Ikigabane ca 1

Ivy’Uguhurikira Hamwe mu Gusenga—Ukwiye Kubibona Gute?

1, 2. (a) Uguhurikira hamwe nyakuri mu vy’ugusenga Imana kuriko kuba muri iki gihe gushimikiye ku ki? (b) Ivyo biriko biba Bibiliya ivyigana gute?

HARIHO urugendo kw isi rutera akamwemwe, amaherezo ari ukuzoshikīra ubumwe mu vy’ugusenga Imana. Abafata urwo rugendo ni abantu baturuka mu mahanga yose, abantu b’amoko yose n’indimi zose. Ubumwe bafise ntibuva ku guheba ivyo umuntu yemera kugira ngo yumvikane n’abandi. Ubwo bumwe ntibābushikiriye kubera ukwirinda kunegura imigenzo idahuje n’Ijambo ry’Imana. Bābushikiriye gute none? Buzanwa n’uko abantu badasangiye imico kavukire bamenya Yehova ko ari we Mana y’ukuri yonyene bagatunganya uburyo babayeho ata guhigimanga, bugahuza n’inzira ziwe zitunganye.—Gereranya no mu Vyahishuriwe Yohani 15:3, 4.

² Iryo ni iranguka ry’amajambo menyeshakazoza yanditswe n’umumenyeshakazoza Mika, haraheze nk’imyaka ishika 2 700. Yaravuze ivyerekeye ‘imisi y’iherezo’ ati: “Amahanga menshi azojayo, abarirane, ati: ‘Ni muze tuduge, tuje ku murwa [wa Yehova], ku ngoro y’Imana ya Yakobo, kugira ngo itwigishe ivy’inzira zayo, natwe tuzigenderemwo.’ ” (Mika 4:1, 2)a Woba ubona ko ivyo biriko biba?

3, 4. (a) Ni mu buryo ki ari ivy’ukuri kuvuga ko “amahanga” aja kwa Yehova? (b) Ni ibibazo ibihe twokwibaza?

³ Si “amahanga” yose uko angana aja ku ngoro ya Yehova y’ivy’umutima kumusenga, ahubwo abantu bamwe bamwe baturuka muri ayo mahanga ni bo bajayo. Uko batahura imigambi ya Yehova iranga urukundo hamwe na kamere yiwe iteye igomwe, ni ko bibashika ku nyota koko. Baricisha bugufi bakarondera kumenya ivyo Imana ibashakako. Isengesho ryabo rimera nka rimwe rya Dawidi wa mushingantahe yari afise ukwizera, umwe yavuga ati: “Unyigishe gukora ivyo ugomba, kuko ari wewe Mana yanje.”—Zaburi 143:10.

⁴ Woba ubona ko uri muri iryo sinzi ry’abantu bambaza Yehova? Ukuntu ukurikiza ivyo wigishijwe vyoba bigaragaza ko uhimbarwa n’ivy’uko Yehova ari we soko ryavyo? ‘Inzira ziwe woba uzigenderamwo’ ku rugero rungana iki?

Ukuntu Ubwo Bumwe Buza

5. (a) Ivyerekeye ubumwe mu vy’ugusenga Imana amaherezo bizomera gute? (b) Ni kuki ivy’ukuba umusavyi wa Yehova ubu vyihutirwa rwose, kandi twofasha abandi gute kuba abasavyi biwe?

⁵ Yehova afise umugambi w’uko ibiremwa vyose bifise ubwenge bihurikira hamwe mu kumusenga—ntihagire na kimwe kizimira kubera uguhendwa, canke ngo hagire ikigenda gikabakaba kubera ko kitatahuye vy’ukuri igituma hariho ubuzima. Ese ingene twipfuza rwose kubona igihe ibiremwa vyose bizoba bishemeza Imana y’ukuri yo nsa! (Zaburi 103:19-22) Ariko imbere y’uko ivyo bishika, Yehova ategerezwa kubanza gukura mu biremwa vyiwe abakengera inganji yiwe iranga urukundo, bagashima cane cane kwononera abandi ubuzima. Kubera imbabazi ziwe, yaramenyesheje hakiri kare ivyo azogira. Abantu bo mu mihingo yose barafise akaryo k’uguhindura uburyo babayeho. Ni co gituma muri iki gihe turimwo, iyi mpanuro isaba gukwirikizwa bidatevye itangwa kw isi yose: “[Mutinye] Imana, muyihimbaze, kuko igihe c’amateka yayo gishitse, musenge iyaremye ijuru n’isi n’ikiyaga n’amasōko y’amazi.” (Ivyahishuriwe Yohani 14:6, 7) Ivyo bagusavye kugira woba waravyemeye? Niba waravyemeye, ubu rero uri n’iteka ry’ugukora ufadikanije n’Ishirahamwe rya Yehova, ugafasha n’abandi kubigira.

