ni ho ibiremwa vyose bidahemuka vyo mw’ijuru bizokwifatanya na bo mu kuvuga biti: “Amen, umugisha no guhimbazwa n’ubgenge n’ishimwe n’icubahiro n’ububasha n’ubushobozi n’ivy’Imana yacu ibihe bitazoshira. Amen.”—Ivyahishuriwe 7:11, 12.
Barerekana ko Bakwiriye Kurokoka
5. Dushobora gute kumenya ibisabwa kugira ngo umuntu abe uwo mw’ishengero ryinshi?
5 Ukuzigurizwa kw’ishengero ryinshi rikarokoka wa mubabaro mwinshi, kuzoba mu buryo buhuye n’ingingo mfatirwako zigororotse za Yehova. Uturanga tw’abazohabuzwa turavugwa muri Bibiliya mu buryo butomoye. Gutyo, birashoboka yuko abakunda ukugororoka bakura amaboko mu mpuzu ubu kugira ngo bagaragaze yuko bakwiriye kurokoka. None abo bategerezwa gukora iki?
6. Ni kuki bibereye kuvugwa ko ishengero ryinshi rifitaniye isano n’intama?
6 Intama ziritonda kandi zikagamburuka. Kubw’ivyo, igihe Yezu yavuga yuko afise izindi ntama zitari mu mugwi w’abaja mw’ijuru, ntiyashaka gusa kuvuga abantu bobaye bashaka kubaho ibihe bidahera kw’isi, mugabo kandi yashaka kuvuga ko bobaye bagamburuka inyigisho ziwe. Yavuze ati: “Abābaye intama zanje bumva ijwi ryanje, nanje ndabazi, na bo barankurikira.” (Yohana 10:16, 27) Abo ni abantu bumviriza Yezu vy’ukuri kandi bagakora ivyo avuga bagamburuka, bagacika abigishwa biwe.
7. Ni kamere izihe abayoboke ba Yezu bakenera gutsimbataza?
7 Ni izindi kamere izihe umwe wese muri abo bayoboke ba Yezu yokenera gutsimbataza? Ijambo ry’Imana ryishura riti: “Ku vy’ingeso zanyu za kera . . . mwiyambure wa muntu wa kera, . . . m[w]ambar[e] wa muntu musha, yaremwe mw ishusho y’Imana mu kugororoka no mu kwera kw’ukuri.” (Abanyefeso 4:22-24) Baratsimbataza kamere zongereza ubumwe bw’abasavyi b’Imana, ari zo “urukundo, umunezero, amahoro, ukwihangana, kugira neza, ingeso nziza, kuba umwizigirwa, ubugwaneza, ukwirinda.”—Ab’i Galatiya 5:22, 23.
8. Ishengero ryinshi rizoshikirwa n’iki uko rigenda rishigikira amasigarira?
8 Ishengero ryinshi rirashigikira ca gitigiri gitoyi c’abafise ivyizigiro vyo kuba mw’ijuru, ari na bo bahagarikiye igikorwa co kwamamaza. (Matayo 24:14; 25:40) Izindi ntama barabashigikira rero, naho bazi yuko bazoshikirwa n’ukurwanywa kubera ko igihe iyi misi y’iherezo yatangura, Kirisitu Yezu be n’abamarayika biwe bajugunyiye Shetani n’amadayimoni yiwe hanze y’ijuru. Ivyo vyatumye “ibara [ribonwa] n’isi . . . kuk’Umurwanizi yabamanukiye, ari n’inzigo nyinshi, azi kw afise igihe gito.” (Ivyahishuriwe 12:7-12) Gutyo, Shetani ararushiriza kurwanya abasavyi b’Imana muri iki gihe aho iherezo ry’uru runkwekwe ryegereje.
9. Abasavyi b’Imana bererwa ku rugero rungana iki mu kwamamaza inkuru nziza, kandi kuki?
9 Naho hari uruhamo rukaze, igikorwa co kwamamaza kirabandanya gutera kija imbere. Guhera ku duhumbi dukeyi tw’abamamaji b’Ubwami bari bahari mu mpera y’Intambara ya Mbere y’Isi Yose, ubu hari amamiliyoni, kuko Yehova yasezeranye ati: “Nta co kurwanisha bācuriye kukurwanya kizogira ico kimara.” (Yesaya 54:17) N’umwe mu bari bahurikiye muri sentare nkuru y’Abayuda yaremeye yuko igikorwa c’Imana kitoshobora gutsindwa. Yabwiye Abafarizayo mu kinjana ca mbere ku biraba abigishwa ati: “Ni muzibukire aba bantu, mubarekure: kukw iyi nama n’iki gikorwa ni vyaba biturutse mu bantu, bizosendwa: ariko ni vyaba biturutse ku Mana, ntimuzoshobora kubatsinda, mwoye kuzosanga murwanya Imana.”—Ivyakozwe 5:38, 39.
