Tukuy imata kamaq Diospi confiasun

1. ¿Ima llakikunapin Job tarikurqan?

ÑAUPA tiempopi Job sutiyoq runamanta rimasun. Payqa imaymana ñak’ariypin tarikurqan, wawankunan wañupurqan, tukuy imantan chinkachirqan, onqopurqan iman; runakunapas paytaqa manañan respetapurankuñachu. Payta kallpachanankupaq jamuq amigonkunapas astawanmi sonqonta k’irirqanku, esposanpas sinchi llakisqa kaspan nirqan: “¡Diosta ñakay jinaspa wañuy!”, nispa (Job 2:9; 15:​4, 5; 19:​1-3). Chaykunaq pasasqanwanqa yaqapaschá Jobqa Jehová Diosta saqepunman karqan, manapaschá serviqninkunata cuidaq Diosta jinañachu qhawarinman karqan.

2, 3. a) ¿Imatan mayninpi piensasunman nishu llakipi tarikuspa? b) ¿Imatan yachasunchis Job libromanta?

² Noqanchispas “manchakuy sinchi sasa tiempokunapin tiyashanchis” (2 Tim. 3:1). Chhayna tiempopitaq tiyashanchis chayqa, yaqapaschá Job jina imaymana llakikuykunapi tarikusunchis. Ima llakipipas tarikuspaqa yaqapaschá mayninqa iskayasunman Jehová Diospa yanapayninmanta, astawanqa chayqa pasawasunman ima llakipas otaq ima sasachakuypas qati-qatilla jamuqtinmi. Chhaynakunapi tarikuspaqa yaqapaschá chaykunata mana aguantay atiqpaq jina qhawarisunman. Chhaynapi tarikuspan wakinqa nirqanku: “Manasuna Jehová Diosqa yanapawanñachu”, nispa.

³ Jayk’aqllapas chhaynapi tarikurqanki chayqa ama llakikuychu. Jobqa tiempowanqa allintan repararqan Jehová Diospa yanapayninta, noqanchistapas Jehová Diosqa yanapawasunpunin, payqa manan jayk’aqpas saqerpariwasunchu. Chayta allinta entiendenapaq estudiasunchis Job librota. Chaypin yachasunchis kay iskay allin yachachikuykunata: 1) Jehová Diosllan tukuy atiyniyoq tukuy munayniyoq Diosqa. 2) Jehová Diosqa imatapas ruwallanmanmi munaynin junt’akunanpaqqa. Chaymantapas payqa imaymanatan ruwan allillan kananchispaq, iñiypi qaqata sayananchispaqpas. Chaykunamantan kaypi allinta yachasunchis.

SATANÁS DIOSPA ÑAUPANMAN JAYKUN

4. ¿Iman pasarqan Jehová Dioswan angelkunapiwan janaq pachapi juñukushaqtinku?

⁴ Juj kutinmi angelkunaqa Jehová Diospa ñaupanpi juñukurqanku. Bibliaq willasqanman jinaqa, “Satanaspas paykunawan kuskan jaykullarqantaq” (Job 1:6). Bibliapiqa chay kutipin primera vezta chay enemigota Satanás nispa nishan, Satanás nisqaqa “contrapi kaq” ninantan nin. Chay kutipaqqa Satanasqa ñan t’aqakapurqanña Jehová Diosmantaqa, paypa enemigonñan kapurqan. Chaymantapas payqa allin angelkunaq Dios sonqo runakunaq enemigon iman kapurqan. ¿Imaraykun chayta ninchis? Satanasqa manan Génesis 3:15 textopi willasqan warmimanta jamuq partemantañachu karqan, chhaynaqa manañan Diospa familianmantañachu karqan.

5. ¿Imatan yachasunman Dioswan angelkunawan juñunakusqankupi imachus pasasqanmanta?

⁵ Jehová Diosqa llapantan qelqachirqan chay juñunakuypi imachus pasarqan chayta. Chaypi imachus pasasqanmantaqa imaymanatan yachasunman. Chay kutipi Satanaspa imachus rimasqanpin reparakun imaynas chay enemigoqa millay mana sonqoyoq llulla chayta (Job 1:9; tupanachiy Apocalipsis 12:10 textowan). ¿Imatan yachallasunmantaq chay kutipi imachus pasasqanmanta? Jehová Dios may jatun atiyniyoqña chaypas, chanillantan imatapas ruwan. Chaymantapas payqa atiyniyoqmi pipas maykamas imatapas ruwanqa chayta ninanpaq. ¡May munaymi chaykunata yachayqa ¿riki?!

DIOSQA ATIYNIYOQMI PITAPAS JARK’ANANPAQ

6. ¿Imaynatan Jehová Dios rikuchirqan paypa makinpi imapas kasqanta? (Job 1:​7, 8).