6. Igihe tumaze kumenya inyigisho z’ishimikiro za Bibiliya, ni iterambere nyabaki rindi dukwiye kurondera tudatevye?

⁶ Imana ntiyagabiye kwakīra mw Ishirahamwe ryayo abantu bavugisha akarimi ngo turizeye Yehova kandi dushaka kuba mw iparadizo, ariko bakabandanya kwironderera ivyabo gusa. Iyo Mana igomba ko abantu ‘buzuzwa ukumenya ivyo igomba,’ kandi ivyo bikagaragarizwa mu buryo babayeho. (Ab’i Kolosayi 1:9, 10) Igihe abantu bakenguruka bamaze gutahura inyigisho za Bibiliya z’ishimikiro, baca barondera gutera baja imbere kugira ngo babe abantu bakuze mu vy’ubukirisu. Icipfuzo cabo ni ukumenya Yehova bagacudika na we, bakarushirizaho rwose gutahura neza Ijambo ryiwe no kuryinjira mu mizi, bakarushirizaho no kurikurikiza mu buzima bwabo bimwe bishitse. Barondera kumera nka Se wabo wo mw ijuru, kuba icirore kigaragaza kamere ziwe, no kubona ibintu nk’uko we nyene ubwiwe abibona. Ivyo bituma barondera uburyo bw’ugufashanya n’abandi uko bashoboye, ca gikorwa ashaka ko kirangūrwa kw isi muri iki gihe. Ivyo ni vyo ukora none?—Abanyefeso 5:1; Abaheburayo 5:12–6:3; 1 Timoteyo 4:15.

7. Ni ibiki bituma haba ubumwe nyakuri muri iki gihe, kandi ubwo bumwe buza gute?

⁷ Bibiliya yerekana ko abakorera Yehova bakwiye kuba abantu bashize hamwe. (Abanyefeso 4:1-3) Ubwo bumwe butegerezwa kuboneka muri iki gihe, naho tuba mw isi y’amacakubiri kandi tukaba tukirwana n’agasembwa dufise. Yezu yarasenze ashirutse umwete ngo abayoboke biwe babe umuntu umwe, bagire ubumwe nyakuri. Ivyo vyoba bishaka kuvuga iki? Ko ubwa mbere na mbere bokwumvikanye rwose na Yehova hamwe n’Umwana wiwe. Ikindi kandi, ko bose bohurikiye hamwe. (Yohani 17:20, 21) Muri iki gihe ubwo bumwe buboneka iyo bakurikiza inyigisho baronkera mu “nzu” ya Yehova.

Ni Ibiki Bituma Haba Ubumwe?

8. (a) Ni ibiki twimenyereza kugaragaza igihe dukoresha Bibiliya kugira ngo tuzirikane inyishu z’ibibazo bitwerekeye? (b) Mu kwishura ibibazo biri aho haruguru, nutohoze ibifasha kuzana ubumwe mu bakirisu.

⁸ Ibikuru bikuru mu bituma haba ubwo bumwe biradondaguwe aho hepfo. Mu kwishura ibibazo vyanditswe munsi y’ivyo bintu bikuru bikuru, erekana ukuntu kimwe kimwe cerekeye ubucuti ufitaniye na Yehova hamwe n’abakirisu bagenzawe. Igihe uzirikanye ivyo bintu wishimikije Ivyanditswe vyerekanywe, na vyo nyene birakwongerereza ubushobozi bw’ukwiyumvīra hamwe n’ugutahura ibintu uvyerekeje ku Mana, ivyo twese tukaba tubikeneye. (Imigani 5:1, 2; Ab’i Filipi 1:9-11) Nuvyihweze rero kimwe kimwe:

(1) Twese dusenga Yehova kandi turazi ko ari we afise uburenganzira bw’ukudushingira ingingo mu vyerekeye iciza n’ikibi.

