Disambishil

9 Nzamb wamuyukisha Now ni anend, ni wayileja anch: “Valijanany, vulijanany ni izwishany divu.” 2 Yitang yawonsu yikweta mwom ya pa divu, atujil awonsu, yitang yawonsu yikata kwend pa divu ni ansh awonsu a mu karung, yikudandamen kukovany wom ni kuzal mulong wenen. Yid katat mu makas men. 3 Annam awonsu ada aom akutwish kwikal yakuda yen. Mud mutapu nakwinkishanya yifukis yitalel, nakwinkishanau kal kand awonsu. 4 Pakwez ufanyidinanyap kuda mbij pamwing ni mwom,* charumburik anch mash. 5 Chikwau kand, nikumupup muntu mwawonsu ukukujipanya.* Chitang chawonsu chikukujipanya, chifanyidin kuchijip. Ni nikumupup muntu mwawonsu ukushesha mwom wa mwanamakwend. 6 Mwawonsu ukumujipa mukwau, niyend akumujip, mulong Nzamb wamutanga muntu mu chifu chend. 7 Pakwez en, valijanany, vulijanany ni palanganany pa divu.

8 Kupwa Nzamb wamuleja Now ni anend amakuny anch: 9 “Katat am nasuk kal mansuk pamwing niyenen ni pamwing ni anen akeza kez,* 10 ni pamwing ni yitang yawonsu yikweta mwom* yida pamwing niyenen: atujil, annam, ni yitang yawonsu yikweta mwom ya pa divu yida pamwing niyenen, yawonsu yabudikina mu waat. 11 Mwaning, nasuk kal mansuk pamwing niyenen: Nikez kasheshap kand yitang yawonsu yikweta mwom kusutin mabeb, ni nikez kasheshap kand divu kusutin mabeb.”

12 Nzamb wawejinaku anch: “Ech chawiy chijingidij cha mansuk nasuka kal pamwing niyenen ni pamwing ni yitang yawonsu yikweta mwom* yida pamwing niyenen, mulong wa majuku mawonsu makeza kez. 13 Natek kal nkongal wam mu madj, ndiy ukwikala chijingidij cha mansuk nasuka kal ni divu. 14 Chisu chawonsu nikuleta madj piur pa divu, chakin kamu nkongal ukubudik mu madj. 15 Ni chakin kamu, nikuvurik mansuk nasuka pamwing niyenen ni pamwing ni yitang yawonsu yikweta mwom ya mitapu kushalijan; ni kukez kikalap kand mabeb makushesha yitang yawonsu yikweta mwom. 16 Ni anch nkongal wabudik mu madj, chakin kamu nikumuman ni nikuvurik mansuk ma chikupu mada pakach pa Nzamb ni yitang yawonsu yikweta mwom ya mitapu kushalijan yida pa divu.”

17 Nzamb wamuleja kand Now anch: “Chinech chawiy chijingidij cha mansuk nasuka kal pamwing ni yitang yawonsu yikweta mwom yida pa divu.”

18 An a Now abudika mu waat ading Sem, Sham ni Yafet. Kupwa Sham wamuvala Kanaan. 19 Amakuny inay asatu ading an a Now, ni kwawiy kwadokalau antu awonsu apalangana pa divu da kabuj.

20 Chad Now wikala ndim, ni wadima chir cha nviny. 21 Dichuku dimwing, wana maar ma nviny ni walewa, chad wadjola masun padingay mu mwinkand wend. 22 Sham, tatukwend a Kanaan, wamana winzikis wa tatukwend, ni waya wayilejamu anamakwend aad ading pol. 23 Chawiy Sem ni Yafet anona disun, aditek pa makij ni andam chinshikanyim. Mwamu abwika winzikis wa tatukwau pading pamwombinau nyim, ni kamanap winzikis wend.

24 Maar pamamupwa, Now walanka ni pajinguninay yom yamusalau kud mwanend mwanikanch, 25 walonda anch:

“Riyind kud Kanaan.

Ikala musuk wa mwinshin wa anamakwend.”

26 Ni wawejinaku anch:

Kanaan ikala kand musuk wend.”

28 Kupwa kwa Mabeb, Now wasala kand mivu yitot yisatu ni makum matan (350). 29 Chawiy mu mwom wend wawonsu, Now wasala mivu yitot chidivu ni makum matan (950), kupwa wafa.