⁶ (Leey Job 1:​7, 8). Chay kuti juñunakuypiqa Jehová Diosqa sut’itan rikuchirqan imaynas payqa atiyniyoq munayninman jina imapas ruwakunanpaq chayta. Chaypin Jehová Diosqa Satanasta tapurqan: “¿Rikumurqankichu kamachiy Jobta?”, nispa. Diosqa allintan yacharqan imaynas Satanasqa Jobta qhawasharqan chayta, imaynas ñak’ariyman churayta munasharqan chaytapas. Ichaqa, ¿imaynatan Jehová Dios Jobta yanapanman karqan? Chayta qhawarisun.

7. Job 1:​10, 11 textopi nisqanman jina, ¿imatan Satanás nirqan runakunamanta?

⁷ (Leey Job 1:​10, 11). Yachasqanchis jinapas, Diosninchis Jehová Diosqa tukuy atiyniyoq Diosmi. Payqa atiyninwanqa ima munasqantapas ruwallanmanmi (Jer. 32:17; Dan. 4:35). Ichaqa Satanaspa piensasqanman jinaqa, Jehová Diosqa chay atiyninwanqa mana allin kaqtas ruwashanman karqan. Runakunata Jobta jina cuidaspaqa, payta servinankupaqpas pagota qoshanman jinas kanman. Chaymantapas Satanaspa nisqanman jinaqa, runakunaqa Diostaqa interesraykullas servinku, imapas chaskinankuraykullas servinku. ¿Cheqaqchu chay kanman karqan? ¿Imatan Jehová Dios ruwanman karqan chayta uyarispa?

8, 9. ¿Ima ruwanantan Jehová Dios Satanasta prohibirqan, imarayku? (Job 1:12; qhaway kay parrafokunapaq dibujota).

⁸ (Leey Job 1:12). Satanaspa nisqan cheqaqchus icha manachus chayta sut’iman orqonanpaqmi Jehová Diosqa jinallata Satanasta dejarqan Jobta ñak’arichinanta. Ichaqa llapa chaypi kaqkunaq ñaupanpin nirqan: “¡Paytan ichaqa ama imanankipaschu!”, nispa. Rikusqanchis jina Diosqa prohibirqanmi Jobta llamiykunanta. Chhaynaqa, Satanasqa manan Diospa siminmanta mastaqa imatapas ruwananchu karqan, kasunanmi karqan Diospa imachus nisqanta. Kunankamapas chhaynapunin chayqa kashan. Rikusqanchis jina Jehová Diosqa pakaykurqanmi Jobta, manan munarqanchu p’enqaypi rikukunantapas.

⁹ Satanasqa sut’itan rikurqan rimasqanqa yanqa kasqanta. Jobqa imapiña tarikuspapas manapunin t’aqakurqanchu Jehová Diosmantaqa (Job 1:22). Ichaqa Satanasqa manan contentakurqanchu chaywan, Jehová Diosqa allintan yacharqan chaytaqa.

10. ¿Imaraykun Jehová Dios dejallarqan Satanás Jobta ñak’arichinanta? (Job 2:​2-6).

¹⁰ (Leey Job 2:​2-6). Satanasqa astawanraqmi Jobpaq phiñakurqan. Paymanta rimaspan Jehová Diosta nirqan: “Runaqa payllapin piensan, kausayninta salvananraykuqa imatapas ruwallanmanmi”, nispa. Chay rimasqan yanqa kasqanta rikuchinanpaqmi Jehová Diosqa dejallarqan Jobta ñak’arichinanta. Ichaqa nillarqantaqmi: “Aman wañuchinkichu”, nispa. Kay kutipipas Satanasqa manan imatapas Diospa siminmanta mastaqa ruwananchu karqan. Chaypin rikullanchistaq imaynas Jehová Diosqa tukuy atiyniyoq tukuy munayniyoq chayta. Paypa makinpin tukuy imapas kashan, Satanasqa manapunin Diospa siminmanta imatapas mastaqa ruwananchu karqan.

JEHOVÁ DIOS JOB ÑAK’ARISQANTA TUKUCHIN

11. Job 42:​10-13 textopi nisqan jina, ¿imaynatan Jehová Dios bendecirqan Jobta ñak’arisqan qhepaman?

¹¹ (Leey Job 42:​10-13). Jobqa allintan rikuchirqan imaynas payqa Dios sonqopuni karqan chayta. Chayta rikuspan Jehová Diosqa manaña dejarqanchu Satanás sufrichinanta, llapa ñak’ariynintan tukuchipurqan. Jehová Diostaq Jobpa ñak’arisqanta sayachipusharqan chayqa, Satanasqa manañan imatapas ruwayta atirqanñachu. Arí, manañan chay Dios sonqo runataqa ñak’arichiyta atirqanñachu.

