Abdías: Jehová Diosta manchakuq runa

Abdiasqa rey Ajabpa wasinmantan encargakuq. Ajabqa millay reymi karan, payqa jinallatan qhawarqan runakuna Baal diosta adorasqankuta. Abdiasmi ichaqa mana chhaynachu karan, payqa juch’uychanmantapachan Jehová Diosta manchakuq (1 Rey. 18:​1-13). Juj kutinmi reyna Jezabel kamachirqan Jehová Diospa llapa profetankunata wañuchinankupaq. ¿Imatan Abdías ruwanman karqan chayta yacharuspa? Payqa pachaj profetakunatan juj qaqa t’oqopi pakarqan. Chaymantapas sinchi yarqayña chay ladopi kasharqan chaypas, imaymanatan ruwarqan chay profetakunaman mijunata apananpaq. Chay ruwayqa sasapunichá karan Abdiaspaqqa (1 Rey. 18:19).

¿Imatan yachasunman Abdiasmanta? Abdiasqa Jehová Diostan mastaqa manchakurqan, tukuy sonqotaqmi munakuqpas. Chaymi wañuytapas mana manchakuspa wayqenkunata yanaparqan. Noqanchispas pay jinan kananchis. Sichus tiyasqanchis llaqtapi jark’awasunman Diosmanta willananchista chayqa, Jehová Diostan kasukunanchis. Mana manchakuspan hermanonchiskunatapas yanaparinanchis.