Diospa amigon wiñaypaq kasun

Amigota ruwaypas, paykunawan kuskalla kaypas sasan. Sichus Dioswan amigota ruwasun, paywan kuskallataq kasun chayqa askha saminchaykunata chaskisun. Paypi iñiqkunatan Jesusqa niran: ‘Cheqaq kaymi kacharichisunkichis’, nispa (Juan 8:32). ¿Ima ninantan nisharan?

Kay tiempopi kacharichisqa kanchis. Kacharichisqan kasunman Satanaspa mast’arisqan llullakuykunamanta, pantasqa yachachikuykunamantapas. Chaymantapas manañan Jehová Diosta mana reqsiq runakuna hinañachu kanchis mana suyakuyniyoq (Romanos 8:22). Diospa amigonkunaqa manañan ‘wañuytapas manchakunkuñachu’ (Hebreos 2:14, 15).

Mosoq pachapipas kacharichisqan kasun. ¡Ima sumaqmi kanqa hamuq tiempopi kacharichisqa kaqtinchis! Kay Allpa paraisoman tukuqtinqa manañan guerrakunapas, onqoykunapas, maqanakuykunapas kanqañachu. Manallataqmi wakchayaypas, yarqaypas kanqañachu. Kacharichisqa kasun machuyaymanta, wañuymanta, manchakuymanta, sarunchaymanta, mana chanin kaymantapas. Biblian Diosmanta nin: “Makiykita kicharispan llapa kawsaqkunata munasqankuwan saksaykachinki”, nispa (Salmo 145:16).

Diospa amigonkunaqa wiñaypaq kawsanqaku. Diospa qokuyninqa wiñay kawsaymi, chaytan qonqa amigonkunaman (Romanos 6:23). ¡Ima sumaqmi kanqa wiñaypaq kawsay!

Tiemponchis kanqa imaymanata ruwananchispaq. Yaqapaschá munasunman guitarra tocayta, imapas pintayta otaq carpinteroq llank’anankuna llank’aytapas. Yaqapaschá animalkunamanta, sach’akunamanta, mallkikunamantapas yachayta munasunman. Munasunmanpaschá huk llaqtakuna rikuyta, chaypi tiyaqkuna reqsiytapas. Wiñaypaqtaq kawsasun chayqa, tukuy chaykunata ruwasun.

Tiemponchis kanqa askha amigokunata ruwanapaq. Wiñaypaqtaq kawsasun chayqa, Diospa askha amigonkunata reqsisun. Yachasunmi imakuna ruway atisqankuta, allin kasqankutapas, paykunaq amigontaq kasunpas. Munanakusunmi (1 Corintios 13:8). Manataq wañusunchu chayqa, kay Allpapi lliw tiyaqkunaq amigon kasun. Tiempoq pasasqanman hinataq Jehová Diosman aswan-aswanta k’askakusun. ¡Diospa amigon wiñaypaq kasun!