12. ¿Imaynatan Jehová Dios yanaparqan kay tiempopi wakin serviqninkunata?

¹² Kay tiempokunapipas Jehová Diospa testigonkunaqa, allintan rikurqanku imaynatas Jehová Dios paykunata ñak’ariykunamanta librarqan chayta. Chaypaq yachasun 1945 watapi imachus pasarqan chayta. Chay watapin 230 Testigokuna nazi nisqa runakunaq makinpi preso kasharqanku. Paykunaqa jatun campokunapin kasharqanku. Chaymantan aparqanku wañuchisqa kanankupaq. Chaykunapi imachus pasasqanmantan paykunaqa khaynata nirqanku: “Llakikuypas ñak’ariypas qhepapiñan kapun. Jehová Diosqa ñaupa tiempopi kinsantin Hebreo waynakunata jinan wañuymanta librawarqanku. Paykunata hornomanña wijch’uykurqanku chaypas, manan q’osñillamanpas asnarqankuchu. Chhaynatan noqaykutapas yanapawarqanku. Chhaynata yanapawasqankuta rikuymi mayta yanapawarqanku”, nispa. Imaynan Jehová Diosqa Danielta leonkunaq t’oqonmanta salvarqan, chhaynatapas Jehová Dios paykunata salvashanman jinan qhawarikurqanku. Paykunan nillarqankutaq: “Noqaykuqa Jehová Diostan wiñaypaq serviyta munashayku. Chaymi noqaykupaqqa kanman imamantapas aswan jatun premioqa”, nispa (tupanachiy Daniel 3:27; 6:22 textokunawan).

13. Ima sasachakuypipas tarikushaspaqa, ¿imatan allinta yuyarinayki? (Qhaway kay parrafopaq fotokunata).

¹³ Noqanchispas yaqapaschá mayninqa tarikusunman Leonkunaq t’oqonmanpas wijch’uykusqa kashasunman jinapi (1 Ped. 5:​8-10). Chhayna llakikunapi tarikuspaqa, yaqapaschá llakikuyninchista qhawarisunman mana tukurikuqta jina. Chhaynapi tarikuspaqa, Jobwan imachus pasarqan chaytan yuyarinanchis. Manataqmi qonqananchischu imaynas Jehová Diosqa llapa llakikuykunata chinkachinanpaq tukuy atiyniyoq chayta. Arí, payqa chinkachinqapunin llakikuyninchistaqa kunanpas jamuq tiempopipas. Payqa ñan churanña tiempota kay millay kausayta tukuchinanpaq.

JEHOVÁ DIOSQA MUNAKUNMI PAY SONQO RUNAKUNATAQA

14, 15. ¿Imatan Jehová Dios ruwanqa tukuy sonqo serviqninkunapaq? (Job 14:15; qhaway tapanpi kaq dibujota).

¹⁴ (Leey Job 14:15). Jehová Diosqa munakunmi payta munakuq runakunataqa. Chhaynata munakusqanraykun paykunamanta wañupuqkunataqa kausarichimpuyta munashan. Paypa gobiernonpiqa wañupuqkunamanta waqaqkunaqa, kausarimpuqkunata rikuspan kusikuymanta waqanqaku (Isa. 65:17).

¹⁵ Job sutiyoq runamanta jujmanta rimallasuntaq. Payqa Satanaspa kamachisqan kay mundollapin kausasharqan. Bibliapi willasqan jina, Jehová Diosqa qhaliyachipurqanmi paytaqa, ñaupaqkunamantapas astawanraqmi bendecirqanpas. Ichaqa chaykunaqa manan imapaschu karqan jamuq tiempopi imachus chaskinanmantaqa. Chaywanpas chaykuna qosqanwanmi Jehová Diosqa rikuchisharqan imaynas payqa munan serviqninkuna kusisqa kausanankuta chayta. Payqa llapa serviqninkunamanmi qonqa ch’uya kausayta wiñay kausayta ima (Apo. 21:​3, 4). Jehová Diosqa munashanmi chaykuna ruwaytaqa. ¡May munaymi chayta yachayqa ¿riki?!

16. ¿Ima razonmi kashallantaq Jehová Diospi confiananchispaq?

¹⁶ Jobqa tiempowanqa wañukapurqanmi. Ichaqa Jehová Diosqa tukuy atiyniyoqtaq tukuy munayniyoqtaq chayqa, kausarichimpunqan Jobtaqa (Deut. 32:39). Manan pipas Jehová Diostaqa jark’ayta atinmanchu pikunatachus munakun paykunata kausarichimpunantaqa (Rom. 8:​38, 39).

