Autoridadkunan llakisqa kashanku wayna-sipaskuna redes sociales nisqata nishuta utilizasqankumanta

2025 watapin askha nacionkunamanta autoridadkuna rimarqanku wayna-sipaskuna nishuta redes sociales nisqata utilizasqankumanta, paykunan nirqanku askha wayna-sipaskuna nishuta celularpi kasqankurayku llakisqa sayk’usqa kashasqankuta. Chaymi juj nacionpipas leyta orqomurqanku 16 watanpi manaraq kaqkunaqa ama redes sociales nisqata utilizanankupaq, juj gobiernokunapas kaqtan ruwayta munashanku.

Wakin wayna-sipaskunapas reparankun celularllapiña kayqa mana allinchu kasqanta. 2025 watapin Estados Unidos nacionpi askha wayna-sipaskunata tapurqanku internet-ta celularta nishuta utilizay allinchus icha manachus kasqanta, paykunamanta yaqa kuskanmi nirqanku chaykunata utilizayqa mana allinchu kasqanta.

Chaymanta yachaq doctorkunapas nirqankun internet-tapas celulartapas nishuta utilizayqa wayna-sipaskunapaq mana allinchu kasqanta, imaynachus piensasqankutas cambiashan. Chaymanta yachaq Vivek Murthy sutiyoq doctormi nirqan: “Kay tiempopi wayna-sipaskunaqa celularllapiña kasqankuraykun jujniray kapushanku, chaymi makilla kashana imatachus paykuna celularpi ruwashasqankumanta”, nispa.

¿Imaynatan tayta-mamakuna wawankuta redes sociales nisqamanta cuidankuman? Bibliapin kashan yanapaykuna.

Tayta-mamakunapaq yanapaykuna

Bibliamanta wakin textokunata qhawasun:

“Mana yachayniyoqqa tukuy uyarisqantan creen” (Proverbios 14:15).

Internet-tapas celulartapas nishuta utilizayqa manan allinchu wayna-sipaskunapaqqa, chayrayku amapuni jinallataqa saqeychu. Sichus wawayki redes sociales nisqapi kayta munan chayqa ñaupaqta qhawariy imatas qhawanqa, pikunawansi rimanqa, jayk’a tiempos chaypi kanqa chaykunata.

• Astawan yachayta munanki chayqa leey “¿Jaykunanchu waway redes sociales nisqaman?” “Wawaykita yanapay allin yuyaywan redes sociales nisqata usananpaq” nisqa yachachikuykunata.

“Tiempoykichista ama usuchiychischu” (Efesios 5:16).

Sichus wawaykiman celularta qonki chayqa niy jayk’a tiempo qhawananta, imakunatachus mana qhawanantapas. Chaymantapas willay imaraykus chay nisqayki allin chayta. Makilla qhaway imaynachus portakushasqanta, chayman jinataq celularta qonkipas otaq manapas.

• Qhaway kay videota “Allin yuyaywan utilizay “redes sociales” nisqata”, chayqa “Dibujokunawan yachachikuykuna” nisqapin kashan, chaymi wawaykikunata yanapanqa imaraykuchus internet-tapas celulartapas ama nishuta utilizananpaq.

Tayta-mamakuna, ¿imakunatawanmi ruwawaqchis wawaykichista sumaqllata yanapanaykichispaq? Chaypaq leey “Saludpi juj jatun autoridadpa nisqanman jinaqa redes sociales nisqaqa mana allinsi kanman. ¿Imatapas Biblia willashanmanchu chaymanta?” nisqata.

Astawan yachanaykipaq

Bibliapi nisqanman jinaqa “manchakuy sinchi sasa tiempokunapin” tiyashanchis (2 Timoteo 3:1-5). Ichaqa Bibliapin kashan allin yanapaykuna kay tiempopi imatapas allinta ruwananchispaq. Chaymanta astawan yachanaykipaq qhaway “Askha wayna-sipaskunan llaki onqoyman urmashanku. ¿Imatapas Biblia willashanmanchu chaykunamanta?” nisqata. Chaypin kashan tayta-mamakunapaq jinallataq wawakunapaqpas askha yachachikuykuna, kashanmi qelqakunapas videokunapas.