Igihe tworenga ku mpanuro za Yehova n’ibigirankana mu vyo tubona ko bisa n’ibidahambaye, Yehova yobibona gute? (Luka 16:10; gereranya no muri Malaki 1:6-8.)

Nk’igihe tutagumye twubaha amategeko ya Yehova, abandi hari ico vyobagira? (Gereranya no mu Baroma 5:12; muri Yosuwa 7:20-26; mu gitabu ca 1 c’Abami 14:16.)

(2) Aho turi hose kw isi, turafise Ijambo ry’Imana ry’ukutuyobora.

Ni kuki twoba tuguye mu rudubi igihe twofata ingingo dukurikije ivyo “tubona” ko ari vyo bitunganye? (Yeremiya 17:9; Imigani 14:12)

Nk’igihe tutazi impanuro Bibiliya itanga ku vyerekeye ibintu bimwe bimwe, dukwiye kugira iki? (Imigani 2:3-5)

(3) Twese turonkera akunguko ku mfungurwa z’umutima zimeze kumwe nk’uko igaburwa ryazo ryatunganijwe.

Abadashimishwa n’ivyo Yehova yatunganije vyerekeye igaburwa ry’imfungurwa z’ivy’umutima bamerewe gute? (Gereranya no muri Yesaya 1:3; 9:16; 65:14.)

(4) Indongozi yacu si umuntu, ni Yezu Kirisitu, kandi twese duca kuri we mu kwitura Yehova ngo tumusenge.

Hari n’umwe muri twebwe afise impamvu nyakuri yotuma abona ko turuta abandi bantu? (Abaroma 3:23, 24; 12:3; Matayo 23:8-10)

(5) Aho tuba hose, duhanze amaso Ubwami bw’Imana kandi tubona ko ari bwo bwonyene abantu bakwiye kwizigira.

Ivyo bidukingira gute ivyotwinjizamwo amacakubiri? (Matayo 6:9, 10; Mika 4:3)

(6) Impwemu yera ituma abasavyi ba Yehova bagira kamere nziza zikenewe rwose mu vyerekeye ubumwe bw’abakirisu.

Impwemu y’Imana tuyiha inzira gute ngo ivyo yama biboneke muri twebwe? (Zaburi 1:2; Imigani 22:4; Ivyahishuriwe Yohani 3:6; Ivyakozwe n’intumwa 5:32)

Ukugira muri twebwe ivyo impwemu yama bituma ubucuti dufitaniye na Yehova bumera gute? Ubwo dufitaniye n’abavukanyi bwo bite? (Ab’i Galatiya 5:22, 23)

(7) Twese twarashinzwe ibanga ry’ukwamamaza inkuru nziza y’Ubwami bw’Imana.

Ugufashanya rwose n’abakirisu bagenzi bacu igikorwa c’ukwamamaza inkuru nziza, bituma tubiyumvira gute? (Gereranya no mu b’i Kolosayi 4:7, 11.)

9. Haba inkurikizi ki igihe mu vy’ukuri twitondeye izo nyigisho z’ukuri mu buzima?

⁹ Kwemera ko ivyo vyose ari ivy’ukuri ni vyiza, ariko kubikurikiza mu buzima bisaba ko umuntu agira ikindi kintu. Ariko igihe tubigenjeje gutyo, duca twiyegereza rwose Yehova. Ukugenderanira na bagenzi bacu bizeye, na vyo nyene biratuzanira agahimbare. Ni nk’uko Zaburi ya 133:1 ibivuga, iti: “Ewe kuntu ari vyiza kandi [bihimbaye, abavukana kubana bashize hamwe koko]!” Ubwo nturiyumvamwo ubwawe ukuntu umuntu aba aruhutse iyo avuye muri iyi si, agahunga agatima kayo k’ubwikunzi, akaja gukoranira hamwe n’abandi bakunda Yehova vy’ukuri?

