Kuchind
19 Yehova wayileja kand Moses ni Aron anch: 2 “Ech chawiy chijil chaletangay Yehova, ‘Yileja In Isarel akwinkish ngomb musunz wakad ulim, wakad chitaj ni wakadingap kal kusend kabengal.* 3 Ukumwinkishanyay mwin kupesh Eliyazar, ndiy ukumutwal pol pa chibeng, ni akumujipin kurutu kwend. 4 Chad mwin kupesh Eliyazar ukunon mash makemp ku muny wend wamaminin tupamp sambwad ku mutambu wa ku chis cha mwinkand wa kukumangen. 5 Kupwa akumwosh ngomb kurutu kwend. Chikit chend, mbij jend, mash mend pamwing ni yiyimp yend, akuyosh. 6 Ni mwin kupesh ukunon rukuny ra mutond wa sedre, nsaakil ja izop, ni disun da ndand musunz wayidjubwil mu kasu mumwoshinau ngomb. 7 Kupwa mwin kupesh ukutut masun mend ni amwinend* ukowal mem; ni ukutwish chad kuchirik mu chibeng; pakwez mwin kupesh ukwikal wijondina kushik urel.
8 “‘Muntu woshang ngomb ukutut masun mend mu mem ni amwinend* ukowal mem, ni ukwikal wijondina kushik urel.
9 “‘Muntu wishitwila ukukungul mawut ma ngomb ni ukumatek pol pa chibeng pa ndond yishitwila; chisak cha In Isarel chikumalam mulong wa kusambish kurijek nich mem ma kushitwishan nich. Chid chakupesh cha chitil. 10 Muntu ukukungula mawut ma ngomb ukutut masun mend ni ukwikal wijondina kushik urel.
“‘Chinech chikwikal chijil cha chikupu kud In Isarel ni kud ngez ushicha pakach pau. 11 Muntu mwawonsu ukukwata ku mujimbu wa muntu* wafang kal ukwikal wijondina mu machuku sambwad. 12 Muntu winou ukwishitwish ni mem pa dichuku da kasatu, ni pa dichuku da sambwad ukwikal wishitwila. Pakwez anch kishitwishinap pa dichuku da kasatu, kakwikalap wishitwila pa dichuku da sambwad. 13 Muntu mwawonsu ukukwata ku mujimbu wa muntu wafang kal* ni walik kwishitwish wijondish kal dizang da Yehova; muntu* winou chifanyidin kumujiyish* pakach pa Isarel. Mulong kamumininangap mem ma kushitwishan nich, ushadin wijondina. Kwijond kwend kushadin pad ndiy.
14 “‘Ech chawiy chijil cha kusadin anch muntu wafil mu mwinkand: Muntu mwawonsu ukwandama mu mwinkand ap muntu mwawonsu wada mu mwinkand pafangay ukwikal wijondina mu machuku sambwad. 15 Chom chawonsu chawash chakad mufunyik wa kukasinap chijondin. 16 Muntu mwawonsu uda mu masuku ukumupukuna muntu wajipangau kwi mpak ya musamun, ukupukuna mujimbu wa muntu wafang mu mutapu ukwau, mafup ma muntu, ap nzay, ukwikal wijondina mu machuku sambwad. 17 Akumunonin muntu wijondina mawut makemp ma chakupesh cha chitil choshangau, amatek mu chom ni azizinap mem ma mukwaku. 18 Kupwa muntu wishitwila ukunon nsaakil ja izop wajitant mu mem, waminin ku mwinkand, ku yom yawonsu yidamu, kud antu adamu, ni kud muntu wapukunang mafup, wapukunang muntu wajipangau, mujimbu wa muntu wada wafang kal, ap kwi nzay. 19 Muntu wishitwila ukumumininam muntu wakad kwishitul pa dichuku da kasatu ni pa dichuku da sambwad, ni ukumushitwish ku chitil pa dichuku da sambwad; kupwa muntu wijondina ukutut masun mend, wowal mem, ni ukwikal wishitwila urel.
20 “‘Pakwez anch muntu wijondin ni walik kwishitwish, muntu* winou chifanyidin kumujiyish* mu chikumangen, mulong wijondish kal ndond yitumbila ya Yehova. Kamumininangap mem ma kushitwishan nich, chawiy wijondin.
21 “‘Ech chikwikal chijil cha chikupu kud awiy: Muntu ukumina mem ma kushitwishan nich ufanyidin kutut masun mend, ni muntu ukukwata mem ma kushitwishan nich ukwikal wijondina kushik urel. 22 Chom chawonsu chikukwatau kud muntu wijondina chikwikal chijondina, ni muntu* ukuchikwata ukwikal wijondina kushik urel.’”