10. (a) “Ikimenyetso” gishirwa ku bo mw’ishengero ryinshi gisigura iki? (b) Abasavyi b’Imana bagamburuka gute rya ‘jwi riva mw’ijuru’?
10 Abo mw’ishengero ryinshi bavugwa nk’aho bashizweko ikimenyetso c’ukurokoka. (Ezekiyeli 9:4-6) Ico “kimenyetso” ni ikimenyamenya c’uko biyeguriye Yehova, bakabatizwa, bakaba abayoboke ba Yezu, kandi bakaba bakora uko bashoboye kugira ngo batsimbataze kamere ya Kirisitu. Baragamburuka rya ‘jwi riva mw’ijuru’ rivuga ku biraba inganji y’isi yose y’idini y’ikinyoma iganzwa na Shetani, irivuga riti: “Bantu banje, ni muve i we, kugira ngo mwoye gufatanya n’ivyaha vyiwe, mwoye guhabga ku vyago vyiwe.”—Ivyahishuriwe 18:1-5.
11. Ni mu buryo buhambaye ubuhe abo mw’ishengero ryinshi berekana yuko ari abasavyi ba Yehova?
11 Vyongeye, Yezu yabwiye abayoboke biwe ati: “Ni mwagiriranira urukundo, ni ho bose bazomenya ko mur’abigishwa banje.” (Yohana 13:35) Ikinyuranye n’ivyo, usanga abo mu madini y’iyi si bicana mu ntambara, kenshi bikaba gusa bitewe n’uko badasangiye ubwenegihugu! Ijambo ry’Imana rivuga riti: “Iki ni co kimenyekanisha abana b’Imana n’abana b’Umurwanizi: ūdakora ibigororotse wese s’uw’Imana, cank’ūdakunda mwene Data wundi. . . . [D]ukundane; ntiduse na Kayini, yar’uwa wa Mubi, akica murumuna we.”—1 Yohana 3:10-12.
12. Kuri wa mubabaro mwinshi, Yehova azogenza gute ‘ibiti’ vyo mu vy’idini vyama ivyamwa ataco bimaze?
12 Yezu yamenyesheje icese ati: “Igiti ciza cose cama ivyiza, arikw igiti kibi cama ibibi. Igiti ciza ntigishobora kwama ibibi, kand’igiti kibi ntigishobora kwama ivyiza. Igiti cose kitama ivyiza kiracibga, kigatererwa mu muriro. Nuko muzobamenyera ku vyo bama.” (Matayo 7:17-20) Ivyamwa amadini y’iyi si yama birayerekana ko ari ‘ibiti’ bibi, bikaba vuba bigiye guhonywa na Yehova kuri wa mubabaro mwinshi.—Ivyahishuriwe 17:16.
13. Ishengero ryinshi ryerekana gute yuko “bahagaze imbere y’iyo ntebe” ya Yehova bunze ubumwe?
13 Mu Vyahishuriwe 7:9-15 harerekana ibintu bituma rya shengero ryinshi rizigurizwa. Berekanwa “bahagaze imbere y’iyo ntebe” ya Yehova, bashigikira ukugaba n’ukuganza kwiwe bunze ubumwe. “Bamesuye imvune zabo bazezesha amaraso ya wa Mwagazi,” bikerekana yuko bemera inkuka mpongeravyaha Yezu yatanze. (Yohana 1:29) Bariyeguriye Imana bongera babigereranya mu kwibizwa mu mazi. Ni co gituma bafise impagararo ityoroye imbere y’Imana, bikaba vyerekanwa n’amakanzu yera bambaye, be n’uko “[bayikorera] . . . ku murango no mw ijoro.” Hoba hariho uburyo ushobora guhuza neza ubuzima bwawe n’ibidondowe ngaho?
