Amigota ruwanapaqqa allin amigo kana

Amigota ruwanapaqqa munakuqmi kana. Jehová Diosta astawan reqsispaqa astawanmi munakunki, kamachikusqantapas ruwayta munanki. Chaymi yanapasunki Jesuspa yachachisqan kanaykipaq (Mateo 28:19). Jehová Diospa testigonkunawan hukllachakuspaqa wiñaypaqmi Diospa amigon kanki. ¿Imatan ruwanayki chaypaq?

Dios munakuyniykita rikuchiy kamachikuyninkunata kasukuspa. “Diosta munakuspanchisqa kamachikusqankunatan kasukunchis, kamachikuyninkunaqa manataqmi sinchi sasachu.” (1 Juan 5:3.)

Yachachisusqaykita kasukuy. Jesusmi rikch’anachiy simipi willaran, qaqa patapi wasinta ruwaq yuyayniyoq runamanta, aqo patapi wasinta ruwaq mana yuyayniyoq runamantapas. Sinchi para, wayra hamuqtinmi qaqa patapi teqsichasqa wasiqa mana thunikuranchu, aqo patapi ruwasqa wasitaq manchayta thunikapuran. Jesuspa nisqan hina, yachachisqankunata uyarispa hunt’aqqa qaqa patapi wasinta ruwaq yuyayniyoq runamanmi rikch’akun. Yachachisqankunata uyarispa mana hunt’aqtaq, aqo patapi wasinta ruwaq mana yuyayniyoq runamanmi rikch’akun. ¿Mayqenmanmi rikch’akuyta munanki? (Mateo 7:24-27.)

Diosman qokuy. Mañakuyniykipi Jehová Diosman willakuy: munayniykita wiñaypaq ruwayta munani, nispa. Diospa munayninta ruwaspan rikuchinchis Jesucristoq yachachisqan kasqanchista (Mateo 11:29).

Bautizakuy. “Bautizachikullayña, huchaykikunamanta pampachayta mañakuy, Señor Jesuspa sutin[pi] waqyakuspa.” (Hechos 22:16.)

Diosta serviy tukuy sonqowan. “Tukuy imatapas runakunapaq ruwaspaykichisqa tukuy sonqowan ruwaychis, Señorpaq hinapuni, ama runakunapaq hinallachu.” (Colosenses 3:23.)