Niwirinde Ibikwega Amacakubiri

10. Ni kuki dukwiye kwirinda rwose agatima ko gukora ivyo umuntu yishakiye?

¹⁰ Nuko rero kugira ngo ntitwonone ubwo bumwe buteye igomwe, dukwiye kwirinda ibizana amacakubiri. Icibonekeje rwose muri ivyo, ni agatima k’ugukora ivyo umuntu yishakiye. Yehova aradufasha kwirinda ako gatima mu guserura inkomoko yako ari yo Shetani wa Mucokoranyi. Ni yo yahenze Eva mu gutuma yiyumvira ko yoronka akarusho arenze ku ryo Imana yavumereye agatangura kwifatira ingingo we nyene ubwiwe. Adamu yaramwunganiye muri ubwo bugarariji. Ivyo vyatumye bo hamwe na twebwe tugira amarushwa menshi. (Itanguriro 2:16, 17; 3:1-6, 17-19) Tuba mw isi yuzuyemwo ako gatima k’ukugira ivyo umuntu yishakiye, ntivyodutangaza rero kubona turinda kukarwanya kugira ngo tukikuremwo. Yehova aradufasha kukarwanya akabigirana urukundo, mu kuduha impanuro abicishije kw Ishirahamwe ryiwe.

11. Ni igiki cokwerekana ko mu vy’ukuri turiko twitegurira kuba mw isi nshasha itunganye y’Imana?

¹¹ Iryo Shirahamwe ryaratumenyesheje ivy’umuhango w’agatangaza wa Yehova w’ugukuraho ivy’iyi si tubamwo ubu, bigasubirirwa n’ijuru hamwe n’isi nsha, ivyo “[ugutungana gutegerezwa kubamwo].” (2 Petero 3:13) Turahimbarwa rwose n’uko muri iyi misi twimirije ivy’iyi si mbi bizohera, iyi si igahinduka iparadizo. Ariko none ukuntu tubayeho vyoba vyerekana ko turiko twitegurira vy’ukuri kuba mw isi izoba yibonekejemwo rwose ivy’ugukora ibitunganye? Bibiliya irabitumenyesha neza, iti: “Ntimugakunde isi, canke ibiri mw isi. Umuntu ni yakunda isi, ugukunda Data wa twese ntikuzoba kuri muri we.” (1 Yohani 2:15) Birumvikana ko hariho ibintu vyinshi muri iyi si ata n’umwe muri twebwe yobikunda. Ariko muri iyi si twoba twanka gusa ibitubuza kwinezereza mu buzima muri iki gihe, canke twoba twirinda n’agatima kayo—kwa gukora ivyo umuntu yishakiye na kwa kwikunda birenze urugero? Twoba twimenyereza vy’ukuri kwumviriza Yehova no kumwumvira bivuye ku mutima, naho umubiri wacu utwosha gukora ibihushanye n’ivyo? Uburyo tubayeho—naho twoba tuba hehe canke dukora akazi kameze gute—bukwiye kugaragaza ko ivyiyumviro hamwe n’agatima dufise vyerekeye ku Mana.—Imigani 3:5, 6.

12. (a) Ni kuki kutagisha akaryo k’ukwiga inzira za Yehova hamwe no kuzigenderamwo mu buzima ubu ari ivy’ingirakamaro koko? (b) Ivyanditswe vyerekanywe muri ico gifungo bivuze iki kuri twebwe ubwacu?

¹² Igihe ca Yehova cashinzwe c’ugusangangura iyi si mbi hamwe n’abakunda inzira zayo ni cashika, ntazobisibiza. Ico gihe ntazogisubiza inyuma canke ngo ahindure ingingo yashinze, kugira ngo afashe abacijijanya imitima mu vy’uguheba iyi si, batarafata ingingo y’imvaho mu vyerekeye kwiga ivyo Imana igomba hamwe no kubikurikiza. Iki ni igihe c’ugufata ingingo! (Luka 13:23, 24; 17:32; 21:34-36) Ese ingene rero biteye agahimbare kubona “ishengero [rinini]” ry’abantu ritagīsha ako karyo keza rironse rikaronderana ubwira inyigisho Yehova atanga biciye kw ishirahamwe ryiwe rirangwa n’urukundo, hanyuma bagahurikira hamwe mu kugendera mu nzira ziwe!

[Akajambo k’epfo]

Ikiyago c’Ugusubiramwo

● Yehova afise umugambi nyabaki ku vyerekeye ukumwambaza?

● Igihe tumaze kwiga inyigisho za Bibiliya z’ishimikiro, ni iterambere nyabaki rindi dukwiye kuronderana igishika?

● Ni igiki umwe umwe wese muri twebwe yokora kugira ngo ibizana ubumwe duhejeje kuyaga biturongōre mu buzima nk’uko bitegerejwe?

[Ifoto yuzuye urupapuro rwose ku rup. 4]