Ivyiza Tuhakura Ubu
14. Ivyiza bimwebimwe ntangere abasavyi ba Yehova baronka ubu ni ibihe?
14 Na wewe nyene, wariboneye ivyiza ntangere abakorera Yehova baronka no muri iki gihe. Nk’akarorero, igihe wiga ivyerekeye imigambi igororotse ya Yehova, waratahuye yuko hariho icizigiro gikayangana ca kazoza. Ubu rero urafise intumbero nyakuri mu buzima, ikaba ari iyo gukorera ya Mana y’ukuri witeganye umunezero ubuzima bwamaho kw’isi y’iparadizo. Egome, Umwami Yezu Kirisitu “azo[shora rya shengero ryinshi] ku masōko y’amazi y’ubu[zima].”—Ivyahishuriwe 7:17.
15. Ivyabona vya Yehova bungukira gute ku kuguma ku ngingo ngenderwako za Bibiliya ku biraba politike be n’ukwigenza runtu?
15 Iciza kimwe c’akaroruhore abo muri rya shengero ryinshi bifitiye ni urukundo, ubumwe n’uguhuza dusanga mu basavyi ba Yehova kw’isi yose. Kubera ko twese dufungura ku bifungurwa vy’impwemu bimwe, turagamburuka amategeko amwe be n’ingingo ngenderwako zimwe dusanga mw’Ijambo ry’Imana. Ni co gituma ata vyiyumviro vya politike canke vy’ubwenegihugu bituma tugira amacakubiri. Si ivyo gusa, turagumya ingingo mfatirwako ziri hejuru Imana isaba abantu bayo kwisunga. (1 Ab’i Korinto 6:9-11) Gutyo, aho gushikirwa n’umuryano, ugucanamwo be n’ubushegabo vyiraye muri iyi si, abasavyi ba Yehova bifitiye icokwitwa iparadizo yo mu vy’impwemu. Ehe raba ukuntu ivyo bidondowe muri Yesaya 65:13, 14.
16. Naho hari ingorane zikunda gushika mu buzima, abo muri rya shengero ryinshi bafise icizigiro ikihe?
16 Ariko ntiwumve, abasavyi ba Yehova bo kw’isi si abatagira agasembwa. Eka mbere barashikirwa n’ingorane zishikira abantu mu buzima muri iyi si, nk’amagume, canke bakicwa bazira ubusa mu ntambara z’ibihugu. Barashikirwa kandi n’indwara, ugucumukura, n’ugupfa. Mugabo barizeye yuko mw’isi nshasha, Imana “[i]zohanagura amosozi yose ku maso yabo, kand’urupfu ntiruzoba rukiriho, kand’amaborogo no gutaka n’uburibge ntibizoba bikiriho.”—Ivyahishuriwe 21:4.
17. Ata kuraba ibidushikira ubu, ni kazoza keza igitangaza akahe kabikiwe abasenga Imana y’ukuri?
17 Naho wobura ubuzima kubera ubusaza, indwara, isanganya canke uruhamo, Yehova azokuzura ngo ube mw’Iparadizo. (Ivyakozwe 24:15) Maze uzobandanya kwinovora amazimano yo mu vy’impwemu mu kiringo ca ya Ngoma ya Kirisitu y’Imyaka Igihumbi. Urukundo ukunda Imana ruzokwongerekana uko uzogenda urabona ukuntu imigambi yayo iranguka bimwe vy’akaroruhore. Kandi n’imihezagiro yo mu buryo bw’umubiri Yehova azotanga ico gihe, izorushiriza kwongereza urukundo umukunda. (Yesaya 25:6-9) Ese ukuntu ari kazoza keza igitangaza kabikiwe abantu b’Imana!
Ikiganiro c’Isubiramwo
• Ni ikintu gitangaje bidasanzwe ikihe Bibiliya ivuga ku bijanye na rya shengero ryinshi?
• Nimba vy’ukuri dushaka kuba mu bagize rya shengero ryinshi Imana itonesha, ni ibiki dutegerezwa gukora ubu?
• Imihezagiro ishengero ryinshi ryifitiye ubu be n’iyo rizoba ryifitiye mw’isi nshasha y’Imana, kuri wewe ihambaye ku rugero rungana iki?
[Ifoto ku rup. 123]
Abantu amamiliyoni bo muri rya shengero ryinshi barasenga Imana y’ukuri mu bumwe