TUKUY SONQO CONFIASUN JEHOVÁ DIOSPI

17. ¿Imaraykun Satanás mana chinkachiyta atirqanchu Diospa llaqtanta?

¹⁷ Bibliapi Jobmanta willasqanmi rikuchin imaynas Jehová Diospi tukuy sonqo confiananchis chayta. Jehová Dios pakaykuwasqanchisraykun Satanasqa mana chinkachiyta atiwanchischu, Diospa llaqtantapas manan chinkachiyta atinqachu. Kunanqa 9 millón jinañan pachantinpi tukuy sonqowan Jehová Diosta servishanchis. Diospa llaqtan contraqa imaymanatan ruwarqanku, ichaqa manan atirqankuchu chinkachiyta (Isa. 54:17). Askha gobiernokuna, religionpi umallikuna iman chinkachiyta munawarqanchis. Ichaqa Jehová Dios yanapawasqanchisraykun mana chinkachiyta atiwarqanchischu. Manan pipas jark’ayta atiwasunmanchu Jehová Diosta reqsichinanchistaqa, ni Satanás llulla kasqanta ni runa wañuchiq kasqanta reqsichinanchistapas. Chaymantapas wañupusunña chaypas, Jehová Diosqa kausarichimpuwasunmi (Os. 13:14).

18. Imaña jamuq tiempoman pasanqa chaypas, ¿imaraykun mana manchakunanchischu?

¹⁸ Jobmanta willakuypi allinta piensarisun chayqa, tukuy sonqon confiasun Jehová Diospi. Payqa imaña kaqtinpas noqanchiswanpunin kashanqa. Chhaynaqa manan imatapas manchakunanchischu. Yachasqanchis jina, manchay ñak’ariy chayamuqtinqa, Satanaspas payta apoyaq ejercitokunapas Diospa llaqtantaqa mana piniyoqta jinan qhawarinqaku. Jinaspa payman phawaykunqaku. Ichaqa imaynan Jobtapas yanaparqan, chhaynatan Jehová Diosqa llaqtantapas yanapanqa, manan munanqachu Satanás nishuta ñak’arichinantaqa. Ñan chayamushanña Jehová Dios ñak’ariykunata chinkachinan tiempoqa. Chay tiempopin Jesusqa Satanasta supayninkunatawan waranqa watapaq wisq’apunqa (Luc. 8:31; Apo. 20:​1-3). Tiempowanqa Satanaspas payta apoyaq runakunapas, castigasqan kanqaku (Apo. 20:10). Jehová Diospa willachisqanman jinan Satanasqa umanpi sarusqa kapunqa, wiñaypaqmi chinkachisqa kapunqa (Gén. 3:15; Rom. 16:20).

19. ¿Imatan chaskikunqaku Jehová Diospi tukuy sonqo confiaqkuna? (Qhaway kay parrafopaq dibujota).

¹⁹ ¡Maytan munashanchis chay mosoq pacha chayamunanta ¿riki?! Chaypiqa llapanchispas kusisqan kausasunchis. Arí, mana jayk’aq kausasqanchista jinan chaypiqa may kusisqa kausasunchis. Jehová Dios kikinmi nin: “¡Qhawariy!, tukuy imatan mosoqta ruwashani”, nispa (Apo. 21:5). Ichaqa, ¿imaninantaq chayri? Chay mosoq pachapiqa manañan kanqañachu Satanaspas ni supayninkunapas. Manañan imapas juchaman, ni mana allin ruwaymanpas aysawasunchischu. ¡Chayqa ancha kusikunapaqmi ¿riki?! Arí, chay kausaypiqa manañan imamantapas llakikusunñachu. Armagedón guerrata kausashaqlla pasaqkunapas jatun milagrokunatan rikunqaku. Chaypin munakusqanchis runakunapas kausarimpunqaku. Chay tiempopiqa, imayna kausananchistachus Diosninchis munarqan, chhaynatan kausasun.

20. ¿Imata ruwananchispaqmi llapanchispas kallpachakunanchis?

²⁰ Ima llakikunapiña kay tiempopi tarikusun chaypas, manan manchakunanchischu. Aswanpas tukuy sonqon Jehová Diospi confiananchis, payllatan apoyananchis. Chaymantapas tukuy ima ruwasqanchispin rikuchinanchis Jehová Dios munakusqanchista. Chhaynapin rikuchisunchis Satanás llulla kasqanta. Noqanchistaqa may munay kausaymi suyawashanchis. Yachasqanchis jinapas, Jehová Diosqa serviqninkunamanmi imaymana bendicionta qoyta munashan.